බාර්ණබස් “සැනසිල්ලේ පුත්‍රයා”

අන්තිම වතාවට මිතුරෙක් ඔබව සනසනු ලැබුවේ කවදාද? ඔබ වෙනත් කෙනෙකුට එය ලබා දුන් අන්තිම වතාව ඔබට මතකද? කලින් කලට අපි සියලුදෙනාටම දිරිගැන්වීම අවශ්‍ය වන අතර, එය ප්‍රේමනීය ලෙස සපයන අයව අපි මොනතරම් අගය කොට සලකනවාද! සැනසීම යන්නෙන් ඇඟවෙන්නේ සවන් දීමට, තේරුම්ගැනීමට හා උපකාර කිරීමට කාලය ගැනීමයි. එසේ කිරීමට ඔබ සූදානම්ද?

ආදර්ශයකට ගත හැකි වන ආකාරයකින් එසේ කිරීමට කැමැත්තක් විදහාපෙන්වූ පුද්ගලයෙක් බාර්ණබස්; ඔහු “යහපත්වූ ශුද්ධාත්මයෙන්ද ඇදහිල්ලෙන්ද පූර්ණවූ මනුෂ්‍යයෙක්ය.” (ක්‍රියා 11:24) බාර්ණබස් ගැන එවැනි දෙයක් පවසන්න පුළුවන් ඇයි? එම විස්තරය ලබන්න වටින තැනැත්තෙකු වීම සඳහා ඔහු කළ දේවල් මොනවාද?

ත්‍යාගශීලී උපකාරකයෙක්

ඔහුගේ නියම නම යෝසෙප් වුණත්, ප්‍රේරිතයන් විසින් ඔහුගේ චරිතයට ඉතාමත් යෝග්‍ය සවිස්තරාත්මක පරම්පරා නාමයක් වන බාර්ණබස් යන නම තැබුවා; එහි අර්ථය “සැනසිල්ලේ පුත්‍රයා” යන්නයි.a (ක්‍රියා 4:36, NW) ක්‍රිස්තියානි සභාව පිහිටුවා වැඩි කලක් ගත වී ගොස් තිබුණේ නැහැ. බාර්ණබස් කලින් යේසුගේ ගෝලයන්ගෙන් කෙනෙක්ව සිටියා කියා සමහරු සිතනවා. (ලූක් 10:1, 2) එය එසේ වුවත් නැතත්, මේ මිනිසා තමා ගැන හොඳ වාර්තාවක් තබා තිබුණා.

පොදු යුගයේ 33 පෙන්තකොස්ත දවසින් ටික කලකට පසු, කුප්‍රසයේ ලෙවීයෙක් වූ බාර්ණබස් සිය කැමැත්තෙන්ම ඉඩමක් විකුණා එහි මුදල් ප්‍රේරිතයන්ට දුන්නා. ඔහු එසේ කළේ ඇයි? ඒ කාලයේ යෙරුසලමෙහි සිටි ක්‍රිස්තියානීන් අතර “එකිනෙකාගේ වුවමනාවේ හැටියට [බෙදා දීමක් සිදු වූ]” බව ක්‍රියා පොතේ සඳහන් වාර්තාව අපට පවසනවා. පෙනෙන විදිහට බාර්ණබස් වුවමනාවක් තිබූ බව දැක ඒ ගැන ත්‍යාගශීලී ලෙස යමක් කරන්න ඇති. (ක්‍රියා 4:34-37) ඔහු යමක් කමක් තිබුණු කෙනෙක් විය හැකි වුණත්, රාජ්‍ය කටයුතුවල අභිවෘද්ධිය සඳහා තමාගේ ද්‍රව්‍යමය සම්පත් මෙන්ම තමාවත් ඉදිරිපත් කිරීමට ඔහු පසුබට වුණේ නැහැ.b “දිරිගැන්වීම අවශ්‍ය කරන අය හෝ තත්වයන් දුටු ඕනෑම අවස්ථාවක ඔහු තමාට කළ හැකිව තිබූ සෑම දිරිගැන්වීමක්ම ලබා දුන්නා” කියා විශාරද එෆ්. එෆ්. බෲස් අදහස් දක්වනවා. ඔහු පෙනී සිටින දෙවන කතාංගයෙන් මෙය පැහැදිලි වෙනවා.

පොදු යුගයේ 36දී පමණ, මේ වන විට ක්‍රිස්තියානියෙක් බවට පත් වී සිටින තාර්සස්හි සාවුල් (පසුව ප්‍රේරිත පාවුල්) යෙරුසලමේ සභාවට සම්බන්ධ වීමට උත්සාහ කරමින් සිටියා; “නුමුත් ඔහු ගෝලයෙකු බව විශ්වාස නොකොට ඔවුන් සියල්ලෝ ඔහු ගැන භයවූහ.” තමාගේ හැරීම අව්‍යාජ ලෙස සිදු කර තිබෙන බවත් එය තවදුරටත් සභාව නාස්ති කර දැමීම සඳහා යොදාගන්න කූට උපක්‍රමයක් නොවන බවත් සභාවට ඒත්තුගන්වන්න ඔහු යන්නේ කොහොමද? “බාර්ණබස් ඔහු ගෙන ප්‍රේරිතයන් ළඟට කැඳවාගෙන [ගියේය].”—ක්‍රියා 9:26, 27; ගලාති 1:13, 18, 19.

බාර්ණබස් සාවුල් කෙරෙහි විශ්වාසය තැබීමට හේතුව සඳහන් කර නැහැ. ඕනෑම අවස්ථාවක, “සැනසිල්ලේ පුත්‍රයා” සාවුල්ට සවන් දීමෙන් හා පෙනෙන විදිහට බලාපොරොත්තු කඩ වී අසීරු තත්වයකට පත් වී සිටින ඔහුට උපකාර කිරීමෙන් බාර්ණබස් ඔහුගේ පරම්පරා නාමයට එකඟව ජීවත් වුණා. පසුව සාවුල් තමාගේ ගම් පළාත වන තාර්සස්වලට ආපසු ගියත්, මේ පුරුෂයන් දෙදෙනා අතර මිත්‍රත්වයක් ගොඩනැඟී තිබුණා. ඉදිරි වර්ෂවලදී, එම මිත්‍රත්වය මගින් වැදගත් ප්‍රතිඵල ඇතිවීමට තිබුණා.—ක්‍රියා 9:30.

අන්තියෝකියේදී

පොදු යුගයේ 45දී පමණ, සිරියේ අන්තියෝකියේ අසාමාන්‍ය වර්ධනයන් සිදු වන බවට වූ ආරංචිය යෙරුසලමට ළඟා වුණා; ඒ නගරයේ ග්‍රීක් භාෂාව කතා කරන වැසියන් බොහෝදෙනෙක් ඇදහිලිවන්තයන් බවට පත් වෙමින් සිටියා. එහි සිදු වන වැඩකටයුතු සෝදිසි කර බලා එය සංවිධානය කිරීම සඳහා සභාව බාර්ණබස්ව පිටත් කර හැරියා. මීට වඩා නැණවත් තේරීමක් කරන්න ඔවුන්ට නොහැකි වුණා. ලූක් මෙසේ සඳහන් කරනවා: “ඔහු ඇවිත් [දෙවිගේ] අනුග්‍රහය දැක, සන්තෝෂවී, [ස්වාමීන්] කෙරෙහි ස්ථිර සිතින් ඇලුම්ව සිටින්ට ඔවුන් [සියල්ලන්ව දිරිගැන්වූයේය, NW]. මක්නිසාද ඔහු යහපත්වූ ශුද්ධාත්මයෙන්ද ඇදහිල්ලෙන්ද පූර්ණවූ මනුෂ්‍යයෙක්ය. මහත් සමූහයක්ද [ස්වාමීන්ට] එක්කරනලද්දෝය.”—ක්‍රියා 11:22-24.

ඒ ඔහු කළ සියල්ල නොවෙයි. විශාරද ජූසෙප්පෙ රීචොටි පවසන පරිදි, “බාර්ණබස් කඩිසර පුද්ගලයෙක් වූ අතර, බහුල අස්වැන්නක් සමඟින් සාර්ථකත්වයක් සහතික කරගැනීම සඳහා යම් වැඩක් කෙරෙහි සම්පූර්ණ අවධානය යොමු කිරීමේ අවශ්‍යතාව ඔහු විගස තේරුම්ගත්තා. මේ නිසා මූලික අවශ්‍යතාව වුණේ අස්වැන්න නෙළන්නන්.” කුප්‍රසයේ වැසියෙක් නිසා ඇතැම්විට අන්‍යජාතීන් සමඟ කටයුතු කිරීම සම්බන්ධයෙන් බාර්ණබස්ට පළපුරුද්දක් තිබෙන්න ඇති. මිථ්‍යාදෘෂ්ටිකයන්ට දේශනා කිරීම සඳහා විශේෂ සුදුසුකමක් තිබෙන බවට ඔහුට හැඟුණා විය හැකියි. නමුත් මේ හැඟීම් දනවන මෙන්ම දිරිගන්වනසුලු ක්‍රියාකාරකම්වලට අනිත් අයවත් සම්බන්ධ කරගැනීමට ඔහු සූදානම්ව සිටියා.

බාර්ණබස් සාවුල් ගැන කල්පනා කළා. සාවුල්ගේ හැරීම සිදු වූ අවස්ථාවේදී, කලින් පීඩා කරන්නෙක්ව සිටි ඔහු ‘අන්‍යජාතීන්ට යේසුගේ නාමය ගැන සාක්ෂිදරන්න තෝරාගත් භාජනයක්’ වීම සම්බන්ධයෙන් අනනියස් ලැබූ අනාවැකිමය එළිදරව් කිරීම ගැන බාර්ණබස් දැනගෙන සිටීමට බොහෝදුරට ඉඩ කඩ තිබෙනවා. (ක්‍රියා 9:15) එනිසා බාර්ණබස් සාවුල්ව සොයාගැනීම සඳහා තාර්සස්වලට යන්න පිටත් වුණා; එහි යෑම පමණක් කිලෝමීටර් 200ක පමණ දුරකින් යුත් ගමනක් වුණා. මොවුන් දෙදෙනා සම්පූර්ණ අවුරුද්දක් හවුල්කරුවන් හැටියට එකට වැඩ කළ අතර, මේ කාලපරිච්ඡේදයේදී “ගෝලයෝ ක්‍රිස්තියානිකාරයෝයයි පළමුකොට කියනු ලැබුවේ අන්තියෝකියේදීය.”—ක්‍රියා 11:25, 26.

ක්ලෞදියස්ගේ පාලන සමයේදී, රෝම අධිරාජ්‍යයේ විවිධ පළාත්වල දරුණු සාගතයක් ඇති වුණා. යුදෙව් ඉතිහාසඥ ජොසීෆස් පවසන පරිදි, යෙරුසලමෙහි “ආහාර සපයාගැනීමට අවශ්‍ය කරන දේවල් හිඟවීමෙන් බොහෝදෙනෙක් මියගියා.” මේ අනුව, අන්තියෝකියේ සිටි ගෝලයන් “එකිනෙකා තම තමාගේ පුළුවන්කමේ හැටියට යුදයෙහි විසූ සහෝදරයන්ට ආධාරෝපකාර යවන්ට නියමකරගත්තෝය. ඔව්හු එසේ කරමින්, බාර්ණබස් සහ සාවුල් අත වැඩිමහල්ලන්ට ඒවා හැරියෝය.” භාර දුන් එම වැඩය සම්පූර්ණ කිරීමෙන් පසුව, මොවුන් දෙදෙනා මාර්ක් නම් ලත් යොහන් සමඟ ආපසු අන්තියෝකියට පැමිණියා; එහිදී එම සභාවේ සිටි අනාගතවක්තෘවරුන් හා ගුරුවරුන් අතර ඔවුන්වද ගණන්ගනු ලැබුවා.—ක්‍රියා 11:29, 30; 12:25; 13:1.

විශේෂ මිෂනාරි පැවරුමක්

පසු කලක විශේෂ දෙයක් සිදු වුණා. ‘ඔවුන් යෙහෝවාට මෙහෙකරමින් නිරාහාරයෙන් උන් කල, ශුද්ධාත්මය කතාකොට: මා විසින් බාර්ණබස්ද සාවුල්ද කැඳවූ වැඩය පිණිස ඔවුන් මට වෙන් කරන්නැයි කීවේය.’ නිකමට සිතා බලන්න! මොවුන් දෙදෙනාට විශේෂ පැවරුමක් ලබා දෙන්න කියා යෙහෝවාගේ ආත්මය අණ කළා. “මෙසේ ඔව්හු [ශුද්ධාත්මය] විසින් යවනලදුව සිලුකියට බැසගොස්, එහිදී නැව් නැගී කුප්‍රසට ගියෝය.” බාර්ණබස්ව ප්‍රේරිතයෙක් නැතහොත් යවන ලද කෙනෙක් හැටියට යෝග්‍ය ලෙස හැඳින්විය හැකියි.—ක්‍රියා 13:2, 4; 14:14.

කුප්‍රසය හරහා ගමන් කරමින් එම දිවයිනේ රෝම පළාත් ආණ්ඩුකාර සර්ගියස් පාවුලස්ගේ හැරීමෙන් පසුව, ඔවුන් කුඩා ආසියාවේ දකුණු වෙරළබඩ ප්‍රදේශයේ පිහිටි පර්ගායට ගමන් කළා; එහිදී මාර්ක් නම් ලත් යොහන් ඔවුන්ගෙන් අහක් වී නැවත යෙරුසලමට ගමන් කළා. (ක්‍රියා 13:13) ඒ කාලය වන තෙක් බාර්ණබස් ප්‍රධාන වැඩකොටසක් කළ බව, ඇතැම්විට වඩාත් අද්දැකීම් ලත් සහකරුවෙක් හැටියට කටයුතු කළ බව පෙනෙනවා. මෙතැන් සිට මූලිකත්වය ගන්නේ (දැන් පාවුල් යනුවෙන් යොමු දක්වන) සාවුල්. (ක්‍රියා 13:7, 13, 16; 15:2 සසඳන්න.) මේ වර්ධනය නිසා බාර්ණබස් සිත් වේදනාවට පත් වුණාද? නැහැ, තමාගේ සහකරුවාවත් යෙහෝවා බලවත් ආකාරයකින් යොදාගනිමින් සිටින බව නිහතමානිව තේරුම්ගත් ඔහු මේරූ ක්‍රිස්තියානියෙක්. ඔවුන්ව යොදාගනිමින් යෙහෝවාට වුවමනා වුණේ අනිත් ප්‍රදේශවල සිටින්නන්ටත් ශුභාරංචිය ඇසීමට සැලැස්වීමටයි.

ඇත්තෙන්ම, පිසිදියේ අන්තියෝකියෙන් මොවුන් දෙදෙනාව පලවාහරින්න කලින්, ඒ මුළු ප්‍රදේශයේම සිටි අය පාවුල් හා බාර්ණබස් මාර්ගයෙන් දෙවිගේ වචනයට සවන් දුන් අතර බොහෝදෙනෙක් පණිවිඩය පිළිගත්තා. (ක්‍රියා 13:43, 48-52) ඉකෝනියේදී ‘යුදෙව්වරුන්ගෙන්ද ග්‍රීක්වරුන්ගෙන්ද මහත් සමූහයක් අදහන්නන් බවට පත් වුණා.’ ‘ඔවුන්ගේ අත්වලින් හාස්කම්ද පුදුමද කරන්න ඔවුන්ට බලය දුන් යෙහෝවාගේ බලයෙන් නිර්භීත ලෙස කතා කරමින්’ එහි බොහෝ කාලයක් නැවතී සිටීමට මෙය පාවුල් සහ බාර්ණබස්ට මඟ පෑදුවා. ඔවුන්ට ගල් ගසන්න කුමන්ත්‍රණයක් ඇති කරමින් තිබූ බව දැනගැනීමෙන් මොවුන් දෙදෙනා නැණවත් ලෙස පලාගොස් ලුකෝනිය, ලුස්ත්‍රාව හා දර්බය යන ප්‍රදේශවල තමන්ගේ වැඩය දිගටම කරගෙන ගියා. ලුස්ත්‍රාවෙහි ජීවිතයට තර්ජනයක් එල්ල කරන අද්දැකීම්වලට මුහුණ දුන්නත්, බාර්ණබස් හා පාවුල් යන දෙදෙනාම දිගටම “අප විසින් [දෙවිගේ] රාජ්‍යයට බොහෝ දුක් විඳිමින් ඇතුල්වෙන්ට ඕනෑයයි කියා ගෝලයන්ගේ සිත් සවිකොට, ඇදහිල්ලේ පවතින්ට [ඔවුන්ව දිරිගැන්වුවෝය, NW].”—ක්‍රියා 14:1-7, 19-22.

මේ ක්‍රියාශීලී දේශනාකරුවන් දෙදෙනා බියට පත්වීමට තමන්ට ඉඩහරිමින් සිටියේ නැහැ. ඊට පටහැනිව, ඇතැම්විට අලුත් සභාවල පෙරමුණ ගැනීමට සුදුසුකම් ලත් පුරුෂයන්ට උපකාර කරමින් ඔවුන් ඒ වන විටත් දරුණු විරුද්ධවාදිකම්වලට මුහුණ පා තිබූ ප්‍රදේශවල සිටි නවක ක්‍රිස්තියානීන්ව ගොඩනැංවීම සඳහා ආපසු ඒ ප්‍රදේශවලට පැමිණියා.

චර්මච්ඡේදනය පිළිබඳ ගැටලුව

පොදු යුගයේ 33 පෙන්තකොස්ත දිනයේ සිට අවුරුදු 16ක් පමණ ගතවීමෙන් පසු, චර්මච්ඡේදනය පිළිබඳ ගැටලුව හා සම්බන්ධ ඉතිහාසගත සිද්ධියකට බාර්ණබස් සම්බන්ධ වුණා. “යුදයෙන් සමහර දෙනෙක් [සිරියාවේ අන්තියෝකියට] ඇවිත්: මෝසෙස්ගේ නියෝගය ලෙස නුඹලා චර්මඡේද්‍යකරනු නොලැබුවොත් නුඹලාට ගැළවෙන්ට නුපුළුවනැයි සහෝදරයන්ට ඉගැන්නුවෝය.” මෙය මෙසේ විය යුතු නැති බව බාර්ණබස් සහ පාවුල් අද්දැකීමෙන් දැන සිටි අතර ඔවුන් ඒ කාරණය ගැන වාද කළා. තමන්ගේම බලතල තහවුරු කිරීමට උත්සාහ කරනවා වෙනුවට, මෙය මුළු සහෝදර සංගමයේම යහපත සඳහා සමථයකට පත් කළ යුතුව තිබූ බව ඔවුන් තේරුම්ගත්තා. එනිසා ඔවුන් යෙරුසලමෙහි පිහිටි පාලක මණ්ඩලයට මේ ප්‍රශ්නය යොමු කළා; එහිදී ගැටලුව සමථයකට පත් කිරීම සඳහා ඔවුන්ගේ වාර්තා උපකාරවත් වුණා. ඉන්පසුව, ‘ස්වාමි වූ යේසුස් ක්‍රිස්තුස්ගේ නාමය නිසා තමුන්ගේ ජීවිත උපද්‍රවයට පැමිණෙවූ ප්‍රේමනීය අය’ හැටියට විස්තර කළ පාවුල් හා බාර්ණබස් අන්තියෝකියේ සහෝදරයන්ට අදාළ තීරණය දැනුම් දීම සඳහා පැවරුම් ලබා සිටි අය අතර සිටියා. පාලක මණ්ඩලයෙන් ලැබුණු ලියුම කියවා අනුශාසනා ඉදිරිපත් කළාට පසු සභාව ‘ඒ [දිරිගැන්වීම, NW] ගැන ප්‍රීති වී’ ‘ශක්තිමත් [NW]’ වුණා.—ක්‍රියා 15:1, 2, 4, 25-32.

“හදිසි කෝපය පිටවීමක්”

අපිට නම් කවදාවත් බාර්ණබස්ගේ ආදර්ශය අනුකරණය කරන්න හැකියාවක් නැහැ කියා ඔහු ගැන යහපත් වාර්තා බොහොමයකට පසු අපිට හැඟෙන්න පුළුවන්. ඒත්, මේ “සැනසිල්ලේ පුත්‍රයා” අපි වගේම අසම්පූර්ණ පුද්ගලයෙක්. ඔහු සහ පාවුල් සභාවන් බැහැදැකීම සඳහා දෙවන මිෂනාරි ගමනක් පිළියෙළ කරමින් සිටියදී, එකඟ නොවීමක් හටගත්තා. තමාගේ ඥාතියෙකු වන මාර්ක් නම් ලත් යොහන්ව තමන් හා කැටුව යන්න බාර්ණබස් තීරණය කළත්, මාර්ක් නම් ලත් යොහන් පළමු මිෂනාරි ගමනේදී තමුන්ගෙන් වෙන් වී ගොස් තිබූ නිසා ඔහුව රැගෙන යෑම සුදුසු නැහැ කියා පාවුල් සිතුවා. එහිදී “[හදිසි කෝපය පිටවීමක්, NW] හටගත් බැවින් ඔව්හු එකිනෙකාගෙන් වෙන්ව ගියෝය. බාර්ණබස් මාර්ක් කැඳවාගෙන, කුප්‍රසට නැවෙන් ගියේය; නුමුත් පාවුල් සීලස් තෝරාගෙන” වෙනත් දිශාවකට ගමන් කළා.—ක්‍රියා 15:36-40.

මොනතරම් කනගාටුදායක සිදුවීමක්ද! කෙසේවෙතත් ඒ සිද්ධියෙන් අපට බාර්ණබස්ගේ පෞද්ගලිකත්වය ගැන යමක් පවසනවා. “ඇති විය හැකි අවදානමක් භාරගැනීමට සූදානම්ව බාර්ණබස් දෙවන වතාවටත් මාර්ක් කෙරෙහි විශ්වාසය තැබීමේ නොමැකෙන ගෞරවය බාර්ණබස්ට හිමි විය යුතුයි” කියා එක් විශාරදයෙක් පවසනවා. ඒ ලේඛකයා අදහස් දක්වන පරිදි, “ඔහුගේ ආත්ම විශ්වාසය යළි පිහිටුවා, නැවතත් වගකීමෙන් යුතුව කටයුතු කිරීම සඳහා පුබුදුවාලීමක් හැටියට, බාර්ණබස් ඔහු කෙරෙහි තැබූ විශ්වාසය උපකාර වුණා” විය හැකියි. දේවල් වර්ධනය වීමත් සමඟ ඒ විශ්වාසය සම්පූර්ණයෙන්ම තහවුරු කරනු ලැබුවා; මන්ද ක්‍රිස්තියානි සේවයෙහි මාර්ක් ප්‍රයෝජනවත් පුද්ගලයෙක් බව පාවුල් පවා පිළිගත්තා.—2 තිමෝති 4:11; සසඳන්න කොලොස්සි 4:10.

කලකිරීමට පත් වී සිටින අයට සවන් දීමට, තේරුම්ගැනීමට හා දිරිගැන්වීමට කාලය ගැනීමටත් අවශ්‍යතා දකින ඕනෑම අවස්ථාවක ප්‍රායෝගික උපකාරය සැපයීමටත් බාර්ණබස්ගේ ආදර්ශය අපව පෙලඹවිය හැකියි. තමාගේ සහෝදරයන්ට යටහත් පහත්ව හා ධෛර්යයෙන් යුක්තව උපකාර කිරීමට ඔහු තුළ තිබූ කැමැත්ත හා එයින් ඇති වූ විශිෂ්ට ප්‍රතිඵල පිළිබඳ වාර්තාවම දිරිගැන්වීමක් වෙනවා. බාර්ණබස් හා සමාන අය අදදින අපේ සභාවල සිටීම මොනතරම් ආශීර්වාදයක්ද!

[පාදසටහන්වල]

[23වන පිටුවේ පින්තූරය]

බාර්ණබස් “යහපත්වූ ශුද්ධාත්මයෙන්ද ඇදහිල්ලෙන්ද පූර්ණවූ මනුෂ්‍යයෙක්”