නීතිය හා සම්බන්ධ වාර්තා

යෙහෝවා දෙවිගේ සාක්ෂිකරුවන්ට ඔවුන්ගේ ආගමික කටයුතු කරගෙන යන්න නීත්‍යනුකූලව ලියාපදිංචි වීම අත්‍යවශ්‍ය දෙයක් නෙමෙයි. ඒත් රැස්වීම් තියන ස්ථාන මිල දී ගන්න හෝ බද්දට ගන්නත් පොත් පත් ගෙන්වාගන්නත් නීත්‍යනුකූලව ලියාපදිංචි වෙන එක පහසුවක්.

• 2004දී රුසියානු අධිකරණකින් මොස්කව්වල යෙහෝවා දෙවිගේ සාක්ෂිකරුවන්ගේ නීත්‍යනුකූල පිළිගැනීම අහෝසි කළා. ඒත් එක්කම එහෙ ඉන්න සාක්ෂිකරුවන්ට තව තවත් පීඩා එල්ල වුණා. පොලීසිය සාක්ෂිකරුවන්ව අපරාධකරුවන් විදිහට සලකලා ඔවුන්ට වධ හිංසා කළා. සේවයේ යද්දී මිනිස්සු ඔවුන්ට පහර දුන්නා. ඒ විතරක් නෙමෙයි සාක්ෂිකරුවන්ට රැස්වීම් පවත්වන්න ශාලා කුලියට දීලා තිබුණ අයිතිකරුවන් තවදුරටත් ඒවා දෙන්න කැමති වුණේ නැහැ. ඒ නිසා ගොඩක් සභාවලට රැස්වීම් තියන්න තැනක් නැති වුණා. සාක්ෂිකරුවන් මේ සම්බන්ධයෙන් පැමිණිලි කළ අවස්ථාවේදී රුසියාව සාක්ෂිකරුවන්ගේ මානව හිමිකම් උල්ලංගනය කරලා තියෙනවා කියා කියමින් මානව හිමිකම් පිළිබඳ යුරෝපීය අධිකරණය 2010දී සාක්ෂිකරුවන්ට පක්ෂව තීන්දුවක් දුන්නා. ඒ වගේම නීත්‍යනුකූල අයිතිය නැවත ලබා දෙන්න කියලත් නියෝග කළා. 2015 මැයි 27වෙනිදා මොස්කව්වල සාක්ෂිකරුවන්ව නැවතත් ලියාපදිංචි කළා කියලා අපි සතුටින් දන්වන්න ආසයි.

ගොඩක් ආගම් සහ ස්වේච්ඡා සංවිධාන වගේ යෙහෝවා දෙවිගේ සාක්ෂිකරුවන්ගේ නීතික සමිති හෝ සමාගමුත් බොහෝ දුරට බදුවලින් නිදහස්. ඒත් සමහර රජයන් ඒක පිළිගන්නේ නැහැ.

• ස්වීඩනයේ ශාඛා කාර්යාලය විශේෂ පූර්ණකාලීන සේවකයන්ගෙන් හැදුණ ආගමික සංවිධානයක් නෙවෙයි, ඒක රැකියා කරන සේවකයන් ඉන්න ව්‍යාපාරික ස්ථානයක් කියලා රජයේ නිලධාරීන් කියා සිටියා. ඒ නිසා ශාඛා කාර්යාලය සහ ඒකෙ සේවය කරන අය රජයට ලොකු බද්දක් ගෙවන්න ඕනේ කියලා නියම කළා. මේ ප්‍රශ්නෙට විසඳුමක් ලබාගන්න ප්‍රාදේශීය උසාවිවල නඩු පවරපු ස්වීඩනයේ සාක්ෂිකරුවන් මානව හිමිකම් පිළිබඳ යුරෝපීය අධිකරණයටත් පැමිණිලි 6ක් ඉදිරිපත් කළා.

‘ජාතීහු තමුන්ගේ කඩුවලින් නගුල් සාදාගන්නෝය. ඔවුහු තවදුරටත් යුද්ධයට පුහුණු වන්නේ නැත’ කියලා බයිබලයේ සඳහන් වෙන දෙයට යෙහෝවා දෙවිගේ සාක්ෂිකරුවන් හදවතින්ම කීකරු වෙනවා. (යෙසා. 2:4) ඒ නිසා හමුදා සේවය වෙනුවට වෙනත් පොදු සේවයක් කරන්න සමහර ආණ්ඩු ඉඩ නොදුන්නත් සාක්ෂිකරුවන් එයාලගේ ස්ථාවරය වෙනස් කරන්නේ නැහැ.

• පුද්ගලයෙක්ට තමන්ගේ හෘදය සාක්ෂියට අනුව හමුදා සේවය ප්‍රතික්ෂේප කරන්න තියෙන අයිතිය දකුණු කොරියාවේ නීතියෙන් පිළිගන්නේ නැහැ. මේ නිසා ගත වුණු අවුරුදු 60 පුරා අපේ සහෝදරයන් 18,000කට වඩා වැඩිදෙනෙක්ට සිර දඬුවම් විඳින්න සිද්ධ වුණා. එහෙම බලද්දී මේ රටේ ඉන්න සාක්ෂිකරුවන් හැමෝගෙම වගේ නෑයෙක් නැත්නම් යාළුවෙක් හිරේ ගිහින් තියෙනවා. 2004 සහ 2011 අවුරුදුවලදී උසාවියෙන් කිව්වේ සාක්ෂිකරුවන්ව ඒ විදිහට හිරේ දාන එක රටේ නීතියට පටහැනි නැහැ කියලයි. ඒත් 2015 ජූලි මාසයේදී අධිකරණය නැවතත් මේ ගැන විභාග කරන්න පටන්ගත්තා. ලෝකෙ පුරාම ඉන්න යෙහෝවා දෙවිගේ සාක්ෂිකරුවන් යාච්ඤා කරන්නේ දකුණු කොරියාවේ ඉන්න සහෝදරයන් පීඩා විඳින මේ ප්‍රශ්නයට සාධාරණ විසඳුමක් ලැබෙන්න කියලයි. එතකොට තමන්ගේ විශ්වාසය නිසා මේ රටේ සහෝදරයන්ට හිරේ යන්න සිද්ධ වෙන එකක් නැහැ.

• හෘදය සාක්ෂියට අනුව හමුදා සේවය ප්‍රතික්ෂේප කරපු නිසා එරිත්‍රියාවේ සිරගත කරලා ඉන්න පාවුලොස් ඉයාසු, ඊසක් මොගොස් සහ නෙගඩෙ ටෙක්ලමරියම් කියන සහෝදරයන් තුන්දෙනා දැනට අවුරුදු 22ක් සිර දඬුවම් විඳිනවා. තවමත් එයාලට විරුද්ධව විධිමත් නඩු විභාගයක් පවත්වලාවත් උසාවියට ගිහින් එයාලගේ නිර්දෝෂීබව ඔප්පු කරන්න අවස්ථාවක් ලැබිලවත් නැහැ. මේ වෙද්දී ඔවුන් සමඟ තවත් 50කට වඩා වැඩි සහෝදර සහෝදරියන් පිරිසක් හිරේ ඉන්නවා. කොච්චර වධ හිංසා විඳින්න වුණත් කටුක තත්වයන්ට මුහුණ දෙන්න වුණත් එයාලගේ විශ්වාසය නම් පොඩ්ඩක්වත් අඩු වෙලා නැහැ. හිරේ ඉන්න අයගේ “කෙඳිරීම්” දෙවිට ඇහෙනවා කියලත් එයාලා වෙනුවෙන් දෙවි පියවරක් ගනියි කියන එක ගැනත් අපිට කිසිම සැකයක් නැහැ.—ගීතා. 79:11.

• 2014 අගෝස්තු මාසයේදී යුක්රේනයේ ඉන්න සහෝදර විටාලී ෂාලයිකෝට හමුදාවට බැඳෙන්න නියෝග කළා. ඒ වෙලාවේ හෘදය සාක්ෂියට අනුව හමුදාවට බැඳෙන්න අකමැති වුණ සහෝදර විටාලී ඒ වෙනුවට වෙනත් පොදු සේවයක් කරන්න කැමති වුණා. ඒත් හමුදාවට බැඳෙන්න කියපු වෙලාවේ ඔහු ඒක මඟහැරියා කියලා චෝදනා කරමින් ඔහුට විරුද්ධව උසාවියේ නඩු පැවරුණා. ඒත් ඔහු වැරදිකරුවෙක් නෙමෙයි කියලා උසාවියෙන් තීරණය කළා. උසාවියෙන් කිව්වේ “රටේ ආරක්ෂාවට තර්ජනයක් තිබෙන අවස්ථාවක වුණත් කෙනෙක්ට හෘදය සාක්ෂියට අනුව තීරණ ගන්න තියෙන අයිතියට බලපෑම් කරන්න රටේ තත්වය පදනමක් කරගන්න බැහැ” කියලයි. පැමිණිලි පාර්ශවයෙන් මේ ගැන නැවත පැමිණිලි කළත් ඉහළ උසාවියෙන් දුන්නෙත් කලින් දුන්න තීරණයමයි. රටේ යුධමය තත්වයක් තිබුණත් කෙනෙක්ට හමුදා සේවය ප්‍රතික්ෂේප කරලා වෙනත් පොදු සේවයක් කරන්න අයිතියක් තියෙනවා කියලා ඒ අවස්ථාවෙදිත් තහවුරු වුණා.

ඒ ගැන සහෝදර විටාලී ෂාලයිකෝ මෙහෙම කිව්වා. “යෙරෙමියා 1:19 කියන දේ මට ලොකු ශක්තියක් වුණා. මං ඕනම දේකට මුහුණ දෙන්න ලෑස්ති වෙලයි හිටියේ. මොකද මට ඕන වුණේ දෙවිට විශ්වාසවන්තව ඉන්න. යෙහෝවා දෙවි කවදාවත් මාව අතහරින්නේ නැහැ කියලත් ඕනම දේකට මුහුණ දෙන්න මට බලය දෙයි කියලත් මට ලොකු විශ්වාසයක් තියෙනවා. මං හිතුවටත් වඩා හොඳ තීන්දුවක් මට ලැබුණා. මොකද නඩු විභාග 3දීම මම වරදකරුවෙක් නෙමෙයි කියලා තීන්දු කළා. මං තනි වෙලා නැහැ, ඕන වෙලාවක සහෝදරයෝ මගේ උදව්වට ඉන්නවා කියලා මට දැනුණා.”

දේශානුරාගී උත්සවවලට හවුල් වීම ප්‍රතික්ෂේප කරන එක සහෝදරයන්ට මුහුණ දෙන්න වෙන තවත් අභියෝගයක්. විශේෂයෙන්ම පාසැල් දරුවන්ට ජාතික ගීය කියන්න සහ කොඩියට ආචාර කරන්න කියලා පාසැල් නිලධාරීන් බල කරන නිසා විශ්වාසවන්තව ඉන්න එක ඒ අයට ලේසි නැහැ.

• රුවන්ඩාවේ කාරොන්ගි දිස්ත්‍රික්කයේ ඉන්න සාක්ෂිකාර දරුවන් කිහිපදෙනෙක් ජාතික ගීය නොකියා ඉන්න එකෙන් කරන්නේ ඒකට අගෞරවයක් කියලා ඔවුන්ගේ පාසැලේ නිලධාරීන් චෝදනා කළා. ප්‍රතිඵලයක් විදිහට එයාලව පාසැලෙන් අස් කරලා හිරගත කළා. ඒත් ඒ දරුවන් ජාතික ගීය ගායනා නොකිරීම අගෞරවනීය ක්‍රියාවක් නෙමෙයි කියා පවසමින් 2014 නොවැම්බර් 28වෙනිදා උසාවිය ඔවුන්ව සියලුම චෝදනාවලින් නිදහස් කළා. කැමරූන්, කොංගෝව, සමක ගිනියාව සහ මලාවි වගේ වෙනත් අප්‍රිකානු රටවල්වල ඉන්න දරුවනුත් මේ ප්‍රශ්නෙටම මුහුණ දීලා තියෙනවා. සමහර අයව පාසැලෙන් අස් කරලත් තියෙනවා. යෙහෝවා දෙවිගේ සාක්ෂිකරුවන් මේ සම්බන්ධයෙන් දරන ස්ථාවරය ගැන රටේ නිලධාරීන්ට පැහැදිලි කරන්න ඒ රටවල ඉන්න සහෝදරයන් උත්සාහ කරනවා.

• 

  2013 දෙසැම්බර් මාසයේදී හොන්ඩ්‍යුරාස්වල ලෙපාර නගරයේ පාසැලක ඉන්න සාක්ෂිකාර දරුවන් දෙන්නෙක් ජාතික ගීය ගායනා නොකළ නිසාත් ජාතික කොඩියට ආචාර නොකළ නිසාත් පාසැල් නිලධාරීන් ඔවුන්ට ඩිප්ලොමා සහතික පත් දුන්නේ නැහැ. මේ ප්‍රශ්නය විසඳන්න නීතිඥයන් විදිහට වැඩ කරන සහෝදරයන් දෙන්නෙක් අධ්‍යාපන අමාත්‍යංශයේ නිලධාරියෙක්ව හම්බ වුණා. මේ වගේ සිද්ධීන් වෙනත් රටවල්වල නීත්‍යනුකූලව හසුරවලා තියෙන විදිහ සහෝදරයන් ඔහුට පැහැදිලි කළා. ඔවුන්ට කාරුණිකව සලකපු නිලධාරියා දරුවන්ට හා එයාලගේ දෙමව්පියන්ට ඒ ගැන ලිඛිතව දැනුම් දෙන්න කියලා කිව්වා. පැමිණිල්ල විභාග කළ අධ්‍යාපන අමාත්‍යංශයේ උසස් නිලධාරියෙක් 2014 ජූලි 29වෙනිදා ප්‍රකාශ කළේ “සමාජයේ ඉන්න ඕනම කෙනෙක්ට අධ්‍යාපනය ලබන්න එක හා සමාන අයිතියක් තියෙනවා” කියලයි. ඒ නිසා දරුවන්ට ඩිප්ලොමා සහතික දෙන්න කියලා නියෝග කළා.

ශුභාරංචිය දේශනා කරන්න කියලා යේසුස් දුන්න අණට ලෝකෙ පුරාම ඉන්න යෙහෝවා දෙවිගේ සාක්ෂිකරුවන් කීකරු වෙනවා. ඒ වගේම එකට රැස් වෙලා නමස්කාර කරන්න සහ නිතිපතා දෙවිගේ වචනය අධ්‍යයනය කරන්න කියලා බයිබලයේ සඳහන් උපදෙසුත් පිළිපදිනවා. දෙවිගේ මඟ පෙන්වීම් දරුවන්ට උගන්වන්න සහ ‘ලේවලින් වළකින්න’ කියලා දීලා තියෙන ආඥාවලටත් අපි කීකරු වෙනවා. (ක්‍රියා 15:20; ද්වි. 6:5-7) ඒත් ඒ ආඥාවලට කීකරු වෙද්දී සමහර වෙලාවට බලධාරීන් අපිව වැරදියට තේරුම්ගන්න නිසා අපිට විවිධ ප්‍රශ්නවලට මුහුණ දෙන්න සිද්ධ වෙනවා.

• ඇමරිකා එක්සත් ජනපදයේ ෆ්ලොරිඩා ප්‍රාන්තයේ පැවති නඩු විභාගයකදී පවුලක ඉන්න දරුවන් තුන්දෙනාට ආගම ගැන ඉගැන්වීමේ සම්පූර්ණ අයිතිය පැවරුවේ යෙහෝවා දෙවිගේ සාක්ෂිකරුවෙක් නොවන මවටයි. ඒ වගේම සාක්ෂිකරුවෙක් වන පියාට අණ කළේ කතෝලික ආගමට පටහැනි කිසිම දෙයක් දරුවන්ට උගන්වන්න එපා කියලයි. පියා ඒ තීන්දුවට විරුද්ධව අභියාචනයක් ඉදිරිපත් කළ අතර 2014 අගෝස්තු 18වෙනිදා උසාවිය ඔහුට විරුද්ධව දුන්න තීන්දුව අහෝසි කළා. කලින් මේ වගේ නඩු සම්බන්ධයෙන් දීලා තියෙන තීන්දු සැලකිල්ලට අරගෙන උසාවියෙන් මෙහෙම කිව්වා. “ආගමික ඉගැන්වීම් දරුවන්ට හානිකරයි කියලා කියන්න සාක්ෂි නැත්නම් දරුවන් තම භාරකරත්වය යටතේ නැති වුණත් ඒ මවට හෝ පියාට තම ආගම ගැන දරුවන්ට කියා දෙන්න දැන් දැන් උසාවිවලින් අයිතිය ලබා දෙනවා.”

  ඒ තීන්දුව නිසා දරුවන්ට කිසිම බාධාවක් නැතුව යෙහෝවා දෙවි ගැන ඉගෙනගන්න අවස්ථාව ලැබුණා. ඒ පළාතේ තියෙන නමස්කාර මධ්‍යස්ථානයකට යන ඒ දරුවන් දැන් දිගටම සත්‍යය තුළ දියුණු වෙනවා. ඒ ගැන පියා කිව්වේ මෙහෙමයි. “පීඩා විඳදරාගත්ත එකෙන් මගේ විශ්වාසය තවත් ශක්තිමත් වුණා. මෑතකදී මට ගොඩක් ප්‍රශ්නවලට මුහුණ දෙන්න වුණත් ඒ හැම වෙලාවකම ස්ථිරව ඉන්න යෙහෝවා දෙවි මට උදව් කළා. අපි දෙවිට සේවය කරද්දී පීඩාවලට මුහුණ දෙන්න වෙනවා කියන එක මං දැනගෙන හිටියා.”

• 

  නැමීබියාවේ ඉන්න සහෝදරි ඉෆිජින්යා සිමෙන්ටෙ 3වෙනි දරුවා හම්බ වෙන්න රෝහල් ගත කළ වෙලාවේ ලොකු අභියෝගයකට මුහුණ දුන්නා. ඇගේ තත්වය ටිකක් බරපතළ වුණ නිසා රෝහල් කාර්ය මණ්ඩලයේ සමහර අයයි සත්‍යයේ නැති එයාගේ පවුලේ අයයි එකතු වෙලා ලේ ගන්න කියලා එයාට බල කළා. ඒ විතරක් නෙමෙයි ඔවුන් ඒකට උසාවි නියෝගයකුත් ගත්තා. ලේ ගන්න එක තදින්ම ප්‍රතික්ෂේප කරපු සහෝදරිය තමන් කැමති ප්‍රතිකාර ලබාගන්න තියෙන අයිතිය තහවුරු කරගන්න නීතියේ පිහිට පැතුවා. 2015 ජූනි 24වෙනිදා සහෝදරි සිමෙන්ටෙගේ පැමිණිල්ල සලකා බැලූ නැමීබියාවේ උසාවිය ඇයට පක්ෂව තීන්දුවක් දුන්නා. “කෙනෙක් දෙමාපියෙක් වුණත් නැතත් ඔහුට හෝ ඇයට තමන් කැමති ප්‍රතිකාර ක්‍රමයක් තෝරාගැනීමට අයිතියක් තියෙනවා” කියලයි ඔවුන් කිව්වේ. මේ තත්වයට මුහුණ දුන්න කාලේ ගැන සහෝදරි සිමෙන්ටෙ මෙහෙම කිව්වා. “යෙහෝවා දෙවි අපිත් එක්ක ඉන්නවා කියන එක වෙන කවදාකටත් වඩා මං අද්දැක්කා. මේ වගේ සංවිධානෙක ඉන්න ලැබුණ එක ගැන මං ගොඩක් සතුටු වෙනවා. යෙහෝවා දෙවි අපිව බලාගන්නේ හරිම ආදරෙන්.”

• ස්විට්සර්ලන්තයේ සාක්ෂිකරුවන් විශාල නගරවල මහජනයා ගැවසෙන තැන්වල සේවය කිරීමෙන් ලබන්නේ ලොකු සතුටක්. ඒත් ජිනීවා නගරයේ “පුවරු යොදාගෙන ප්‍රසිද්ධ ස්ථානවල සෘජුව හෝ වක්‍රව ආගමික තොරතුරු බෙදාහරින එක තහනම්” කියලා රජයෙන් කිව්වා. එහෙම කරන එක ආගමික නිදහස උල්ලංගනය කිරීමක් කියලා සාක්ෂිකරුවන් උසාවියට පැමිණිල්ලක් ඉදිරිපත් කළා. සාක්ෂිකරුවන්ගේ පැමිණිල්ලට පක්ෂව උසාවියෙන් තීන්දුවක් දුන්න නිසා රජයේ නිලධාරීන්ගේ අවසරය ඇතුව ඒ නගරයෙත් මහජනයා ගැවසෙන තැන්වල සේවය කරන්න දැන් සාක්ෂිකරුවන් සැලසුම් කරලා තියෙනවා.

• අසර්බයිජානයේ රජය ඒ රට තුළ යෙහෝවා දෙවිගේ සාක්ෂිකරුවන්ගේ වැඩකටයුතු නවත්වන්න ගන්න උත්සාහය තවත් වැඩි කරලා. ඒ නිසා ජාතික ආරක්ෂක අමාත්‍යංශය සාක්ෂිකරුවන්ව ගෙන්නලා නිතරම ප්‍රශ්න කරනවා. ඒ විතරක් නෙමෙයි ඔවුන්ගේ ගෙවල්වලට ගිහින් රජයෙන් තහනම් කරපු පොත් පත් තියෙනවද කියලත් නිතරම පරීක්ෂා කරනවා. 2015 පෙබරවාරි මාසයේදී, සහෝදරි අයිරීනා සාකාචියන්කා සහ වලීඩා ජබ්රියිලාවා තමන්ගේ අසල්වාසීන් එක්ක බයිබලයේ තියෙන පණිවිඩය කතා කළ නිසා ඔවුන්ව අත්අඩංගුවට ගත්තා කියන ආරංචිය දැනගත්තාම ලෝකෙ පුරාම ඉන්න බොහෝදෙනෙක් පුදුම වුණා. ඒ වගේ දේවල් සිද්ධ වෙන එක ගැන අපිට කනගාටුවක් දැනුණත් අසර්බයිජානයේ ඉන්න සහෝදර සහෝදරියන් නිර්භීතව “රාජ්‍යය පිළිබඳ ශුභාරංචිය” දේශනා කරන එක ගැන අපි ගොඩක් සතුටු වෙනවා.—මතෙ. 24:14.

• රුසියාවේ ඉන්න යෙහෝවා දෙවිගේ සාක්ෂිකරුවන්ගේ වැඩකටයුතු නවත්වන්න රජය එයාලට කරන්න පුළුවන් හැම දෙයක්ම කරනවා. මේ වෙනකොට අපේ ප්‍රකාශන 80ක් අන්තවාදී ප්‍රකාශන කියලා නම් කරලා තියෙනවා. අන්තවාදියි කියලා ඔවුන් නම් කරලා තියෙන පොත් පත් ළඟ තබාගන්න එක සහ බෙදාහරින එක නීති විරෝධී දෙයක්. ඒ ප්‍රකාශන ලැයිස්තුවට ‘මගේ බයිබල් කතන්දර පොතත්’ ඇතුළත්. 2014 දෙසැම්බර් මාසයේදී අපේ වෙබ් අඩවියත් අන්තවාදියි කියලා උසාවියෙන් කිව්වා. ඒ නිසා රුසියාව තුළ වෙබ් අඩවියට පිවිසීම අවහිර කරලා තියෙනවා. ඒ විතරක් නෙමෙයි වෙබ් අඩවිය ගැන ප්‍රචාරය කරන එකත් නීති විරෝධියි. 2015 මාර්තු ඉඳන් සාක්ෂිකරුවන්ගේ කිසිම ප්‍රකාශනයක් රටට ගෙන්නගන්න රේගුවෙන් අවසර දෙන්නෙත් නැහැ. අඩුම තරමින් බයිබල් සහ අන්තවාදී පොත් නෙමෙයි කියලා උසාවියෙන් නම් කරපු ඒවාවත් රටට ගෙන්වන්න ඉඩ දෙන්නේ නැහැ.

ආගමික රැස්වීම් සංවිධානය කිරීම සහ ඒවාට සහභාගි වීම යන නීති විරෝධී ක්‍රියාවලට හවුල් වුණා කියලා ටැගන්රොග් නගරයේ බලධාරීන් ප්‍රචාරකයන් 16දෙනෙක්ට විරුද්ධව චෝදනාවක් එල්ල කරලා තියෙනවා. ඒ වගේම සාක්ෂිකරුවන්ව අන්තවාදීන් විදිහට සලකන නිසා සමාරා නගරයේ බලධාරීන් ඔවුන්ගේ නීත්‍යනුකූල පිළිගැනීම අහෝසි කරන්න උසාවි නියෝගයක් ගත්තා. රජය නිතරම බාධා කළත්, මොන තරම් පීඩා තිබුණත් රුසියාවේ ඉන්න අපේ සහෝදර සහෝදරියන් “දෙවිට අයිති දේ දෙවිට දෙන්න” දැඩි අධිෂ්ඨානයක් අරගෙනයි ඉන්නේ.—මතෙ. 22:21.