ඔවුහු කවරහුද?

යෙහෝවාගේ සාක්ෂිකරුවන්ගේ ආශාව ඔබ ඔවුන් ගැන හොඳින් දැනගන්නවා දැකීමයි. ඔවුන් ඔබේ අසල්වාසීන් විය හැකියි. නැතහොත් ඔබ සමඟ එකට රැකියාව කරනවා විය හැකියි. එසේත් නැතහොත් එදිනෙදා ජීවිතයේ විවිධ කටයුතුවලදී ඔවුන්ව ඔබට මුණ ගැසී තිබෙනවා විය හැකියි. ඔවුන් පාරේදී තමන් අසලින් යන අයට සඟරා බෙදා දෙනවා ඔබ දැක ඇති. නොඑසේනම් ඔබේ නිවසේදී ඔබ ඔවුන් සමඟ ස්වල්ප වේලාවක් කතා බහ කර ඇති.

ඇත්ත වශයෙන්ම, යෙහෝවාගේ සාක්ෂිකරුවෝ ඔබ සහ ඔබේ ශුභසාධනය ගැන සැලකිලිමත් වන්නෝය. ඔබේ මිතුරන් වීමට ඔවුන්ට වුවමනා වන අතර, ඔවුන් ගැනත්, ඔවුන්ගේ විශ්වාසයන් ගැනත්, ඔවුන්ගේ සංවිධානය ගැනත්, මිනිසුන් ගැන මෙන්ම අප සියලුදෙනාම ජීවත් වෙන මේ ලෝකය ගැනත් ඔබට පැවසීමට ඔවුන් සිටින්නේ ඉමහත් ආශාවෙනි. ඔවුන් මෙම විවරණිකාව පිළියෙළ කර තිබෙන්නේ එම අරමුණ පෙරදැරි කරගෙනය.

බොහෝ පැතිවලින් යෙහෝවාගේ සාක්ෂිකරුවන් වෙනත් අය වාගේමය. ඔවුන්ටත් තිබෙන ආර්ථික, ශාරීරික හා චිත්තවේගී ගැටලු සාමාන්‍යය. ඇතැම් අවස්ථාවලදී ඔවුන්ගේ අතිනුත් වැරදි සිදු වේ. මක්නිසාදයත් ඔවුන් පරිපූර්ණ නැත. යම් විශේෂ වූ දේවබලයක්ද ඔවුන්ට නැත. ඔවුන් නොවරදිනසුලු අයද නොවේ. එහෙත්, තමන් ලබා ඇති අද්දැකීම්වලින් ඉගෙනගෙන අවශ්‍ය වෙනස්කම් කිරීම පිණිස ඉතා ඕනෑකමින් ඔවුහු බයිබලය පාඩම් කිරීමට උත්සාහ කරති. දෙවිගේ කැමැත්ත කිරීමට දෙවිට කැප වී සිටින ඔවුහු තමන්ගේ එම කැපවීමට අනුව ජීවත් වීමට උත්සුක වෙති. ඔවුන්ගේ සියලු ක්‍රියාකාරකම්වලදී ඔවුන් සොයන්නේ දේවවචනයේ හා දෙවිගේ ශුද්ධාත්මයේ මඟ පෙන්වීමයි.

හුදෙක් මිනිසුන්ගේ සංකල්ප මත හෝ ආගමික ඇදහිලි මත නොව, බයිබලය මත තම විශ්වාසයන් පදනම් වීම ඔවුන්ට අතිශයින් වැදගත් වේ. ඔවුන්ට ඇත්තේ, “සියලු මිනිසුන් බොරුකාරයන් වුණත් දෙවි සත්‍යවාදී කෙනෙකු බව ඔප්පු වේවා” යනුවෙන් ප්‍රේරිත පාවුල් දේවානුභාවය යටතේ පළ කළ හැඟීම්මය. (රෝම 3:4, නව ලෝක පරිවර්තනය හෙවත් NWa) යම් ඉගැන්වීමක් බයිබල් සත්‍යයක් ලෙස ඉදිරිපත් කරනු ලබන විට, ප්‍රේරිත පාවුල්ට සවන් දුන් බෙරීයවරුන් අනුගමනය කළ පහත සඳහන් ක්‍රියාමාර්ගයම අනුගමනය කිරීමට ඔවුහු අනුන්ව දිරිගන්වති. එය නම්, “ඔවුහු මහත් උනන්දුවකින් වචනය පිළිගෙන, මේ දේවල් සැබෑදැයි බලන පිණිස දිනපතා ශුද්ධ ලියවිලි හොඳින් පරීක්ෂා කළෝය” යන්නය. (ක්‍රියා 17:11) තමන්ගේ ආගමික ඉගැන්වීම් වේවා වෙනත් කෙනෙකු කරන ආගමික ඉගැන්වීම් වේවා, ඒ සියලු ඉගැන්වීම් ශුද්ධ ලියවිලිවලට එකඟදැයි පරීක්ෂා කර බැලිය යුතු බව යෙහෝවාගේ සාක්ෂිකරුවෝ විශ්වාස කරති. ඔබ ඔවුන් සමඟ සාකච්ඡා කරන විට, මෙය කරන මෙන් ඔවුහු ඔබට ආරාධනා කරති. එසේ කරන මෙන් ඇත්තෙන්ම ඔබගෙන් උදක්ම ඉල්ලා සිටිති.

මෙයින් පෙනී යන්නේ යෙහෝවාගේ සාක්ෂිකරුවන් බයිබලය දේවවචනය බව විශ්වාස කරන බවයි. මෙහි පොත් 66 දේවානුභාවයෙන් ලියා ඇති බවත් ඓතිහාසික වශයෙන් නිවැරදි බවත් ඔවුහු පිළිගනිති. අලුත් ගිවිසුමයයි සාමාන්‍යයෙන් හැඳින්වෙන කොටස ඔවුන් ක්‍රිස්තියානි ග්‍රීක් ලියවිලි ලෙසටද පැරණි ගිවිසුම ලෙස හැඳින්වෙන කොටස හෙබ්‍රෙව් ශුද්ධ ලියවිලි ලෙසටද හඳුන්වති. ග්‍රීක් සහ හෙබ්‍රෙව් ශුද්ධ ලියවිලි යන මෙම දෙකොටසම කෙරෙහි විශ්වාසය තබන ඔවුහු, යම් ප්‍රකාශයක් හෝ අවට පාඨ සම්බන්ධයෙන් හෝ සංකේතමය අර්ථයක් ඇති බවට පැහැදිලිවම අඟවා ඇති අවස්ථාවලදී හැර අනෙකුත් සියලුම අවස්ථාවලදී පාඨයන් පදගතාර්ථමය ලෙසට සලකති. බයිබල් අනාවැකිවලින් බොහොමයක් ඉෂ්ට වී ඇති බවත්, තවත් ඒවා ඉෂ්ට වෙමින් තිබෙන බවත්, තවත් ඒවා අනාගතයේදී ඉෂ්ට වීමට නියමිත බවත් ඔවුහු වටහාගෙන සිටිති.

ඔවුන්ගේ නාමය

යෙහෝවාගේ සාක්ෂිකරුවෝ? එසේය, ඔවුන්ව හඳුන්වනු ලබන්නේ එලෙසයි. එම නාමයට යම් අර්ථයක් මුසු වී ඇත. ඉන් අඟවන්නේ ඔවුන් යෙහෝවා ගැන, ඔහුගේ දේවත්වය සහ ඔහුගේ අරමුණු ගැන සාක්ෂි දරන්නන් බවය. “ජනාධිපති,” “රජ,” සහ “හමුදාපති” වැනි වූ “දෙවි,” “ස්වාමීන්,” සහ “නිර්මාතෘ” යන පදවි නාමයන් යම් කිසි උසස් පුද්ගලයන් කිහිපදෙනෙකුට අදාළ විය හැකියි. එහෙත්, “යෙහෝවා” යනු පෞද්ගලික නාමයක් වන අතර, එයින් යොමු දක්වන්නේ විශ්වයේ මැවුම්කරු වන සර්වබලධාරි දෙවිටය. සිංහල බයිබලයේ පැරණි අනුවාදයේ ගීතාවලිය 83:17හි මෙය මෙසේ පෙන්වා ඇත. “යෙහෝවා නම් වූ ඔබ පමණක් මුළු පොළොවට මහෝත්තමයාණන් බව ඔවුන් දැනගන්නා පිණිස.”

යෙහෝවා (නැතහොත් රෝමානු කතෝලික ජෙරූසලම් බයිබලය සහ ඇතැම් විශාරදයන්ගේ මනාපය පරිදි යාහ්වේ) යන නාමය මුල් හෙබ්‍රෙව් ශුද්ධ ලියවිලිවල 7,000 වාරයක් පමණ සඳහන් වේ. බයිබල් වැඩි ගණනක මෙය දකින්නට නැත. ඒ වෙනුවට ආදේශ කර තිබෙන්නේ “දෙවියන්වහන්සේ” හෝ “ස්වාමීන්වහන්සේ” යන යෙදුම්ය. කෙසේවෙතත්, මේ බයිබල්වල පවා යම් කෙනෙකුට මුල් හෙබ්‍රෙව් පාඨයේ යෙහෝවා යන්න යොදා ඇත්තේ කොහේදැයි කියා දැනගත හැකියි. මන්දයත්, බයිබල්වල එම ස්ථානවලදී තද කලු අකුරෙන් දෙවියන්වහන්සේ, ස්වාමීන්වහන්සේ ලෙස යොදා තිබෙන බැවිනි. නූතන පරිවර්තන කිහිපයකම යෙහෝවා හෝ යාහ්වේ යන නාමය භාවිත කරයි. මෙබැවින්, නව ලෝක පරිවර්තනයෙහි “මම යෙහෝවාය. මාගේ නාමය ඒකය” යනුවෙන් යෙසායා 42:8හි කියවන්නට තිබේ.

යෙහෝවාගේ සාක්ෂිකරුවන් යන නාමය භාවිත කිරීමට පදනම ලෙස ඔවුන් යොදාගන්නා ශුද්ධ ලියවිලි වාර්තාව සඳහන් වෙන්නේ යෙසායා පොතේ 43වන පරිච්ඡේදයේය. මෙහිදී ලෝක තත්වය විස්තර කර ඇත්තේ අධිකරණ ශාලාවක පැවැත්වෙන නඩුවක් හා සමානවය. ජාතීන්ගේ දෙවිවරුන්ට තමන්ගේ ධර්මිෂ්ඨකම් ගැන ඔප්පු කිරීමට තම සාක්ෂිකරුවන්ව ඉදිරිපත් කරන ලෙසට මෙහිදී ඇරයුම් කෙරේ. නැත්නම් යෙහෝවාගේ පැත්තේ සිටින සාක්ෂිකරුවන්ට සවන් දී සත්‍යය පිළිගන්නා ලෙසට කියා සිටිනු ලැබේ. එහිදී යෙහෝවා තම සෙනඟට ප්‍රකාශ කරන්නේ මෙලෙසයි. “මම ඒ තැනැත්තා බව ඔබ දැනගන මා විශ්වාස කර තේරුම්ගන්න පිණිස, ඔබ මාගේ සාක්ෂිකාරයෝව, මා විසින් තෝරාගත් මාගේ මෙහෙකරුවාව සිටින්නහුයයි යෙහෝවා කියන්නේය. මා සිටින්ට පළමුවෙන් කිසි දෙවිකෙනෙක් සාදනු ලැබුවේ නැත, මට පසුව සිටින්නෙත් නැත. මම, මමම, යෙහෝවාය; මා ඇර වෙන ගැලවුම්කාරයෙක් නැත.”—යෙසායා 43:10, 11, ප්‍රතිසංස්කෘත පරිවර්තනය, 1938 හෙවත් පැ.අ.

යේසුස් පොළොව මත ඉපදීමට වසර දහස් ගණනකට පෙරාතුව සිට යෙහෝවා දෙවිට පොළොව මත සාක්ෂිකරුවෝ සිටියහ. හෙබ්‍රෙව් 11වන පරිච්ඡේදයේ ඇදහිලිවන්තවූ මෙම පුරුෂයන් සමහරදෙනෙකුව ලැයිස්තු ගත කළායින් පසුව, හෙබ්‍රෙව් 12:1 මෙසේ කියයි. “එබැවින්, මෙපමණ විශාල වලාකුළක් වැනි වූ සාක්ෂිකරුවන් සමූහයකගෙන් අප වට වී සිටින නිසා, සියලු බරද අපව පහසුවෙන් හසු කරගන්නා ඒ පාපයද අහක දමා, අපි ඉදිරියෙහි තබා තිබෙන ධාවන තරඟය විඳදරාගනිමින් දුවමු.” පොන්තියුස් පිලාත් ඉදිරිපිටදී යේසුස් මෙසේ පැවසීය. “මා ඉපදුණෙත් ලෝකයට පැමිණියෙත් සත්‍යය ගැන සාක්ෂි දැරීමටය.” තවද “විශ්වාසවන්ත, සැබෑ සාක්ෂිකරුවා” යනුවෙන්ද ඔහුව හැඳින්වේ. (යොහන් 18:37; එළිදරව් 3:14) එමෙන්ම යේසුස් තම ගෝලයන්ට මෙසේද පැවසීය. “ඔබ මතට ශුද්ධාත්මය පැමිණි විට ඔබට බලය ලැබෙනවා ඇත. එවිට ඔබ යෙරුසලමෙහිද මුළු යුදයෙහිද සමාරියෙහිද පොළොවේ ඈත කෙළවරෙහි ඇති ස්ථානය දක්වාද මා ගැන සාක්ෂිකරුවෝ වන්නහුය.”—ක්‍රියා 1:8.

මෙබැවින්, රටවල් 230කට වඩා වැඩියෙන් අද දින 60,00,000කට වඩා වැඩිදෙනෙක් ක්‍රිස්තුස් යේසුස් විසින් පාලනය කරනු ලබන යෙහෝවාගේ රාජ්‍යය පිළිබඳ ශුභාරංචිය ගැන කතා කරමින් සිටින අතර, ඔවුන් තමන් යෙහෝවාගේ සාක්ෂිකරුවෝ ලෙසට නිවැරදිව හඳුන්වා දෙති.

[පාදසටහන]

[4වන පිටුවේ වාක්‍ය කණ්ඩය]

ඔවුන් කැප වී සිටින්නේ දෙවිගේ කැමැත්ත කිරීමටය

[4වන පිටුවේ වාක්‍ය කණ්ඩය]

බයිබලය දේවවචනය බව ඔවුහු විශ්වාස කරති

[5වන පිටුවේ වාක්‍ය කණ්ඩය]

මෙම නාමය අධිකරණයක පැවැත්වෙන නඩු විභාගයක් හා සම්බන්ධය

[5වන පිටුවේ වාක්‍ය කණ්ඩය]

රටවල් 230කට වඩා වැඩි ප්‍රමාණයක සාක්ෂිකරුවෝ 60,00,000ක් පමණ සිටිති

[3වන පිටුවේ පින්තූරය]

ඔවුහු ඔබ ගැන සැලකිලිමත් වෙති

[4වන පිටුවේ පින්තූරය]

ඉපැරණි හෙබ්‍රෙව් භාෂාවෙන් දෙවිගේ පෞද්ගලික නාමය