22. යෙහෝවා තම සෙනඟව කිසිදා අමතක නොකරන බව කාවද්දන්නේ කෙසේද?

²² යෙසායා දැන් යෙහෝවාගේ ප්‍රකාශයන් දිගටම දැනුම් දෙයි. වහල්භාවයේ සිටින ඉශ්‍රායෙල්වරුන් වෙහෙසට පත් වී, බලාපොරොත්තු සුන් කරගන්නා බව ඔහු පුරෝකථනය කරයි. යෙසායා මෙසේ කියයි. ‘සියොන්: යෙහෝවා මා අත්හැරියේය, යෙහෝවා මා මතක නැති කළේයයි කීවාය.’ (යෙසායා 49:14) මෙය සැබෑවක්ද? යෙහෝවා තම සෙනඟව අත්හැර දමා මතක නැති කර තිබේද? යෙහෝවාගේ වදන් ප්‍රකාශ කරන්නා හැටියට යෙසායා මෙසේ කියයි. “ස්ත්‍රියෙක් ඇගේම කුසේ පුත්‍රයාට අනුකම්පා නොකරන ලෙස ඇගේ කිරි දරුවා මතකනැතිකරන්නට ඈට පුළුවන්ද? එසේය, මොවුන්ට මතකනැතිවෙන්ට පුළුවන, එහෙත් මම නම් මතක නැති නොකරන්නෙමි.” (යෙසායා 49:15) යෙහෝවාගේ ප්‍රතිචාරය මොනතරම් ප්‍රේමනීයද! මවක් තම දරුවාට දක්වන ප්‍රේමයට වඩා යෙහෝවා තම සෙනඟ කෙරෙහි දක්වන ප්‍රේමය අධිකය. යෙහෝවා සෑමවිටම තම පක්ෂපාත සේවකයන් ගැන සිතමින් සිටින්නේය. ඔවුන්ගේ නම් තම අතේ කොටා ඇත්තාක් මෙන් ඔහු ඔවුන්ව තම මතකයේ තබාගන්නේය. “බලව, මම මාගේ අතුල්වල නුඹ කොටාගතිමි; නුඹේ පවුරු මා ඉදිරියේ නිතරම තිබේ.”—යෙසායා 49:16.

23. යෙහෝවා තම සෙනඟව අමතක නොකරන බව විශ්වාස කිරීමට පාවුල් ක්‍රිස්තියානීන්ව දිරිගැන්වූයේ කෙසේද?

²³ ගලාතියේ සිටි ක්‍රිස්තියානීන්ට ලියූ ලිපියෙහි ප්‍රේරිත පාවුල් මෙසේ දිරිගැන්වීය. “යහපත්කම්කිරීමට මැළිනොවෙමු; මක්නිසාද අපි ක්ලාන්ත නොවෙමු නම්, නියම කාලයේදී කපාගන්නෙමුව.” (ගලාති 6:9) හෙබ්‍රෙව්වරුන්ට ඔහු දිරිගන්වනසුලු මෙම වදන් පවසයි. ‘නුඹලා දෙවිගේ නාමයට පෙන්නූ ප්‍රේමය මතක නැති කරන්ට ඔහු අධර්මිෂ්ඨ නැත.’ (හෙබ්‍රෙව් 6:10) යෙහෝවා තම සෙනඟව අමතක කර ඇතැයි කියා අප කිසිවිටෙක නොසිතිය යුතුයි. පුරාණ සියොන් වැසියන් මෙන් ප්‍රීතියෙන් හා ඉවසිලිවන්තව යෙහෝවා දෙස බලා සිටීමට ක්‍රිස්තියානීන්ටද හොඳ හේතු තිබේ. යෙහෝවා තම ගිවිසුමේ කොන්දේසි සහ පොරොන්දුවලට තදින් ඇලී සිටින්නේය.

25. නවීන කාලයේදී ආත්මික ඉශ්‍රායෙල් අද්දකින්නේ කිනම් ආකාරයේ යළි පිහිටුවීමක්ද?

²⁵ මෙම වදන්වලට නවීන දින අදාළ වීමක් තිබේ. දුෂ්කර වූ Iවන ලෝක මහා යුධ සමයේදී, ආත්මික ඉශ්‍රායෙල්වරු පාළු කිරීමේ සහ වහල්භාවයේ කාලයක් අද්දුටූහ. එහෙත්, ඇයව යළි පිහිටුවා ආත්මික පාරාදීසයකට ගෙනෙනු ලැබීය. (යෙසායා 35:1-10) යෙසායා කලින් විස්තර කළ පාළු නුවර ප්‍රීති වුණාක් මෙන් ඇයද මහත් සතුටකින් ඉපිල ගියාය. ඊට හේතු වූයේ, යෙහෝවාට ප්‍රීතියෙන් සේවය කරන ක්‍රියාශීලී නමස්කාර කරන්නන්ගෙන් ඇය පිරී ඉතිරී යෑමයි.