යෙහෝවඃවහන්සේගේ දයාව ගැන යෝනා ඉගෙනගනියි
යෙහෝවඃවහන්සේට තම අනාගතවක්තෘ යෝනාට දීමට පැවරුමක් තිබේ. කාලය, පොදු යුගයට පෙර 9වන ශතවර්ෂයයි, තවද IIවන යෙරොබොවම් ඉශ්‍රායෙලය පාලනය කරමින් සිටී. යෝනා සාබුලොන් ජාතිකයන්ගේ නගරයක් වන ගාත්-හෙපෙර්හි වැසියෙකි. (යෝෂුවා 19:10, 13; 2 රාජාවලිය 14:25) දෙවියන්වහන්සේ යෝනාව ඔහුගේ ගමට ඊශාන දිගින් කිලෝමීටර 800කට ඔබ්බෙන් පිහිටි අෂූරියේ අගනුවර වන නිනිවයට යවනසේක. නිනිවයේ වැසියන් දෙවියන්වහන්සේගෙන් වූ විනාශයකට මුහුණ දීමට යන බවට අනතුරු ඇඟවීම ඔහුගේ කාර්යය වේ.
යෝනා මෙසේ සිතන්ට ඇත: ‘එම නගරයටත් ජාතීන් වෙතටත් යන්න? ඔවුන් දෙවියන්වහන්සේට භක්තිවන්තකමක්වත් දක්වන්නේ නැහැ. ඉශ්‍රායෙල්වරුන් කළාක් මෙන්, එම ලේ පිපාසිත අෂූරිවරු කිසිදාක යෙහෝවඃවහන්සේ සමඟ ගිවිසුමකට ඇතුල් වූයේ නැහැ. ඇයි, එම දුෂ්ට ජාතියේ ජනයා මගේ අනතුරු ඇඟවීම තර්ජනයක් ලෙස සලකා ඉශ්‍රායෙලය පරාජය කරන්ට එන්ට පුළුවන්! මට බැහැ! මම යන්නේ නැහැ. මම යොප්පාවට දුවගොස්, විරුද්ධ දිශාවට යාත්‍රා කරනවා—ඒ කියන්නේ හරියටම මහ මුහුදේ අනිත් කෙළවර වන තර්ෂිෂ් දක්වා යනවා. මා කරන්ට යන්නේ එයයි!’—යෝනා 1:1-3.
මුහුදේ උපද්‍රව!
වැඩි වේලාවක් යන්ට මත්තෙන් යෝනා මධ්‍යධරණි වෙරළේ පිහිටි යොප්පාවේ සිටී. ඔහු තම ගමන් ගාස්තුව ගෙවා, නිනිවයට කිලෝමීටර 3,500කට වඩා වැඩි දුරකින් බටහිර දෙසට පිහිටි, ස්පාඤ්ඤය සමඟ සාමාන්‍යයෙන් සම්බන්ධ කොට ඇති තර්ෂිෂ් බලා පිටත් වන නැවකට නඟී. මුහුදේදී, වෙහෙසට පත් වී සිටින මෙම අනාගතවක්තෘවරයා නැව් තට්ටුව යටට ගොස් නිදාගනී. වැඩි වේලාවක් යන්ට පෙර, යෙහෝවඃවහන්සේ මුහුද පිටට තද සුළඟක් පමුණුවනසේක, තවද බියට පත් වූ සෑම නැවියෙක්ම උපකාරය සඳහා තම තමන්ගේ දෙවිවරුන්ට අයැද සිටී. නැව කෙතරම් දුරට පැද්දෙමින් පෙරළෙන්ට යනවාද කිවහොත්, එය සැහැල්ලු කරගැනීම සඳහා එහි තිබූ නැව් බඩු නැවෙන් පිටතට දැමීමට සිදු වේ. එහෙත්, නිශ්චිතවම නැව මුහුදුබත් වීමට යන බව පෙනේ, එවිට කලබලයට පත් වූ කපිතාන් මෙසේ කෑගසනවා යෝනාට ඇසේ: “නුඹ නිදාගන ඉන්නේ මක්නිසාද? නැගිට නුඹේ දෙවියන්වහන්සේගෙන් පිහිට ඉල්ලාපන්න, සමහරවිට අප විනාශ නොවන ලෙස දෙවියන්වහන්සේ අප ගැන කල්පනාකරනවා ඇත.” යෝනා නැඟිට නැව් තට්ටුව මතට නඟී.—යෝනා 1:4-6.
“මේ විපත්තිය අපට පැමිණුණේ කා නිසාදැයි දැනගන්නා පිණිස පසඇට දමමුයයි” නැවියෝ පවසති. පසඇටය යෝනාට වැටේ. නැවියන් මෙසේ පවසන විට, ඔහුට ඇති වන කාන්සාව ගැන කල්පනා කර බලන්න: “මේ විපත්තිය අපට පැමිණුණේ මක්නිසාද කියා අපට කියාපන්න; නුඹේ රක්ෂාව මොකද? නුඹ කොතැන සිට ආවාද? නුඹේ රට කිමෙක්ද? නුඹ මොන ජාතියේ කෙනෙක්ද?” යෝනා, තමා “ස්වර්ගයේ දෙවිවූ ස්වාමීන්වහන්සේ[ට] [යෙහෝවඃවහන්සේට, NW]” නමස්කාර කරන හෙබ්‍රෙව්වෙකු බවත්, “මුහුදත් ගොඩබිමත් මැවුවාවූ” තැනැන්වහන්සේට ගෞරවාන්විත බියක් තිබෙන බවත් පවසයි. කීකරුව දෙවියන්වහන්සේගේ පණිවුඩය නිනිවයට ගෙන යනවා වෙනුවට, ඔහු යෙහෝවඃවහන්සේ ඉදිරියෙන් පලායෑම නිසා ඔවුන් මතට මේ කුණාටුව පැමිණ තිබේ.—යෝනා 1:7-10.
“මුහුද අපට නිශ්චලවෙන පිණිස අප විසින් නුඹට කරන්ට ඕනෑ මොකදැයි” නැවියෝ අසති. මුහුදේ කුණාටු සහිත ස්වභාවය තව තවත් වර්ධනය වනවාත් සමඟම, යෝනා මෙසේ පවසයි: “මා අරන් මුහුදේ දමාපල්ලා; එවිට මුහුද නුඹලාට නිශ්චලවන්නේය. කුමක්හෙයින්ද මේ මහත් කුණාටුව නුඹලා පිටට පැමිණ තිබෙන්නේ මා නිසා බව දනිමි.” යෙහෝවඃවහන්සේගේ සේවකයාව මුහුදෙහි හෙළා නිශ්චිත මරණයකට ගොදුරු කරලීමට නොකැමතිව, එම මිනිස්සු ගොඩබිම කරා ළඟාවීමට උත්සාහ කරති. අසාර්ථක වූ නැවියෝ: “අහෝ ස්වාමීන්වහන්ස, මේ මනුෂ්‍යයාගේ ප්‍රාණය නිසා අප පිට විනාශයක් නොවේවා, නිදොස් ලේද අප පිට නොතැබුව මැනව. මක්නිසාද, ස්වාමීන්වහන්ස, ඔබ කැමති ලෙසම කළසේකැයි” හඬ නඟති.—යෝනා 1:11-14.
මුහුද තුළට!
එවිට නැවියෝ යෝනාව නැවෙන් පිටතට විසි කරති. කැළඹිලි සහිත වූ මුහුදේ ඔහු ගිලෙනවාත් සමඟම, එහි චංචල ස්වභාවය නවතින්ට පටන්ගනී. මෙය දැක ‘ඒ මනුෂ්‍යයන් යෙහෝවඃවහන්සේට අතිශයින් බියවීමට පටන්ගන්නා අතර, එනිසා ඔවුහු උන්වහන්සේට පූජාවක් ඔප්පු කර බාරවල් වෙති.’—යෝනා 1:15, 16.
ජලය යෝනාව යට කරනවාත් සමඟම, නිසැකවම ඔහු යාච්ඤා කරමින් සිටී. ඉන්පසු ඔහුට තමා විශාල කුහරයක් තුළින්, මෘදු මාධ්‍යයක් දිගේ ලිස්සා යනවාක් මෙන් දැනේ. තවමත් ඔහුට ආශ්වාස කිරීමට හැකිවීම පුදුම එලවන යමකි! තම හිස වටේට වූ මුහුදු පැළෑටි ගළවා දමද්දී, යෝනා තමා සැබවින්ම අද්විතීය ස්ථානයක සිටිනවා දකී. මෙසේ වූයේ මන්දයත්, “ස්වාමීන්වහන්සේ යෝනා ගිලින්ට මහා මත්ස්‍යයෙකු පත්කළසේක; යෝනා වනාහි දාවල් තුනක්ද රෑ තුනක්ද මත්ස්‍යයාගේ බඩේ සිටියේය.”—යෝනා 1:17.
යෝනාගේ බලවත් යාච්ඤාව
යෝධ මත්ස්‍යයාගේ බඩ තුළ සිටියදී යාච්ඤා කිරීම සඳහා යෝනාට කාලය තිබේ. ඔහුගේ සමහර වචන යම් ගීතිකාවලට සමානකමක් දරයි. බලාපොරොත්තු රහිතබවේ මෙන්ම පසුතැවීමේ ප්‍රකාශයන් අඩංගු තම යාච්ඤා යෝනා පසුව වාර්තා කළේය. එක් නිදසුනකට, මත්ස්‍යයාගේ බඩ ෂෙයෝලය, නැත්නම් තම මිනීවළ බවට පත් වේයයි ඔහුට පෙනී ගියේය. එමනිසා ඔහු මෙසේ යාච්ඤා කළේය: “මාගේ පීඩාව නිසා ස්වාමීන්වහන්සේට හඬගැසීමි, උන්වහන්සේද මට උත්තරදුන්සේක; පාතාල [ෂෙයෝල, NW] ගැබේ සිට කෑගැසීමි, ඔබ මාගේ හඬ ඇසූසේක.” (යෝනා 2:1, 2) වාර්ෂික උත්සවයන් සඳහා යෙරුසලම බලා ගමන් කළ ඉශ්‍රායෙලිතයන් විසින් ගයනු ලැබූ ආරෝහණ ගීතිකා දෙකක මීට සමාන අදහස් පළ කෙරේ.—ගීතාවලිය 120:1; 130:1, 2.
මුහුදු පත්ලට වූ තම ගමන ගැන කල්පනා කරමින් යෝනා මෙසේ යාච්ඤා කරයි: “ඔබ [යෙහෝවඃවහන්සේ] මුහුදු මධ්‍යයේ ගැඹුරට මා හෙළූසේක, ජලධාරාවද මා වටකර තිබුණේය; ඔබගේ රැළ හා ඔබගේ ජලකඳු සියල්ල මට උඩින් ගලාගියේය.”—යෝනා 2:3; සසඳන්න ගීතාවලිය 42:7; 69:2.
තම අකීකරුවීම දිව්‍ය අනුමැතිය අහිමි කරගැනීමට හේතු වන බවත්, නැවත කිසිදාක දෙවියන්වහන්සේගේ දේවමාළිගාව දක්නට නොලැබෙන බවත් සිතා යෝනා බිය වේ. ඔහු මෙසේ යාච්ඤා කරයි: “මම: ඔබගේ ඇස් හමුයෙන් පහකරනු ලැබීමි; එහෙත් ඔබගේ ශුද්ධ මාළිගාව දෙස නැවත බලන්නෙමි [බලන්නේ කෙසේද? NW].” (යෝනා 2:4; සසඳන්න ගීතාවලිය 31:22.) යෝනාගේ තත්වය කෙතරම් අයහපත් එකක් සේ පෙනේද කිවහොත් ඔහු මෙසේ පවසයි: “ජලයෝ ප්‍රාණ හානිය දක්වා [ඔහුගේ ජීවිතය අනතුරට ලක් කරමින්] මා වටකරගත්තෝය; ගැඹුර මා වටේට පැමිණියේය; මුහුදු පන් මාගේ ඉස වටේ එතුණේය.” (යෝනා 2:5; සසඳන්න ගීතාවලිය 69:1.) යෝනාගේ අසරණ තත්වය ගැන සිතා බලන්න, මන්ද ඔහු තවදුරටත් මෙසේ පවසන හෙයිනි: “කඳුවල පතුලට [මත්ස්‍යයා තුළට] බැස්සෙමි; පොළොව [මිනීවළක තිබෙන ඒවා මෙන්] ස්වකීය අගුල්වලින් සදාකාලේටම මා හිරකරගත්තේය. එහෙත්, මාගේ දෙවිවූ ස්වාමීන්වහන්ස, ඔබ මාගේ ප්‍රාණය [තුන්වන දින] වළෙන් ගොඩට ගත්සේක.”—යෝනා 2:6; සසඳන්න ගීතාවලිය 30:3.
යෝනා මත්ස්‍යාගේ බඩේ සිටියත්, ඔහු මෙසේ සිතුවේ නැත: ‘මම බොහෝ සෙයින් විෂාදයට පත් වී සිටින නිසා මට යාච්ඤා කරන්න බැහැ.’ ඒ වෙනුවට ඔහු මෙසේ යාච්ඤා කරයි: “මා තුළ මාගේ ආත්මය [මරණාසන්නව] ක්ලාන්තවූ විට, මම [ඇදහිල්ලෙන් යුතුව, අනුපමේය බලය හා දයාව ඇති එකම තැනැන්වහන්සේ ලෙස] ස්වාමීන්වහන්සේ සිහිකෙළෙමි. මාගේ යාච්ඤාව ඔබ වෙතට, ඔබගේ ශුද්ධ මාළිගාවට, පැමිණියේය.” (යෝනා 2:7) දෙවියන්වහන්සේ ස්වර්ගික දේවමාළිගාවේ සිට යෝනාගේ හඬ අසා, ඔහුව ගැළවූසේක.
අවසාන වශයෙන් යෝනා මෙසේ යාච්ඤා කරයි: “[බොරු දෙවිවරුන්ගේ අප්‍රාණික රූප කෙරෙහි විශ්වාස කිරීමෙන්] බොරු නිරර්ථක දේවල් සලකන්නෝ තමුන්ගේම [ප්‍රේමනීය කරුණාව පෙන්වන තැනැන්වහන්සේ අත්හැරීමෙන්] රක්ෂස්ථානය හැර දමති. එහෙත් මම ස්තුති හඬකින් ඔබට [යෙහෝවඃ දෙවියන්වහන්සේට] පූජා ඔප්පුකරන්නෙමි; [මෙම අද්දැකීම අතරතුර හෝ අනෙකුත් අවස්ථාවල] බාරවූ දේ ගෙවන්නෙමි. ගැළවීම අයිති ස්වාමීන්වහන්සේට[යි].” (යෝනා 2:8, 9; සසඳන්න ගීතාවලිය 31:6; 50:14.) මරණයෙන් තමාව ගැළවීමට හැක්කේ දෙවියන්වහන්සේට පමණක්යයි අවබෝධයෙන් සිටින, පසුතැවිලි වූ අනාගතවක්තෘවරයා (ඔහුට පෙර සිටි දාවිත් හා සාලමොන් යන රජවරුන් මෙන්) ගැළවීම යෙහෝවඃවහන්සේට අයිති බව ප්‍රකාශ කරයි.—ගීතාවලිය 3:8; හිතෝපදේශ 21:31.
යෝනා කීකරු වෙයි
සෑහෙන කාලයක් කල්පනා කිරීමෙන් හා උනන්දුවෙන් යාච්ඤා කිරීමෙන් පසු, තමා ඇතුල් වූ මාර්ගයෙන් පිටතට තල්ලු කරවන බලයක් යෝනාට දැනේ. අවසානයේදී, ඔහුව වියළි ගොඩබිමට විසි කරන ලදි. (යෝනා 2:10) ගැළවීම සඳහා ස්තුතිපූර්වක වෙමින්, යෝනා දෙවියන්වහන්සේගේ වචනයට කීකරු වෙයි: “නැගිට නිනිවය නම් මහත් නුවරට ගොස්, මා විසින් නුඹට කියන කාරණා එහි ප්‍රකාශකරපන්න.” (යෝනා 3:1, 2) යෝනා අෂූරීය අගනුවර බලා පිටත් වෙයි. දිනය කවදාදැයි ඔහු දැනගන්නා විට, තමා දවස් තුනක් මත්ස්‍යයාගේ බඩේ සිටි බව හේ දැනගනී. අනාගතවක්තෘවරයා ඒප්‍රාත් ගඟේ බටහිර දෙසින් පිහිටි මහා වංගුව හරහා නැඟෙනහිර දෙසට ඇති උතුරු මෙසපොතේමියාවට ගමන් කර ටයිග්‍රීස් ගංගාව අසලට පැමිණ, අවසානයේදී බලවත් නුවරට ළඟා වෙයි.—යෝනා 3:3.
යෝනා මහත් නුවරක් වූ නිනිවයට ඇතුල් වෙයි. දිනක් නගරය හරහා ගමන් කර, පසුව හෙතෙම මෙසේ ප්‍රකාශ කරයි: “තව සතළිස් දවසකින් නිනිවය හෙළාදමනු ලැබේ.” යෝනාට අෂූරීය භාෂාව පිළිබඳ දැනුම ආශ්චර්යවත් අයුරකින් දායාද කර තිබේද? අපට පවසා නැත. එහෙත් ඔහු හෙබ්‍රෙව් භාෂාවෙන් කතා කර වෙනත් කෙනෙකු විසින් එහි අර්ථය පැහැදිලි කර දුන්නත්, ඔහුගේ ප්‍රචාරයට ප්‍රතිඵල තිබේ. නිනිවයේ මිනිස්සු දෙවියන්වහන්සේ කෙරෙහි විශ්වාසය තබන්ට පටන්ගනිති. ඔවුන් උපවාසයක් ප්‍රසිද්ධ කර, ලොකු අය පටන් කුඩා අය දක්වා ගෝණි රෙදි ඇඳගනිති. ආරංචිය නිනිවයේ රජු වෙත පැමිණි විට, හෙතෙම සිංහාසනයෙන් නැඟිට, තම නිල ඇඳුම් ගළවා දමා, ගෝණිරෙදිවලින් තමාව පොරවාගෙන අළු මත ඉඳගන්නේය.—යෝනා 3:4-6.
යෝනා කෙතරම් පුදුමයට පත් වේද? අෂූරීය රජ මෙසේ ප්‍රකාශ කිරීමට දූතයන් පෙරටුව යවයි: “මනුෂ්‍යයෙක්වත් මෘගයෙක්වත් ගවයෙක්වත් බැටළුවෙක්වත් කිසිවක් රස නොබලත්වා. කිසි කෑමක් නොකත්වා, වතුර නොබොත්වා. මනුෂ්‍යයාද මෘගයාද ගෝණිරෙදි පෙරවාගෙන, දෙවියන්වහන්සේට බලවත්ලෙස මොරගසත්වා. එසේය, ඔවුන් එකිනෙකා තම තමාගේ නපුරු මාර්ගයෙන්ද තමුන්ගේ අත්වල බලාත්කාරයෙන්ද හැරේවා. අප විනාශ නොවන ලෙස සමහරවිට දෙවියන්වහන්සේ හැරී, තැවී, තමන්ගේ බලවත් උදහසෙන් නොහැරෙනසේක්ද කියා දන්නේ කවුද?”—යෝනා 3:7-9.
නිනිවයේ වැසියෝ තම රජුගේ ආඥාවට එකඟව ක්‍රියා කරති. ඔවුන් තමුන්ගේ නපුරු මාර්ගවලින් හැරී තිබෙන බව දෙවියන්වහන්සේ දකින විට, උන්වහන්සේ ඔවුන්ට ගෙනෙන්ට යන බව ප්‍රකාශ කළාවූ විපත්තිය පිළිබඳව තැවී, එය හටගන්වන්නේ නැත. (යෝනා 3:10) ඔවුන්ගේ පසුතැවිලි වීම, නිහතමානිකම සහ ඇදහිල්ල නිසා, යෙහෝවඃවහන්සේ අදහස් කළ විනිශ්චය මගින් ඔවුන්ට දඬුවම් නොකර සිටීමට තීරණය කරනසේක.
අමනාප වන අනාගතවක්තෘවරයා
සතළිස් දවසක් ගත වුවත් නිනිවයට කිසිවක් සිදු නොවේ. (යෝනා 3:4) නිනිවයේ වැසියන් විනාශ නොවන බව අවබෝධ කරගනිමින් යෝනා අතිශයින් අප්‍රසන්නව, කෝපයට පත්ව මෙසේ යාච්ඤා කරයි: “අනේ ස්වාමීන්වහන්ස, මගේ රටේ සිටියදීම මා කීවේ මෙය නොවේද? එබැවින් මම තර්ෂිෂ්ට පලායන්ට ඉක්මන් කෙළෙමි. මක්නිසාද ඔබ දයාවන්තවූ, අනුකම්පා ඇත්තාවූ, ඉවසිලිවන්තවූ, ඉතා කරුණාවන්තවූ, විපත්තිය ගැන තැවෙන්නාවූ දෙවිකෙනෙකු බව දැනගන සිටියෙමි. ඉතින්, ස්වාමීන්වහන්ස, මාගේ ප්‍රාණය මාගෙන් තුරන්කරගත මැනව; ජීවත්වීමට වඩා නැසීයාම මට හොඳය.” මෙම ප්‍රශ්නයට දෙවියන්වහන්සේ මෙසේ ප්‍රතිචාරය දක්වනසේක: “කෝපවෙන්ට නුඹට යුතුද”?—යෝනා 4:1-4.
ඉන්පසු යෝනා උඩඟු ආකාරයෙන් නගරයෙන් පිටතට යයි. ඔහු නැඟෙනහිර දෙසට ගොස්, නුවරට කුමක් වේදැයි බලාගැනීමට පැලක් සාදාගෙන එහි සෙවණේ ඉඳගන්නේය. අනතුරුව, යෙහෝවඃවහන්සේ අනුකම්පාසහගතව, ‘ලබුවැලක් නියම කර, යෝනාව ඔහුගේ විපත්තිදායක තත්වයෙන් මුදන්ට සහ ඔහුගේ හිසට උඩින් සෙවණක් වන පිණිස එය ඔහුට උඩින් යන්ට සලස්වනසේක.’ යෝනා ලබුවැල ගැන කෙතරම් සතුටු වනු ඇද්ද! නමුත් දෙවියන්වහන්සේ අලුයම එම වැලට පහර දීමට පණුවෙකු නියම කළ අතර, එය මැල වී යන්ට පටන්ගනී. ඉක්මනින්ම එය සම්පූර්ණයෙන්ම වියළී ගොස් ඇත. තවද දෙවියන්වහන්සේ තද වියළිබවක් ඇති පෙරදිග සුළඟක්ද එවනසේක. සූර්යයා දැන් අනාගතවක්තෘවරයාගේ හිසට උඩින් තදින් පායයි, එනිසා ඔහුට ක්ලාන්ත ගතියක් දැනේ. තමා නසින පිණිස ඔහු දිගටම ඉල්ලමින් සිටී. එසේය, යෝනා නැවත නැවතත් මෙසේ පවසයි: “ජීවත්වීමට වඩා නැසීයාම මට හොඳය.”—යෝනා 4:5-8.
යෙහෝවඃවහන්සේ දැන් කතා කරනසේක. උන්වහන්සේ යෝනාගෙන් මෙසේ අසනසේක: “ලබුවැල ගැන කෝපවෙන්ට නුඹට යුතුද”? යෝනා මෙසේ පිළිතුරු දෙයි: “මැරෙන තරම් කෝපවෙන්ට මට යුතුය.” දැන් යෙහෝවඃවහන්සේ අනාගතවක්තෘවරයාට ලුහුඬින් මෙසේ පවසයි: ‘ඔබට ලබුවැල ගැන කනගාටු සිතුණා. නමුත් ඔබ ඒ වෙනුවෙන් මහන්සි වූයේවත්, නැත්නම් එය විශාලව වැවෙන්ට සැලැස්වූයේවත් නැහැ. රාත්‍රියක් තුළ එය වැඩී විනාශ වී ගියා.’ දෙවියන්වහන්සේ තවදුරටත් මෙසේ කරුණු පැහැදිලි කළසේක: ‘එසේනම්, දකුණතවත් වමතවත් නොදන්න 1,20,000කට වඩා මනුෂ්‍යයන්ද බොහෝ මෘගයන්ද සිටින නිනිවය නම් ඒ මහත් නුවර කෙරෙහි මා කනගාටු නොවිය යුතුද?’ (යෝනා 4:9-11) නිවැරදි පිළිතුර පැහැදිලිය.
යෝනා පසුතැවිලි වී, තමාගේ නම දරන පොත ලිවීමට ජීවත් වෙයි. යාත්‍රාකරන්නන් යෙහෝවඃවහන්සේට බිය වී, උන්වහන්සේට පූජාවක් ඔප්පු කර, බාරවල් වූ බව ඔහු දැනගන්ට ඇත්තේ කෙසේද? දිව්‍ය ආනුභාවයෙන් නැත්නම් සමහරවිට දේවමාළිගාවට පැමිණි යාත්‍රාකරන්නන්ගෙන් හෝ මඟීන්ගෙන් විය හැක.—යෝනා 1:16; 2:4.
“යෝනාගේ ලකුණ”
ලියන්නන් සහ ඵරිසිවරුන් යේසුස් ක්‍රිස්තුස්වහන්සේගෙන් ලකුණක් ඉල්ලූ විට, උන්වහන්සේ මෙසේ පැවසූසේක: “නපුරුවූ කාමමිථ්‍යාචාරිකවූ පරම්පරාවක් ලකුණක් සොයයි; නුමුත් අනාගතවක්තෘවූ යෝනාගේ ලකුණ හැර වෙන ලකුණක් . . . දෙනු නොලබන්නේය.” යේසුස්වහන්සේ තවදුරටත් මෙසේ කීසේක: “මක්නිසාද යෝනා මහා මත්ස්‍යයාගේ බඩේ දවහල් තුනක්ද රෑ තුනක්ද සිටියාක්මෙන් මනුෂ්‍ය පුත්‍රයාද පොළෝ ගැබේ දවහල් තුනක්ද රෑ තුනක්ද සිටින්නේය.” (මතෙව් 12:38-40) යුදෙව්වරුන්ගේ දවස් පටන්ගත්තේ හිරු බැසයෑමෙන් පසුවය. ක්‍රිස්තුස්වහන්සේ පොදු යුගයේ 33 නීසාන් මස 14වන දින, සිකුරාදා පස්වරුවේ මියගියසේක. එම දිනයේ හිරු බැසයෑමට පෙර උන්වහන්සේගේ ශරීරය සොහොන් ගෙයක තබන ලදි. නීසාන් මස 15වන දිනය සන්ධ්‍යාවේ ආරම්භ වී සතියේ සත්වන සහ අවසාන දිනය වන සෙනසුරාදා දින හිරු බැස යන තෙක් පැවතිණ. එම වේලාවේදී නීසාන් මස 16වන දිනය ආරම්භ වී, අප ඉරිදා නමින් හඳුන්වන දිනයේ හිරු බැස යන තෙක් පැවතිණ. ප්‍රතිඵලයක් වශයෙන්, යේසුස්වහන්සේ මියගොස් නීසාන් මස 14වන දිනයේ අඩු තරමින් යම් කාලයකට සොහොන් ගෙයි සිටිසේක, එමෙන්ම නීසාන් මස 15වනදා, දවස මුළුල්ලේම සොහොන් ගෙයි සිටි අතර, නීසාන් මස 16වන දින රාත්‍රි කාලය සොහොනෙහි ගත කළසේක. ඉරිදා අලුයම කාන්තාවන් පිරිසක් සොහොන් ගෙය බලන්ට පැමිණි විට, උන්වහන්සේ එවිටමත් නැවත නැඟිට සිටිසේක.—මතෙව් 27:57-61; 28:1-7.
යේසුස්වහන්සේ දින තුන ආවරණය කරන යම් කාලපරිච්ඡේදයක් සොහොනෙහි ගත කළසේක. මෙසේ උන්වහන්සේගේ සතුරන් “යෝනාගේ ලකුණ” ලබා සිටි මුත්, ක්‍රිස්තුස්වහන්සේ මෙසේ පැවසූසේක: “නිනිවයේ මනුෂ්‍යයෝ මේ පරම්පරාවට විරුද්ධව විනිශ්චයේදී නැගිට එය වරදට පත්කරන්නෝය. මක්නිසාද යෝනාගේ දේශනාකිරීමෙන් ඔව්හු පසුතැවිලිවූවෝය; බලව, යෝනාට වඩා උතුම් කෙනෙක් මෙහි සිටියි.” (මතෙව් 12:41) මොනතරම් සැබෑද! යුදෙව්වන් අතරේ යෝනාට වඩා උතුම් අනාගතවක්තෘවරයෙක් වන යේසුස් ක්‍රිස්තුස්වහන්සේ සිටිසේක. නිනිවයේ ජනතාවට යෝනා ප්‍රමාණවත් ලකුණක් වුවත්, යේසුස්වහන්සේ එම අනාගතවක්තෘවරයාට වඩා අධිකාරයෙන් හා එයට අනුබල දෙන සාක්ෂි සමඟ දේශනා කළසේක. එහෙත්, පොදුවේ යුදෙව්වරු විශ්වාස නොකළෝය.—යොහන් 4:48.
ජාතියක් වශයෙන් යුදෙව්වරුන්, යෝනාට වඩා උතුම් අනාගතවක්තෘවරයාව නිහතමානී ලෙස නොපිළිගත් අතර, උන්වහන්සේ කෙරෙහි ඇදහිල්ලද ඔවුන් විදහාපෙන්වූයේ නැත. එහෙත් ඔවුන්ගේ මුතුන් මිත්තන් සම්බන්ධයෙන් කුමක් කිව හැකිද? ඔවුහුද ඇදහිල්ලෙන් සහ නිහතමානී ස්ප්‍රීතුවෙන් හීනව සිටියෝය. ඇදහිල්ලෙන් සහ නිහතමානිකමෙන් අතිශයින් හීනව සිටි තද කුළල් ගති ඇති ඉශ්‍රායෙලිතයන් හා පසුතැවිලි වූ නිනිවයේ සෙනඟ අතර වෙනස දැක්වීමේ අදහසින් යෙහෝවඃවහන්සේ යෝනාව නිනිවයට යැවූ බව පැහැදිලිය.—ද්විතීය කථාව 9:6, 13, සසඳන්න.
යෝනා සම්බන්ධයෙන් කුමක් කිව හැකිද? දෙවියන්වහන්සේගේ දයාව කෙතරම් බලවත්ද කියා ඔහු ඉගෙනගත්තේය. එපමණක්ද නොව, පසුතැවිලි වූ නිනිවයේ සෙනඟට පෙන්වූ අනුකම්පාව සම්බන්ධයෙන් යෝනාගේ කෙඳිරිගෑමට වූ යෙහෝවඃවහන්සේගේ ප්‍රතික්‍රියාව මගින්, අපගේ දවසේ සිටින ජනතාවට අපගේ ස්වර්ගික පියාණන්වහන්සේ දයාව පෙන්වන විට, අපව මැසිවිලි කීමෙන් වැළැක්විය යුතුය. සැබවින්ම, සෑම වසරකම දහස් ගණනක් ඇදහිල්ලෙන් සහ නිහතමානී හෘදයකින් යුතුව යෙහෝවඃවහන්සේ වෙතට හැරෙන බැවින් අපි ප්‍රීති වෙමු.