සත්‍යය ජීවිත පරිවර්තනය කරයි

අද සිටින බොහෝදෙනාගේ ජීවිත, කටයුතු කිරීමට දුෂ්කර පමණක් නොව, අර්බුදකාරියි යන කාරණය කනගාටුදායකයි, නමුත් ඇත්තයි. එවන් මිනිසුන්ට පුළුවන්ද සන්තෝෂය සොයාගන්න? සමහරු අපරාධකරුවන් වන අතර, ඔවුන් ඔවුන්ගේ අසල්වැසියන්ව ගොදුරු කරගන්නවා. ඔවුන්ට කවදා හෝ සමාජයේ අවංක සාමාජිකයන් බවට පත් වෙන්න පුළුවන්ද? මෙම ප්‍රශ්න දෙකටම උත්තරය, ඔව් යන්නයි. මිනිසුන්ට වෙනස් වෙන්න පුළුවන්. ජීවිත පරිවර්තනය කරන්න පුළුවන්. එය වන්නේ කොහොමද කියා, මෙහෙම ලියද්දී ප්‍රේරිත පාවුල් පෙන්නුවා: “දෙවිගේ යහපත් වූ පිළිගත හැකි වූ පරිපූර්ණ වූ කැමැත්ත ඔබටම සහතික කරගන්නා පිණිස, ඔබේ මනස සකස් කරගැනීමෙන් මුළුමනින්ම පරිවර්තනය වන්න.”—රෝම 12:⁠2, NW.

පාවුල් ඉහත සඳහන් වචන ලියන්න අවුරුදු 20කට කලින්, ‘දෙවිගේ පරිපූර්ණ වූ කැමැත්ත’ පිළිබඳව යේසුස් කී දේ මතකයට නැඟෙන්න ඉඩ තියෙනවා. යේසුස් කිව්වේ මෙහෙමයි: “නුඹලා සැබෑව දැනගන්නවා ඇත, සැබෑවද නුඹලා නිදහස්කරන්නේය.” (යොහන් 8:32) “සැබෑව” කීමෙන් යේසුස් අදහස් කළේ, දිව්‍යමය ආනුභාවය ලත් තොරතුරුයි—විශේෂයෙන්ම දෙවිගේ කැමැත්ත පිළිබඳ තොරතුරු—එය අප සඳහා රැකී තිබෙන්නේ බයිබලයෙහියි. (යොහන් 17:18) බයිබල් සත්‍යය, ඇත්තෙන්ම මිනිසුන්ව නිදහස් කරනවාද? දෙවිගේ කැමැත්තට එකඟව ජීවත් වීම, ඇත්තෙන්ම ජීවිත පරිවර්තනය කරන්න යනවාද? සැබවින්ම එහෙම කරනවා. උදාහරණ කිහිපයක් සලකා බලන්න.

ජීවිතයට අරමුණක්

ජිබ්‍රෝල්ටාහි වෙසෙන මෝයිසස්, මෑතක් වන තුරු ඉතාම අසන්තෝෂයෙන් සිටි මිනිසෙක් වුණා. ඔහු මෙහෙම කියනවා: “මං බේබද්දෙක්, නිදාගත්තේ පාරවල්වල. මාව නැතිභංග වුණු තත්වයක් මට දැනුණා. හැම රෑකම මං දෙවිට කිව්වා මට කරුණාව දක්වල, තව එක දවසකටවත් විඳවන්න සලස්වන්න එපාය කියලා. මං කිසි කමකට නැත්නම්, කිසි වැඩක්වත්, පවුලක්වත් උදව්වට කිසිම කෙනෙක්වත් නැත්තම්, ඇයි මං මේ ලෝකෙට ඉපදුණේ කියලා අඬ අඬා දෙවිගෙන් ඇහුවා. මං ජීවත් වෙන්න ඕනෙ මොකටද?” ඉන්පසු, යමක් සිදු වුණා.

මෝයිසස් නැවත කියන්න පටන්ගන්නවා: “රෝබෙර්තෝ කියන යෙහෝවාගේ සාක්ෂිකාරයාව හම්බ වුණාම, දෙවි මගේ යාච්ඤාවලට ඇහුම්කන් දීල තියෙනවා කියල මං දැනගත්තා. රෝබෙර්තෝ මට බයිබලයකුයි, දෙවිට අපෙන් ඕනෑ කරන්නේ කුමක්ද?a කියන බයිබල් ආධාරකයේ පිටපතකුයි දුන්නා. මං නිදාගත්තු තැන තියෙන බංකුවේ ඉඳගෙන සෑම දවසකම අපි බයිබලය පාඩම් කෙරුවා. මාසෙකට පස්සේ ඒ ප්‍රදේශයේ යෙහෝවාගේ සාක්ෂිකාරයන්ගේ රාජ්‍ය ශාලාවට රෝබෙර්තෝ මාව එක්කගෙන ගියා. ඉක්මනින්ම, බයිබල් සත්‍යය මගේ බලාපොරොත්තුව සම්පූර්ණයෙන්ම වෙනස් කළා. මං දැන් එළියේ නිදාගන්නේවත් මත්පැන් බොන්නේවත් දුම් බොන්නේවත් නැහැ. මගේ ජීවිතය වෙනස් වෙලා තියෙනවා, ඒ වගේම මම සන්තෝෂයෙන් ඉන්නේ. යෙහෝවාගේ සාක්ෂිකාරයෙක් හැටියට සේවය කරන්න මම ඉක්මනින්ම බව්තීස්ම වෙන්න බලාපොරොත්තු වෙනවා.”

මොනතරම් පරිවර්තනයක්ද! මිනිසුන් බලාපොරොත්තුවක් නැතුව සිටිද්දී, බොහෝවිට ඊට හේතුව වන්නේ දැනුමේ ඌනතාවයි. ඔවුන් දෙවි ගැන එහෙම නැත්නම් ඔහුගේ පුදුමාකාර අරමුණු ගැන දන්නේ නැහැ. මෝයිසස් සම්බන්ධයෙන් නම්, ඔහු එම දැනුම ලබාගත් විට, එය ඔහුගේ ජීවිතය හරවාගන්න අවශ්‍ය ශක්තිය සහ ධෛර්යය ලබා දුන්නා. මෝයිසස්ගේ සිද්ධියේදී, ගීතිකාකරුගේ යාච්ඤාවට දෙවි උත්තර දුන්නා: “ඔබගේ එළියත් සැබෑකමත් එවුව මැනව; ඒවා මා ගෙනයෙත්වා. ඒවා ඔබගේ ශුද්ධවූ කන්දටත් ඔබගේ මණ්ඩපවලටත් මා පමුණුවත්වා.”—ගීතාවලිය 43:⁠3.

බෙලීස්හි ඩාන්‍යල්ටත් ඒ හා සමාන අද්දැකීමක් තිබුණා. ඩාන්‍යල් පාරවල්වල නිදාගත්තේ නැහැ—ඔහුට කීර්තිමත් රැකියාවක් තිබුණා. නමුත් අවුරුදු 20ක් පුරා, මත්ද්‍රව්‍ය සහ මත්පැන් සමඟ ඔහු සටන් කළා; දුරාචාර ජීවිතයක් ගත කළා. කතෝලිකයෙක් හැටියට ඇති දැඩි වුණත්, ඩාන්‍යල්ට ජීවිතයේ අරමුණක් පෙනෙන තෙක් මානයකවත් තිබුණේ නැහැ, එමෙන්ම දෙවිකෙනෙකුගේ පැවැත්ම පවා ඔහු සැක කළා. උපකාරය පතා ඔහු විවිධ පල්ලිවලට ගියත් ඔහුට සොයාගන්න පුළුවන් වුණේ, පල්ලි යන ඔහුගේ බොහෝ මිතුරන් සහ සමහර මිතුරු පූජකයන් පවා මත්ද්‍රව්‍ය සහ මත්පැන් අනිසි ලෙස පාවිච්චි කරන බවයි. මේ අතර, ඔහුගේ බිරිඳ ඔහුගෙන් දික්කසාද වෙන්න ඔන්න මෙන්න කියලයි හිටියේ.

බලාපොරොත්තු බිඳී, පුනරුත්ථාපන මධ්‍යස්ථානයකින් ඩාන්‍යල් තමාව පරීක්ෂා කරවාගත්තා. ඔහු එයින් මිදී ආවාට පසුවත් ඔහුට උපකාර නොලැබුණොත්, නැවතත් ඉක්මනින්ම මත්ද්‍රව්‍ය පාවිච්චියට තමාව වැටෙන බව ඒ වන විටත් ඔහු දැනගෙන හිටියා. නමුත් අවශ්‍ය කරන්නේ කුමන ආකාරයේ උපකාරයක්ද? පුනරුත්ථාපනයෙන් පැමිණ දවස් දෙකකට පසුව 1996 මැයි මාසයේදී, ඩාන්‍යල් යෙහෝවාගේ සාක්ෂිකාරයෙක් වෙත ගොස් මෙහෙම ආයාචනා කළේ ඔහුවත් පුදුමයට පත් කරමින්: “කරුණාකරලා මාත් එක්ක බයිබලය පාඩම් කරන්න.” සාක්ෂිකරුවා ඔහු සමඟ සතියකට දෙවරක් පාඩම් කරන්න සැලසුම් කළා; ඩාන්‍යල් ඔහුගේ ජීවිතය ඉක්මනින්ම දෙවිගේ කැමැත්තට එකඟ කරගන්න පටන්ගත් අතර, ඔහුගේ පරණ මිතුරන් වෙනුවට මත්ද්‍රව්‍ය අනිසි ලෙස පාවිච්චි නොකරන, දුරාචාරය ප්‍රතික්ෂේප කරන ක්‍රිස්තියානි මිතුරන්ව ඇති කරගත්තා. මේ අනුව බයිබලයේ කියන දෙය සැබෑ බව ඩාන්‍යල් සොයාගත්තා: “ඥාණවන්තයන් කැටුව යන්න, එවිට නුඹ ඥාණවන්තවන්නේය; එහෙත් අඥානයන්ගේ සමාගම්කාරයාට වේදනා සිදුවන්නේය.” (හිතෝපදේශ 13:20) වැඩි කල් නොගොස් ඔහු මෙහෙම කිව්වා: “පිරිසිදු හෘදය සාක්ෂියක් ඇතුව ඉන්නවා කියන්නේ මොකක්ද කියල දැනගත්ත, මගේ ජීවිතයේ මුල්ම වතාවයි මේ.” ඩාන්‍යල්ගේ ජීවිතයත් පරිවර්තනය වුණා.

පුවටෝ රිකෝහි, තවත් මනුෂ්‍යයෙක් සැලකිය යුතු පරිවර්තනයක් අද්දැක්කා. ඔහු සිරභාරයේ සිටි අතර, මිනිසුන් ගණනාවක් මරා දමා තිබූ නිසා ඉතා භයානක කෙනෙක් ලෙස ඔහුව සැලකුවා. බයිබල් සත්‍යයට පුළුවන්ද ඔහුව වෙනස් කරන්න? ඔව්. මුරටැඹ සහ පිබිදෙව්! සඟරාවල පිටපත් කිහිපයක් ඔහුට දෙන්න යෙහෝවාගේ සාක්ෂිකරුවන්ගෙන් කෙනෙකුට හැකි වූ අතර, වැඩි කල් නොගොස් ඔහු තවත් ඉල්ලුවා. ඔහු සමඟ බයිබල් පාඩමක් ආරම්භ කළා, බයිබල් සත්‍යය ඔහුගේ හෘදයට බලපාන්න පටන්ගත්තා, ඔහු සිදු කළ වෙනස්කම් සියල්ලන්ටම දැකගන්න පුළුවන් වුණා. ඔහුගේ දිග කොණ්ඩය කොටට කපා දැමීමත්, කැතට විහිදී, වැවී තිබූ රැවුල බෑමත් ඔහුගේ වෙනස් වීම පිළිබඳ ප්‍රධාන සාක්ෂිවලින් එකක් වුණා.

සැබෑවටම පසුතැවිලි වී ඔවුන්ගේ ජීවිත-ක්‍රමය වෙනස් කරගන්නාවූ පව්කාරයන්ට දෙවි සමාව දෙන බව බයිබලය කියනවා. පාවුල් මෙසේ ලිව්වා: ‘අධර්මිෂ්ඨයන් දෙවිගේ රාජ්‍යය උරුම කරගන්නේ නැති බව නුඹලා දන්නේ නැද්ද? නුඹලාගෙන් සමහරු එබන්දෝව සිටියෝය. නුමුත් නුඹලා සෝදනු ලැබුවහුය.’ (1 කොරින්ති 6:​9, 11) එම වචන මෙන්ම, ක්‍රියා 24:15හි ඇති වචනද මෙම මිනිසාව සැනසූ බවට කිසිම සැකයක් නැහැ: “ධර්මිෂ්ඨයන්ගේද අධර්මිෂ්ඨයන්ගේද නැවත-නැගිටීමක් වන්නේය.” ඔහු මෙහෙම කිව්වා: “මළවුන් නැවත නැඟිටිද්දී මට ඕනෙ එතන ඉන්න; එතකොට මට පුළුවන් මං මරාදාපු අයගෙන් සමාව ඉල්ලාගන්න.”

අලුත් පවුලක්

එක දවසක් ආර්ජන්ටිනාවේ සිටින යෙහෝවාගේ සාක්ෂිකාරයන්ගේ පූර්ණ කාලීන එවැන්ජලිස්ත සේවකයෙක් වන ලූවිස්, දුක්ඛිත ඉතිහාසයක් ඇති එක්තරා තරුණයෙකුට තමාව හඳුන්වා දුන්නා. උපතෙන්ම දෙමාපියන් විසින් අහක දමා තිබූ ඔහු, විවිධ ආයතන සෙවනේ හැදී වැඩුණා. ඔහුට වයස අවුරුදු 20ක් පමණ වෙද්දී, තම මව සිටින තැන සොයාගෙන ඇය සමඟ ජීවත් වන්න ඔහු තීරණ කළා. ඔහු වෙහෙස වී වැඩ කර, මුදල් සම්භාරයක් ඉතිරි කරගෙන ඔහුගේ මව සිටින නගරයට ගමන් කළා. මුදල් අවසන් වන තුරු ඇය සමඟ සිටින්න ඉඩහැරි ඇය, ඉන්පසුව ඔහුට යන ලෙස කියා සිටියා. මෙම ප්‍රතික්ෂේප කිරීම ඔහුව සියදිවි හානි කරගැනීමට තරම් තත්වයට පත් කළා.

කෙසේවෙතත්, මෙම තරුණ මිනිසා සමඟ බයිබල් සත්‍යය බෙදාගන්න ලූවිස්ට පුළුවන් වුණා. එම සත්‍යයට මෙම සහතිකයත් ඇතුළත්: “මගේම පියාද මවුද මා අත්හැරියත්, යෙහෝවා මා පිළිගන්නේය.” (ගීතාවලිය 27:​10, NW ) ඔහුව කිසිදාක අතහරිනු නොලබන ස්වර්ගික පියෙක් සිටින බව දැන් මේ තරුණ මිනිසා සොයාගෙන තිබෙනවා. දැන් ඔහු අලුත් පවුලක කොටසක් වීම ගැන සන්තෝෂයෙන් සිටිනවා; ඒ යෙහෝවාගේ පවුලයි.

එම රටේම තවත් මනුෂ්‍යයෙක් තමා මුරටැඹ සඟරාවට කැමතියි කියා යෙහෝවාගේ සාක්ෂිකාරයෙකුට කිව්වා. ඇයි? ඔහුගේ විවාහය බේරුණු හින්දා. පෙනෙන විදිහට, එක දවසක් මේ මනුෂ්‍යයා වැඩ ඇරී එන අතරතුරේදී, ලොකු අකුරෙන් ලියූ “දික්කසාදය” යන මාතෘකාවෙන් යුත් මුරටැඹ සඟරාවක් කුණු බක්කියේ තියෙනවා දැකල තියෙනවා. ඔහුගේ විවාහය අනතුරේ තිබූ නිසාත්, නීත්‍යනුකූලව වෙන්වීම සඳහා ඔහු සහ ඔහුගේ බිරිඳ නීතික ක්‍රියාමාර්ග ආරම්භ කර තිබූ නිසාත්, ඔහු සඟරාව අරගෙන කියවන්න පටන්ගත්තා. ඔහු ඒක ගෙදර අරගෙන ගිහින් ඔහුගේ බිරිඳ සමඟ කියෙව්වා. යුවළ, සඟරාවේ තිබූ බයිබලය මත පදනම් උපදෙස් අදාළ කරගන්න උත්සාහ කළා. (එපීස 5:​21–6:⁠4) ඉක්මනින්ම, ඔවුන්ගේ සම්බන්ධතාව පෙරට වඩා දියුණු වුණා. ඔවුන් වෙන්වීමේ නීතික ක්‍රියාමාර්ග නවතා දමා, එක්සත් විවාහක යුවළක් හැටියට දැන් බයිබලය පාඩම් කරමින් සිටිනවා.

උරුගුවේහි ලූවිස් කියා තවත් මනුෂ්‍යයෙක් සිටි අතර, ඔහු සිටියේ සන්තෝෂයෙන් බොහෝදුරට බැහැරවයි. මත්ද්‍රව්‍ය ඇබ්බැහිය, භූතවාදය, රූප නමස්කාරය, මත්පැන් අනිසි පාවිච්චිය—මේවා ඔහුගේ ජීවිතය ව්‍යාකූල කළ දේවලින් සමහරක්. අවසානයේදී ලූවිස්, සම්පූර්ණයෙන්ම කලකිරී, අදේවවාදියෙක් බවට පත් වුණා. මිතුරෙක් ඔහුට ජීවය—මෙහාට පැමිණියේ කොහොමද? පරිණාමයෙන්ද නැතහොත් මැවීමෙන්ද?b (ඉංග්‍රීසියෙන්) යන පොත දුන්නා. මෙය යෙහෝවාගේ සාක්ෂිකාරයන්ව සුළු වශයෙන් හඳුනාගැනීමට හේතු වුණත්, වැඩිකල් නොගොස් ඔහු නැවතත් මත්පැන්වලටත් මත්ද්‍රව්‍යවලටත් ඇද වැටුණා. ඇඟපතේ අධික වේදනාව නිසා ඇහැරී බලද්දී, ඔහු සිටියේ කුණු ගොඩක් මතයි; ඔහු යාච්ඤා කළා, දෙවිගේ නම ඔහු හරියටම දැනගෙන සිටියේ නැති නිසා, ඔහුගේ යාච්ඤාව “යේසුස් ක්‍රිස්තුස්ගේ පියාට” යොමු කළා.

තමා මේ ලෝකයේ සිටීමට මොකක් හරි හේතුවක් තියෙනවාද කියා ඔහුට පෙන්වන්න කියා ඔහු දෙවිගෙන් අයැදුවා. ලූවිස් වාර්තා කරන්නේ, “ඊළඟ දවසේදීම, මගේ යාළුවෙක් එයාට තවදුරටත් අවශ්‍ය කරන්නේ නැති පොතක් මට දුන්නා. ඒකේ නම? එළිදරව්ව එහි උදාර උච්චාවස්ථාව අත ළඟ ය!”c ඔහුගේ ප්‍රශ්නයට උත්තර දෙන්න මේ පොත ඔහුට උදව් කළා. දෙවිට සේවය කරන්නේ කොහොමද කියා පෙන්වන ආගම සොයාගන්න උදව් කරන ලෙස ලූවිස් නැවතත් යාච්ඤා කළා. මොනතරම් පුදුමයක්ද! දොර සීනුව නාද වුණා, යෙහෝවාගේ සාක්ෂිකාරයන් දෙදෙනෙක් එළියේ සිටගෙන සිටිනවා. ලූවිස් අප්‍රමාදව ඔවුන් සමඟ බයිබලය පාඩම් කරන්න පටන්ගත්තා. ඔහු ශීඝ්‍ර ප්‍රගතියක් ලැබූ අතර, බව්තීස්ම ලත් සාක්ෂිකරුවෙක් වන්න ආශීර්වාද ලබා තිබෙන බව ඔහුට දැන් හැඟෙනවා. ඔහු පිරිසිදු ජීවිතයක් ගත කරන අතර, අනුන්ටත් ඔවුන්ගේ ජීවිතවලට අරමුණක් සොයාගන්න උදව් කරනවා. ගීතාවලිය 65:2 ඔහු සම්බන්ධයෙන් සැබෑ වුණා: ‘යාච්ඤා අසන තැනැත්තාණෙනි, මාංසමය වූ සියල්ලෝම ඔබ වෙතට පැමිණෙන්නෝය.’

පිලිපීනයේ සිටින ඇලන්, ශිෂ්‍ය උද්ඝෝෂකයෙක්ව සිටියා. ඔහු අයිතිව සිටි සංවිධානයේ අරමුණ වුණේ, “අනාගත පරම්පරාවන්ට සමානාත්මතාව භුක්ති විඳීමට පුළුවන් වන පිණිස, ආණ්ඩුව පෙරළා දැමීමයි.” කෙසේවෙතත්, එක දවසක් ඔහුට යෙහෝවාගේ සාක්ෂිකාරයෙක්ව හමු වෙලා, මනුෂ්‍යවර්ගයා සඳහා දෙවිගේ අරමුණ ගැන ඔහු බයිබලයෙන් ඉගෙනගත්තා. එම අරමුණට දේවානුභාවය ලත් පොරොන්දුව ඇතුළත් වෙනවා: “මද කලකින් දුෂ්ටයා නැතිවන්නේය. . . . නුමුත් මොළොක් ගුණ ඇත්තෝ දේශය උරුමකරගන්නෝය. ඔව්හු මහත් සමාදානයෙන් ප්‍රීතිමත් වන්නෝය.” (ගීතාවලිය 37:​10, 11) ඇලන් මෙහෙම කියනවා: “අපේ ව්‍යාපාරය සටන් කරන දේ ගැන බයිබලයෙහි බොහෝ කාලයකට ඉස්සෙල්ල පොරොන්දු වෙලා තියෙනවා කියල මම වැඩිකල් යන්න කලින් දැනගත්තා. අපි දැවෙන ආශාවකින් සිටින සියල්ලම දෙවිගේ රාජ්‍යය යටතේ ලැබෙන්න යනවා.” ඇලන් දැන් දෙවිගේ රාජ්‍යයට සහයෝගය දක්වන අතර, බයිබල් සත්‍යය කෙරෙහි ඇදහිල්ල තබන්න අන් අයට උදව් කරනවා.

ඔව්, දෙවිගේ වචනය වන බයිබලයේ සත්‍යතාවන්ට මිනිසුන් අවනත වෙද්දී, ජීවිත පරිවර්තනය වෙනවා. සැබවින්ම, ගැළවෙන සියලුම ජනයා ඔවුන්ගේ ජීවිත දෙවිගේ කැමැත්තට එකඟ කරගන්න යන කාලය පැමිණෙමින් තියෙනවා. එය මොනතරම් පරිවර්තනයක් වේවිද! එවිට, අනාවැකිය ඉටු වෙන්න යනවා: ‘මාගේ ශුද්ධ කන්දේ සීමා තුළෙහි කිසි අනතුරු කිරීමක්වත් විනාශ කිරීමක්වත් නොවන්නේය. මක්නිසාද ජලයෙන් මුහුද වැසී තිබෙන්නාක් මෙන්, යෙහෝවා ගැන දැනගැන්මෙන් පොළොව පිරීයන්නේය.’—යෙසායා 11:⁠9.

[පාදසටහන්වල]