Chinhu Chaanorasikirwa Nacho chomuNew York City

CHIRATIDZO chiri pamusoro apa chave chakaratidzwa zvinooneka pane chimwe chezvivako zvefekitari zveWatchtower Society muBrooklyn, New York, kubvira kuma1950. Vafambi, vashanyi, nevamwe vanongopfuurawo zvavo vanoyeuchidzwa kurava Bhaibheri zuva nezuva. Tsamba inotevera, yakabva kune mumwe musikana muduku Chapupu, inoratidza kushanda kwechiyeuchidzo ichi.

“Ndaikurukura newandinodzidza naye zvandaida kuzoita kana ndapedza chikoro chesekondari. Ndakatanga kutaura nezveBheteri, dzimbahwe reZvapupu zvaJehovha, uye akafara kwazvo. Akandiudza kuti akanga agara muNew York City kwoupenyu hwake hwose. Mhuri yake yakanga isingashingairi kwazvo mune zvechitendero, asi mangwanani oga oga paaitarisa panze nepahwindo, paiva nechiratidzo chaiti ‘Rava Shoko raMwari Bhaibheri Dzvene Zuva Nezuva.’ Saka mazuva ose airava Bhaibheri rake asati aenda kuchikoro.

“Atama muguta racho, akati chinhu chaanorasikirwa nacho chomuNew York City ndechokuti paanomuka, haachaoni zvakare chinomuyeuchidza kurava Bhaibheri rake. Asi nemhaka yechiratidzo chiri pachivako cheWatchtower, kurava Bhaibheri kwazova tsika, saka anopfuurira kurava Bhaibheri zuva nezuva!”

Hapana nzira ingava nani yokutanga nayo zuva inopfuura kurava chikamu cheShoko raMwari! Nokuita kudaro, pasina mubvunzo uchasvika pakuonga mashoko omuapostora Pauro anoti: “Zvinyorwa zvitsvene, zvinokwanisa kukuita uve akachenjera nokuda kwokuponeswa nokutenda muna Kristu Jesu.”—2 Timoti 3:15-17.