Munguva yaJona, vaNinivhi vakava nemukana wekupfidza. Uye yeuka zvakataurwa naJesu ‘nezvekumukira kutongwa.’ Kuchasanganisira “vaya vaiita zvakaipa.” (Joh. 5:29) Saka zvinoita sekuti panogonawo kuva netariro pavanhu vemuSodhomu neGomora. Zvinoita kuti titi vamwe vevanhu ivavo vanogona kumutswa, uye tinogona kuwana mukana wekuvadzidzisa nezvaJehovha naJesu Kristu. Jehovha agara ari iye ‘anonzvera mwoyo, achiongorora pfungwa dzakadzama.’ Kana pari panyaya yekumutswa kuchaitwa vanhu, Jehovha achaita zvaagara achiita, ‘achapa mumwe nemumwe zvinoenderana nenzira dzake.’ Achapa mutongo wakasimba pazvinenge zvakakodzera kuti adaro, asi achanzwirawo tsitsi pese pazvinenge zvakakodzera kuti adaro. Saka hatifaniri kutaura kuti hapana tariro yekuti mumwe munhu achamutswa kunze kwekunge tichiziva kuti ndizvo zvinotaurwa neBhaibheri! w24.05 5-6 ¶15-16

Kubva kare, mashoko anobva kuna Mwari ari kusimbisa vashumiri vake pavanenge vaine basa rakaoma rekuita. Funga nezvemuprofita Jeremiya. Jehovha paakamupa basa rekuparidza, akazeza. Jeremiya akati: “Handigoni kutaura, nekuti ndinongovawo hangu mukomana.” (Jer. 1:6) Chii chakamubatsira kuti ave neushingi hwekuparidza? Akawana simba kubva mushoko raMwari. Akati: “Rakava semoto unobvira wakavharirwa mumapfupa angu, ndakaneta nekuramba ndakanyarara.” (Jer. 20:​8, 9) Kunyange zvazvo Jeremiya aiparidza mundima yakaoma, mashoko aakapiwa kuti aparidze akamupa simba rekuti aite basa racho. VaKristu vanowana simba kubva mumashoko aJehovha anowanika muBhaibheri. Muapostora Pauro akataura kuti kuva neruzivo rwakarurama kwaizoita kuti hama dzake dzifambe “zvinokodzerana nezita raJehovha” sezvadzairamba ‘dzichibereka zvibereko mumabasa ese akanaka.’—VaK. 1:​9, 10 w24.04 14-15 ¶2-4

Zadhoki akaramba akavimbika kuna Jehovha pasinei nekuti Mupristi Mukuru Abhiyatari akanga asarudza kutsigira Adhonija, mwanakomana waDhavhidhi uyo aironga kubvuta chigaro. Dhavhidhi aiziva kuti aigona kuvimba naZadhoki nguva dzese. Zvainge zvarongwa naAdhonija pazvakafumurwa, Dhavhidhi akasarudza Zadhoki, Natani, naBhenaya kuti vazodze Soromoni samambo. (1 Madz. 1:​32-34) Kuva nevamwe vanamati vaJehovha vakavimbika vakadai saNatani nevamwe vaitsigira Mambo Dhavhidhi, kunofanira kunge kwakasimbisa uye kwakakurudzira Zadhoki. Soromoni paakava mambo, “akagadza mupristi Zadhoki panzvimbo yaAbhiyatari.” (1 Madz. 2:35) Ungatevedzera sei Zadhoki? Kana mumwe munhu wepedyo akasarudza kusiya Jehovha, ratidza Jehovha kuti unoda kuramba wakavimbika kwaari. (Josh. 24:15) Jehovha achakupa simba neushingi zvaunoda kuti uite zvakarurama. Nyengetera kwaari uye ramba uri pedyo nevamwe vanamati vake vakavimbika. Jehovha anokoshesa kuvimbika kwako uye achakupa mubayiro wekuita izvozvo.—2 Sam. 22:26. w24.07 6-7 ¶16-17