Ungaswedera Pedyo naMwari Asingaoneki Here?

‘Ndingatanga sei ukama hwepedyo nomunhu wandisingagoni kuona?’ ungabvunza kudaro. Iwoyo ungaratidzika kuva mubvunzo une musoro.  Asi funga kuti:

KUONA kunokosha zvakadini pakutanga ukama hworudo uye husingaperi? Ko zvisingaoneki hazvina kukosha zvakaenzana here, kana kutopfuura? Zvinodaro! Nechikonzero ichocho vamwe vanhu vakatanga ukama hwepedyo navamwe nokugara vachinyorerana—tsamba dzavo dzichiratidza nokutendeseka zvavanoda, zvavasingadi, vavariro, kuzvibata kwavanoda, kufarira kwavo zvinosetsa, uye zvimwe zvinooneka zvounhu hwavo kana zvavanofarira.

Mapofu anoratidzawo kuti kuona hakukoshi pakutanga ukama hwapedyo nomumwe munhu. Funga nezvomuenzaniso waEdward naGwen, mapofu akaroorana.a Edward akasangana naGwen pachikoro chemapofu, paakanga ari mumwe wevadzidzi vechikuru. Akayemura unhu hwaGwen, zvikurukuru kutendeseka kwake mukutaura nomumufambiro, uye kunyatsoda basa kwake. Iyewo Gwen akakwezvwa naEdward nokuti, achitaura pachake anoti “airatidza unhu hwose hwandakarerwa ndichidavira kuti hunokosha.” Vakatanga kudanana, uye makore matatu gare gare vakanga varoorana.

“Pamunenge muri pamwe chete,” anodaro Edward, “upofu hahuna zvahunonyanya kukanganisa pakuvaka ukama nomumwe munhu. Mungave musingakwanisi kuonana henyu, asi manzwiro amunoita haana kupofumara.” Iye zvino, pashure pemakore 57, vachiri kudanana zvikuru. Vanotsanangura kuti zvinoita kuti vave noukama hwakanaka zvinosanganisira zvinhu zvina: (1) kucherechedza unhu hwomumwe, (2) kufunga nezvounhu ihwohwo nokukwezvwa nahwo, (3) kuramba muchikurukurirana zvakanaka, uye (4) kuita zvinhu pamwe chete.

Zvinhu zvina izvi zvinokosha muukama hupi nohupi hwakanaka, pangava pakati peshamwari, vakaroorana kana kuti, zvinotonyanya kukosha, pakati pavanhu naMwari. Munyaya inotevera, tichaona kuti kushandisa zvinhu izvi kungatibatsira sei kutanga ukama hwepedyo naMwari, kunyange zvazvo tisingagoni kumuona.b

[Mashoko Omuzasi]