5. Jehovha anoda kuti shamwari dzake dziitei?

Pane zvatinowanzotarisira kushamwari dzedu.

• Zvinhu zvipi zvaunoda kuti shamwari dzako dzikuitire?

Verengai 1 Johani 5:3, mobva makurukura muchishandisa mubvunzo unotevera:

• Jehovha anoda kuti shamwari dzake dziitei?

Kuti titeerere Jehovha, dzimwe nguva tinotofanira kugadzirisa maitiro edu. Verengai Isaya 48:17, 18, mobva makurukura muchishandisa mubvunzo unotevera:

• Nei Jehovha achida kuti munhu achinje mararamiro ake kana achida kuva shamwari yake?

Uri kunzwa uri pedyo naMwari here kubva pawakatanga kudzidza Bhaibheri? Ungada kuramba uchisimbisa ushamwari hwako naye here? Kana zvakadaro, yeuka kuti paunowedzera kuda Jehovha, iye anozviona, uye anobva awedzerawo kukuda uye kukuchengeta. Ungamuratidza sei kuti unomuda?

1. Tingaratidza sei kuti tinoda Jehovha?

Tinoratidza kuti tinoda Jehovha nekumuteerera. (Verengai 1 Johani 5:3.) Hapana waanomanikidza kuti amuteerere. Anopa munhu wese mukana wekusarudza kana achida kumuteerera kana kusamuteerera. Anozviitirei? Jehovha anoda kuti tive “vanhu vanoteerera zvichibva pamwoyo.” (VaRoma 6:17) Izvi zvinoreva kuti anoda kuti timuteerere nekuti tinomuda, kwete kungomuteerera nekuti ndiye Mwari. Chikamu 3 ne4 chebhuku rino chichakubatsira kuti uratidze kuda kwaunoita Jehovha nekuita zvinhu zvinomufadza uye kurega zvinhu zvinomugumbura.

2. Sei dzimwe nguva zvichioma kuti tiratidze kuti tinoda Jehovha?

“Matambudziko emunhu akarurama mazhinji.” (Pisarema 34:19) Tese tinorwisana nenyama yedu ine chivi. Uye tinogona kunge tiine matambudziko akadai sekushaya mari, kubatwa zvisina kunaka, kana mamwewo matambudziko. Kana tiri munguva yakaoma zvinogona kutiomera kuita zvatinotarisirwa naJehovha kuti tiite. Zvinodaro nekuti dzimwe nguva kuita zvisina kunaka ndiko kuri nyore. Asi paunoita zvaunonzi naJehovha uite kunyange zvakakuomera, unenge uchiratidza kuti unomuda kupfuura zvese. Unenge uchiratidzawo kuti wakavimbika kwaari. Iyewo achabva ava akavimbika kwauri. Haazombofi akakusiya.—Verengai Pisarema 4:3.

4. Fadza mwoyo waJehovha

Verengai Zvirevo 27:11, mobva makurukura muchishandisa mibvunzo iyi:

• Jehovha anonzwa sei kana ukaratidza kuti wakachenjera womuteerera? Nei wadaro?

5. Unogona kuramba wakavimbika kuna Jehovha

VHIDHIYO: Tsigira Kutenda Kwako Kunyange Paunoshorwa (5:09)

• Unomboomerwa nekuudza vamwe nezvaJehovha here?

• Muvhidhiyo iyi, chii chakabatsira Grayson kuti akurire kutya kwaaimboita?

Zvinoita nyore kuti tirambe takavimbika kuna Jehovha kana tichida zvaanoda uye tichivenga zvaanovenga. Verengai Pisarema 97:10, mobva makurukura muchishandisa mibvunzo iyi:

• Ndezvipi zvimwe zvinhu zvawakadzidza zvinodiwa naJehovha? Ko ndezvipi zvaanovenga?

• Ungadzidza sei kuda zvakanaka uye kuvenga zvakaipa?

6. Kuteerera Jehovha kunotibatsira

Kuteerera Jehovha kwagara kwakatinakira. Verengai Isaya 48:17, 18, mobva makurukura muchishandisa mibvunzo iyi:

• Unofunga kuti Jehovha anoziva zvakatinakira nguva dzese here? Nei uchidaro?

• Kusvika pawava iye zvino, kudzidza Bhaibheri uye kudzidza nezvaMwari wechokwadi Jehovha kwakubatsira sei?

PFUPISO

Unogona kuratidza kuti unoda Jehovha nekumuteerera uye kuramba wakavimbika kwaari kunyange pazvinenge zvakaoma.

Kudzokorora

• Wadzidzei kubva pane zvakaitika kuna Jobho?

• Ucharatidza sei kuti unoda Jehovha?

• Chii chichakubatsira kuti urambe wakavimbika kuna Jehovha?

WEDZERA PANE ZVAWADZIDZA

Dzidza zvaungaita kuti urambe wakavimbika kuna Jehovha uye kuungano.

“Muchava Akavimbika Kune Akavimbika” (16:49)

Verenga unzwe zvakawanda nezvenhema dzinotaurwa naSatani achipomera vanhu.

“Jobho Anoramba Akaperera” (Bhaibheri—Rinombotaura Nezvei? chikamu 6)

Ona kuti vana vangaratidza sei kuti vanoda Jehovha.

Fadza Jehovha (8:16)

Vechidiki vangaramba sei vakavimbika kuna Jehovha pavanenge vachifurirwa nevamwe?

Ramba Kufurirwa! (3:59)

Tese tine zvatinofanira kusarudza muupenyu. Zvakawanda zvacho zvinogona kutibatsira kana kutikanganisa uye zvinogona kubatabata ushamwari hwedu naJehovha. Zvimwe zvezvinhu zvatinosarudza zvingasanganisira nyaya dzakadai sekwekugara, basa ratingaita, uye kuroora kana kuroorwa. Tikasarudza zvakanaka, tinogona kuva neupenyu hunofadza uye tinofadzawo Jehovha.

1. Bhaibheri ringakubatsira sei kuti usarudze zvakanaka?

Usati wasarudza zvekuita, nyengetera kuna Jehovha uchikumbira kuti akubatsire, woongorora Bhaibheri kuti uone kuti anoona sei nyaya yacho. (Verengai Zvirevo 2:3-6.) Pamwe pacho Jehovha anenge akapa mutemo wakajeka. Pakadaro kungotevedzera mutemo iwoyo ndiko kuchenjera.

Ko kana pasina mutemo wakajeka wemuBhaibheri unokuudza zvekuita? Kunyange ipapo Jehovha “anokutungamirira munzira yaunofanira kufamba nayo.” (Isaya 48:17) Anozviita sei? Panogona kunge paine dzimwe pfungwa dziri muBhaibheri dzinogona kukutungamirira kunyange pasina mutemo chaiwo. Dzinogona kutibatsira kuona mafungiro aJehovha uye kuti anonzwa sei nezveimwe nyaya. Kazhinji tinodzidza kuti Mwari anonzwa sei nezveimwe nyaya patinoverenga zvakamboitika zvakanyorwa muBhaibheri. Kana tava kunzwisisa kuti Jehovha anoona sei nyaya yacho tinogona kubva tasarudza zvinomufadza.

2. Tinofanira kufunga nezvei tisati tasarudza zvekuita?

Bhaibheri rinoti: “Munhu ane njere anofungisisa nhanho imwe neimwe.” (Zvirevo 14:15) Izvi zvinoreva kuti tisati tasarudza, tinofanira kuzvipa nguva yekunyatsofunga kuti toita zvipi. Paunenge uchiongorora chimwe nechimwe chezvaunogona kuita, zvibvunze kuti: ‘Bhaibheri rinotii nezvazvo? Ndezvipi zvandingasarudza zvandisingazodembi? Zvandichasarudza zvichabatsira sei vamwe kana kuvakanganisa?’ Uye mubvunzo unokosha pane mimwe yese ndewekuti, ‘Zvichaita kuti Jehovha afare here?’—Dheuteronomi 32:29.

Jehovha ane kodzero yekutiudza kuti ichi chakanaka, ichi chakaipa. Kana tikajairana nemafungiro aJehovha, tiine shungu dzekuatevedzera, tinenge tichidzidzisa hana yedu. Hana zvinoreva pfungwa iri matiri yekusiyanisa zvakanaka nezvakaipa. (VaRoma 2:14, 15) Hana yakadzidziswa inotibatsira kusarudza zvakanaka.

WEDZERA KUONGORORA

3. Tungamirirwa neBhaibheri

VHIDHIYO: Tungamirirwa Nechokwadi Chiri muBhaibheri (5:54)

• Chii chinonzi rusununguko rwekusarudza?

• Nei Jehovha akatipa rusununguko rwekusarudza?

• Akatipa chii kuti atibatsire kushandisa rusununguko rwedu rwekusarudza zvakanakisisa?

Kuti tione muenzaniso wekushanda kunoita Bhaibheri kana pasina mutemo wakanyatsonyorwa ngativerengei VaEfeso 5:15, 16 tobva takurukura kuti ‘tingashandisa sei nguva yedu nekuchenjera’ . . .

• pakugara tichiverenga Bhaibheri.

• pakuva murume kana kuti mudzimai akanaka, mubereki akanaka, kana kuti mwana akanaka.

• pakupinda misangano.

4. Dzidzisa hana yako kuti ikubatsire pakusarudza

VHIDHIYO: “Ivai Nehana Yakanaka” (5:13)

• Muvhidhiyo iyi, matanho api akatorwa nehanzvadzi iyi kuti idzidzise hana yayo uye kuti isarudze zvinofadza Jehovha?

Nei tisingafanire kubvunza vamwe kuti toita sei panyaya dzatinenge tichifanira kusarudza tega? Verengai VaHebheru 5:14, mobva makurukura muchishandisa mibvunzo iyi:

• Kunyange zvazvo zvichiita sezviri nyore kubvunza vamwe kuti vatisarudzire zvekuita, iwe pachako unofanira kukwanisa kusiyanisa chii?

• Chii chatiinacho chaunokwanisa kushandisa pakudzidzisa hana yako kuti ukwanise kusarudza?

5. Fungawo nezvehana dzevamwe

Vanhu havasarudze zvakafanana. Tingaratidze sei kuti tinoremekedza hana dzevamwe? Ona mienzaniso miviri:

Muenzaniso wekutanga: Imwe hanzvadzi inofarira zvekupoda-poda inotamira kuungano ine hanzvadzi dzakawanda dzinoshora nyaya yacho.

Verengai VaRoma 15:1 uye 1 VaKorinde 10:23, 24, mobva makurukura muchishandisa mibvunzo iyi:

• Tichishandisa mavhesi aya, hanzvadzi iyi inogona kuita sei? Ungaita sei paunenge uine munhu ane hana inomurambidza kuita chimwe chinhu chaunoona hana yako ichikubvumira kuita?

Muenzaniso wechipiri: Imwe hama inoziva kuti Bhaibheri harirambidze kunwa doro zvine mwero, asi inosarudza kusanwa. Anokokwa kumabiko oona hama dzichinwa.

Verengai Muparidzi 7:16 uye VaRoma 14:1, 10, mobva makurukura muchishandisa mibvunzo iyi:

• Tichishandisa mavhesi aya, hama iyi inogona kuita sei? Ungaita sei kana ukaona mumwe munhu achiita chimwe chinhu chaunoona hana yako isingakubvumire kuita?

Matanho api atinofanira kutora kuti tizosarudza zvakanaka?

1. Kumbira Jehovha kuti akubatsire kusarudza zvekuita.—Jakobho 1:5.

2. Tsvakurudza muBhaibheri nemumabhuku anotsanangura Bhaibheri kuti unzwe mafungiro aMwari. Unogona kunzwawo pfungwa dzemumwe muKristu ava nenguva achinamata dzinogona kukubatsira pakusarudza.

3. Funga kuti kana wasarudza uchasara uchinzwa sei uye hana dzevamwe dzichanzwawo sei.

PFUPISO

Tichasarudza zvakanaka kana tikatanga taziva kuti Jehovha anonzwa sei nezveimwe nyaya, tozofunga kuti zvatichaita zvichabatsira vamwe here kana kuti zvichavakanganisa.

Kudzokorora

• Ungasarudze sei zvinofadza Jehovha?

• Ungadzidzisa sei hana yako?

• Ungaratidze sei kuti unoremekedza hana dzevamwe?

WEDZERA PANE ZVAWADZIDZA

Ungasarudze sei zvinoita kuti ushamwari hwako naMwari husimbe?

“Ita Zvisarudzo Zvinokudza Mwari” (Nharireyomurindi, April 15, 2011)

Wedzera kunzwisisa kuti Jehovha anotipa sei mazano.

Jehovha Anotungamirira Vanhu Vake (9:50)

Ona zvakabatsira mumwe murume kusarudza pazvakanga zvakamuomera kuti oita zvipi.

Jehovha Anovimbisa Kuti Zvinhu Zvichatifambira Zvakanaka (5:46)

Wedzera kudzidza zvatingaita kuti tifadze Jehovha kunyange kana pasina mutemo wakanyatsojeka nezvenyaya inenge iripo.

“Unoda Murayiro weBhaibheri Nguva Dzose Here?” (Nharireyomurindi, December 1, 2003)