2. Kuziva chokwadi nezverufu kunotibatsira sei?

Vanhu vakawanda vanotya rufu, uye vamwe vanototyawo kunyange vanhu vakafa! Asi zvinotaurwa neBhaibheri nezverufu zvinogona kukunyaradza. Jesu akati: “Muchaziva chokwadi, uye chokwadi chichakusunungurai.” (Johani 8:32) Bhaibheri haridzidzisi kuti munhu ane mweya unosara uri mupenyu kana afa, sezvinodzidziswa nezvimwe zvitendero. Kureva kuti hakuna munhu anotambura kana afa. Saka kana vakafa vasina chavanoziva, hapana zvavanokwanisa kutiita. Hapana chikonzero chekuedza kuvafadza, kuvanamata kana kuvanyengeterera.

Vamwe vanhu vanoti vanogona kutaura nevakafa. Asi izvozvo hazviiti. Sezvatatodzidza, “vakafa havana kana chavanoziva.” Vaya vanofunga kuti vari kutaura nehama dzavo dzakafa vanogona kunge vachitotaura nemadhimoni ayo anonyepedzera kuva vanhu vakafa. Saka kuziva chokwadi nezverufu kunotidzivirira kumadhimoni. Jehovha anotiyambira kuti tisaedza kutaura nevakafa nekuti anoziva kuti madhimoni anogona kutikuvadza.—Verengai Dheuteronomi 18:10-12.

4. Kuziva chokwadi nezverufu kunotibatsira

Kuziva chokwadi nezverufu kunotisunungura pakutya vakafa. Verengai Muparidzi 9:10, mobva makurukura muchishandisa mubvunzo unotevera:

• Vakafa vane zvavanokwanisa kutiita here?

Chokwadi chiri muBhaibheri chinotidzivirira panhema dzekuti tinofanira kufadza vakafa kana kuvanamata. Verengai Isaya 8:19 uye Zvakazarurwa 4:11, mobva makurukura muchishandisa mubvunzo unotevera:

• Unofunga kuti Jehovha anonzwa sei paanoona mumwe munhu achinamata kana kuti achiedza kutsvaga rubatsiro kuvanhu vakafa?