Kusava Nedivi Ratinotsigira Kunorevei?

Jesu akadzidzisa kuti vateveri vake vanofanira kunge ‘vasiri venyika.’ (Johani 15:19) Izvi zvinosanganisira kusapindira mune zvematongerwo enyika uye muhondo. Chokwadi ndechekuti hapasi pese pazviri nyore kusava nedivi raunotsigira. Tinogona kutosekwa nevamwe. Tingaita sei kuti tisava nekwatakarerekera toramba takavimbika kuna Jehovha Mwari?

1. VaKristu vechokwadi vanoona sei hurumende dzevanhu?

VaKristu vanoremekedza hurumende. Tinoita zvakataurwa naJesu paakati, “dzorerai zvinhu zvaKesari kuna Kesari.” Izvi zvinoreva kuti tinoteerera mitemo yemunyika dzatinogara, yakadai seiya inotaura kuti tibhadhare mitero. (Mako 12:17) Bhaibheri rinodzidzisa kuti hurumende dzevanhu dzinotonga nekuti Jehovha ndiye akadzibvumira kutonga. (VaRoma 13:1) Saka tinoziva kuti masimba ehurumende ane paanogumira. Tinotenda kuti Mwari ndiye achagadzirisa matambudziko ari panyika achishandisa Umambo hwake hwekudenga.

2. Tingaratidza sei kuti hatina divi ratakarerekera?

Jesu akanga asingapindire mune zvematongerwo enyika uye ndiye watinotevedzera. Mumwe musi vanhu pavakaona chishamiso chakanga chaitwa naJesu vakaedza kumuita mambo wavo pasi pano, asi akavatiza. (Johani 6:15) Akazviitirei? Chikonzero chacho ndicho chaakazotaura paakati, “Umambo hwangu hahusi hwenyika ino.” (Johani 18:36) Sevadzidzi vaJesu tinoratidza nenzira dzinoverengeka kuti hatina kwatakarerekera. Imwe yacho ndeyekuti hatipindire muhondo. (Verengai Mika 4:3.) Tinoremekedza micherechedzo yenyika yakadai semireza, asi hatiisarute nekuti hazvina kumbosiyana nekuinamata. (1 Johani 5:21) Hatitsigiri kana kupikisa rimwe bato rezvematongerwo enyika kana kuti munhu anenge achida kuvhoterwa. Patinoita seizvi, tinoratidza kuti takavimbika zvakazara kuUmambo hwaMwari, inova ndiyo hurumende yake.

WEDZERA KUONGORORA

3. VaKristu vechokwadi havana divi ravakarerekera panyaya dzezvematongerwo enyika

Jesu nevateveri vake vakaita zvatinofanira kutevedzera. Verengai VaRoma 13:1, 5-7 uye 1 Petro 2:13, 14. Kana mapedza, onai VHIDHIYO, mobva makurukura mibvunzo inotevera:

VHIDHIYO: VaKristu Vechokwadi Havapindire Mune Zvematongerwo Enyika—Chikamu 1 (4:28)

• Nei tichifanira kuremekedza hurumende dzevanhu?

• Ndedzipi dzimwe nzira dzatinoratidza nadzo kuti tinozviisa pasi pehurumende?

Kana iri nguva yehondo, dzimwe nyika dzinogona kutaura kuti hadzina divi radzinotsigira, asi dzinenge dzichibatsira mativi acho ese ari kurwisana. Chii chinonyatsonzi kusava nekwatakarerekera? Verengai Johani 17:16. Kana mapedza, onai VHIDHIYO mobva makurukura mubvunzo unotevera:

VHIDHIYO: VaKristu Vechokwadi Havapindire Mune Zvematongerwo Enyika—Chikamu 2 (3:11)

• Kusava nekwatakarerekera kunorevei?

Ko kana hurumende dzevanhu dzikatiudza kuti tiite chimwe chinhu chinopesana nemutemo waMwari? Verengai Mabasa 5:28, 29. Kana mapedza, onai VHIDHIYO mobva makurukura mibvunzo inotevera:

VHIDHIYO: VaKristu Vechokwadi Havapindire Mune Zvematongerwo Enyika—Chikamu 3 (1:18)

• Kana mutemo wakagadzwa nevanhu ukapesana nemutemo waMwari isu tinofanira kuteerera ani?

• Pane mamwe mamiriro ezvinhu aungafunga nezvawo here ekuti muKristu angasarudza kusateerera hurumende dzevanhu?

4. Usava nekwawakarerekera mupfungwa dzako uye pane zvaunoita

Verengai 1 Johani 5:21. Kana mapedza, onai VHIDHIYO mobva makurukura mibvunzo inotevera:

VHIDHIYO: VaKristu Vechokwadi Vanofanira Kuva Neushingi—Kuti Vasava Nedivi Ravanotsigira (2:49)

• Muvhidhiyo chii chakaita kuti Ayenge asarudze kusapinda mubato rezvematongerwo enyika kana kuita zvinhu zvinoitwa pakutsigira nyika, zvakadai sekusaruta mureza?

• Unofunga kuti zvaakaita zvinoratidza kuchenjera here?

Ndeapi mamwe mamiriro ezvinhu anogona kutiisa pamuedzo panyaya yekusava nekwatakarerekera? Ngationei VHIDHIYO, tobva takurukura mibvunzo inotevera:

VHIDHIYO: Zvidzidzo Zvatinowana Kubva muNharireyomurindi—Ramba Usina Kwaunotsigira Munyika Isina Kubatana (5:16)

• Tingaratidze sei kuti hatina kwatakarerekera panokwikwidzana nyika yedu nedzimwe nyika pamitambo?

• Tingaramba sei tisina kwatakarerekera kunyange kana vezvematongerwo enyika vakasarudza kuita zvimwe zvinhu zvinotibata-bata?

• Zvinobuda munhau kana kuti vanhu vatinoswera navo vanogona sei kutikanganisa panyaya yekusava nekwatakarerekera?

PFUPISO

VaKristu vanoedza zvese zvavanogona kuti vasava nekwavakarerekera mupfungwa dzavo, mashoko avo, uye pane zvavanoita.

Kudzokorora

• Tinoona sei hurumende dzevanhu?

• Nei tisina divi ratinotsigira pane zvematongerwo enyika?

• Mamiriro api ezvinhu anogona kutipinza pamuedzo panyaya yekusava nekwatakarerekera?

WEDZERA PANE ZVAWADZIDZA

Dzimwe nguva tinogona kuzvipira kurasikirwa nechii kuti tirambe tisina kwatakarerekera panyaya dzezvematongerwo enyika?

Jehovha Haana Kumbobvira Atisiya (3:14)

Mhuri dzingaita sei kuti dzigare dzakagadzirira muedzo wekusava nekwavakarerekera pane zvematongerwo enyika?

Ramba Usina Divi Raunotsigira Uri Panoungana Vanhu Vakawanda (4:25)

Nei kudzivirira nyika yaunogara risiri iro basa rinokudzwa kupfuura mamwe ese?

“Zvinhu Zvese Zvinobvira Kuna Mwari” (5:19)

Ongorora kuti ungaite sei kuti usava wenyika paunosarudza kuti wopinda basa ripi.

“Mumwe Nomumwe Achatakura Mutoro Wake” (Nharireyomurindi, March 15, 2006)

MuKristu wese anotombopikiswa kana kutambudzwa. Izvozvo zvinofanira kutishamisa here?

1. Nei tichitarisira kuti tichatambudzwa?

Bhaibheri rinotaura zvakajeka kuti: “Vese vanoda kurarama vachizvipira kuna Mwari muna Kristu Jesu vachatambudzwawo.” (2 Timoti 3:12) Jesu akatambudzwa nekuti akanga asiri wenyika yaSatani. Isuwo hatisi venyika, saka hazvitishamisi kana tichitambudzwa nehurumende dzenyika ino nemasangano ezvitendero.—Johani 15:18, 19.

2. Tingaita sei kuti tigare takagadzirira kutambudzwa?

Tinofanira kusimbisa chivimbo chedu muna Jehovha iye zvino. Wana nguva yekunyengetera kwaari uye kuverenga Shoko rake zuva rega rega. Gara uchipinda misangano yeungano. Izvi zvichakubatsira kuramba wakasimba uye wakashinga paunotambudzwa, kunyange nevemumhuri. Muapostora Pauro, uyo aiwanzotambudzwa, akanyora kuti: “Jehovha ndiye mubatsiri wangu; handizotyi.”—VaHebheru 13:6.

Chimwe chinogona kutipa ushingi kugara tichiparidza. Kuparidza kunotidzidzisa kuvimba naJehovha uye kusatya vanhu. (Zvirevo 29:25) Kana ukava neushingi hwekuparidza iye zvino, uchakwanisa kuparidza kunyange kana hurumende ikarambidza basa redu.—1 VaTesaronika 2:2.

3. Kutsungirira kana tichitambudzwa kunotibatsira sei?

Hapana munhu anonakidzwa nekutambudzwa, asi patinotsungirira, kutenda kwedu kunosimba. Kutsungirira kunotiswededzawo pedyo naJehovha nekuti tinonyatsonzwa kuti ndiye ari kutibatsira patinofunga kuti hatichazvikwanisi. (Verengai Jakobho 1:2-4.) Jehovha anorwadziwa kana achitiona tichitambura, asi anofara kana tichitsungirira. Bhaibheri rinoti: “Kana mukatsungirira matambudziko nekuti munenge maita zvakanaka, izvozvo zvinofadza Mwari.” (1 Petro 2:20) Jehovha achapa vese vanotsungirira mubayiro weupenyu husingaperi munyika inenge isina vanopikisa kunamata kwechokwadi.—Mateu 24:13.

WEDZERA KUONGORORA

4. Unogona kutsungirira kupikiswa nevemumhuri

Jesu akagara ataura kuti vemumhuri medu vanogona kusatitsigira pakunamata kwedu Jehovha. Verengai Mateu 10:34-36, mobva makurukura mubvunzo uyu:

• Chii chinogona kuitika kana mumwe munhu mumhuri akasarudza kushumira Jehovha?

VHIDHIYO: Jehovha Akatitora (5:13)

• Ungaita sei kana mumwe munhu akakuudza kuti usiye kunamata Jehovha, angava weukama kana shamwari?

Verengai Pisarema 27:10 uye Mako 10:29, 30. Verengai rugwaro rumwe chete panguva, mokurukura muchishandisa mubvunzo unotevera:

• Vimbiso iyi ingakubatsira sei kana uchipikiswa nevemumhuri kana shamwari?

5. Ramba uchinamata Jehovha pasinei nekutambudzwa

VHIDHIYO: Kuratidza Ushingi Patinenge Tichitambudzwa (6:27)

• Chii chakusimbisa muvhidhiyo iyi?

Verengai Mabasa 5:27-29 uye VaHebheru 10:24, 25. Verengai rugwaro rumwe chete panguva, mokurukura muchishandisa mubvunzo unotevera:

• Nei zvichikosha kuti tirambe tichinamata Jehovha kunyange kana basa redu rekuparidza kana misangano zvikarambidzwa?

6. Jehovha achakubatsira kutsungirira

VHIDHIYO: Jehovha Mwari Achandisimbisa (3:40)

• Muvhidhiyo iyi, chii chakabatsira Zvapupu kutsungirira?

Verengai VaRoma 8:35, 37-39 uye VaFiripi 4:13. Verengai rugwaro rumwe chete panguva, mokurukura muchishandisa mubvunzo unotevera:

• Rugwaro urwu runokupa sei chivimbo chekuti unogona kutsungirira chero muedzo?

Verengai Mateu 5:10-12, mobva makurukura mubvunzo uyu:

• Chii chingaita kuti ufare paunenge uchitambudzwa?

PFUPISO

Jehovha anokoshesa zvatinoedza kuita kuti timushumire pasinei nekutambudzwa. Anogona kutibatsira kutsungirira!

Kudzokorora

• Nei vaKristu vachifanira kutarisira kuti vachatambudzwa?

• Ungaita sei iye zvino kuti ugare wakagadzirira panozouya kutambudzwa?

• Chii chingakubatsira kuti uve nechivimbo chekuti unogona kushumira Jehovha pasinei nemiedzo?

WEDZERA PANE ZVAWADZIDZA

Ona imwe hama yechidiki ichitsanangura kuti Jehovha akaibatsira sei payakaiswa mujeri nenyaya yekusatsigira zvematongerwo enyika.

Kutsungirira Pasinei Nekutambudzwa (2:34)

Ona kuti chii chakabatsira mumwe murume nemudzimai kushumira Jehovha kwamakore akawanda pasinei nekupikiswa.

Kushumira Jehovha Munguva Dzekuchinja Kwezvinhu (7:11)

Dzidza kuti ungaramba sei wakashinga paunenge uchitambudzwa.

“Gadzirira Iye Zvino Kuzotambudzwa” (Nharireyomurindi, July 2019)

Zvinofanira kutishamisa here kana tichitambudzwa nevemumhuri, uye tingatsungirira sei matambudziko atinosangana nawo patinotambudzwa mumhuri?

“Chokwadi Hachiunzi ‘Rugare, Asi Bakatwa’” (Nharireyomurindi, October 2017)