Ikoku kungatapura kurangarira kwaunoita zvinoitika zveBhaibheri. Ungarava nezvokugadza kwaEria mutsivi wake: “Iye . . . akawana Erisha mwanakomana waShafati achirima nenzombe dzakasungwa pamajoko ane gumi namaviri pamberi pake.” (1 Madzimambo 19:19, NW) Unofunga kuti ikoko kwakaitika mumwedzii, uye nyika ingave yakatarisika sei? Uye pana Johane 4:35, Jesu akati: “Ko imi hamuti: Kwasara mwedzi mina kucheka kwasvika? . . . Simudzai meso enyu, onai minda kuti yatoibvira kucheka.” Kunyange zvazvo iye akadudza nguva, unonzwisisa here kuti rini?

Uye Jesu akataura mashoko ari pana Johane 4:35 rini? Kucheka kwakanga kuri kure nemwedzi mina. Cherechedza kuti kucheka gorosi kwaivamba muna Nisani (March-April), inenge nguva yePaseka. Verenga uchidzokera shure mwedzi mina. Ikoko kunokusvitsa kuna Kisrevhi (November-December). Mvura dzakanga dzichiwedzera, nemvura dzakasimba zvikuru nomwaka unotonhora zvikuru mberi. Naizvozvo Jesu nenzira yakajeka akareva kucheka kwokufananidzira paakati: “Simudzai meso enyu, onai minda, kuti yatoibvira kucheka.”