Zvakadiniko na“Magwaro Anobvumikisa” Utatu?

KUNOTAURWA kuti mamwe magwaro anogovera chibvumikiso mukutsigira Utatu. Zvisinei, pakurava magwaro akadaro, tinofanira kuyeuka kuti ufakazi hweBhaibheri nohwenhau hahuzati huchitsigira Utatu.

Nongedzero ipi neipi yeBhaibheri inogoverwa sechibvumikiso inofanira kunzwisiswa mumashoko akapoteredza edzidziso isingachinji yeBhaibheri rose. Kazhinji kazhinji zvikuru revo yechokwadi yorugwaro rwakadarorwo inojekeswa namashoko akapoteredza endima dzakapoteredza.

Vatatu Muno Mumwe

NEW Catholic Encyclopedia inogovera “magwaro anobvumikisa” akadaro matatu asi inobvumawo, kuti: “Dzidziso yoUtatu Hutsvene haizati ichidzidziswa muT[estamende] Y[ekare]. MuT[estamende] I[tsva] hufakazi hwekaresa huri mutsamba dzaPauro, zvikurukuru 2 VaK. 13.13 [ndima 14 muna mamwe maBhaibheri], uye 1 VaK. 12.4-6. MuEvhangeri hufakazi hwoUtatu hunowanwa nomutoo wakajeka bedzi mumashoko akapfupikiswa orubhapatidzo aMateo 28.19.”

Mundima idzodzo “vanhu” vatatu vanorongwa sezvinotevera muThe New Jerusalem Bible. VaKorinte Wechipiri 13:13 (14) inoronga vatatu pamwe chete neiyi nzira: “Mungoni dzaShe Jesu Kristu, rudo rwaMwari nohushamwaridzani hwoMudzimu Mutsvene ngazvive nemi mose.” VaKorinte Wokutanga 12:4-6 inoti: “Kune zvipo zvizhinji zvakasiana, asi unogarova Mudzimu mumwe chetewo; kune nzira zhinji dzakasiana dzokubatira, asi anogarova Ishe mumwe cheteyo. Kune zvimiro zvizhinji zvakasiana zvomubato, asi mumunhu ari wose ndiMwari mumwe cheteyo anoshanda mazviri zvose.” Uye Mateo 28:19 inorava, kuti: “Naizvozvo, endai muite vadzidzi vamarudzi ose; muchivabhapatidza muzita raBaba neroMwanakomana neroMudzimu Mutsvene.”

Ko idzi ndima dzinoti here Mwari, Kristu, uye mudzimu mutsvene vanoumba Humwari hwoUtatu, kuti vatatu vakaenzana muchimiro, musimba, nomukusingagumi? Nyangwe, havazati, sezvo kuronga vanhu vatatu, vakadai saTapfumanei, Dambudzo, uye Garikai, kusati kuchireva kuti ivo vatatu muno mumwe.

Urwu rudzi rwenongedzero, inobvuma kudaro Cyclopedia of Biblical, Theological, and Ecclesiastical Literature yaMcClintock naStrong, “rwose rwunobvumikisa bedzi kuti pana vanhu vatatu vanodudzwa, . . . asi haruzati ruchibvumikisa, irwo rwumene pacharwo, kuti vose zvavo vatatu ndovorudzi rwoumwari, uye vane ruremekedzo rwakaenzana rwoumwari.”

Kunyange zvazvo ari mutsigiri woUtatu, manyuko iwawo anoti nezva 2 VaKorinte 13:13, (14): “Hatigoni kutaura nomutoo wakarurama kuti ivo vane chiremera chakaenzana, kana kuti chimiro chimwe chetecho.” Uye nezvaMateo 28:18-20 iwo anoti: “Zvisinei, urwu rugwaro ruchirangarirwa pacharwo rwumene, harungabvumikisiwo nomutoo unopedza nharo hunhu hwavatatu vanodudzwa, kana kuti uenzani hwavo kana kuti humwari hwavo.”

Apo Jesu akabhapatidzwa, Mwari, Jesu, uye mudzimu mutsvene vakadudzwawo mumashoko mamwe chetewo akapoteredza. Jesu “akaona mudzimu waMwari uchiburukira paari senjiva.” (Mateo 3:16) Ikoku, zvisinei, hakuzati kuchireva kuti vatatu ndimumwe. Abrahama, Isaka, uye Jakobho vanodudzwa pamwe chete kanoverengeka, asika ikoko hakuzati kuchivaita vavewo mumwe. Petro, Jakobho, uye Johane vanodudzwa pamwe chete, asi ikoko hakuzatiwo kuchivaita mumwe. Kupfuurirazve, sezvo mudzimu waMwari wakaburukira pana Jesu parubhapatidzo rwake, ikoku kunoratidzira kuti Jesu akanga asina mudzimu kutozosvikira panguva iyoyo. Ikoku zvakwakadaro, aigona sei kuve akave ari rutivi rwoUtatu uko iye aifanira kuve ari mumwe ane mudzimu mutsvene?

Imwe nongedzero inoreva nezvetatu pamwe chete inowanwa mushanduro dzekare dzeBhaibheri pana 1 Johane 5:7. Zvisinei, vazivi vanobvuma kuti aya mashoko pakuvamba akanga asati ari muBhaibheri asi akawedzerwa gare gare zvikuru. Vashanduri vazhinji vazvino uno nomutoo wakarurama vanobvisa iyi ndima isati iri yechokwadi.

Mamwe “magwaro anobvumikisa” anongobata bedzi noukama huri pakati pavaviri—Baba naJesu. Ngatirangarirei mamwe awo.

“Ini naBaba Tiri Vamwe”

RUGWARO irworwo rwuri pana Johane 10:30, runowanzonokorwa mashoko kutsigira Utatu, kunyange zvazvo pasina munhu wechitatu anodudzwa ipapo. Asi Jesu iye amene akaratidzira icho iye aireva kupfurikidza nokuva kwake “vamwe” naBaba. Pana Johane 17:21, 22, iye akanyengetera kuna Mwari kuti vadzidzi vake “vagova vamwe, kungofanana nemi, Baba, muri muhumwe neni uye ini muhumwe nemi, . . . kuti ivo vagovawo muhumwe nesu.” Jesu akanga achinyengeterera kuti vadzidzi vake vose vaizova chinhu chimwe here? Aiwa, sezvinooneka Jesu akanga achinyengetera kuti ivo vaizova vakabatana mumufungo nomudonzo sezo iye naBaba vaiva vakadaro.—Onawo 1 VaKorinte 1:10.

Pana 1 VaKorinte 3:6, 8, Pauro anoti: “Ini ndakasima, Aporo akadiridza . . . Iye unosima naiye unodiridza ndivamwe.” Pauro haana kureva kuti iye naAporo vaiva vanhu vaviri muno mumwe; akareva kuti ivo vakanga vakabatana mudonzo. Shoko rechiGiriki iro Pauro akashandisa pano nokuda kwa“vamwe” (hen) ishoko risina chimiro chechirume nechechikadzi, chaizvoizvo “(chinhu) chimwe,” rinoratidzira humwe mumushandira pamwe. Ndiro shoko rimwe chetero iro Jesu akashandisa pana Johane 10:30 kurondedzera ukama hwake naBaba vake. Ndirowo shoko rimwe chetero iro Jesu akashandisa pana Johane 17:21, 22. Naizvozvo apo iye akashandisa shoko rokuti “vamwe” (hen) mune zvinoitika izvozvi, iye akanga achitaura pamusoro pechinzwano chomufungo nedonzo.

Pamusoro paJohane 10:30, John Calvin (uyo akanga ari wezvoUtatu) akati mubhuku rinonzi Commentary on the Gospel According to John: “Vakare vakashandisa zvisina kururama ichi chikamu chamashoko kubvumikisa kuti Kristu . . . ndowechimiro chimwe chetecho naBaba. Nokuti Kristu haazati achitaura pamusoro pechinzwano chechimiro, asi pamusoro pebvumirano yaanayo naBaba.”

Mumashoko chaiwo akapoteredza endima dzapashure paJohane 10:30, Jesu akataura nesimba kuti mashoko ake akanga asati ari kambiro yokuva Mwari. Iye akabvunza vaJudha vakasvika nomutoo usina kururama pamhedziso iyeyo uye vakada kumutaka namabwe, kuti: “Neiko imi muchindipomera kumhura nokuti ini, ndakaitwa mutsvene ndokutumwa munyika naBaba, ndakati, ‘ndiri Mwanakomana waMwari’?” (Johane 10:31-36, NE) Aiwa, Jesu akataura kuti iye akanga, asati ari Mwari Mwanakomana, asi Mwanakomana waMwari.

“Akazviita Amene Akaenzana naMwari” Here?

RUMWE rugwaro runopiwa sorunotsigira Utatu ndiJohane 5:18. Inoti vaJudha (sapana Johane 10:31-36) vakada kuuraya Jesu nokuti “iye aiidzawo Mwari Baba vake amene, achizviita amene akaenzana naMwari.”

Asika ndianiko akataura kuti Jesu akanga achizviita amene akaenzana naMwari? Handi Jesu. Iye akazvidzivirira amene papomero iyeyo yenhema mundima imene inotevera (19), achiti: “Kune iyi pomero Jesu akapindura, kuti: . . . ‘Mwanakomana haagoni kuita chinhu iye amene; iye anogona kuita bedzi icho iye anoona Baba vachiita.’”—JB.

Kupfurikidza naikoku, Jesu akaratidzira vaJudha kuti iye akanga asati akaenzana naMwari uye nokuda kwechikonzero ichecho haati aigona kuita chinhu chokuzvitangira iye amene. Tinogona here kufungidzira mumwe munhu akaenzana naMwari Wamasimba ose achitaura kuti iye haagoni “kuita chinhu pachake amene”? (Enzanisira Dhanieri 4:34, 35.) Nomutoo unofadza, mashoko akapoteredza apose pari paviri apana Johane 5:18 na 10:30 anoratidzira kuti Jesu akazvidzivirira iye amene papomero dzenhema dzinobva kuvaJudha avo, savezvoUtatu, vakanga vachisvika pamhedziso dzisina kururama!

“Akaenzana naMwari” Here?

PANA VaFiripi 2:6 Douay Version (Dy) yeKaturike ya 1609 inoti nezvaJesu: “Uyo ari muchimiro chaMwari, haana kukufunga kuva ugororo kuva akafanana naMwari.” King James Version (KJ) ya 1611 inorava zvakangofananawo. Chiverengero chakati kuti cheshanduro dzakadaro chichiri kushandiswa navamwe kutsigira pfungwa yokuti Jesu akanga akaenzana naMwari. Asika cherekedza mashandurire anoita dzimwe shanduro iyi ndima:

1869: “uyo, ari muchimiro chaMwari, haana kukurangarira kuva chinhu chinofanira kubvutwa kuva akaenzana naMwari.” The New Testament, rakanyorwa naG. R. Noyes.

1965: “Iye—worudzi rwoumwari zvamazvirokwazvo!—nomutoo wokuzvivimba iye haana kutongozviita amene akaenzana naMwari.” Das Neue Testament, chinyorwa chakavandudzwa, chakanyorwa naFriedrich Pfäfflin.

1968: “uyo, kunyange zvazvo aiva ari muchimiro chaMwari, haana kurangarira kuva akaenzana naMwari sechinhu chokuzviitira chake amene nomutoo wamakaro.” La Bibbia Concordata.

1976: “Iye akanguve ari worudzi rwoUmwari, asi iye haana kufunga kuti kupfurikidza nesimba anofanira kuedza kuva akaenzana naMwari.” Today’s English Version.

1984: “uyo, kunyange zvazvo iye akanga achirarama muchimiro chaMwari, haana kurangarira kubvuta, ndiko kuti, kuti iye anofanira kuva akaenzana naMwari.” New World Translation of the Holy Scriptures.

1985: “Uyo, ari muchimiro chaMwari, haana kurangarira kuenzana naMwari sechimwe chinhu chinofanira kubvutwa.” The New Jerusalem Bible.

Zvisinei, vamwe vanotaura kuti kunyange idzi shanduro dzakarurama zvikuru dzinoratidzira kuti (1) Jesu akanga achitova nouenzani asi haana kuda kuomerera pahuri kana kuti (2) akanga asingadi kubvuta uenzani nokuti iye akanga achitova nahwo.

Muna ikoku, Ralph Martin, muThe Epistle of Paul to the Philippians, anoti nezvechiGiriki chapakuvamba: “Zvisinei, kunopanikirika kana pfungwa yeshoko rechiito ingagona kubva parevo yayo chaiyo yo‘kubvuta’, ‘kunakura namasimba masimba’ kuenda kune yeyo yokuti ‘kubatisisa.’” The Expositor’s Greek Testament rinotiwo: “Hatigoni kuwana chikamu chamashoko chipi nechipi apo ἁρπάζω [har·paʹzo] kana kuti ripi neripi ramashoko akatorwa mariri rine pfungwa yo‘kubatisisa,’ ‘kuchengeta’. Nomutoo usingachinji rinoratidzika kuva rinoreva ‘kubvuta,’ ‘kunakura nomutoo wamasimba masimba’. Nokuda kweichi chikonzero hakubvumiki kupinza mufungo wechokwadi wokuti ‘kubvuta’ muno uri wakasiana chose chose, wokuti ‘kubatisisa.’”

Kubva mune zvataurwa pakuvamba kuri pachena kuti vashanduri veshanduro dzakadai seDouay neKing James vanomonyanisa mirau kuti vatsigire madonzo oUtatu. Mukusiana chose nokutaura kuti Jesu aifunga kuti kwakanga kwakakodzera kuva akaenzana naMwari, chiGiriki chaVaFiripi 2:6, pachinorahwa nomutoo usina kwachakarerekera, chinoratidzira zvakasiana chaizvoizvo, kuti Jesu haana kukufunga kuti kwakanga kwakakodzera.

Mashoko akapoteredza endima dzakapoteredza (3-5, 7, 8, Dy) anojekesa kuti ndima 6 inofanira kunzwisiswa sei. VaFiripi vakakurudzirwa, kuti: “Mukuzvininipisa, mumwe nomumwe ngaarangarire vamwe savari nani zvikuru kupinda ivo vamene.” Ipapo Pauro anoshandisa Kristu somuenzaniso wakatanhamara weichi chimiro chendangariro, achiti: “Iyi ndangariro ngaive mamuri, iyo yakanga iriwo muna Kristu Jesu.” I“ndangariro”iko? Ko ‘kusakufunga kuva ugororo kuva akaenzana naMwari’ here? Aiwa, ikoku kwaizova mhesano chaiyoiyo yepfundo riri kusimbiswa! Panzvimbo pakwo, Jesu, uyo ‘akarangarira Mwari saari nani zvikuru kupfuura iye amene,’ aisazotongo‘bvuta uenzani naMwari,’ asi panzvimbo pakwo aka“zvininipisa iye amene, achiva anoteerera kusvikira kurufu.”

Zvamazvirokwazvo, iyeyo haigoni kuva inotaura pamusoro porutivi rwupi norwupi rwaMwari Wamasimba ose. Yakanga ichitaura pamusoro paJesu Kristu, uyo akaenzanisira nomutoo wakakwana pfundo raPauro pano—ukoshi hwokuzvininipisa nokuteerera kuMukuru noMusiki womumwe, Jehovha Mwari.

“Ndini Iye”

PANA Johane 8:58 chiverengero chakati kuti cheshanduro, somuenzaniso, The Jerusalem Bible, rinoratidzira Jesu achiti: “Abrahama asati ambovapo, Ndini Iye.” Ko Jesu pano akanga achidzidzisa here, sokusimbisa kunoita vezvoUtatu, kuti iye aizivikanwa nezita rechiratidziro rokuti “Ndini Iye”? Uye, sokutaura kwavanoita, ikoku kunoreva here kuti iye akanga ari Jehovha womuMagwaro echiHebheru, sezvo King James Version pana Eksodho 3:14 ichiti: “Mwari akati kuna Mosesi, NDINI IYE WANDIRI IYE”?

Pana Eksodho 3:14 (KJ) chikamu chamashoko chokuti “NDINI IYE” chinoshandiswa sezita rechiratidziro raMwari kuratidzira kuti iye airarama chaizvoizvo uye aizoita zvaakapikira. The Pentateuch and Haftorahs, rakapepetwa naDr. J. H. Hertz, rinoti nezvechikamucho chamashoko: “Kuna vaIsraeri vari muusungwa, revo yaizova, ‘Kunyange zvazvo Iye achigere kuratidzira simba Rake kwamuri, Iye achaita kudaro; Iye ndowokusingagumi uye achakununurai zvamazvirokwazvo.’ Vechizvino zvino vazhinjisa vanotevera Rashi [mutsinhiri weBhaibheri neGamuchidzanwa rechiJudha wechiFrench] mukushandura [Eksodho 3:14] ‘Ndichava chandichava.’”

Kutaura kuri pana Johane 8:58 kwakasiana chose chose nouko kunoshandiswa pana Eksodho 3:14. Jesu haana kukushandisa sezita kana kuti zita rechiratidziro asi somutoo wokutsanangura kurarama kwake asati ava munhu. Nokudaro, cherekedza kuti dzimwe shanduro dzeBhaibheri dzinoshandura sei Johane 8:58:

1869: “Kubvira Abrahama asati avapo, ndave ndiripo.” The New Testament, rakanyorwa naG. R. Noyes.

1935: “Ndakanga ndiripo Abrahama asati aberekwa!” The Bible—An American Translation, rakanyorwa naJ. M. P. Smith naE. J. Goodspeed.

1965: “Abrahama asati aberekwa, ndakanga ndichitova wandiri.” Das Neue Testament, rakanyorwa naJörg Zink.

1981: “Ndakanga ndiri mupenyu Abrahama asati aberekwa!” The Simple English Bible.

1984: “Abrahama asati avapo, ndave ndiripo.” New World Translation of the Holy Scriptures.

Nokudaro, mufungo chaiwo wechiGiriki unoshandiswa pano ndowokuti “dangwe” rakasikwa raMwari, Jesu, akanga anguve aripo Abrahama asati aberekwa.—VaKorose 1:15; Zvirevo 8:22, 23, 30; Zvakazarurwa 3:14.

Zvakare, mashoko akapoteredza anoratidzira ikoku kuva kunzwisisa kwakarurama. Nguva ino vaJudha vaida kutaka namabwe Jesu nokuda kwokutaura kwo“kuve akaona Abrahama” kunyange zvazvo, sokutaura kwavakaita, iye akanga achigere kuva nezera ramakore 50. (Ndima 57) Mhinduro yomuzvarirwo yaJesu yakanga iri yokutaura zvokwadi pamusoro pezera rake. Naizvozvo nomutoo womuzvarirwo akavaudza kuti “iye akanga ari mupenyu Abrahama asati aberekwa!”—The Simple English Bible.

“Shoko Rakanga Riri Mwari”

PANA Johane 1:1 The Holy Bible in Union Shona rinorava, kuti: “Pakutanga Shoko rakanga riripo, Shoko rakanga riri kuna Mwari, Shoko rakanga riri Mwari.” VezvoUtatu vanotaura kuti ikoku kunoreva kuti “Shoko” (chiGiriki, ho loʹgos) rakauya kupasi saJesu Kristu rakanga riri Mwari Wamasimba ose iye amene.

Zvisinei, ona kuti pano zvakare mashoko akapoteredza anovanzarika hwaro nokuda kwokunzwisisa kwakarurama. Kunyange The Holy Bible in Union Shona rinoti, “Shoko rakanga riri kuna Mwari.” (Kutsveyamiswa kwamashoko ndokwedu.) Mumwe munhu uyo ‘ano’ mumwe munhu haangagoni kuva munhu mumwe cheteyo iyeyo. Mukubvumirana naikoku, Journal of Biblical Literature, rakapepetwa naJesuit Joseph A. Fitzmyer, rinoti kana rutivi rwapashure rwaJohane 1:1 rwakadudzirwa kurava Mwari, ikoku “ipapo kwaizopesana nechitsama chamashoko chapamberi,” icho chinoti Shoko rakanga riri kuna Mwari.

Cherekedzawo, kuti dzimwe shanduro dzinoshandura sei urwu rutivi rwendima:

1808: “uye shoko rakanga riri mwari [chiNgezi, “a god”].” The New Testament in an Improved Version, Upon the Basis of Archbishop Newcome’s New Translation: With a Corrected Text.

1864: “uye mwari akanga ari shoko [“a god”].” The Emphatic Diaglott, kurava kwapakati pemitsetse, rakanyorwa naBenjamin Wilson.

1928: “uye Shoko rakanga riri munhu woumwari.” La Bible du Centenaire, L’Evangile selon Jean, rakanyorwa naMaurice Goguel.

1935: “uye Shoko rakanga riri roumwari.” The Bible—An American Translation, rakanyorwa naJ. M. P. Smith naE. J. Goodspeed.

1946: “uye Shoko rakanga riri rorudzi rwoumwari.” Das Neue Testament, rakanyorwa naLudwig Thimme.

1950: “uye Shoko rakanga riri mwari [“a god”].” New World Translation of the Christian Greek Scriptures.

1958: “uye Shoko rakanga riri Mwari [“a God”].” The New Testament, rakanyorwa naJames L. Tomanek.

1975: “uye Shoko rakanga riri mwari (kana kuti, rorudzi rwoumwari).” Das Evangelium nach Johannes, rakanyorwa naSiegfried Schulz.

1978: “uye Logos akanga ari worudzi rwakafanana namwari.” Das Evangelium nach Johannes, rakanyorwa naJohannes Schneider.

Pana Johane 1:1 shoko rechiGiriki rinoshandiswa sezita rokuti the·osʹ (mwari) rinooneka kaviri. Kuoneka kwokutanga kunonongedzera kuna Mwari Wamasimba ose, uyo Shoko rakanga rinaye (“uye Shoko [loʹgos] rakanga riri kuna Mwari [chimiro chathe·osʹ]”). Uyu the·osʹ wokutanga anotangirwa neshoko rokuti ton (chiNgezi, the), chimiro cheshoko chairo rechiGiriki rinonongedzera kumunhu akatsaukana, mune chinoitika chino Mwari Wamasimba ose (“uye Shoko rakanga riri kuna Mwari [chiNgezi, the God]”).a

Kuno rumwe rutivi, hapana shoko rinotangira the·osʹ wechipiri pana Johane 1:1. Naizvozvo shanduro yeshoko neshoko yaizorava kuti, “uye Shoko rakanga riri mwari” (and god was the Word). Bva taona kuti vashanduri vazhinji vanoshandura uyu the·osʹ wechipiri (shoko rinorondedzera) so“woumwari,” “akafanana naMwari,” kana kuti “mwari” (a god). Ko ivo vanoita ikoku pamusoro pechiremerai?

Mutauro wechiGiriki Wakarovedzeka une shoko chairo (chiNgezi, “the”), asi wakanga usina shoko risiri chairo (chiNgezi, “a” kana kuti “an”). Naizvozvo apo shoko rinorondedzera risati richitangirwa neshoko chairo, ringava risiri chairo, kuchitsamira pamashoko akapoteredza.

Journal of Biblical Literature rinoti kutaura kwokuti “ane shoko rinorondedzera [risina shoko chairo] rinotangira shoko rechiito, zvikurukuru kunoratidzira chimiro murevo.” Sokuratidzira kunoita Journal, ikoko kunoratidzira kuti iro loʹgos anogona kufananidzirwa namwari (a god). Rinotiwo nezvaJohane 1:1: “Simba rinoratidzira chimiro cheshoko rinorondedzera rakatanhamara zvikuru zvokuti zita rokuti [the·osʹ] haringagoni kuva rinorangarirwa seshoko chairoiro.”

Naizvozvo Johane 1:1 inosimbisa chimiro cheShoko, kuti iye akanga ari “woumwari,” “akafanana naMwari,” “mwari” [“a god”], asi kwete Mwari Wamasimba ose. Ikoko kunotsinhirana norumwe rutivi rwose rwasara rweBhaibheri, urwo runoratidzira kuti Jesu, anoidzwa pano kunzi “Shoko” mubasa rake soMutauriri waMwari, akanga ari munhu anozviisa pasi anoteerera akatumwa kupasi noMukuru wake, Mwari Wamasimba ose.

Kune dzimwe ndima zhinji dzeBhaibheri umo vanenge vashanduri vose mune mimwe mitauro inoshandisa shoko chairo neshoko risiri chairo nomutoo usingachinji vanoisa shoko risiri chairo rokuti (“a”) pakushandura mitsetse yamashoko yechiGiriki ine chimiro chimwe chetecho. Somuenzaniso, pana Marko 6:49, apo vadzidzi vakaona Jesu achifamba pamusoro pemvura, King James Version inoti: “Ivo vakafunga kuti rakanga riri dzangaradzimu [chiNgezi, “a spirit”].” MuchiGiriki Chakarovedzeka, hamuna shoko risiri chairo (“a”) pamberi pe“dzangadzimu.” Asi dzinenge shanduro dzose mune mimwe mitauro inoshandisa shoko chairo neshoko risiri chairo dzinowedzera shoko risiri chairo (“a”) kuitira kuti kushandura kukodzerane namashoko akapoteredza. Nomutoo wakafanana, Johane 1:1 zvainoratidzira kuti Shoko rakanga riri kuna Mwari, iro harati raigona kuva Mwari Wamasimba ose asi rakanga riri “mwari” (“a god”) kana kuti “roumwari.”

Joseph Henry Thayer, wezvoumwari rworudzidziso nomuzivi uyo akashanda paAmerican Standard Version, nomutoo wakapfava iye akati: “Logos akanga ari woumwari, kwete Mwari iye amene.” Uye Jesuit John L. McKenzie akanyora mune rake rinonzi Dictionary of the Bible, kuti: “Jn 1:1 nomutoo chaiwoiwo anofanira kushandurwa kuti . . . ‘shoko rakanga riri munhu woumwari.’”

Kupunza Murairo Here?

ZVISINEI, vamwe vanotaura kuti shanduro dzakadaro dzinoputsa murau wokurongwa kwomutauro wechiGiriki Warovedzeka wakabudiswa nomuzivi wechiGiriki E. C. Colwell kare muna 1933. Akasimbisa kuti muchiGiriki shoko rinorondedzera “rine shoko [chairo] parinotevera shoko rechiito; harizati rine shoko [chairo] apo rinotangira shoko rechiito.” Kupfurikidza naikoku iye akareva kuti shoko rinorondedzera rinotangira shoko rechiito rinofanira kunzwisiswa sokunge kuti raiva neshoko chairo (“the”) pamberi paro. Pana Johane 1:1 zita rechipiri (the·osʹ), shoko rinorondedzera, rinotangira shoko rechiito—“uye [the·osʹ] rakanga riri Shoko.” Naizvozvo, Colwell akataura kuti, Johane 1:1 anofanira kurava kuti “uye Shoko rakanga riri Mwari [the God].”

Asika rangarira mienzaniso miviri bedzi inowanwa pana Johane 8:44. Ipapo Jesu anotaura nezvaDhiabhorosi: “Iyeyo akanga ari muurayi [chiNgezi, “a manslayer”] uye “iye murevi wenhema [chiNgezi, “a liar”].” Kungofanana napana Johane 1:1, mashoko anorondedzera (“muurayi” uye “murevi wenhema”) anotangira mashoko echiito (“akanga” uye “ari”) [chiNgezi, “was” uye “is”] muchiGiriki. Hapana shoko chairo riri pamberi pamashoko anoshandiswa munzvimbo mamazita nemhaka yokuti muchiGiriki Chakarovedzeka makanga musina shoko risi chairo. Asi shanduro zhinjisa mune mimwe mitauro inoshandisa shoko chairo neshoko risiri chairo vanoisa shoko risiri chairo (“a”) nokuti kunodikanwa nokurongwa kwomutauro wechiGiriki namashoko akapoteredza.—Onawo Marko 11:32; Johane 4:19; 6:70; 9:17; 10:1; 12:6.

Colwell aitofanira kubvuma ikoku pamusoro peshoko rinorondedzera, nokuti iye akati: “Rinova Shoko risiri chairo [“a” kana kuti “an”] mune iyi nzvimbo bedzi apo mashoko akapoteredza anokuda.” Naizvozvo kunyange iye achibvuma kuti apo mashoko akapoteredza anokuda, vashanduri vangaisa shoko risiri chairo pamberi pezita mune urwu rudzi rwechimiro chomutsetse wamashoko.

Ko mashoko akapoteredza anoda shoko risiri chairo pana Johane 1:1 here? Hungu, nokuti chipupuriro cheBhaibheri rose ndechokuti Jesu haazati ari Mwari Wamasimba ose. Nokudaro, hauzi murau unopanikirika waColwell wokurongwa kwomutauro, asi mashoko akapoteredza anofanira kutungamirira mushanduri muzvinoitika zvakadaro. Uye kunooneka mushanduro zhinji dzinoisa shoko risiri chairo (“a”) pana Johane 1:1 nomune dzimwe nzvimbo kuti vazivi vazhinji havabvumirani nomurau wakadaro wokuisira, ndozvinoitawo Shoko raMwari.

Hakurwisani

KO KUTAURA kuti Jesu Kristu ndi“mwari” kunorwisana nedzidziso yeBhaibheri yokuti kuna Mwari mumwe bedzi here? Aiwa, nokuti dzimwe nguva Bhaibheri rinoshandisa shoko irero kutaura nezvezvisikwa zvine simba. Pisarema 8:5 rinorava, kuti: “Imi makapfuurirawo kumuita [munhu] muduku zvishoma kupinda vakafanana namwari [chiHebheru, ʼelo·himʹ],” ndiko kuti, ngirozi. Mukudzivirira kwaJesu pomero yavaJudha, yokuti iye aitaura kuva Mwari, iye akacherekedza kuti “Mutemo unoshandisa shoko rokuti vamwari vaavo shoko raMwari rakanga richitaurwa kwavari,” ndiko kuti, vatongi vohunhu. (Johane 10:34, 35, JB; Pisarema 82:1-6) Kunyange Satani anonzi “mwari wetsika ino yezvinhu” pana 2 VaKorinte 4:4.

Jesu ane nzvimbo yakakwirira zvikuru kupfuura ngirozi, vanhu vasina kukwana, kana kuti Satani. Avo zvavanotaura nezvavo sa“vamwari,” vane simba, zvamazvirokwazvo Jesu anogona kuva uye ndi “mwari.” Nemhaka yenzvimbo yake yakasiana chose muwirirano naJehovha, Jesu ndi“Mwari Ane Simba.”—Johane 1:1; Isaya 9:6.

Asika kuti “Mwari une simba” kune bhii rakwo guru hakuzati here kuchiratidzira kuti Jesu munzira yakati akaenzana naJehovha Mwari? Nyangwe napaduku pose zvapo. Isaya akangoporofita bedzi ikoku kuva rimwe ramazita mana ayo Jesu aizoidzwa nawo, uye mumutauro weShona mazita akadaro ana mabhii makuru ebhii rokutanga. Zvisinei hazvo, kunyange zvakadaro Jesu akanzi “une simba,” panogona kuva bedzi nomumwe uyo ari “Wamasimba ose.” Kuidza Jehovha Mwari kuti “Wamasimba ose” kwaizova kusingakoshi kutoti paiva navamwe vainziwo vamwari asi vaiva nenzvimbo duku kana kuti yakaderera.

Bulletin of the John Rylands Library muEngland inoti mukuwirirana nowezvoruzivo rwoumwari weKaturike Karl Rahner, kunyange the·osʹ richishandiswa mumagwaro akadai saJohane 1:1 mukutaura nezvaKristu, “hapana nechimwe cheizvi zvinoitika apo ‘theos’ rinoshandiswa somutoo wakadai sowokuzivisa Jesu aine uyo kune imwe nzvimbo muTestamende Itsva anofananidzira ‘ho Theos,’ ndiko kuti, Mwari Mukuru.” Uye Bulletin inowedzera, kuti: “Kudai vanyori veTestamende Itsva vaikudavira kuva kunokosha kuti vakatendeka vanofanira kubvuma Jesu sa‘Mwari’, ko kunodokuva kusavapo kwakakwana kweichi chimiro bedzi chokubvuma muTestamende Itsva kunotsanangurika here?”

Asika zvakadiniko nokutaura kwomuapostora Tomasi, kwokuti, “Ishe wangu naMwari wangu!” kuna Jesu pana Johane 20:28? Kuna Tomasi, Jesu akanga akaita sa“mwari,” zvikurukuru mumigariro yamanenji yakakuchidzira kukuwa kwake. Vamwe vazivi vanokarakadza kuti Tomasi angava akaita kukuwa kwokunzwa kwokushamisika, kwakataurwa kuna Jesu asi kwakanangidzirwa kuna Mwari. Pasinei hapo nokuti ndichinoitika chipi kana chipi, Tomasi haana kufunga kuti Jesu akanga ari Mwari Wamasimba ose, nokuti iye navamwe vaapostora vose vaiziva kuti Jesu haana kutongotaura kuva Mwari asi akadzidzisa kuti Jehovha oga bedzi ndiye “Mwari bedzi wechokwadi.”—Johane 17:3.

Zvakare, mashoko akapoteredza anotibetsera kunzwisisa ikoku. Mazuva anoverengeka pamberi pezuva irero Jesu akamutswa akanga audza Maria Magdharene kundozivisa vadzidzi vake, kuti: “Ini ndinokwira kuna Baba vangu, nokuna Baba venyu nokuna Mwari wangu, uye Mwari wenyu.” (Johane 20:17) Kunyange zvazvo Jesu akanga atomutswa somudzimu une simba, Jehovha akanga achiri Mwari wake. Uye Jesu akapfuurira kutaura nezvaIye sowakadaro kunyange mubhuku rokupedzisira reBhaibheri, pashure pokunge iye apiwa mbiri.—Zvakazarurwa 1:5, 6; 3:2, 12.

Ndima nhatu bedzi pashure pokukuwa kwaTomasi, pana Johane 20:31, Bhaibheri rinojekesazve nhauyo kupfurikidza nokuti: “Izvi zvakanyorwa kuti imi mudavire kuti Jesu ndiye Kristu Mwanakomana waMwari,” kwete Mwari Wamasimba ose. Uye rakareva “Mwanakomana” nenzira chaiyoiyo, sezvakwakadaro kuna baba nomwanakomana wokunyama, kwete sorutivi rwakati rwechakavanzika rwoHumwari hwoUtatu.

Inofanira Kutsinhirana neBhaibheri

KUNOTAURWA kuti mamwe magwaro anoverengeka anotsigira Utatu. Asika iwawa akafanana naawa akurukurwa pamusoro apa mukuti, paanosanonzverwa, haapi tsigiro chaiyoiyo. Magwaro akadaro anongoratidzira bedzi kuti pakurangarira tsigiro ipi neipi inotaurwa nokuda kwoUtatu, munhu anofanira kubvunza, kuti: Ko dudziro inotsinhirana nedzidziso isingachinji yeBhaibheri rose here—kuti Jehovha Mwari oga bedzi ndiye Mukuru? Kana isati, ipapo dudziroyo inofanira kuva ine chikanganiso.

Tinodawo kuyeuka kuti hapatongorina norumwe “rugwaro runobvumikisa” runoti Mwari, Jesu, uye mudzimu mutsvene ndivamwe muHumwari hwoutatu akavanzika. Hapana norumwe rugwaro munzvimbo ipi neipi muBhaibheri runoti vose vari vatatu vakafanana muchimiro, musimba, nomukusingagumi. Bhaibheri harichinji mukuzivisa Mwari Wamasimba ose, Jehovha, soMukuru oga bedzi, Jesu soMwanakomana wake akasikwa, uye mudzimu mutsvene sesimba rinobate basa raMwari.

[Mashoko Omuzasi]

[Mashoko okukwezva vaverengi ari papeji 24]

“Vakare vakashandisa zvisino kururama [Johane 10:30] kubvumikisa kuti Kristu . . . ane chimiro chakafanana nechaBaba.”—Commentary on the Gospel According to John, rakanyorwa naJohn Calvin

[Mashoko okukwezva vaverengi ari papeji 27]

Mumwe munhu “ano” mumwe munhu haagoniwo kuva mumwe munhu iyeyo

[Mashoko okukwezva vaverengi ari papeji 28]

“Logos akanga ari woumwari, kwete Mwari iye amene.”—Joseph Henry Thayer, muzivi weBhaibheri

[Mifananidzo iri papeji 24, 25]

Jesu akanyengetera kuna Mwari kuti vadzidzi vake “vose vagova vamwe,” sezvo iye naBaba vake “vari vamwe”

[Mufananidzo uri papeji 26]

Jesu akaratidzira vaJudha kuti iye akanga asina kuenzana naMwari, achitaura kuti iye aigona ‘kusaita chinhu iye amene asi bedzi icho akaona Baba vake vachiita’

[Mufananidzo uri papeji 29]

Bhaibheri zvarinoidza vanhu, ngirozi, kunyange Satani, kuti “vamwari,” kana kuti vane simba, Jesu mukuru mudenga anogona nomutoo wakakodzera kuva anonzi “mwari”