Nemhaka yokuti apo Musiki worudzi rwomunhu akapa mukadzi wokutanga muroorano kumurume wokutanga, Akagadza murume kuva musoro womudzimai wake navana vavo vomunguva yemberi. Ikoku kwaiva bedzi kune mufungo. Muboka ripi neripi rakarongwa ravanhu, mumwe munhu anofanira kutungamirira ndokuita zvisarudzo zvokupedzisira. Muchinoitika cheroorano, Musiki akaraira kuti “murume ndiye musoro womudzimai wake.”—VaEfeso 5:23, NW.

Haasati Ari Mudzvinyiriri

Murume anofanira kushandisa sei chiremera chake? Kupfurikidza nokutevera muenzaniso wakaisvonaka woMwanakomana waMwari. Bhaibheri rinoti: “Murume musoro womudzimai wake saKristuwo ari musoro weungano, iye achiva muponesi wouyu muviri. Varume, pfuurirai kuda vadzimai venyu, kungofanana naKristu akadawo ungano ndokuzvipa amene nokuda kwayo.” (VaEfeso 5:23, 25, NW) Kushandisa umusoro kwaJesu Kristu kwakanga kuri chikomborero kuungano. Iye akanga asati ari mudzvinyiriri. Iye haana kuita kuti vadzidzi vake vanzwe vachiganhurirwa kana kuti kudzvinyirirwa. Panzvimbo pezvo, iye akawana ruremekedzo rwavose kupfurikidza nokuvabata kwake kworudo netsitsi. Muenzaniso wakaisvonaka zvakadini wokuti varume vatevere mukubata kwavo vadzimai vavo!

Kune varume, kunyanguvezvo, vasingateveri uyu muenzaniso wakaisvonaka. Ivo vanoshandisa umusoro hwavo hwakapiwa naMwari nenzira youdyire, panzvimbo pokuda kwezvakanakira vadzimai vavo. Ivo vanodzora vadzimai vavo nomutoo wokudzvinyirira, vachiraira kuzviisa pasi kwakakwana uye kazhinji kazhinji vasingavabvumidzi kuita zvisarudzo zvipi nezvipi nokuda kwavo vamene. Nenzira inonzwisisika, vadzimai vavarume vakadaro kazhinji kazhinji vanorarama upenyu husingafadzi. Uye murume akadaro anotamburawo mukuti anokundikana kuwana ruremekedzo rworudo rwomudzimai wake.

Chokwadi, Mwari anoda kuti mudzimai aremekedze nzvimbo ine murume wake somusoro wemhuri. Asi kana murume achishuva kufarikanya ruremekedzo rwake rwapachokwadi nokuda kwake somunhu, anofanira kuruwana, uye nzira yakanakisisa yokuita ikoko iri kupfurikidza nokuita nenzira ine mufungo nokusakurira mavara akaisvonaka, oumwari somusoro wemhuri.

Kuzviisa Pasi Kune Mwero

Chiremera chomurume pamudzimai wake hachisi chachose chose. Munzira dzakati kuzviisa pasi kwohudzimai kunogona kuenzaniswa nokuzviisa pasi kwomuKristu pomutongi wenyika. Mwari anoraira kuti muKristu anofanira “kuva pasi pezviremera zvikuru.” (VaRoma 13:1, NW) Bva uku kuzviisa pasi nguva dzose kunofanira kudzikamiswa neizvo tine ngava nazvo kuna Mwari. Jesu akati: “Dzorerai zvinhu zvaKesari kuna Kesari, asi zvinhu zvaMwari kuna Mwari.” (Marko 12:17, NW) Kana Kesari (hurumende yenyika) akaraira kuti timupe chiri chaMwari, tinoyeuka izvo muapostora Petro akataura: “Tinofanira kuteerera Mwari somutongi panzvimbo pavanhu.”—Mabasa 5:29, NW.

Murume achachengeta rudo noruremekedzo zvomudzimai wake apo anoratidzira mavara oumwari omusoro wake, Jesu Kristu, uyo akaraira vateveri vake kudana. (Johane 13:34) Kunyange zvazvo murume achikanganisa uye asina kukwana, kana achishandisa chiremera chake mutsinhirano noumusoro hukuru hwaKristu, anoita kuti kuve nyore zvikuru kuti mudzimai wake ave anofara kuva naye somusoro wake. (1 VaKorinte 11:3) Kana mudzimai akasakurira mavara echiKristu okuzvininipisa nomutsa worudo, hakuna kumuomera kuzviisa amene pasi pomurume wake.

Zvimiro zvakadaro zvinofanira kusakurirwa muungano. Uye zvinofanira zvikuru kusakurirwa pakati pomurume nomudzimai mumusha wechiKristu. Murume anogona kuratidza chidakadaka chake chikuru nounyoro kupfurikidza nokuteerera zvikarakadzo zvinobva kumudzimai wake. Iye anofanira kurangarira murangariro womudzimai wake asati aita chisarudzo chinotapura mhuri. Vadzimai vechiKristu havasi vasingafungi. Ivo vanogona kazhinji kazhinji kupa varume vavo zvikarakadzo zvinokosha, sezvakaita Sara kumurume wake, Abrahama. (Genesi 21:12) Pane rumwe rutivi, mudzimai wechiKristu haasati achizoraira murume wake nenzira isina mufungo. Iye acharatidza mutsa wake nokuzvininipisa kwendangariro kupfurikidza nokutevera nhungamiro yake nokutsigira zvisarudzo zvake, kunyange zvazvo izvo pane dzimwe nguva zvingasiana nezvido zvake amene.

Murume ane mufungo, kufanana nomukuru ane mufungo, anosvikika uye ane mutsa. Mudzimai ane rudo anopindura nokuva netsitsi nomwoyo murefu, achiziva nhamburiko dzaanoita kuti aite mitoro yake pasinei zvapo nokusakwana nedzvinyiriro dzoupenyu. Apo zvimiro zvakadaro zvinosakurirwa navose vari vaviri murume nomudzimai, kuzviisa pasi muroorano hakusati kuchizova chinetso. Panzvimbo pezvo, manyuko omufaro, chengeteko, uye gutsikano isingaperi.