Ganhuro 11

Kuzivikanwa Kwatakaitwa seZvapupu zvaJehovha

MUKATI mamakumi amakore apakuvamba enhau yavo yomuzuva razvino uno, vaingonongedzerwa kwavari kazhinji kazhinji saVadzidzi veBhaibheri bedzi. Apo vamwe vaibvunza pamusoro pezita resangano, hama dzedu kazhinji kazhinji dzaipindura kuti, “Tiri vaKristu.” Hama Russell vakapindura kumubvunzo wakadaro kupfurikidza nokuti, muNharireyomurindi: “Hatizviparadzanisi timene navamwe vaKristu kupfurikidza nokutora zita ripi neripi rinosiyanisa kana kuti rechienzi. Tinogutswa nezita rokuti, muKristu, iro vatsvene vapakuvamba vaizivikanwa naro.”—Chinyorwa chechiNgezi chaSeptember 1888.

Ipapoka, kwakaitika sei kuti tinozivikanwa nhasi seZvapupu zvaJehovha?

Zita Rokuti muKristu

Vateveri vechokwadi vaJesu Kristu, mose muri muviri muzana rokutanga ramakore nomunguva dzazvino uno, vakanongedzera kwavari vamene nokuvatendi biyavo se“hama,” “shamwari,” uye “ungano yaMwari.” (Mabasa 11:29; 3 Joh. 14; 1 VaK. 1:2, NW) Vakataurawo nezvaKristu sa“Tenzi” uye nezvavo vamene sa“varanda vaKristu Jesu” uye “varanda vaMwari.” (VaK. 3:24; VaF. 1:1; 1 Pet. 2:16) Mazita akadaro ave achishandiswa norusununguko mukati meungano, uye imomo akasanonzwisiswa.

Muzana rokutanga ramakore, mararamire ayo aisimbisa kutenda muna Jesu Kristu (uye, nokutambanudza, ungano imene) ainongedzerwa kwaari se“Nzira.” (Mabasa 9:2; 19:9) Shanduro dzakati dzaMabasa 18:25 dzinoratidzira kuti aidanwawo kunzi “nzira yaJehovha.”a Pane rumwe rutivi, vamwe vakanga vari kunze kweungano vainongedzera kwaari nenzira yokunyomba se“sekete ravaNazareni.”—Mabasa 24:5.

Pakasvika 44 C.E. kana kuti isiri nguva refu pashure pacho, vateveri vakatendeka vaJesu Kristu vakavamba kuzivikanwa savaKristu. Vamwe vanotaura kuti vakanga vari vokunze vakavadana kuti vaKristu, vachiita saizvozvo nenzira yokuzvidza. Zvisinei, vanyori vakati vemaduramashoko eBhaibheri navatsinhiri vanotaura kuti chiito chinoshandiswa pana Mabasa 11:26 chinoreva nhungamiro yaMwari kana kuti ziviso. Nokudaro, muNew World Translation, rugwaro irworwo runorava, kuti: “Pakutanga makanga muri muAntiokia umo vadzidzi kupfurikidza nenhungamiro yaMwari vakadanwa kunzi vaKristu.” (Kushandura kwakafanana kunooneka muLiteral Translation of the Holy Bible raRobert Young, Chinyorwa Chakahwirudzurwa, cha1898; The Simple English Bible, ra1981; uye New Testament raHugo McCord, ra1988.) Pakasvika munenge muna 58 C.E., zita rokuti muKristu rakanga richisanozivikanwa kunyange navakuru vakuru veRoma.—Mabasa 26:28.

Apo vaapostora vaKristu vakanga vachiri vapenyu, zita rokuti muKristu rakanga richisiyanisa uye rakananga. (1 Pet. 4:16) Vose avo vaitaura kuti vaKristu asi vaiva nezvitendero kana kuti mufambiro zvaipokanidza kutaura kwavo vaidzingwa munzanga yechiKristu. Zvisinei, sokufanotaura kwakanga kwaita Jesu, pashure porufu rwavaapostora Satani akadyara mbeu idzo dzakabereka vaKristu venhema. Ava vanyepedzeri vaitaurawo kuti vane zita rokuti muKristu. (Mat. 13:24, 25, 37-39) Apo chiKristu chakaramba kutenda chakatendeukira kukutendeutsa nokumanikidza, vamwe vaitaura kuti vaKristu kuti vangodzivise zvavo kutambudzwa. Pashure penguva yakati, wokuEurope upi noupi uyo aisataura kuti muJudha, muMuslim, kana kuti asingadaviri kuvapo kwaMwari airangarirwa kazhinji kazhinji kuva muKristu, pasinei zvapo nezvitendero zvake kana kuti mufambiro.

Mazita Okunemera Okuzvidza

Kubvira muzana ramakore rechi16 zvichienda mberi, aya mamirire ezvinhu akamutsira chinetso Vachinji. Sezvo zita rokuti muKristu rakanga richishandiswa zvakaipa kwazvo, vaigona sei kuzvisiyanisa vamene navamwe avo vaitaura kuti vaKristu?

Kazhinji kazhinji ivo vaingobvuma zvavo kushandiswa kwezita rokunemera rokuzvidza raipiwa kwavari nevavengi vavo. Nokudaro vashori vorudzidziso vaMartin Luther, muGermany, ndivo vakanga vari vakatanga kushandisa zita rake kuvateveri vake, vachivadana kuti vaLutheran. Avo vakanga vakabatana naJohn Wesley, muEngland, vakanzi vaMethodist nemhaka yokuti vakanga vakarurama uye vane nhevedzano nenzira yechienzi mukuchengetwa kwamabasa orudzidziso. VaBaptist pakutanga vakadzivisa zita rokunemera rokuti Anabaptist (rinoreva kuti, “Anobhapatidzazve”) asi vakagamuchira zvishoma nezvishoma zita rokuti Baptist sorudzi rwakati rwokubvumirana pane zvisina kufanira.

Zvakadiniko naVadzidzi veBhaibheri? Vainzi Vateveri vaRussell naVateveri vaRutherford navafundisi. Asi kugamuchira zita rakadaro kungadai kwakatsigira mudzimu wesekete. Kungadai kwakava kusingawirirani netsiuro yakapiwa kumaKristu apakuvamba nomuapostora Pauro, uyo akanyora, kuti: “Kana mumwe achiti: Ini ndiri waPauro; mumwe achiti: Ini ndiri waAporo; ko hamuzi vanhu here [ndiko kuti, venyama mumurangariro panzvimbo pevomudzimu]?” (1 VaK. 3:4) Vamwe vanhu vaivati “vaMillennial Dawn”; asi Kutonga kwaKristu kweMireniyumu kwakanga kuri bedzi imwe yedzidziso dzavo. Vamwe vaivadana kuti “Vanhu veWatch Tower”; asi ikokowo kwakanga kusina kukodzera, nokuti Watch Tower yakanga ingoriwo zvayo chimwe chezvinyorwa zvavaishandisa kuparadzira zvokwadi yeBhaibheri.

Kudikanwa Kwezita Rinosiyanisa

Pashure penguva yakati, kwakava kuri pachena nenzira inowedzera kuti mukuwedzera kuzita rokuti muKristu, ungano yavabatiri vaJehovha zvirokwazvo yaida zita rinosiyanisa. Revo yezita rokuti muKristu yakanga yashatiswa mundangariro dzavanhu nemhaka yokuti vanhu vaitaura kuti vaKristu kazhinji kazhinji vakanga vane pfungwa shomanene kana kuti vasina yokuti Jesu Kristu akanga ari ani, zvaakadzidzisa, uye zvavanofanira kuva vachiita kudai vaiva chaizvoizvo vateveri vake. Mukuwedzera, sezvo hama dzedu dzakafambira mberi mukunzwisisa kwadzo Shoko raMwari, idzo dzakaona nenzira yakajeka kudikanwa kwokuva dzakaparadzana nedzakasiyana namasangano iwayo orudzidziso ayo aitaura nenzira yokunyengera kuti ndeechiKristu.

Chokwadi, hama dzedu kazhinji kazhinji dzainongedzera kwadziri dzimene saVadzidzi veBhaibheri, uye kutanga muna 1910, idzo dzaishandisa zita rokuti International Bible Students’ Association dzichinongedzera kumisangano yadzo. Muna 1914, kuti dzidzivise kuvhiringidzika nesangano radzo rapamutemo rakanga richangobva kuumbwa rinonzi International Bible Students Association, dzakagamuchira zita rokuti Associated Bible Students nokuda kwamapoka adzo omunzvimbomo. Asi kunamata kwadzo kwaibatanidza zvinopfuura kufunda Bhaibheri. Uyezve, kwakanga kune vamwe vaifundawo Bhaibheri—vamwe, nenzira yokuzvipira; vamwe, savatsoropodzi; uye vasiri vashoma, savanhu vairirangarira sebhukuwo zvaro rakaisvonaka. Ipapo, pashure porufu rwaHama Russell, vamwe vaichimbova vasonganiri vakaramba kubatira pamwe neWatch Tower Society neInternational Bible Students Association, vachitoshora basa raaya masosaiti. Mapoka akaparadzana akadaro aishandisa mazita akasiyana-siyana, mamwe awo achinamatira kuzita rokuti Associated Bible Students. Ikoku kwakaparira kumwe kuvhiringidzika.

Asi ipapo, muna 1931, takagamuchira zita rinosiyanisa zvirokwazvo rokuti Zvapupu zvaJehovha. Munyori Chandler W. Sterling anonongedzera kuna ikoku se“pfungwa inobudirira zvikuru” yaJ. F. Rutherford, panguva iyeyo purezidhendi weWatch Tower Society. Sokurangarira kwakaita munyori iyeyo nhau yacho, ichochi chakanga chiri chiito chokuchenjera icho chisina kugovera bedzi zita rapamutemo reboka racho asi chakakuitawo kuti kuve nyore kwavari kududzira nongedzero dzose dzeBhaibheri ku“chapupu” no“kupupura” sedzinoshanda zvakananga kuZvapupu zvaJehovha. Mukupesana, A. H. Macmillan, musonganiri anotarisira wamapurezidhendi matatu eWatch Tower Society, akati pamusoro pechiziviso ichocho chakapiwa naHama Rutherford: “Hapana panikiro mundangariro mangu—kwete panguva iyoyo kana kuti zvino—kuti Ishe akamutungamirira muna ikoko, uye kuti ndiro zita iro Jehovha anoda kuti tive naro, uye tinofara zvikuru uye tine mufaro zvikuru kuva naro.” Maidi anotsigira murangariro upi? Zita racho rakanga riri ‘pfungwa inobudirira zvikuru’ yaHama Rutherford here, kana kuti wakanga uri mugumisiro wenhungamiro yaMwari?

Zviitiko Zvinonongedzera Kuzita Racho

Makanga muri muzana ramakore rechisere B.C.E. umo Jehovha akaparira kuti Isaya anyore, kuti: “Zvanzi naJehovha: Ndimi zvapupu zvangu, nomuranda wangu, wandakasanangura; kuti muzive, mugonditenda, munzwisise kuti ndini iye; hakuna mumwe mwari wakanditangira pakuumbwa, shure kwangu hakungazovipo mumwe. . . . Imi muri zvapupu zvangu, neni ndiri Mwari, ndizvo zvinotaura Jehovha.” (Isa. 43:10, 12) Sezvinoratidzwa muMagwaro echiKristu echiGiriki, uporofita hwakawanda hwakanyorwa naIsaya hune zadziko pamusoro peungano yechiKristu. (Enzanisa Isaya 8:18 naVaHebheru 2:10-13; Isaya 66:22 naZvakazarurwa 21:1, 2.) Bva, Isaya 43:10, 12 haina kutongokurukurwa muudzame hupi nohupi muNharireyomurindi mukati mamakore 40 ayo okutanga okubudiswa.

Pashure paikoko, zvisinei, fundo yavo yaMagwaro yakanangidzira ngwariro yavabatiri vaJehovha kuzviitiko zvitsva zvinokosha. Umambo hwaMwari naJesu saMambo wouMesiya hwakanga hwaberekwa mumatenga muna 1914. Muna 1925, gore iro ikoku kwakajekeswa muNharireyomurindi, murayiro wouporofita, uri muna Isaya ganhuro 43, wokuva zvapupu zvaJehovha wakapiwa ngwariro muzvinyorwa 11 zvakasiyana-siyana zvemagazini yacho.

MuNharireyomurindi yechiNgezi yaJanuary 1, 1926, nyaya huru yakasimbisa mubvunzo unodenha, unoti: “Ndiani Achakudza Jehovha?” Mukati mamakore mashanu akatevera, Nharireyomurindi yakakurukura chikamu chakati chaIsaya 43:10-12 muzvinyorwa 46 zvakaparadzana uye nguva imwe neimwe yakachishandisa kuvaKristu vechokwadi.b Muna 1929 kwakaoneswa kuti nhau yakatanhamara yakatarisana nechisiko chose chakangwara inobatanidza kukudzwa kwezita raJehovha. Uye pamusoro pomutoro uyo vabatiri vaJehovha vanawo pamusoro peiyi nhau, Isaya 43:10-12 yakabuda yabudazve nokuda kwokurangarirwa.

Nokudaro maidi anoratidza kuti somugumisiro wefundo yeBhaibheri, ngwariro yakanga ichikweverwa yakweverwazve kumusengwa wavo wokuva zvapupu zvaJehovha. Rakanga risati riri zita reboka iro rakanga richirangarirwa asi basa iro vaifanira kuita.

Asi zvapupu izvozvo zvinofanira kuzivikanwa nezitai? Chii chaizova chakakodzera nemhaka yebasa razvakanga zvichiita? Shoko raMwari amene rakanongedzera kumhedzisoi? Iyi nhau yakakurukurwa pakokorodzano muColumbus, Ohio, U.S.A., pana July 24-30, 1931.

Zita Idzva

Mavara makuru JW aioneka zvakatanhamara pabutiro rapamusoro repurogiramu yekokorodzano. Aireveiko? Kwakanga kusati kuri kutozosvikira Svondo, July 26, apo revo yawo yakatsanangurwa. Pazuva iroro Hama Rutherford vakapa hurukuro yavose inoti “Umambo, Tariro Yenyika.” Muhurukuro iyoyo, pakuzivisa avo vari vazivisi voUmambo hwaMwari, mukurukuri akaita nongedzero chaiyo kuzita rokuti Zvapupu zvaJehovha.

Gare gare zuva iroro Hama Rutherford vakatevera ikoku neimwe hurukuro, mukati mayo vakakurukura zvikonzero nei zita rinosiyanisa rakanga richidikanwa.c Magwaro amene akanongedzera kuzitai? Mukurukuri akanokora mashoko Mabasa 15:14, iyo inonangidzira ngwariro kuchinangwa chaMwari chokutora mumarudzi “vanhu vezita rake.” Muhurukuro yake iye akasimbisa idi rokuti sezvinotaurwa pana Zvakazarurwa 3:14, Jesu Kristu ndiye “chapupu chakatendeka, chazvokwadi.” Iye akanongedzera kuna Johane 18:37, apo Jesu akazivisa, kuti: “Ndakauyira izvozvo panyika, kuti ndipupure zvokwadi.” Iye akanangidzira ngwariro kuna 1 Petro 2:9, 10, iyo inotaura kuti vabatiri vaMwari vanofanira ‘kuzivisa kwakafara zvakaisvonaka zvouyo akavadana kubuda murima kuti vapinde muchiedza chake chinoshamisa.’ Iye akarangarira magwaro akati muna Isaya, ayo akanga asinganzwisiswi ose nenzira yakajeka panguva iyoyo, asi ipapo akagumisa hurukuro yake naIsaya 43:8-12, iyo inobatanidza basa roumwari: “Imi muri zvapupu zvangu, neni ndiri Mwari, ndizvo zvinotaura Jehovha.” Ipapoka, Shoko raJehovha amene rakanga richivatungamirira kumhedzisoi? Izitai raizova mutsinhirano nenzira iyo Mwari akanga ari kuvashandisa nayo chaizvoizvo?

Mhinduro iri pachena yakabatanidzwa muchisarudzo chakagamuchirwa nembavarira panhambo iyoyo.d Chisarudzo ichocho chakati, murutivi:

“Kuti chimiro chedu chechokwadi chiziviswe, uye tichidavira kuti ichochi chiri mutsinhirano nokuda kwaMwari, kunoratidzirwa muShoko rake, NGAKUSARUDZWE, sezvinotevera, ndiko kuti:

“KUTI tinoda zvikuru Hama Charles T. Russell, nokuda kwebasa ravo, uye kuti tinobvuma nomufaro kuti Ishe akavashandisa ndokukomborera zvikuru basa ravo, bva hatigoni nenzira inowirirana neShoko raMwari kubvuma kudanwa nezita rokuti ‘Vateveri vaRussell’; kuti Watch Tower Bible and Tract Society neInternational Bible Students Association nePeoples Pulpit Association mazitawo zvawo amasangano ayo seboka ravanhu vechiKristu tinawo, atinodzora ndokushandisa kupfuuridzira basa redu mukuteerera mirayiro yaMwari, bva hakuna nerimwe ramazita iwaya rinobatana nenzira yakakodzera kana kuti kushanda kwatiri somutumbi wavaKristu avo vanotevera mumakwara aShe wedu naTenzi, Kristu Jesu; kuti tiri vadzidzi veBhaibheri, asi, somutumbi wavaKristu vanoumba sangano, tinoramba kugamuchira kana kuti kudanwa nezita rokuti ‘Vadzidzi veBhaibheri’ kana kuti mazita akafanana somutoo wokuzivikanwa kwenzvimbo yedu yakakodzera pamberi paShe; tinoramba kuva nezita romunhu upi noupi kana kuti kudanwa naro;

“KUTI, zvatakatengwa neropa rinokosha raJesu Kristu Ishe wedu noMudzikinuri, takaruramiswa ndokuberekwa naJehovha Mwari ndokudanwa kuumambo hwake, tinozivisa tisingazenguriri ruvimbiko rwedu rwose nokuzvipira kuna Jehovha Mwari noumambo hwake; kuti tiri vabatiri vaJehovha Mwari vakatumwa kuita basa muzita rake, uye, mukuteerera murayiro wake, kuti tipe chipupuriro chaJesu Kristu, uye kuzivisa kuvanhu kuti Jehovha ndiMwari wechokwadi naWamasimba Ose; naizvozvo tinogamuchira nomufaro ndokutora zita iro muromo waShe Mwari wakatumidza, uye tinoshuva kuzivikanwa ndokudanwa nezita, rokuti, zvapupu zvaJehovha.—Isa. 43:10-12.”e

Pashure pokupiwa kwechisarudzo chakazara, kurova maoko kunonzwika, kunopfuuridzirwa kwakaratidzira kubvumirana kwakazara kwavateereri nezvakanga zvataurwa.

Kugamuchira Basa

Rukudzo rwakadini kuva nezita raMwari wechokwadi bedzi, Changamire wechisiko chose! Asi zita iroro rinofamba nebasa. Iro ibasa iro mamwe mapoka orudzidziso asingadi. Hama Rutherford vakati muhurukuro yavo: “Vanofara ndivo avo vanogona kuva nezita iro risina munhu pasi pezuva anoda kunze kwaavo vakazvitsaurira zvizere uye chose chose kuna Jehovha.” Bva, kwakakodzera sei kuti vabatiri vaJehovha vane zita raMwari amene, kuti varizivise, uye kuti ribatanidzwe zvakatanhamara nokuziviswa kwechinangwa chake!

Boka ripi neripi kana kuti vanhu avo vanotaura muzita raJehovha vanozvipinza vamene mumusengwa wokupa shoko rake zvapachokwadi. (Jer. 23:26-28) Vanofanira kuzivisa kwete bedzi gadziriro dzaJehovha dzokukomborerwa kwavadi vokururama asiwo marutongeso ake pavaiti vokusarurama. Seizvo Jehovha akarayira vaporofita vake munguva dzakapfuura, naizvozvo nhasi, zvapupu zvake hazvifaniri kubvisa chinhu chipi nechipi mushoko raMwari kupfurikidza nokukundikana kurizivisa. (Jer. 1:17; 26:2; Ezek. 3:1-11) Zvinofanira kuzivisa zvose zviri zviviri “gore rengoni dzaJehovha, nezuva rokutsiva raMwari wedu.” (Isa. 61:1, 2) Avo vakagamuchira chisarudzo chiri pamusoro apa vakaziva basa iroro, uye murutivi rwapashure rwechisarudzo chacho, ivo vakazivisa, kuti:

“Sezvapupu zvaJehovha chinangwa chedu chimwe bedzi ndechokuteerera chose chose mirayiro yake; kuzivisa kuti ndiye Mwari wechokwadi bedzi naWamasimba Ose; kuti Shoko rake nderechokwadi uye kuti zita rake rakafanirwa norukudzo rwose nembiri; kuti Kristu ndiMambo waMwari, uyo akaisa pachigaro chake choumambo chechiremera; kuti umambo hwake zvino hwakasvika, uye mukuteerera mirayiro yaShe zvino tinofanira kuzivisa aya mashoko akanaka sechipupuriro kana kuti uchapupu kumarudzi ndokuzivisa vatongi navanhu nezvesangano rine utsinye nerinodzvinyirira raSatani uye pamusoro paro, uye zvikurukuru nenongedzero ku‘chiKristudhomu’, icho chiri rutivi rwakaipa zvikurusa rwesangano iroro rinooneka, uye nezvechinangwa chaMwari uye pamusoro pacho chokuparadza nokukurumidza sangano raSatani, chiri chiito chikuru icho chichakurumidza kuteverwa nokuunzira kwaKristu Mambo vanhu vanoteerera vapasi rugare norubudiriro, rusununguko noutano, mufarwa noupenyu husingaperi; kuti umambo hwaMwari ndihwo tariro yenyika, uye hakuna humwe, uye kuti shoko irori rinofanira kupiwa naavo vanozivikanwa sezvapupu zvaJehovha.

“Tinokoka nenzira yokuzvininipisa vanhu vose vakazvipa chose chose kuna Jehovha noumambo hwake kuti vakumbanire mukuzivisa aya mashoko akanaka kuvamwe, kuti mupimo wakarurama waShe ugosimudzirwa, kuti vanhu venyika vagoziva kwokuwana zvokwadi netariro yorusununguko; uye, kupfuura zvose, kuti zita guru nedzvene raJehovha Mwari rigorevererwa nokukwidziridzwa.”

Makanga musati muri muColumbus, Ohio bedzi, muAmerica, asi kure seAustralia umo vateereri vakatanga kurova maoko apo vakanzwa kuziviswa kwezita idzva iroro. MuJapan, pashure pamaawa enhamburiko, chikamu chipfupi chete chepurogiramu chakabatwa muredhiyo yeshortwave pakati pousiku. Pakarepo chakashandurwa. Nokudaro boka duku raiva ipapo rakanzwa chisarudzo nokurova maoko kune ruzha. Matsue Ishii akanga ari ikoko navo, uye sokunyora kwaakaita gare gare, ivo ‘vakadanidzira nomufaro mutsinhirano nehama dzavo muAmerica.’ Pashure pekokorodzano muColumbus, magungano neungano zveZvapupu zvaJehovha munyika dzose uko zvakanga zvichipfuuridzira ushumiri hwazvo zvakataura izvo zvimene sezvaiva mubvumirano yakazara nechisarudzo ichocho. KuNorway, somuenzaniso mumwe bedzi, kwakabva mushumo, unoti: “Pakokorodzano yedu yegore . . . muOslo tose takasimuka ndokudanidzira nembavarira huru kuti ‘Ja’, pakugamuchira zita redu idzva rokuti ‘zvapupu zvaJehovha’.”

Rinopfuura Chiratidzo

Nyika yose zvayo yaizoziva kuti hama dzedu dzakanga dzagamuchira zita idzva iroro here? Hungu, zvirokwazvo! Hurukuro umo chiziviso chezita chakatanga kuitwa yakakurukurwa mumubatanidzwa mukurusa weredhiyo wakanga wati wamboshandiswa kusvikira panguva iyoyo. Mukuwedzera, chisarudzo chinozivisa zita idzva chakabatanidzwa mubhukwana rinonzi The Kingdom, the Hope of the World. Pashure pekokorodzano, Zvapupu zvaJehovha zvakaparadzira mamiriyoni amakopi ebhukwana iroro mumitauro yakawanda muNorth nomuSouth America, Europe, Africa, Asia, uye zvitsuwa zvegungwa. Mukuwedzera kukupa makopi paimba neimba, zvakaita nhamburiko chaiyo yokugovera kopi mukuru mukuru wehurumende ari wose, muzvinabhizimisi akatanhamara, uye mufundisi. Vamwe vakanga vachiri vapenyu muna 1992 vakasanoyeuka goverano yavo munhimbe iyoyo inokosha.

Havasati vari vose vakagamuchira bhukwana racho zvakanaka. Eva Abbott anoyeuka kuti sezvo aibva paimba yomumwe mufundisi muUnited States, bhukwana racho rakakandwa rikapfuura nepaaiva ndokudonha pasi. Iye akanga asingadi kurisiya ipapo, naizvozvo akarinhonga; asi imbwa huru yakahon’a, ikaribvuta muruoko rwake, uye yakariendesa kuna tenzi wayo, muparidzi. Iye akati: “Chandaisagona kuendesa, imbwa yakadaro!”

Martin Poetzinger, uyo gare gare akabatira somutezo woMutumbi Unodzora weZvapupu zvaJehovha, akayeuka, kuti: “Zviso zvakakatyamadzwa zvaioneka pasuo riri rose apo taizvisuma timene namashoko, anoti: ‘Ndauya kwamuri nhasi somumwe wezvapupu zvaJehovha.’ Vanhu vaidzungudza misoro yavo kana kuti kubvunza, kuti: ‘Asi muchiri vadzidzi veBhaibheri, hamusi here? Kana kuti makakumbanira sekete idzva here?’” Zvishoma nezvishoma mamirire iwayo ezvinhu akachinja. Makumi amakore anoverengeka pashure pokunge zvavamba kushandisa zita razvo rinosiyanisa, Hama Poetzinger vakanyora, kuti: “Ichinjo yakadini! Ndisati ndataura shoko vanhu vachatsinhira, kuti: ‘Unofanira kuva mumwe wezvapupu zvaJehovha.’” Hungu, vanoziva zita racho zvino.

Zita iroro harisati riri chiratidzo chete. Angave ari muduku kana kuti mukuru, munhurume kana kuti munhukadzi, vose veZvapupu zvaJehovha vanogoverana mubasa rokupupurira Jehovha nechinangwa chake chakaisvonaka. Somugumisiro, C. S. Braden, purofesa wenhau yorudzidziso, akanyora, kuti: “Zvapupu zvaJehovha zvakafukidza chaizvoizvo pasi nokupupura kwazvo.”—These Also Believe.

Kunyange zvazvo kupupura kwaiitwa nehama dzedu dzisati dzagamuchira zita rokuti Zvapupu zvaJehovha kwakanga kuchipoteredza nyika, mukutarira shure kunoratidzika kuti Jehovha akanga achizvigadzirira nokuda kwebasa rinotova guru zvikuru—kuunganidzwa kweboka guru avo vaizochengetwa vari vapenyu vachipfuura muArmagedhoni, vane mukana wokurarama nokusingaperi muparadhiso yapasi.

[Mashoko Omuzasi]

[Mashoko okukwezva vaverengi ari papeji 149]

“Vadzidzi kupfurikidza nenhungamiro yaMwari vakadanwa kunzi vaKristu”

[Mashoko okukwezva vaverengi ari papeji 150]

Zita rokuti muKristu rakashatiswa mundangariro yavanhu

[Mashoko okukwezva vaverengi ari papeji 151]

Vaipfuura kuva Vadzidzi veBhaibheri

[Mashoko okukwezva vaverengi ari papeji 157]

“Imi muri zvapupu zvangu, neni ndiri Mwari, ndizvo zvinotaura Jehovha”

[Bhokisi riri papeji 151]

Zita rokuti Zvapupu zvaJehovha Munyika dzeAmerica

Arabic ش‍هود ‍ي‍هوه‍

Armenian Եհովայի Վկաներ

Chinese 耶和華見證人

English Jehovah’s Witnesses

French Témoins de Jéhovah

Greek Μάρτυρες του Ιεχωβά

Greenlandic Jehovap Nalunaajaasui

Italian Testimoni di Geova

Japanese エホバの証人

Korean 여호와의 증인

Papiamento Testigonan di Jehova

Polish Świadkowie Jehowy

Portuguese Testemunhas de Jeová

Samoan Molimau a Ieova

Spanish Testigos de Jehová

Sranantongo Jehovah Kotoigi

Tagalog Mga Saksi ni Jehova

Vietnamese Nhân-chứng Giê-hô-va

[Bhokisi riri papeji 152]

Vamwe Vakakuona

Yakanga isati iri “Nharireyomurindi” bedzi iyo yakaonesa muBhaibheri kuti Jehovha aizova nezvapupu papasi. Somuenzaniso, H. A. Ironside, mubhuku rinonzi “Lectures on Daniel the Prophet” (rakatanga kubudiswa muna 1911), akanongedzera kuavo zvipikirwa zvinokosha zvaIsaya 43 zvaizozadzikwa ndokuti: “Ivava vachava zvapupu zvaJehovha, vachipupurira simba nembiri zvaMwari mumwe wechokwadi, apo chiKristudhomu chakaramba kutenda chichave chatera kunyengedzo yakasimba yokudavira nhema dzaantiKristu.”

[Bhokisi riri papeji 153]

Zita Rokuti Zvapupu zvaJehovha kuMabvazuva Nezvitsuwa zvePacific

Bengali যিহোবার সাক্ষিরা

Bislama Ol Wetnes blong Jeova

Chinese 耶和華見證人

English Jehovah’s Witnesses

Fijian Vakadinadina i Jiova

Gujarati યહોવાહના સાક્ષીઓ

Hindi यहोवा के साक्षी

Hiri Motu Iehova ena Witness Taudia

Iloko Dagiti Saksi ni Jehova

Indonesian Saksi-Saksi Yehuwa

Japanese エホバの証人

Kannada ಯೆಹೋವನ ಸಾಕ್ಷಿಗಳು

Korean 여호와의 증인

Malayalam യഹോവയുടെ സാക്ഷികൾ

Marathi यहोवाचे साक्षीदार

Marshallese Dri Kennan ro an Jeova

Myanmar ယေဟောဝါသက်သေမျာ

Nepali यहोवाका साक्षीहरू

New Guinea Pidgin Ol Witnes Bilong Jehova

Niuean Tau Fakamoli a Iehova

Palauan reSioning er a Jehovah

Pangasinan Saray Tasi nen Jehova

Ponapean Sounkadehde kan en Siohwa

Rarotongan Au Kite o Iehova

Russian Свидетели Иеговы

Samoan, Tuvaluan Molimau a Ieova

Sinhalese යෙහෝවාගේ සාක්ෂිකරුවෝ

Solomon Islands Pidgin all’gether Jehovah’s Witness

Tahitian Ite no Iehova

Tamil யெகோவாவின் சாட்சிகள்

Telugu యెహోవాసాక్షులు

Thai พยาน​พระ​ยะโฮวา

Tongan Fakamo‘oni ‘a Sihova

Trukese Ekkewe Chon Pwarata Jiowa

Urdu

Vietnamese Nhân-chứng Giê-hô-va

Yapese Pi Mich Rok Jehovah

[Bhokisi riri papeji 154]

Zita Rokuti Zvapupu zvaJehovha muAfrica

Afrikaans Jehovah se Getuies

Amharic የይሖዋ ምሥክሮች

Arabic ش‍هود ‍ي‍هوه‍

Chicheŵa Mboni za Yehova

Cibemba Inte sha kwa Yehova

Efịk Mme Ntiense Jehovah

English Jehovah’s Witnesses

Ewe Yehowa Ðasefowo

French Témoins de Jéhovah

Ga Yehowa Odasefoi

Gun Kunnudetọ Jehovah tọn lẹ

Hausa Shaidun Jehovah

Igbo Ndịàmà Jehova

Kiluba Ba Tumoni twa Yehova

Kinyarwanda Abahamya ba Yehova

Kirundi Ivyabona vya Yehova

Kisi Seiyaa Jɛhowaa

Kwanyama Eendombwedi daJehova

Lingala Batemwe ya Jéhovah

Luganda Abajulirwa ba Yakuwa

Malagasy Vavolombelon’i Jehovah

Moore A Zeova Kaset rãmba

Ndonga Oonzapo dhaJehova

Portuguese Testemunhas de Jeová

Sango A-Témoin ti Jéhovah

Sepedi Dihlatse tša Jehofa

Sesotho Lipaki tsa Jehova

Shona Zvapupu zvaJehovha

Silozi Lipaki za Jehova

Swahili Mashahidi wa Yehova

Tigrinya ናይ የሆዋ መሰኻኽር

Tshiluba Bantemu ba Yehowa

Tsonga Timbhoni ta Yehova

Tswana Basupi ba ga Jehofa

Twi Yehowa Adansefo

Venda Ṱhanzi dza Yehova

Xhosa amaNgqina kaYehova

Yoruba Ẹlẹ́rìí Jehofa

Zulu oFakazi BakaJehova

[Bhokisi riri papeji 154]

Zita Rokuti Zvapupu zvaJehovha muEurope neMiddle East

Albanian Dëshmitarët e Jehovait

Arabic ش‍هود ‍ي‍هوه‍

Armenian Եհովայի Վկաներ

Bulgarian Свидетелите на Йехова

Croatian Jehovini svjedoci

Czech svĕdkové Jehovovi

Danish Jehovas Vidner

Dutch Jehovah’s Getuigen

English Jehovah’s Witnesses

Estonian Jehoova tunnistajad

Finnish Jehovan todistajat

French Témoins de Jéhovah

German Jehovas Zeugen

Greek Μάρτυρες του Ιεχωβά

Hebrew עדי־יהוה

Hungarian Jehova Tanúi

Icelandic Vottar Jehóva

Italian Testimoni di Geova

Macedonian, Serbian Јеховини сведоци

Maltese Xhieda ta’ Jehovah

Norwegian Jehovas vitner

Polish Świadkowie Jehowy

Portuguese Testemunhas de Jeová

Romanian Martorii lui Iehova

Russian Свидетели Иеговы

Slovak Jehovovi svedkovia

Slovenian Jehovove priče

Spanish Testigos de Jehová

Swedish Jehovas vittnen

Turkish Yehova’nın Şahitleri

Ukrainian Свідки Єгови

[Mifananidzo iri papeji 155]

Mabhii okutanga JW (asina tsananguro) akanga akatanhamara pakokorodzano ya1931. Revo yawo yakaziviswa muhurukuro inofadza pamusoro pezita idzva

[Mifananidzo iri papeji 156]

Ivo vaidada kuzivisa vamwe kuti vakanga vari Zvapupu zvaJehovha