23. Ko inzwi rinobuda mudenga rinosimbisa sei kurumidziro yokutiza kubuda muBhabhironi Guru?

²³ Ko kutiza muBhabhironi Guru ndokwokukurumidzira zvikuru kwazvo chaizvoizvo here, kurega kuva mutezo mumarudzidziso enyika ndokuita paradzano yakakwana? Kwakadaro, nokuti tinodikanirwa kunzwisisa murangariro waMwari wourwu rudzidziso rukurusa rwekare, Bhabhironi Guru. Iye akataura zvakajeka mukuriidza hure guru. Naizvozvo zvino inzwi rinobuda mudenga rinozivisazve Johane pamusoro peiyi mhombwe, kuti: “Nokuti zvivi zvaro zvatutirana kusvika kudenga, uye Mwari wayeuka mabasa aro okusaruramisira. Riitirei kunyange sezvarakakuitirai iro rimene, uye riitirei nekane kaviri, hungu, wanziridzai chiverengero chezvinhu zvarakaita nekane kaviri; mumukombe makadira muvhenganiswa dirai muvhenganiswa waro nekane kaviri. Zvarakazvikudza zvikuru rimene ndokurarama mukuzvifadza kusine nyadzi, ritambudzei zvikuru ndokurichemedza. Nokuti mumwoyo maro iro rinoramba richiti: ‘Ini ndinogara pachigaro choumambo samambokadzi, uye handizi chirikadzi, uye handizotongooni kuchema.’ Ndokusaka madambudziko aro achasvika muzuva rimwe, rufu nokuchema nenzara, uye richapiswa chose chose nomwoto, nokuti Jehovha Mwari, uyo akaritonga ane simba.”​—⁠Zvakazarurwa 18:​5-⁠8.

27. Ienzaniranoi dziripo pakati pamarutongeso pamusoro peBhabhironi rekare naawo eBhabhironi Guru?

²⁷ Kuwa kweBhabhironi rekare uye kuva dongo pakupedzisira kwakanga kuri chirango nokuda kwezvivi zvaro. “Nokuti rutongeso rwaro rwakasvika kudenga.” (Jeremia 51:⁠9) Nomutoo wakafanana, zvivi zveBhabhironi Guru zvaka“tutirana kusvikira kudenga,” zvokuti zvakasvika pakuona kwaJehovha iye amene. Iro rine mhaka yokusaruramisira, kunamata zvidhori, utere, dzvinyiriro, kuba, uye kuponda. Kuwa kweBhabhironi rekare, murutivi, kwakanga kuri matsive nokuda kwezvarakanga raitira tembere yaJehovha uye vanamati vake vechokwadi. (Jeremia 50:​8, 14; 51:​11, 35, 36) Kuwa kweBhabhironi Guru uye pakupedzisira ruparadziko rwaro nenzira yakafanana iratidzirwo dzamatsive nokuda kwezvarakaitira vanamati vechokwadi kwamazana amakore. Zvamazvirokwazvo, ruparadziko rwaro rwokupedzisira ndiwo mavambo e“zuva ramatsive raMwari wedu.”​—⁠Isaya 34:​8-​10; 61:⁠2; Jeremia 50:⁠28.

28. Ko Jehovha anoshandisa mupimoi weruramisiro kuBhabhironi Guru, uye nei?

²⁸ Pasi poMutemo waMosesi, kana muIsraeri akabira vamabiyake, iye aitofanira kudzorera kanenge kaviri mumuripo. (Eksodho 22:​1, 4, 7, 9) Muruparadziko runouya rweBhabhironi Guru, Jehovha achashandisa mupimo wakaenzanirana weruramisiro. Iro rinofanira kuwana zvakawanda nakane kaviri sezvarakapa. Hapazati pachizoratidzwa ngoni nokuti Bhabhironi Guru harina kuitira ngoni vanyajambwa varo. Iro rakadyeredzera vanhu vapasi kuti iro rimene rirambe riri mu“kuzvifadza kusine nyadzi.” Zvino iro richawana kutambura nokuchema. Bhabhironi rekare rakarangarira kuti iro rakanga riri munzvimbo yakakotsekana chose chose, richiganza, kuti: “Ini handizati ndichigara sechirikadzi, uye handizati ndichiziva kurashikirwa navana.” (Isaya 47:​8, 9, 11) Bhabhironi Guru rinonzwawo rakakotsekana. Asika ruparadziko rwaro, rwakatemwa naJehovha uyo “ane simba,” ruchaitika nokukurumidza, sokunge kuti “muzuva rimwe”!