T’i ndihmojmë të tjerët të bëhen «të bindur nga zemra»
1. Çfarë kërkon Jehovai nga adhuruesit e tij?
1 Një nga faktorët thelbësorë që e bën të pranueshëm adhurimin tonë ndaj Jehovait, është bindja. (Ligj. 12:28; 1 Pjet. 1:14-16) Së shpejti, gjykimi i Perëndisë do të vijë mbi «ata që nuk e njohin Perëndinë dhe mbi ata që nuk i binden lajmit të mirë». (2 Sel. 1:8) Si t’i ndihmojmë të tjerët që të bëhen «të bindur nga zemra» ndaj mësimeve të Fjalës së Perëndisë?—Rom. 6:17.
2. Përse është e rëndësishme t’i ndihmojmë të tjerët të krijojnë një besim të fortë?
2 T’i ndihmojmë që të kenë besim dhe dashuri: Në Shkrime, bindja lidhet ngushtë me besimin. Apostulli Pavël foli për «urdhrin e Perëndisë të përjetshëm për të nxitur bindjen me anë të besimit». (Rom. 16:26) Te kapitulli i 11-të i Hebrenjve tregohen shumë shembuj besimi, një pjesë e të cilëve përmenden sepse vepruan në harmoni me vullnetin e Jehovait. (Hebr. 11:7, 8, 17) Nga ana tjetër, mosbindja lidhet me mungesën e besimit. (Gjoni 3:36; Hebr. 3:18, 19) Duhet ta përdorim me zotësi Fjalën e Perëndisë, që t’i ndihmojmë të tjerët të krijojnë atë lloj besimi që sjell bindjen.—2 Tim. 2:15; Jak. 2:14, 17.
3. (a) Si lidhet bindja me dashurinë? (b) Si mund t’i ndihmojmë studentët biblikë që të kenë dashuri për Jehovain?
3 Gjithashtu, bindja lidhet me dashurinë për Perëndinë. (Ligj. 5:10; 11:1, 22; 30:16) Te 1 Gjonit 5:3 thuhet: «Kjo do të thotë dashuri për Perëndinë: të zbatojmë urdhërimet e tij; dhe megjithatë urdhërimet e tij nuk janë të rënda.» Si mund t’i ndihmojmë studentët biblikë që të zhvillojnë dashurinë për Jehovain? Gjatë studimit, të gjejmë mundësinë për të rritur çmueshmërinë e tyre për cilësitë e Jehovait. T’u shprehim ndjenjat tona të thella për Perëndinë. T’i ndihmojmë studentët që të mendojnë të krijojnë një marrëdhënie personale me Jehovain. Më shumë se çdo gjë tjetër, dashuria për Jehovain do të na nxitë, si ne edhe ata, që t’i bindemi nga zemra.—Mat. 22:37.
4. (a) Pse ka rëndësi shembulli që lëmë? (b) Çfarë duhet të bëjmë që të kemi «një zemër të bindur»?
4 Me shembullin tonë: Një mjet i fuqishëm për të inkurajuar të tjerët që t’i binden lajmit të mirë është shembulli ynë. Por kërkohen përpjekje të vazhdueshme nga ana jonë për të pasur «një zemër të bindur». (1 Mbret. 3:9, BR; Prov. 4:23) Çfarë do të thotë kjo? Ta ushqejmë zemrën duke studiuar rregullisht Biblën dhe duke qenë të pranishëm në mbledhje. (Psal. 1:1, 2; Hebr. 10:24, 25) Të përpiqemi që të shoqërohemi me ata njerëz, zemrat e të cilëve janë të bashkuara në adhurimin e vërtetë. (Prov. 13:20) Të marrim pjesë rregullisht në shërbim, me dëshirën e sinqertë për t’i ndihmuar njerëzit në territorin tonë. Të kërkojmë ndihmën e Jehovait në lutje, që të na mësojë se si të kemi një zemër të pastër. (Psal. 86:11) T’i shmangim gjërat që mund të na e ndotin zemrën, si zbavitja imorale ose e dhunshme. Të bëjmë ato gjëra që na afrojnë më tepër me Perëndinë dhe që e forcojnë marrëdhënien tonë me të.—Jak. 4:7, 8.
5. Si po bekohen ata që janë të bindur?
5 Jehovai e siguroi popullin e tij të lashtë se do të kishte shumë bekime po të dëgjonte zërin e Tij. (Ligj. 28:1, 2) Po kështu edhe sot, Jehovai po u jep bekime me bollëk «atyre që i binden atij si sundimtar». (Vep. 5:32) Pra, le t’i ndihmojmë njerëzit me anë të mësimdhënies dhe shembullit tonë, që të bëhen të bindur nga zemra.