A mund të hysh në ‘një derë të gjerë që të çon në aktivitet’?
1. Cila «derë e gjerë që çon në aktivitet» është hapur para nesh?
1 Kur apostullit Pavël iu hap ‘një derë e gjerë që e çoi në aktivitet’, ai e shfrytëzoi menjëherë mundësinë për të çuar përpara interesat e Mbretërisë, paçka se shumë e kundërshtonin. (1 Kor. 16:9) Sot rreth 642.000 lajmëtarë të Mbretërisë në të gjithë botën kanë hyrë në një derë të gjerë aktiviteti, duke shërbyer si pionierë të rregullt.
2. Pse është mirë që herë pas here të vlerësojmë situatën tonë?
2 Rrethanat ndryshojnë: Megjithëse për momentin mund të jemi të kufizuar në atë që bëjmë, rrethanat ndryshojnë. Prandaj, bëjmë mirë që herë pas here të vlerësojmë situatën që kemi dhe jo thjesht të presim për rrethanat ideale. (Ekl. 11:4) A je një i ri që së shpejti do të mbarosh shkollën e mesme? A je një prind me fëmijë që së shpejti do të hyjnë në shkollë? A po i afrohesh pensionit? Ndryshime të tilla mund të të lënë më shumë kohë dhe të të krijojnë mundësinë të fillosh shërbimin si pionier i rregullt. Një motër që më parë kishte pasur probleme me shëndetin vendosi të shërbente si pioniere në moshën 89-vjeçare. Pse? Meqë nuk kishte qenë në spital për më shumë se një vit, ajo mendonte se shëndeti i jepte mundësi të shërbente si pioniere.
3. Ç’ndryshime kanë bërë disa për të nisur shërbimin si pionierë të rregullt?
3 Pavli fillimisht kishte ndër mend të vizitonte vëllezërit e tij në Korint. Por i ndryshoi planet për hir të lajmit të mirë. Shumë prej atyre që shërbejnë si pionierë të rregullt sot, u është dashur të bëjnë disa ndryshime që të nisin këtë lloj shërbimi. Disa e kanë thjeshtuar jetën deri në atë pikë sa i kanë pakësuar shpenzimet dhe ia dalin t’i përballojnë me një punë me orar të shkurtër. Kanë gjetur kënaqësi në privilegjin për të marrë pjesë në këtë lloj shërbimi. (1 Tim. 6:6-8) Disa çifte të martuara kanë bërë ndryshime që u kanë dhënë mundësi ta përballojnë jetesën vetëm me rrogën e burrit, për t’i dhënë mundësi gruas të shërbejë si pioniere.
4. Çfarë mund të bëjmë nëse nuk jemi të sigurt se mund t’i plotësojmë orët e kërkuara?
4 Mos e largo shpejt nga mendja idenë për të filluar shërbimin si pionier, nga frika se nuk plotëson dot orët e kërkuara. Nevojiten pak më shumë se dy orë në ditë. Nëse nuk je i sigurt se mund t’ia dalësh, përpiqu të shërbesh si pionier ndihmës për një ose dy muaj, me synimin për të arritur 70 orë. Kështu, do të provosh gëzimet që sjell shërbimi si pionier. (Psal. 34:8) Fol me ata që tashmë janë duke shërbyer si pionierë. Ata mund të kenë kapërcyer vështirësi si të tuat. (Prov. 15:22) Kërkoji Jehovait t’i bekojë përpjekjet e tua për të bërë më shumë në shërbim të tij.—1 Gjon. 5:14.
5. Pse shërbimi si pionier i rregullt është një synim që ia vlen?
5 Një synim që ia vlen: Shërbimi si pionier i rregullt sjell shumë bekime. Të jep mundësi të provosh lumturinë e madhe që vjen kur jep më shumë. (Vep. 20:35) Shërbimi si pionier do të të ndihmojë të aftësohesh më shumë për ta përdorur drejt Fjalën e së vërtetës që vjen nga Perëndia. (2 Tim. 2:15) Do të kesh më shumë mundësi të shohësh se si të mbështet dora e Jehovait. (Vep. 11:21; Filip. 4:11-13) Shërbimi si pionier do të të ndihmojë edhe të zhvillosh cilësi frymore, si qëndrueshmëria, dhe do të të afrojë më shumë me Jehovain. (Jak. 4:8) A mund të hysh në këtë derë të gjerë aktiviteti duke u bërë pionier i rregullt?