Sa emra ka Zoti?

Përgjigjja e Biblës

Zoti ka vetëm një emër. Në hebraisht shkruhet יהוה dhe në shqip zakonisht përkthehet «Jehova».a Nëpërmjet profetit Isaia, Perëndia deklaroi: «Unë jam Jehovai. Ky është emri im.» (Isaia 42:8) Ky emër shfaqet rreth 7.000 herë në dorëshkrimet e lashta të Biblës—shumë më shpesh se çdo term tjetër përshkrues për Zotin, e madje më tepër se çdo emër tjetër.b

A ka emra të tjerë Zoti?

Ndonëse Bibla tregon se Perëndia ka vetëm një emër, ajo përdor shumë tituj e përshkrime për Të. Secili prej titujve dhe përshkrimeve në listën e mëposhtme zbulon një aspekt të natyrës ose të personalitetit të Jehovait.

Titulli	Vargu biblik	Kuptimi
Allah	(S’ka)	Fjala «Allah» vjen nga arabishtja dhe nuk është emër i përveçëm, por titull që ka kuptimin «Zot». Përkthime të Biblës në arabisht dhe në gjuhë të tjera përdorin fjalën «Allah» si ekuivalent për «Zot».
I Plotfuqishëm	Zanafilla 17:1	Ai ka fuqi të pakufishme. Shprehja hebraike ʼEl Shaddái, «Perëndi i Plotfuqishëm», gjendet shtatë herë në Bibël.
Alfa dhe Omega	Zbulesa 1:8; 21:6; 22:13	«I pari dhe i fundit» ose «fillimi dhe mbarimi» që do të thotë se përpara tij s’ka pasur asnjë Perëndi të Plotfuqishëm, dhe s’ka për të pasur ndonjë pas tij. (Isaia 43:10) Alfa është shkronja e parë e alfabetit grek, kurse omega e fundit.
I Lashti i Ditëve	Danieli 7:9, 13, 22	Nuk ka pasur fillim; ka ekzistuar përjetësisht para se të vinte në jetë çdokush a çdo gjë tjetër.—Psalmi 90:2.
Krijues	Isaia 40:28	Krijoi gjithçka.
Atë	Mateu 6:9	Jetëdhënës.
Perëndi	Zanafilla 1:1	Që adhurohet; i fuqishëm. Fjala hebraike ʼElohím është në shumës dhe përdoret për të treguar madhështinë, dinjitetin ose shkëlqimin e Jehovait.
Perëndi i perëndive	Ligji i përtërirë 10:17	Ai është Perëndia suprem krahasuar me ‘perënditë e kota’ që adhurojnë disa njerëz.—Isaia 2:8.
Mësues i Madh	Isaia 30:20, 21	Jep mësim e drejtim dobiprurës.—Isaia 48:17, 18.
Bërës i Madh	Psalmi 149:2	Solli në jetë gjithçka.—Zbulesa 4:11.
Perëndi i lumtur	1 Timoteut 1:11	Karakterizohet nga gëzimi dhe lumturia.—Psalmi 104:31.
Dëgjues i lutjes	Psalmi 65:2	Ai dëgjon personalisht këdo që i lutet me besim.
Unë jam Ai që jam	Dalja (Eksodi) 3:14, Diodati i Ri	Bëhet çfarë të jetë e nevojshme për të përmbushur qëllimin e tij. Kjo shprehje është përkthyer edhe «Unë do të bëhem çdo gjë që dua të bëhem.» (Përkthimi Bota e Re) Ky përshkrim na ndihmon të kuptojmë domethënien e emrit Jehova në vargun pasues.—Dalja 3:15.
Xheloz	Dalja 34:14, Diodati i Ri	Nuk toleron rivalitet në adhurim. Ky term është përkthyer edhe «Ai që kërkon t’i përkushtohesh vetëm atij».—Përkthimi Bota e Re.
Mbret i përjetësisë	Zbulesa 15:3	Ai ka pasur dhe do të ketë gjithmonë autoritet suprem.
Zotëri	Psalmi 135:5	Pronar ose zotëri; në hebraisht ʼAdhóhn dhe ʼAdhoním.
Zot i ushtrive	Isaia 1:9, Diodati i Ri; Romakëve 9:29	Komandant i forcave të panumërta engjëllore.
Më i Larti	Psalmi 47:2	Ka pozitën supreme.
Më i Shenjti	Proverbat 9:10	Më i shenjtë (i pastër moralisht dhe i dëlirë) se çdo qenie tjetër.
Poçar	Isaia 64:8	Ka autoritet mbi individë e kombe, ashtu si një poçar ka autoritet mbi argjilën.—Romakëve 9:20, 21.
Riblerës, shpengues	Isaia 41:14	Shpengon ose riblen njerëzimin nga mëkati e vdekja me anë të flijimit shpërblyes të Jezu Krishtit.—Gjoni 3:16.
Shkëmb	Psalmi 18:2, 46	Strehë e sigurt dhe burim shpëtimi.
Shpëtimtar	Isaia 45:21	Shpëton nga rreziku ose shkatërrimi.
Bari	Psalmi 23:1	Kujdeset për adhuruesit e tij.
Zotëri Sovran	Zanafilla 15:2	Ka autoritetin më të lartë; hebraisht ʼAdhonái.
Tejet i Larti	Danieli 7:18, 27	Sovrani më i lartë.

Emra vendesh në Shkrimet Hebraike

Disa emra vendesh në Bibël përmbajnë emrin personal të Zotit, ama nuk janë emra të tjerë të Tij.

Emri i vendit	Vargu biblik	Kuptimi
Jehova-Jireh	Zanafilla 22:13, 14	«Jehovai do të sigurojë.»
Jehova-Nisi	Dalja 17:15	Jehovai është sinjali im ose «flamuri im». (Diodati i Ri) Jehovai është një Perëndi të cilit njerëzit mund t’i drejtohen për ndihmë dhe mbrojtje.—Dalja 17:13-16.
Jehova-Shalom	Gjykatësit 6:23, 24	Jehovai është paqe.
Jave-Shama	Ezekieli 48:35, Bibla ECM	Jehovai është atje.

Arsye për ta njohur e për ta përdorur emrin e Zotit

Perëndia e konsideron të rëndësishëm emrin e tij, Jehova, përderisa e përfshiu me mijëra herë në Bibël.—Malakia 1:11.
Biri i Perëndisë, Jezui, e theksoi vazhdimisht rëndësinë e emrit të Zotit. Për shembull, ai iu lut Jehovait me fjalët: «U shenjtëroftë emri yt.»—Mateu 6:9; Gjoni 17:6.
Njohja dhe përdorimi i emrit të Perëndisë janë hapat e parë për të lidhur miqësi me Jehovain. (Psalmi 9:10; Malakia 3:16) Një miqësi e tillë u jep mundësi njerëzve të përjetojnë përmbushjen e këtij premtimi të Perëndisë: «Meqenëse ai më ka për zemër, unë do ta shpëtoj. Do ta mbroj, sepse njeh emrin tim.»—Psalmi 91:14.
Bibla pranon: «Ekzistojnë ata që quhen ‘perëndi’, qoftë në qiell, qoftë në tokë, ashtu sikurse ka shumë ‘perëndi’ dhe shumë ‘zotërinj’.» (1 Korintasve 8:5, 6) E megjithatë të vetmin Perëndi të vërtetë e identifikon qartësisht me emrin Jehova.—Psalmi 83:18.

a Disa studiues hebrenj parapëlqejnë që emrin e Perëndisë ta përkthejnë «Jahve».

b Në Bibël forma e shkurtuar e emrit hyjnor, «Jah», shfaqet rreth 50 herë, përfshirë përdorimin në fjalët «Haleluja» ose «Aleluja», që do të thotë «Lëvdoni Jah!».—Zbulesa 19:1; Bibla ECM; Diodati i Ri; Simon Filipaj.