PUTEOLI

Një port kryesor në juglindje të Romës në shekullin e parë të e.s. Pavli mbërriti në Puteoli kur po shkonte në Romë që të dilte para Cezarit, rreth vitit 59 të e.s. (Ve 28:13) Me ndihmën e jugës, anija e tij arriti «ditën e dytë» në Puteoli nga Regjiumi, një vend rreth 320 km në jug-juglindje.

Vëllezërit e krishterë të Puteolit iu përgjëruan Pavlit dhe shoqëruesve të tij që të qëndronin një javë me ta. (Ve 28:14) Kjo tregon se ai gëzonte njëfarë lirie, ndonëse ishte i burgosur. Edhe më parë, ndërsa ishte nën ruajtje në Cezare dhe Sidon, Pavli kishte gëzuar liri të kufizuar.​—Ve 24:23; 27:3.

Në përgjithësi mendohet se Puteoli është Pocuoli i sotëm, që gjendet në gjirin me të njëjtin emër, rreth 10 km në perëndim-jugperëndim të Napolit. Atje ende shihen rrënoja të mëdha të një moli të lashtë. Historiani Jozef e përmend vendin me emrin e vjetër, Dikaerkia, dhe thotë se atje ndodhej një koloni judenjsh.​—Antikitete judaike, XVII, 328 (xii, 1).

Apostulli Pavël qëndroi në Sirakuzë për tri ditë nga fundi i udhëtimit të tij në Romë, rreth vitit 59 të e.s. Ndalesa në këtë vend mund të ketë qenë e nevojshme, meqë anija duhej të priste ndonjë erë të përshtatshme për të lundruar. (Ve 28:12) Nga Sirakuza, anija e Pavlit i ra «rrotull» dhe mbërriti në Regjium, në skajin jugor të Italisë. Nuk dihet kuptimi i saktë i kësaj shprehjeje. Mbase anija ndoqi një udhë disi të lakuar, larg bregut, që të kapte erë të mjaftueshme për të fryrë velat. Ose ndoshta ‘lundroi rreth bregut’, që të mbërrinte në Regjium.​—Ve 28:13, CHC.