A e kishte parathënë Bibla si do të mendonin e si do të vepronin njerëzit sot?

Po, Bibla kishte parathënë se në përgjithësi njerëzit do të ndryshonin për keq në kohën tonë. Ajo zbulonte se ky ndryshim do të sillte degjenerim moral në një shkallë të madhe dhe rënie të atyre vlerave që e ndihmojnë shoqërinë të funksionojë siç duhet.a (2 Timoteut 3:1-5) Ama parathoshte edhe se disa njerëz nuk do t’i përvetësonin këto tipare negative. Me ndihmën e Perëndisë do t’u rezistonin ndikimeve të këqija dhe do të përputhnin mënyrën si mendojnë e si sillen me mënyrën që i pëlqen Perëndisë.—Isaia 2:2, 3.

Në këtë artikull do të shohim:

• Çfarë kishte parathënë Bibla për mënyrën si do të mendonin e si do të vepronin njerëzit në kohën tonë?

• Si do të ndikonin te të tjerët njerëzit egoistë?

• Pse njerëzit në përgjithësi do të ndryshonin për keq?

• Si duhet të reagojmë ne ndaj këtij ndryshimi?

• A do të bëheshin më të këqij të gjithë njerëzit?

• A do të përfundojë në kaos total shoqëria njerëzore?

Bibla përshkruan një sërë tiparesh dhe veprimesh negative që do të bëheshin të zakonshme, shkaku i të cilave është egoizmi. Njerëzit do të ishin «pa vetëkontroll» e «të dashuruar me veten». Gjithashtu ‘do të donin kënaqësitë dhe jo Perëndinë’.—2 Timoteut 3:2-4.

Tamam siç thoshte kjo profeci, në përgjithësi njerëzit sot mendojnë vetëm për veten, çfarë u leverdis atyre, çfarë i bën ata të ndihen mirë dhe të plotësuar, e kështu me radhë. Këto tipare janë kaq të përhapura, sa disa grupe njerëzish janë përshkruar si «brezi i unit», e madje «brezi unë unë unë». Mjaft njerëz janë kaq të përqendruar te vetja sa nuk kanë «dashuri për mirësinë», pra as nuk arrijnë të duan cilësitë e mira. Duke qenë «mosmirënjohës», nuk e ndiejnë për detyrë të jenë mirënjohës për gjërat që kanë ose për atë që bëjnë të tjerët për ta.—2 Timoteut 3:2, 3.

Egoizmi qëndron në rrënjë të disa tipareve të tjera që janë karakteristikë e ditëve tona:

• Lakmia. Hasim shpesh njerëz që janë «lakmues parash», të cilët e matin suksesin në jetë me të ardhurat ose me gjërat që zotërojnë.—2 Timoteut 3:2.

• Krenaria. Një numër i madh njerëzish janë «mburravecë, fodullë» dhe «të krekosur». (2 Timoteut 3:2, 4) Ata shesin mend dhe ekzagjerojnë aftësitë, cilësitë dhe pasuritë e tyre.

• Shpifjet. Jemi të rrethuar nga njerëz «blasfemues» dhe «shpifës». (2 Timoteut 3:2, 3) Këto fjalë u referohen njerëzve që fyejnë të tjerët a Zotin ose që thonë gënjeshtra për ta.

• Kokëfortësia. Shumë njerëz janë «të pabesë», ‘nuk janë të gatshëm për asnjë marrëveshje’, «tradhtarë» dhe «kokëkrisur». (2 Timoteut 3:2-4) Ata nuk duan të arrijnë në një marrëveshje, nuk bashkëpunojnë për të gjetur zgjidhje e as respektojnë marrëveshjen për të cilën kishin rënë dakord.

• Dhuna. Shumë veta sot janë «të egër», marrin zjarr kollaj, dhe kjo shpeshherë çon në veprime brutale e mizore.—2 Timoteut 3:3.

• Mosrespektimi i ligjeve. Jezui paratha se në kohën tonë do të kishte ‘rritje të ligësisë’. (Mateu 24:12) Paratha edhe se do të kishte «trazira» ose «rrëmuja» gjithandej.—Luka 21:9, shënimi.

• Mungesë dashurie brenda familjes. Ngaqë shumë janë «të pabindur ndaj prindërve» dhe «pa përzemërsi të natyrshme [familjare]», gjithnjë e më tepër pjesëtarë të familjes lihen pas dore dhe janë viktima të abuzimit dhe të dhunës.—2 Timoteut 3:2, 3.

• Hipokrizi fetare. Sot sa vjen e shtohet numri i njerëzve që thjesht «duket sikur janë të përkushtuar ndaj Perëndisë». (2 Timoteut 3:5) Në vend që të bëjnë vullnetin e Zotit, ndjekin udhëheqës fetarë të cilët u thonë atë që duan të dëgjojnë.—2 Timoteut 4:3, 4.

Ngaqë egoizmi ka marrë dhenë, sot njerëzit po vuajnë si kurrë më parë nga probleme të mëdha mendore dhe emocionale. (Eklisiastiu 7:7) Për shembull, disa njerëz lakmitarë përfitojnë në kurriz të të tjerëve. Ndonjëherë, ata që nuk kanë përzemërsi të natyrshme, abuzojnë me pjesëtarët e familjes që, si pasojë, bien në dëshpërim të thellë e madje mendojnë t’i japin fund jetës. Veç kësaj, çdo tradhtar dhe i pabesë lë vraga të thella emocionale te njerëzit që tradhton.

Bibla shpjegon arsyen e vërtetë që qëndron pas ndryshimit të njerëzve:

• Dashuria e sinqertë për Perëndinë dhe për të tjerët po pakësohet. (Mateu 24:12) Për këtë arsye, egoizmi përhapet gjithnjë e më shumë.

• Satana Djalli është dëbuar nga qielli dhe është kufizuar në afërsi të tokës. (Zbulesa 12:9, 12) Që atëherë, ligësia dhe egoizmi i tij kanë infektuar gjithnjë e më shumë njerëzimin.—1 Gjonit 5:19.

Fjala e Perëndisë thotë: «Largohu nga njerëzit e tillë!» (2 Timoteut 3:5, Bibla ECM) Kjo s’do të thotë se duhet të izolohemi nga shoqëria. Ama nuk duhet të jemi miq të ngushtë me njerëz egoistë dhe që shpërfillin Zotin.—Jakovi 4:4.

Jo. Bibla parathoshte se disa veta ‘do të psherëtinin e do të rënkonin për tërë gjërat e neveritshme që bëhen’. (Ezekieli 9:4) Ata do të luftonin egoizmin dhe do të jetonin në përputhje me normat e Perëndisë. Të folurit dhe sjellja e tyre do të dalloheshin qartë në krahasim me veprimet e njerëzve në përgjithësi. (Malakia 3:16, 18) Për shembull, do të përpiqeshin të ruanin marrëdhënie paqësore me të gjithë dhe nuk do të përfshiheshin në luftë ose në ngjarje të dhunshme.—Mikea 4:3.

Jo. Njerëzimi nuk do të marrë fund. Në vend të kësaj, së shpejti Zoti do të heqë nga toka njerëzit që janë të vendosur të shkelin normat e tij. (Psalmi 37:38) Ai do të themelojë «një tokë të re», pra një shoqëri të re njerëzore këtu në tokë, ku zemërbutët do të jetojnë në paqe përgjithmonë. (2 Pjetrit 3:13; Psalmi 37:11, 29) Kjo shpresë nuk është thjesht ëndërr. Që sot Bibla po i ndihmon njerëzit të ndryshojnë e ta përputhin jetën me udhët e drejta të Perëndisë.—Efesianëve 4:23, 24.