Të qëndrojmë të mbrojtur si pjesë e organizatës së Perëndisë
«Emri i Jehovait është një kullë e fortë. Në të vrapon i drejti dhe i jepet mbrojtje.»—PROVERBAT 18:10, BR.
1. Sipas lutjes së Jezuit, në cilën situatë të vështirë gjenden të krishterët?
PAK kohë para se të vdiste, Jezui iu lut Atit të tij qiellor në dobi të ithtarëve të tij. Me interesim të dashur ai tha: «U kam dhënë atyre fjalën tënde, por bota i ka urryer, sepse nuk janë pjesë e botës, pikërisht ashtu si unë nuk jam pjesë e botës. Të kërkoj, jo që t’i nxjerrësh nga bota, por të vigjilosh mbi ta për shkak të të ligut.» (Gjoni 17:14, 15, BR) Jezui e dinte se bota do të ishte një vend i rrezikshëm për të krishterët. Ajo do ta tregonte urrejtjen e saj, duke gënjyer për ta dhe duke i persekutuar. (Mateu 5:11, 12; 10:16, 17) Ajo do të ishte edhe një burim korrupsioni.—2. Timoteut 4:10; 1. Gjonit 2:15, 16.
2. Ku mund të gjejnë të krishterët një vend mbrojtjeje frymore?
2 Bota që do t’i urrente të krishterët përbëhet nga ata që janë të larguar nga Perëndia e janë nën kontrollin e Satanait. (1. Gjonit 5:19) Kjo botë është shumë më e madhe se kongregacioni i krishterë dhe vetë Satanai është shumë më i fuqishëm se çdo njeri. Prandaj, urrejtja e botës është një kërcënim i vërtetë. Ku mund të gjejnë mbrojtje frymore ithtarët e Jezuit? Një pohim i bërë në Kullën e Rojës 1 dhjetor 1922, anglisht, sugjeron përgjigjen: «Tani ne jemi në ditë të liga. Beteja zhvillohet mes organizatës së Satanait dhe organizatës së Perëndisë. Është një betejë dhëmb për dhëmb.» Në këtë konflikt, organizata e Perëndisë është një vend mbrojtjeje frymore. Fjala «organizatë» nuk shfaqet në Bibël dhe në vitet 20, «organizata e Perëndisë» ishte një shprehje e re. Çfarë është, pra, kjo organizatë? E si mund të gjejmë ne mbrojtje në të?
Organizata e Jehovait
3, 4. (a) Sipas një fjalori dhe sipas Kullës së Rojës, çfarë është një organizatë? (b) Në cilin kuptim mund të quhet një organizatë shoqëria ndërkombëtare e Dëshmitarëve të Jehovait?
3 Sipas një fjalori (Concise Oxford Dictionary) një organizatë është «një grup i organizuar njerëzish». Me këtë në mendje, e kuptojmë se, meqë apostujt i organizuan të krishterët e shekullit të parë në kongregacione lokale nën mbikëqyrjen e një trupi udhëheqës në Jerusalem, është e përshtatshme që për atë «shoqëri vëllezërish» të flitet si për një organizatë. (1. Pjetrit 2:17, BR) Dëshmitarët e Jehovait sot kanë një strukturë të ngjashme organizative. Uniteti i grupit të shekullit të parë u forcua nga «dhuratat në njerëz», siç ishin disa «barinj dhe mësues». Disa prej këtyre udhëtuan nga një kongregacion në tjetrin, kurse të tjerët ishin pleq në kongregacionet lokale. (Efesianëve 4:8, BR, 11, 12; Veprat 20:28) «Dhurata» të ngjashme forcojnë sot unitetin e Dëshmitarëve të Jehovait.
4 Në Kullën e Rojës, 1 nëntor 1922, anglisht, për fjalën «organizatë» thuhej: «Një organizatë është një shoqëri personash për qëllimin e përmbushjes së një plani të hartuar.» Kulla e Rojës vazhdonte të shpjegonte se quajtja e Dëshmitarëve të Jehovait një organizatë, nuk i bën ata «një sekt në kuptimin e përdorimit të këtij termi, por do të thotë thjesht se Studentët e Biblës [Dëshmitarët e Jehovait] po përpiqen t’i përmbushin qëllimet e Perëndisë dhe ta bëjnë këtë ashtu si bën çdo gjë Zotëria, në një mënyrë të rregullt». (1. Korintasve 14:33) Apostulli Pavël tregoi se të krishterët e ditëve të tij vepruan po ashtu në një mënyrë të rregullt. Ai e krahasoi shoqërinë e krishterë të mirosur me trupin njerëzor, i cili ka shumë pjesë, ku secila prej tyre përmbush rolin që i është caktuar në mënyrë që i gjithë trupi të funksionojë siç duhet. (1. Korintasve 12:12-26) Ky është një ilustrim i shkëlqyer i një organizate. Pse ishin të organizuar të krishterët? Për t’u shërbyer «qëllimeve të Perëndisë», për të bërë vullnetin e Jehovait.
5. Cila është organizata e dukshme e Perëndisë?
5 Bibla paratha se të krishterët e vërtetë sot do të ishin të bashkuar, të sjellë së bashku në një «vend» si një «komb», ku ata do të «shkëlqenin si ndriçues në botë». (Isaia 66:8; Filipianëve 2:15, BR) Ky «komb» i organizuar tani numëron më shumë se pesë milionë e gjysmë veta. (Isaia 60:8-10, 22) Gjithsesi, kjo nuk është shtrirja e plotë e organizatës së Perëndisë. Në të përfshihen edhe engjëjt.
6. Në kuptimin e saj më të zgjeruar, kush e përbën organizatën e Perëndisë?
6 Ekzistojnë shumë shembuj të engjëjve që punojnë së bashku me shërbëtorët njerëzorë të Perëndisë. (Zanafilla 28:12; Danieli 10:12-14; 12:1; Hebrenjve 1:13, 14; Zbulesa 14:14-16) Prandaj, në mënyrë të përshtatshme në Kullën e Rojës, 15 maj 1925, anglisht, thuhej: «Të gjithë engjëjt e shenjtë janë pjesë e organizatës së Perëndisë.» Më tej, aty thuhej: «Në krye të organizatës së Perëndisë, duke pasur zotërimin e të gjithë fuqisë dhe autoritetit, [është] Zotëria Jezu Krisht.» (Mateu 28:18) Kështu, në kuptimin më të zgjeruar, organizata e Perëndisë përbëhet nga të gjithë ata në qiell e mbi tokë që punojnë së bashku për të bërë vullnetin e Perëndisë. (Shiko kutinë.) Sa privilegj i mrekullueshëm është të jesh pjesë e kësaj organizate! E çfarë gëzimi është të presësh me padurim kohën kur të gjitha krijesat e gjalla, qiellore dhe tokësore, do të jenë të organizuara për të lavdëruar Perëndinë Jehova në unitet! (Zbulesa 5:13, 14) Megjithatë, cila është mbrojtja që siguron organizata e Perëndisë sot?
Të mbrojtur në organizatën e Perëndisë: Si?
7. Në ç’mënyrë na mbron organizata e Perëndisë?
7 Organizata e Perëndisë mund të na ndihmojë, duke na ruajtur nga Satanai dhe strategjitë e tij dinake. (Efesianëve 6:11) Satanai bën presion, i persekuton dhe i tundon adhuruesit e Jehovait, duke pasur vetëm një qëllim në mendje: t’i largojë ata nga ‘udha në të cilën duhet të ecin’. (Isaia 48:17, BR; krahaso Mateun 4:1-11.) Ne nuk mund t’i shmangim kurrë plotësisht këto sulme në këtë sistem gjërash. Megjithatë, marrëdhënia jonë e ngushtë me Perëndinë dhe me organizatën e tij na forcon dhe na mbron, duke na ndihmuar kështu për të qëndruar në «udhën». Si rezultat, ne nuk dështojmë në lidhje me shpresën tonë.
8. Si i mbështet organizata e padukshme e Jehovait shërbëtorët e tij tokësorë?
8 Si e siguron organizata e Perëndisë këtë mbrojtje? Së pari, ne kemi mbështetjen e padështueshme të shërbëtorëve engjëllorë të Jehovait. Kur Jezui ishte nën një presion intensiv, një engjëll i shërbeu atij. (Luka 22:43) Kur ishte nën kërcënimin e vdekjes, Pjetrin e shpëtoi në mënyrë të mrekullueshme një engjëll. (Veprat 12:6-11) Edhe pse sot nuk ka mrekulli të tilla, popullit të Jehovait i është premtuar mbështetja engjëllore në aktivitetin e predikimit. (Zbulesa 14:6, 7) Shpesh ata kanë forcë përtej asaj që është normale, kur ballafaqohen me situata të vështira. (2. Korintasve 4:7) Për më tepër, ata janë të vetëdijshëm se «engjëlli i Jehovait fushon kudo përreth atyre që i druhen atij dhe ai i shpëton ata».—Psalmi 34:7, BR.
9, 10. Në ç’kuptim mund të thuhet se «emri i Jehovait është një kullë e fortë» dhe si zbatohet ky parim për organizatën e Perëndisë si një e tërë?
9 Edhe organizata e dukshme e Jehovait është një mbrojtje. Si? Në Proverbat [Fjalët e urta] 18:10, lexojmë: «Emri i Jehovait është një kullë e fortë. Në të vrapon i drejti dhe i jepet mbrojtje.» (BR) Kjo nuk do të thotë se thjesht përsëritja e emrit të Perëndisë siguron mbrojtje. Në vend të kësaj, strehimi ynë në emrin e Perëndisë do të thotë të besojmë në vetë Jehovain. (Psalmi 20:1; 122:4) Do të thotë të mbështetësh sovranitetin e tij, duke mbajtur lart ligjet dhe parimet e tij dhe duke pasur besim në premtimet e tij. (Psalmi 8:1-9; Isaia 50:10; Hebrenjve 11:6) Përfshin t’i japësh Jehovait devocion ekskluziv. Vetëm ata që e adhurojnë Jehovain në këtë mënyrë mund të thonë bashkë me psalmistin: «Në [Jehovain] gëzohet zemra jonë, sepse në emrin e tij të shenjtë ne kemi vendosur besimin tonë.»—Psalmi 33:21, BR; Ps 124:8.
10 Tani e gjithë organizata e dukshme e Perëndisë thotë bashkë me Mikean: «Ne, nga ana jonë, do të ecim në emër të Jehovait, Perëndisë sonë, në kohë të pacaktuar, madje përgjithmonë.» (Mikea 4:5, BR) Organizata e kohëve moderne është e mbledhur përreth ‘Izraelit të Perëndisë’, i cili në Bibël quhet «një popull për emrin e tij». (Galatasve 6:16; Veprat 15:14; Isaia 43:6, 7; 1. Pjetrit 2:17) Prandaj, të jesh pjesë e organizatës së Jehovait do të thotë të jesh pjesë e një populli që kërkon dhe merr mbrojtje në emrin e Perëndisë.
11. Në cilat mënyra specifike siguron mbrojtje organizata e Jehovait për ata që janë pjesë e saj?
11 Përveç kësaj, organizata e dukshme e Perëndisë është një bashkësi besimi, një shoqëri bashkëbesimtarësh që ndërtojnë dhe inkurajojnë njëri-tjetrin. (Proverbat 13:20; Romakëve 1:12) Ajo është një vend ku barinjtë e krishterë kujdesen për delet, inkurajojnë të sëmurët e të dëshpëruarit dhe përpiqen të rivendosin ata që kanë rënë. (Isaia 32:1, 2; 1. Pjetrit 5:2-4) «Skllavi i besueshëm dhe i matur» siguron «ushqim në kohën e duhur» me anë të organizatës. (Mateu 24:45, BR) Ky «skllav», i përbërë nga të krishterë të mirosur, siguron gjërat më të mira nga ana frymore: njohurinë e saktë të bazuar në Bibël, e cila mund të çojë në jetën e përhershme. (Gjoni 17:3) Falë udhëheqjes nga «skllavi», të krishterët marrin ndihmë për të mbajtur standardet e larta morale dhe për të qenë «të kujdesshëm si gjarpërinjtë e megjithatë të pafajshëm si pëllumbat» në ambientin e rrezikshëm që i rrethon. (Mateu 10:16, BR) Gjithashtu, ata ndihmohen gjithnjë për të pasur «shumë për të bërë në veprën e Zotërisë», e cila në vetvete është një mbrojtje e fuqishme.—1. Korintasve 15:58, BR.
Kush është pjesë e organizatës së Perëndisë?
12. Cilët identifikohen si pjesë e organizatës qiellore të Perëndisë?
12 Duke qenë se kjo mbrojtje është në dispozicion të atyre që janë pjesë e organizatës së Perëndisë, kë përfshin kjo? Në lidhje me organizatën qiellore, nuk ka asnjë dyshim për përgjigjen e kësaj pyetjeje. Satanai dhe engjëjt e tij nuk janë më në qiell. Nga ana tjetër, engjëjt besimplotë janë ende atje, «në asamblenë e përgjithshme». Apostulli Gjon pa se gjatë ditëve të fundit «Qengji», kerubinët («katër qeniet e gjalla») dhe «shumë engjëj» do të ishin pranë fronit të Perëndisë. Me ta do të ishin 24 pleq, që përfaqësojnë ata të krishterë të mirosur që tashmë kanë hyrë në trashëgiminë e tyre të lavdishme qiellore. (Hebrenjve 12:22, 23, BR; Zbulesa 5:6, 11; 12:7-12) Është e qartë se të gjithë këta janë pjesë e organizatës së Perëndisë. Por, mes njerëzve gjërat nuk janë kaq të thjeshta.
13. Si i identifikoi Jezui ata që janë pjesë e organizatës së Perëndisë e ata që nuk janë?
13 Për disa që do të pohonin se e ndiqnin atë, Jezui tha: «Shumë do të më thonë në atë ditë: ‘Zotëri, Zotëri, a nuk profetizuam në emrin tënd, dëbuam demonët në emrin tënd dhe kryem shumë vepra të fuqishme në emrin tënd?’ E megjithatë unë do t’u them atyre: Nuk ju kam njohur kurrë! Largohuni nga unë, ju punëtorë të paligjshmërisë.» (Mateu 7:22, 23, BR) Nëse dikush është një punëtor i paligjshmërisë, patjetër që nuk është pjesë e organizatës së Perëndisë, pavarësisht nga ajo që pohon ai dhe pavarësisht nga vendi ku shkon për të adhuruar. Jezui tregoi edhe si të identifikojmë një person që është pjesë e organizatës së Perëndisë. Ai tha: «Jo gjithkush që më thotë: ‘Zotëri, Zotëri’, do të hyjë në mbretërinë e qiejve, por ai që bën vullnetin e Atit tim që është në qiej.»—Mateu 7:21, BR.
14. Cilat aspekte të vullnetit të Perëndisë identifikohen si të detyrueshme për ata që janë pjesë e organizatës së Perëndisë?
14 Kështu, për të qenë pjesë e organizatës së Perëndisë, në të cilën «mbretëria e qiejve» është pjesa qendrore, një person duhet të bëjë patjetër vullnetin e Perëndisë. Cili është vullneti i tij? Pavli identifikoi një aspekt jetësor të tij kur tha: «Vullneti [i Perëndisë] është që çdo lloj njeriu duhet të shpëtohet dhe të arrijë një njohuri të saktë të së vërtetës.» (1. Timoteut 2:4, BR) Nëse një person kërkon me të vërtetë të fitojë njohurinë e saktë nga Bibla, ta zbatojë atë në jetën e tij dhe t’ia shpërndajë atë «çdo lloj njeriu», ai po bën vullnetin e Perëndisë. (Mateu 28:19, 20; Romakëve 10:13-15) Vullneti i Perëndisë përfshin edhe që delet e Jehovait të ushqehen dhe t’u tregohet kujdes. (Gjoni 21:15-17) Mbledhjet e krishtere luajnë një rol jetësor në këtë. Një person që është i lirë të ndjekë këto mbledhje, por i lë pas dore ato, nuk tregon çmueshmëri për vendin e tij në organizatën e Perëndisë.—Hebrenjve 10:23-25.
Miqësia me botën
15. Çfarë paralajmërimi u dha Jakovi kongregacioneve të ditëve të tij?
15 Rreth 30 vjet pas vdekjes së Jezuit, gjysmëvëllai i tij Jakovi identifikoi disa faktorë që mund ta rrezikojnë vendin e dikujt në organizatën e Perëndisë. Ai shkroi: «Tradhtare bashkëshortore, a nuk e dini se miqësia me botën është armiqësi me Perëndinë? Prandaj, kushdo që dëshiron të jetë mik i botës, e bën veten armik të Perëndisë.» (Jakovi 4:4, BR) Një armik i Perëndisë sigurisht që nuk është pjesë e organizatës së tij. Çfarë është, pra, miqësia me botën? Është shpjeguar se ajo merr disa forma të ndryshme, si kultivimi ose përfshirja në shoqëritë e këqija. Përveç kësaj, Jakovi u përqendrua mbi diçka shumë specifike: mbi qëndrimet e gabuara mendore që çojnë në sjellje jo të përshtatshme.
16. Cili ishte konteksti i paralajmërimit të Jakovit se miqësia me botën është armiqësi me Perëndinë?
16 Në Jakovin 4:1-3, lexojmë: «Prej cilit burim janë luftërat dhe prej cilit burim janë ndeshjet mes jush? A nuk janë prej këtij burimi, domethënë nga dëshirat tuaja të forta për kënaqësi epshore, që zhvillojnë një konflikt në gjymtyrët tuaja. Ju dëshironi, por megjithatë nuk keni. Ju vazhdoni të vritni dhe të dëshironi me lakmi dhe megjithatë nuk jeni në gjendje të arrini të keni. Ju vazhdoni të ndesheni dhe të bëni luftë. Ju nuk keni, sepse nuk kërkoni. Ju kërkoni dhe megjithatë nuk merrni, sepse kërkoni për një qëllim të gabuar, që ta shpenzoni në dëshirat tuaja të forta për kënaqësi epshore.» (BR) Pikërisht pasi shkroi këto fjalë, Jakovi paralajmëroi kundër miqësisë me botën.
17. Në ç’kuptim kishte «luftëra» dhe «zënka» në kongregacionin e krishterë të shekullit të parë?
17 Shekuj pas vdekjes së Jakovit, të krishterët e rremë bënë luftë dhe vranë njëri-tjetrin në kuptimin e drejtpërdrejtë të fjalës. Sidoqoftë, Jakovi po u shkruante pjesëtarëve të shekullit të parë të ‘Izraelit të Perëndisë’, ‘priftërinj dhe mbretër’ të ardhshëm qiellorë. (Zbulesa 20:6) Ata nuk e vritnin njëri-tjetrin në luftëra të mirfillta. Prandaj, pse foli Jakovi për këto gjëra mes të krishterëve? E, pra, apostulli Gjon e quajti dikë që urrente vëllain e vet një vrasës. Dhe Pavli foli për grindjet dhe konfliktet që lindin nga ndryshimi i personaliteteve si për «luftëra» dhe «zënka». (Titit 3:9; 2. Timoteut 2:14; 1. Gjonit 3:15-17) Në të njëjtën mënyrë, me sa duket Jakovi kishte ndër mend dështimin për të dashur të krishterët e tjerë. Mes tyre, të krishterët po vepronin në një mënyrë që i ngjante mënyrës me të cilën njerëzit në botë trajtonin shpesh njëri-tjetrin.
18. Çfarë gjëje mund të çojë në veprime dhe ndjenja jo të dashura mes të krishterëve?
18 Pse ndodhën gjëra të tilla në kongregacionet e krishtere? Për shkak të qëndrimeve të gabuara, siç është dëshirimi me lakmi dhe «dëshirat e forta për kënaqësi epshore». Edhe krenaria, xhelozia e ambicia mund ta prishin shoqërinë e dashur të krishterë në një kongregacion. (Jakovit 3:6, 14) Qëndrime të tilla e bëjnë një person mik me botën e në këtë mënyrë armik me Perëndinë. Asnjë person që ushqen qëndrime si këto nuk mund të presë të mbetet pjesë e organizatës së Perëndisë.
19. (a) Kujt i duhet vënë faji kryesisht nëse një i krishterë kupton se mendimet e gabuara po zënë rrënjë në zemrën e tij? (b) Si mund t’i kapërcejë një i krishterë mendimet e gabuara?
19 Kujt mund t’ia vëmë fajin nëse kuptojmë se mendimet e gabuara kanë zënë rrënjë në zemrën tonë? Satanait? Në njëfarë mase, po. Ai është «sundimtari i autoritetit të ajrit» të kësaj bote, në të cilën këto qëndrime janë shumë të përhapura. (Efesianëve 2:1, 2, BR; Titit 2:12) Por, zakonisht rrënjët e mendimeve të gabuara gjenden në mishin tonë të papërsosur. Pasi paralajmëroi kundër miqësisë me botën, Jakovi shkroi: «Apo ju duket se shkrimi e thotë pa asnjë qëllim: ‘Është me një tendencë drejt smirës që fryma, e cila ka zënë vend brenda nesh, vazhdon të digjet nga dëshira.’?» (Jakovit 4:5, BR) Të gjithë ne kemi një tendencë të lindur për të bërë të gabuarën. (Zanafilla 8:21; Romakëve 7:18-20) Gjithsesi, ne mund ta luftojmë këtë tendencë nëse pranojmë dobësitë tona dhe mbështetemi në ndihmën e Jehovait për t’i kapërcyer ato. Jakovi thotë: «Megjithatë, dashamirësia e pamerituar që jep ai [Perëndia], është më e madhe [se tendenca jonë e lindur për smirën].» (Jakovit 4:6, BR) Falë ndihmës së frymës së shenjtë të Perëndisë, mbështetjes së vëllezërve besimplotë të krishterë dhe me anë të vlerës së flijimit shpërblyes të Jezuit, të krishterët besimplotë nuk mposhten nga dobësitë e mishit të tyre. (Romakëve 7:24, 25) Ata janë të sigurt në organizatën e Perëndisë, miq të Perëndisë e jo të botës.
20. Çfarë bekimesh të pasura gëzojnë ata që janë pjesë e organizatës së Perëndisë?
20 Bibla premton: «Vetë Jehovai do t’i japë vërtet forcë popullit të tij. Vetë Jehovai do ta bekojë popullin e tij me paqe.» (Psalmi 29:11, BR) Nëse jemi me të vërtetë pjesë e «kombit» të sotëm të Jehovait, pjesë e organizatës së tij të dukshme, ne do të kemi forcën që jep ai dhe do të gëzojmë paqen me të cilën ai bekon popullin e vet. Qartë, bota e Satanait është shumë më e madhe se organizata e dukshme e Jehovait dhe Satanai është shumë më i fortë se ne. Por Jehovai është i Plotfuqishmi. Forca e tij aktive është e pathyeshme. Edhe engjëjt e tij të fuqishëm janë të bashkuar me ne për t’i shërbyer Perëndisë. Kështu, pavarësisht nga urrejtja që hasim, ne mund të qëndrojmë të palëkundur. Ashtu si Jezui, ne mund ta mundim botën.—Gjoni 16:33; 1. Gjonit 4:4.
A mund ta shpjegosh?
◻ Cila është organizata e dukshme e Perëndisë?
◻ Në cilat mënyra siguron mbrojtje organizata e Perëndisë?
◻ Kush është pjesë e organizatës së Perëndisë?
◻ Si mund ta shmangim miqësinë me botën?
[Kutia në faqen 9]
Cila është organizata e Perëndisë?
Në literaturën e Dëshmitarëve të Jehovait, shprehja «organizata e Perëndisë» përdoret në këto tri mënyra:
1 Organizata qiellore, e padukshme e Jehovait, e përbërë nga krijesat besimplote frymore. Në Bibël, kjo quhet «Jerusalemi i sipërm».—Galatasve 4:26, BR.
2 Organizata njerëzore, e dukshme e Jehovait. Sot, ajo konsiston në mbetjen e të mirosurve, të cilës i është bashkuar shumica e madhe.
3 Organizata universale e Jehovait. Sot ajo konsiston në organizatën qiellore të Jehovait bashkë me të mirosurit e tij, bijtë e adoptuar në tokë, të cilët kanë një shpresë qiellore. Me kalimin e kohës, ajo do të përfshijë edhe njerëzit e përsosur mbi tokë.
[Figura në faqen 10]
Ushqimi më i mirë frymor sigurohet me anë të organizatës së Jehovait