Esekièl

10 Na tapu a plata sani di ben de na tapsei fu den kerub-engel, mi si wan sani di ben gersi wan kownusturu fu safir-ston. 2 Dan Gado taki nanga a man di ben weri a linnen-krosi. A taigi en: „Go na mindri den wiel na ondro den kerub-engel. Teki tu anu fu a krofaya di e bron na mindri den kerub-engel, dan yu musu trowe en na tapu a foto.” Ne mi si fa a go na insei.

3 Di a man go na insei, den kerub-engel ben tnapu na a ret’anusei fu a tempel èn a wolku ben furu a heri pkin tempel-dyari. 4 Dan a glori fu Yehovah kmoto na den kerub-engel èn a go na a mofodoro fu a tempel. Safsafri a wolku furu a heri tempel èn a heri fesdyari ben e brenki nanga a glori fu Yehovah. 5 A b’bari di den frei fu den kerub-engel ben e meki, ben de fu yere srefi na a bigi dyari. A ben de neleki te na Almakti Gado e taki.

6 Di Gado taigi a man di ben weri a linnen-krosi fu teki faya na mindri den wiel, iya, na mindri den kerub-engel, a man go na insei èn a go tnapu na sei a wiel. 7 Dan wan fu den kerub-engel langa en anu fu teki a faya di ben de na mindri den kerub-engel èn a poti en na ini ala den tu anu fu a man di ben weri a linnen-krosi. A man teki en èn a go na dorosei. 8 Den kerub-engel ben abi sani di ben gersi libisma anu na ondro den frei.

9 Dan mi si fo wiel na sei den kerub-engel. Wán wiel ben de na sei ibri kerub-engel. Den wiel ben e brenki leki krisolit-ston.* 10 Ala den fo wiel ben de a srefi. A ben gersi leki wan wiel ben de na ini wan tra wiel. 11 Te den ben e gwe, den ben kan go na iniwan sei pe den ben wani go. Den no ben abi fu drai fu go na wan tra sei, bika den ben go na a sei pe iniwan fu den fesi fu den kerub-engel ben sori go. 12 Den heri skin, den baka, den anu, den frei èn ala den fo wiel fu den kerub-engel ben lai nanga ai. 13 Mi yere wan sten e taigi den wiel: „Un bigin go!”

14 Ibriwan fu den* ben abi fo fesi. A foswan ben de a fesi fu wan kerub-engel, a di fu tu ben de a fesi fu wan libisma. A di fu dri ben de a fesi fu wan lew èn a di fu fo ben de a fesi fu wan aka.

15 Den kerub-engel ben e opo ibri tron baka. Den ben de den srefi libisani* di mi si na Kebar-liba. 16 Te den kerub-engel ben e gwe, den wiel di ben de na den sei ben e gwe tu. Te den kerub-engel ben opo den frei fu frei go na loktu, dan den wiel ben de leti na den sei. Den no ben e go na nowan tra sei. 17 Te den libisani ben tan tnapu, den wiel ben tan tnapu tu. Te den libisani ben opo go na loktu, den wiel ben opo go na loktu tu, bika a yeye di ben de na ini den libisani,* ben de na ini den wiel tu.

18 Ne a glori fu Yehovah kmoto na a mofodoro fu a tempel èn a tan tnapu na tapsei fu den kerub-engel. 19 Dan den kerub-engel opo den frei èn mi si fa den opo go na loktu. Den wiel ben de leti na den sei di den ben e gwe. Den go tnapu na a owstusei portu fu a tempel fu Yehovah èn a glori fu a Gado fu Israel ben de na tapsei fu den.

20 Na den libisani disi* mi si na Kebar-liba, na ondro a kownusturu fu a Gado fu Israel. Na so mi kon sabi taki den ben de kerub-engel. 21 Ibriwan fu den fo libisani ben abi fo fesi nanga fo frei. Na ondro den frei, sani ben de di ben gersi den anu fu wan libisma. 22 Den fesi fu den ben gersi den fesi fu den libisani di mi ben si na Kebar-liba. Ibriwan fu den kerub-engel ben e gwe langalanga.