2 NOA
A ben krutu grontapu
WAN pisi ten baka di Heinok dede, wan tu engel na hemel trangayesi Gado. Den ogri engel disi bigin luku den frow na grontapu. Dati meki den teki libisma skin gi densrefi èn den teki ala den uma di den ben wani leki frow. Den manpkin di den ben kisi ben de afu engel èn afu libisma. Bijbel e kari den manpkin disi Neifilim. Den manpkin disi ben bigi, den ben ogri èn den ben wreed srefsrefi. Disi meki taki libisma na grontapu ben kon ogri srefsrefi. Gi Gado, den libisma di a ben meki fu libi na grontapu, ben pori helemaal. Ma wan fu den bakapkin fu Heinok ben de heri tra fasi leki den tra sma na grontapu. A nen fu en ben de Noa.
Noa ben tron wan man di ben tan du san reti, neleki Heinok. Bijbel e taki: „Noa ben e waka nanga a tru Gado.” Bakaten Noa trow èn en nanga en frow leri den dri manpkin fu den fu gi yesi na Yehovah tu. Dati meki na osofamiri disi ben de heri tra fasi leki den tra sma.
Wan dei, Yehovah taigi Noa taki a ben o kiri ala den ogri sma na grontapu. Ma Yehovah ben gi Noa howpu tu. A taigi Noa fu bow wan bigi ark, noso wan bigi boto di ben gersi wan kisi, di ben o kibri a libi fu ret’ati sma. Noiti ete Noa ben si wan bigi frudu di ben o tapu heri grontapu soleki fa Yehovah ben taki. Èn noiti ete Noa ben bow so wan bigi ark. Ma fu di Noa ben fertrow Yehovah nanga den sani di a ben pramisi, meki a bigin bow na ark.
Noa nanga en osofamiri ben abi ogr’ati feanti di no ben lobi a boskopu nanga a wroko fu den
Noa nanga en osofamiri ben musu abi dek’ati fu man du a wroko disi. Kande furu sma ben lafu den èn son sma pruberi fu tapu den fu du a wroko di den ben musu du. Boiti dati yu ben abi den ogri engel tu di ben tranga èn den manpkin fu den ben lobi fu du ogri nanga trawan. Ma Noa èn a frow fu en di tan horbaka gi en, den dri manpkin fu den nanga den frow fu den, no meki noti tapu den fu gi yesi na Yehovah. Sowan 50 yari langa, den aiti sma disi wroko tranga ibri dei fu bow na ark.
Ma Noa ben du wan tra sani tu. Bijbel e kari a famiri-edeman disi „wan preikiman fu retidu”. A teki fesi leki famiri-edeman fu warskow sma taki wan frudu ben o kon. Ma nowan sma ben arki en. Srefi den tra famiri fu Noa no ben arki en. Den sma no ben wani tapu fu du ogri. A tranga bribi di Noa ben abi ben meki taki a de heri tra fasi leki den tra sma. Wi kan ferstan fu san ede Bijbel e taki fu Noa: „Nanga a bribi disi Noa ben krutu grontapu.”
Te fu kba, Noa nanga en osofamiri kba bow na ark. Baka dati den tyari n’nyan, watra nanga tra sani di den ben o abi fanowdu gi densrefi nanga ala den meti, go na ini na ark. Bakaten wan aparti sani psa. Ala sortu meti, manwan nanga umawan, bigin kon na ini na ark. Sondro fu wan sma tyari den, den „go na Noa na ini na ark tu na tu”.
Gado ben taigi Noa kba fu tyari en osofamiri go na ini na ark, fu di alen ben o kon baka seibi dei. Wi kan ferstan fa a famiri disi ben abi en druk fu du wan tu sani ete. Kande den ben teki den lasti sani ete fu tyari go na ini na ark èn den ben poti den sani na den presi. A kan taki now sma ben lafu den èn spotu den moro. Ma di den lai ala sani poti na ini na ark èn den go na insei, dan Yehovah srefi tapu a doro. Di den sma si san psa, dan den no ben man lafu moro. Dan alen bigin fadon. A presi bigin sungu èn a watra tan kren moro nanga moro. Alen kon 40 dei langa teleki den ede fu den bergi ben tapu nanga watra. Na so Yehovah kiri ala den ogri sma.
Noa nanga en osofamiri tan moro leki wán yari na ini na ark sondro taki wan sani psa nanga den. Na a ten dati a watra bigin saka pkinpkin. Te fu kba, na ark go fasi na wan bergi èn Yehovah taigi Noa bakaten dati a ben kan kmoto na ini na ark. Di Noa nanga en osofamiri kmoto na ini na ark, den tyari ofrandi gi Yehovah fu di den ben de nanga tangi taki a kibri den. Yehovah pramisi taki noiti moro a o tyari so wan frudu kon na heri grontapu. A gi libisma a regenboog fu sori taki a o hori ensrefi na a pramisi fu en.
Ala libisma na ini a ten disi e kon fu a famiri dati. Dati meki wi de nanga tangi trutru taki den ben abi a dek’ati fu de tra fasi leki den ogri sma fu a ten dati.
Leisi a tori:
Prakseri a sani disi:
Na sortu fasi Noa sori taki a abi dek’ati?
Diki moro dipi
1. Fa a grontapu ben de fosi a Frudu? (w02 1/3 5 ¶3–6 ¶4)
2. O ten Gado taigi Noa fu bow na ark? O ten Gado taigi Noa krin taki a Frudu ben o bigin? (w12 15/4 23 ¶5-8)
3. Fu san ede wi kan bribi taki a Frudu psa trutru? (ijwbq artikel 156 ¶2-5, faki-wcgr) 1
Historic Collection/Alamy Stock Photo
Prenki 1: Wan owru Hindu tori di e taki fu wan man di bow wan boto fu man psa wan frudu di ben kon na heri grontapu. Baka a frudu a tyari wan ofrandi èn bakaten a kon tron a p’pa fu ala libisma na grontapu.
4. San psa moro leki 100 yari baka a Frudu? Fa Noa ben feni den sani di ben psa aladi a ben kon owru kba? (it „Noa” nr. 1 ¶12-wcgr) 2
Prenki 2
San yu leri
Fa a ten fu wi de a srefi leki a ten fu Noa? (Mat. 24:36-39)
Te wi e luku na eksempre fu Noa, dan o prenspari a de . . .
fu orga sani bun? 3
Prenki 3
fu wroko tranga? 4
Prenki 4
fu abi pasensi? 5
Prenki 5
Fa yu kan abi a srefi dek’ati leki Noa?
Denki dipi
San a tori disi e leri mi fu Yehovah?
San a tori disi abi fu du nanga a wani fu Yehovah?
San mi ben o wani aksi Noa te a opo baka?
Sortu tra sani yu kan leri
Luku fa wan p’pa e wroko tranga neleki Noa.
Teki na eksempre fu sma di ben abi bribi—De leki Noa, no de leki den sma fu a ten fu en (2:57)
Yepi yu pkin fu si san den kan leri fu Noa.