Bijbellési pisi foe na theocratisskorol lezing nr. (2)
8 juli: NUMERI 12:1-16.
Mirjam nanga Aäron now bigin taki tége Mozes foe na Kuschitis oema di a ben teki. 2 Èn den ben tan e taki: „Sonten Jehovah ben taki nanga jepi foe Mozes wawan? A no ben taki nanga jepi foe oenoe?” Èn Jehovah ben e arki. 3 Èn a man Mozes ben de na moro safri-ati sma di ben libi na tapoe a fesi foe grontapoe. 4 Ne wantenso Jehovah ben taki gi Mozes nanga Aäron nanga Mirjam: „Oen go nanga oen dri na a tenti foe komakandra.” Foe dat’ede den ben go nanga den dri na a tenti na dorosé. 5 Baka di Jehovah ben saka kon na ini na wolkoe-kolom èn go tanapoe na a mofodoro foe na tenti èn a kari Aäron nanga Mirjam. Na baka foe dati ala toe ben kon na fesisé. 6 Moro fara a ben taki: „Jere mi wortoe tangitangi. Efoe wan sma na oen mindri ben tron wan proféti foe Jehovah, mi ben sa meki misrefi bekenti na en na ini wan visioen. Ini wan dren mi ben sa taki nanga en. 7 No so nanga mi knegti Mozes! Na en mi e fertrow mi heri oso. 8 Mofo nanga mofo mi e taki nanga en foe sori en a sofasi [sani]; èn no nanga raitori; èn wan skijn foe Jehovah na dati a e si. Foe san-ede dan oen no ben frede foe taki tége mi knegti, tége Mozes.” 9 Èn Jehovah ati ben kon bron nanga den, èn a ben waka gwe. Èn a wolkoe ben wai komoto foe na tenti, èn loekoe gwasi ben kisi Mirjam. A ben weti fan. Dan Aäron drai en fesi èn loekoe! a ben kisi gwasi. 11 Wantronwantron Aäron ben taigi Mozes: „No mandi nanga mi, mi masra! Tangitangi no loekoe na a sondoe foe oenoe na ini a fasi fa wi ben handri na wan law fasi èn san wi ben doe! 12 Tangitangi no meki a tan leki wan dede sma, foe soema na meti pori afoe kaba te a komoto foe en mamabere!” 13 Mozes ben bigin e bari tranga gi Jehovah: „O Gado tangitangi! Meki a kon gosontoe baka tangitangi!” 14 Ne Jehovah ben taigi Mozes: „Efoe en tata ben spiti leti na mindri en fesi, a no sébi dé a ben sa de nanga sjen? Meki den poti en na dorosé foe na legre ini wan aparti presi, èn meki den teki en baka dati.” 15 Foe dat’ede Mirjam ben poti foe sébi dé na dorosé foe na legrepresi ini wan aparti presi, èn a pipel no ben hari go moro fara solanga den no ben teki Mirjam baka. 16 Èn baka dati a pipel ben opo waka foe Hazeroth èn den ben opo den kampoe na ini na gran sabana foe Paran.