Wan Jerusalem di e hori ensrefi na a nen foe en
„Oen de nanga prisiri foe têgo foe den sani di mi e kria. Bika loekoe, mi e kria Jerusalem foe kon de wan sani foe abi prisiri.” — JESAJA 65:18.
1. Fa Esra ben denki foe a foto di Gado ben teki?
LEKI wan fajafaja studenti foe Gado Wortoe, a djoe priester Esra ben warderi a banti di Jerusalem ben abi wan ten nanga a soifri anbegi foe Jehovah (Deuteronomium 12:5; Esra 7:27). A lobi foe Esra gi a foto foe Gado e kon na krin ini den boekoe foe bijbel di a skrifi nanga jepi foe Gado en santa jeje — Wán Kroniki nanga Toe Kroniki nanga Esra. Na ini den historia boekoe disi, a nen Jerusalem skrifi so wan 200 tron foe den moro leki 800 tron di a nen dati skrifi na ini a heri bijbel.
2. Te wi e loekoe o prenspari a nen Jerusalem de, dan san dati wani taki na profeitifasi?
2 Na ini a Hebrewtongo foe bijbel, sma kan froestan a wortoe „Jerusalem” leki wan fasi foe a Hebrewtongo, di den ben kari: dobroe. Moro foeroetron den e gebroiki dobroe, gi sani di e kon toe-na-toe, soleki ai, jesi, anoe, nanga foetoe. Te den e gebroiki Jerusalem na a fasi disi leki wan sani di dobroe, dan wi kan froestan a nen Jerusalem na wan profeitis fasi foe wan vrede di a pipel foe Gado ben sa abi na toe fasi — na jejefasi èn na skinfasi. Den Boekoe foe bijbel no e tjari kon na krin efoe Esra ben froestan disi krinkrin. Ma, leki wan priester, Esra ben doe ala san a ben man foe jepi den djoe foe njan boen foe vrede nanga Gado. Èn seiker a ben wroko tranga, so taki Jerusalem ben sa kan hori ensrefi na a sani di a nen foe a foto dati wani taki, namkoe „Na abi di a abi [noso, Fondamenti foe] toe fasi foe vrede”. — Esra 7:6.
3. Omeni jari ben pasa bifo wi e si Esra baka na wroko, èn na ini sortoe situwâsi wi e feni en?
3 Bijbel no e taki pe Esra ben de den 12 jari di ben kon na mindri a fisiti di a ben fisiti Jerusalem èn a doro di Nehemia ben doro na a foto. A pôti jejefasi foe a nâsi na a ten dati, e sori taki Esra no ben de drape. Tokoe, wi e si taki Esra e dini agen leki wan getrow priester na Jerusalem sjatoe baka di a skotoe foe a foto ben bow baka.
Wan kefalek moi dei foe konmakandra
4. San ben de so prenspari foe a fosi dei foe a di foe seibi moen foe Israèl?
4 A skotoe foe Jerusalem ben kaba biten gi a prenspari fesa moen Tisjri, a di foe seibi moen tapoe a relisi kalender foe Israèl. A fosi dei foe Tisjri ben de wan spesroetoe njoen moen fesa di den ben kari a Fesa Foe Bro Toetoe. Na a dei dati, den priester ben bro tapoe toetoe ala di srakti-ofrandi ben tjari gi Jehovah (Numeri 10:10; 29:1). A dei disi ben sreka den Israèlsma gi na alajari Verzoendei na a di foe 10 dei foe Tisjri, èn a prisiri Fesa foe tjari sani kon na makandra foe a di foe 15 dei te go miti a di foe 21 dei foe a srefi moen.
5. (a) Fa Esra nanga Nehemia ben meki boen gebroiki foe „a fosi dei foe a di foe seibi moen”? (b) Foe san ede den Israèlsma ben krei?
5 Tapoe „a fosi dei foe a di foe seibi moen”, „a heri pipel” ben kon makandra, kande foe di Nehemia nanga Esra ben gi den deki-ati foe doe so. Mansma, oemasma, nanga „ala sma di ben abi nofo froestan foe arki” ben de toe. So boen, jongoe pikin ben de drape èn ben poti den prakseri di Esra ben tanapoe na tapoe wan podium èn ben leisi a Wet „foe son-opo te leki bakadina” (Nehemia 8:1-4). Ten na ten, den Leifisma ben jepi a pipel foe froestan san den ben e leisi. Disi ben meki den Israèlsma kisi watra-ai di den ben froestan o fara den nanga den afo foe den ben fadon komoto na a gi den ben moesoe gi jesi na a Wet foe Gado. — Nehemia 8:5-9.
6, 7. San kresten kan leri foe a sani di Nehemia ben doe foe tapoe den djoe foe no krei moro?
6 Ma a ten disi no ben de wan ten foe krei nanga sari. A ben de wan fesa, èn didjonsro a pipel ben kaba a wroko foe bow a skotoe foe Jerusalem baka. Foe dati ede Nehemia ben jepi den foe abi a joisti fasi foe si sani, foe di a ben e taki: „Oen go, njan den fatoe sani èn dringi den soekroe sani, èn seni pisi foe dati go na a sma di noti no sreka gi en; bika a dei disi santa gi wi Masra, èn no firi sari, bika a prisiri foe Jehovah na oen fortresi.” Den ben gi jesi èn „a heri pipel ben gowe foe njan, foe dringi, foe seni porsi gi sma èn foe abi bigi prisiri, bika den ben froestan den wortoe di sma ben meki den kon sabi”. — Nehemia 8:10-12.
7 Na ini a ten disi a pipel foe Gado kan leri foeroe foe a tori disi. Den wan di abi a grani foe abi wan prati na den gemeente konmakandra nanga den bigi konmakandra, moesoe hori a sani di kari na tapoesei, na prakseri. Boiti taki a de fanowdoe son tron foe sori sma tapoe a fowtoe foe den, tokoe den sortoe konmakandra disi e poti krakti na tapoe den winimarki nanga blesi di e kon te wan sma e doe san Gado e aksi. Gado pipel e kisi prèise gi den moi wroko di den doe èn den e kisi deki-ati foe kan horidoro. Baka den sortoe konmakandra disi, Gado pipel moesoe gowe nanga prisiri ati foe di den ben kisi bodoi di ben bow den èn di ben komoto na Gado Wortoe. — Hebrewsma 10:24, 25.
Wan tra pisiri konmakandra
8, 9. Sortoe spesroetoe konmakandra ben hori na tapoe a di foe toe dei foe a di foe seibi moen, èn sortoe bakapisi disi ben abi gi Gado en pipel?
8 Tapoe a di foe toe dei foe a spesroetoe moen dati, „den edeman foe den papa foe a heri pipel, den priester nanga den Leifisma, ben kon makandra na Esra, a kopi skrifiman, srefi foe kisi inzicht na ini den wortoe foe a wet” (Nehemia 8:13). Esra ben bekwaam srefisrefi foe hori a konmakandra disi, foe di a „ben sreka na ati foe en foe go soekoe rai na a wet foe Jehovah èn foe doe en èn foe leri sma ordroe nanga retidoe na Israèl” (Esra 7:10). Sondro tweifri, a konmakandra disi ben poti krakti na tapoe kontren pe a pipel foe Gado ben moesoe hori densrefi moro fini na a Wet froebontoe. Wan sani di ben abi foe doe wantewante nanga dati, ben de a de di a ben de fanowdoe foe sreka sani boen foe hori a Wiwirikampoe-fesa di ben o kon.
9 A fesa disi di ben hori wan heri wiki langa, ben hori na a joisti fasi, foe di a heri pipel ben tan na ini tanpresi di ben meki gi wan pisi ten nomo èn di ben meki foe taki nanga wiwiri foe difrenti sortoe bon. A pipel ben poti den wiwiri disi na tapoe den plata daki foe den, na ini den fesi djari foe den, na ini den fesi djari foe a tempel, èn na tapoe den poebliki pren foe Jerusalem (Nehemia 8:15, 16). Disi ben de troetroe wan moi okasi foe meki a pipel kon makandra èn foe leisi gi den na ini a Wet foe Gado! (Teki gersi Deuteronomium 31:10-13.) Disi den ben doe ibri dei, „foe a fosi dei te leki a lasti dei” foe a fesa, èn disi ben meki a pipel foe Gado ben e „prisiri pasa marki”. — Nehemia 8:17, 18.
Wi no moesoe libi na oso foe Gado sondro foe sorgoe foe en
10. Foe san ede wan spesroetoe konmakandra ben seti na tapoe a di foe 24 dei foe a di foe seibi moen?
10 Wan joisti ten nanga presi de fanowdoe foe meki serjoesoe fowtoe na mindri Gado pipel kon boen baka. Soleki fa a sori, dan Esra nanga Nehemia ben e froestan taki disi ben de so wan ten, èn dati meki den ben seti sani, so taki a pipel ben kan faste wan dei, na tapoe a di foe 24 dei foe a moen Tisjri. Ete wan tron den ben leisi Gado Wet, èn a pipel ben meki den sondoe foe den bekènti. Baka dati den leifisma ben loekoe sjatoe baka fa Gado ben handri na wan sari-ati fasi nanga a tranga-ede pipel foe En, den leifisma ben prèise Jehovah nanga moi wortoe, èn ben meki ’wan kroederi di den ben kan froetrow’ èn di ben kisi krakti nanga jepi foe a lakstampoe foe den granman, den leifisma, nanga den priester foe den. — Nehemia 9:1-38.
11. Na sortoe ’kroederi di den ben kan froetrow’, den djoe ben tai densrefi?
11 Ala a pipel ben meki wan sweri foe doe den sani foe a ’kroederi’ di ben skrifi èn ’di den ben kan froetrow’. Den ben sa „waka na ini a wet foe a troe Gado”. Èn den ben agri foe no meki trowfroebontoe nanga „den sma foe a kondre” (Nehemia 10:28-30). Boiti dati, den djoe ben poti wan plekti tapoe densrefi foe hori a Sabadei, foe gi moni ala jari, so taki den ben kan horibaka gi a troe anbegi, foe tjari oedoe gi na altari foe srakti-ofrandi, foe gi a fosi geborewan foe den ipi nanga den meti foe den leki srakti-ofrandi, èn foe tjari den fosi froktoe foe a gron foe den na den njanjan kamra foe a tempel. A ben de krin taki den ben abi a fasti bosroiti ’foe no libi na oso foe a Gado foe den sondro foe sorgoe foe en’. — Nehemia 10:32-39.
12. Sortoe sani wi moesoe doe toe foe no libi na oso foe Gado sondro foe sorgoe na oso na ini a ten disi?
12 Na ini a ten disi a pipel foe Jehovah moesoe loekoe boen taki den no e frigiti a grani di den abi, foe ’doe santa diniwroko’ na ini den fesi djari foe a bigi jeje tempel foe Jehovah (Openbaring 7:15). Disi wani taki toe foe begi ala ten komoto na a ati taki na anbegi foe Jehovah go na fesi. Foe libi akroederi den sortoe begi disi, e aksi foe wi taki wi moesoe sreka wisrefi gi kresten konmakandra èn abi wan prati na den, abi wan prati na den sani di seti foe preiki a boen njoensoe, èn jepi den wan di abi belangstelling foe di wi e go baka na den èn, efoe a kan, hori bijbelstudie nanga den. Foeroe sma di no wani foe libi na oso foe Gado sondro foe sorgoe foe en, e gi moni foe a boen foe a preikiwroko èn foe sorgoe den presi foe troe anbegi. Kande wi kan jepi toe foe bow konmakandra presi di de tranga fanowdoe èn so srefi foe hori den presi disi krin èn na wan orde fasi. Wan prenspari fasi foe sori lobi gi Gado oso na jeje fasi, na foe sorgoe taki vrede de na mindri kompe bribiman èn foe jepi iniwan foe den di abi jepi fanowdoe na materia sei noso na jejefasi. — Mateus 24:14; 28:19, 20; Hebrewsma 13:15, 16.
Wan prisiri inwijding
13. Na tapoe sortoe afersi di ben de tranga fanowdoe den djoe ben moesoe poti prakseri bifo na inwijding foe a skotoe foe Jerusalem, èn sortoe moi eksempre foeroe foe den ben gi?
13 A ’kroederi di den ben kan froetrow’ èn di lakstampoe ben poti na en tapoe na ini a ten foe Nehemia, ben sreka Gado pipel foe owroeten gi na inwijding dei foe a skotoe foe Jerusalem. Ma den ben moesoe poti prakseri toe tapoe wan tra afersi di ben de tranga fanowdoe. Now di wan bigi skotoe nanga 12 portoe ben lontoe Jerusalem, dan Jerusalem ben abi moro sma fanowdoe foe libi na ini a foto. Ala di wan toe Israèlsma ben libi drape, tokoe „a foto ben bradi èn bigi, èn wan toe sma nomo ben de na ini” (Nehemia 7:4). Foe loesoe a problema disi, a pipel „ben trowe lot foe tjari wán sma foe ibri tin sma kon drape, so taki den kan tan na Jerusalem, a santa foto”. Foe di a pipel ben wani wroko makandra nanga a seti disi, meki a pipel „ben blesi ala den mansma di ben gi densrefi fri foe tan na Jerusalem” (Nehemia 11:1, 2). Fa dati na troetroe wan moi eksempre gi troe anbegiman na ini a ten disi, di abi na okasi foe froisi go na tra presi pe moro jepi foe lepi kresten de fanowdoe!
14. San ben pasa na a inwijding dei foe a skotoe foe Jerusalem?
14 Heri esi prenspari sani ben bigin sreka gi a bigi inwijding dei foe a skotoe foe Jerusalem. Pokoeman nanga singiman ben kon makandra komoto na den foto lontoe Juda. Den ben poti den wan disi na ini toe bigi groepoe singiman di ben e gi tangi èn baka ibriwan foe den, wan groepoe sma ben o waka (Nehemia 12:27-31, 36, 38). Den groepoe singiman nanga den groepoe sma di ben o waka na den baka, ben bigin na wan presi foe a skotoe di ben de moro fara foe a tempel, kande bigin foe a Lagipresi-Portoe; wan groepoe ben e waka go na a wán sei, èn a tra groepoe ben e waka go na a tra sei te leki den ben miti makandra na a oso foe Gado. „Den ben e tjari bigi srakti-ofrandi na a dei dati èn den ben prisiri, bika a troe Gado srefi ben meki dati den ben kan prisiri nanga bigi prisiri. Èn den oemasma nanga den pikin-nengre srefi ben e prisiri toe, so taki a prisiri di Jerusalem ben e prisiri ben de foe jere farawe.” — Nehemia 12:43.
15. Foe san ede a gi di den ben gi a skotoe foe Jerusalem abra na Gado, no ben de wan sani di ben meki den prisiri foe ala ten?
15 Bijbel no e taki sortoe dei a prisiri fesa disi ben hori. Ma sondro tweifri, a ben de a heimarki foe a meki di Jerusalem ben meki kon boen baka. A no de foe taki, dati foeroe bow-wroko ben moesoe doe na ini a foto srefi. Baka wan pisi ten, den sma di ben tan na Jerusalem ben lasi a moi jejefasi foe den. Foe eksempre, di Nehemia ben fisiti a foto wan di foe toe leisi, a ben kon si taki den Israèlsma ben bigin libi na oso foe Gado baka sondro foe den sorgoe na oso èn taki den ben e trow baka nanga heiden oema (Nehemia 13:6-11, 15, 23). A profeiti Maleaki e taki toe foe den srefi sortoe takroe situwâsi disi na ini den sani di a ben skrifi (Maleaki 1:6-8; 2:11; 3:8). So boen, a gi di den ben gi a skotoe foe Jerusalem abra na Gado, no ben de wan sani di ben e meki den prisiri foe ala ten.
Wan sani di e meki prisiri kon foe têgo
16. Sortoe sani a pipel foe Gado e froewakti foe si leki heimarki foe sani?
16 Na ini a ten disi, a pipel foe Jehovah e angri foe si a ten te Gado sa wini ala den feanti foe en. Disi sa bigin nanga a pori foe „Babilon a Bigiwan” — wan simbôlis foto di abi foe doe nanga ala fasi foe falsi relisi makandra (Openbaring 18:2, 8). A pori foe falsi relisi sa de wan marki foe den fosi sani di o pasa ini a bigi banawtoe di e kon (Mateus 24:21, 22). Wi kan froewakti wan kefalek moi sani toe — a trow-oso na hemel foe Masra Jesus Krestes nanga en trowmisi foe 144.000 sma di e tan na a „Njoen Jerusalem” (Openbaring 19:7; 21:2). Wi no kan taki soifri o ten a trow-oso dati na hemel sa kaba, ma a sa de troetroe wan prisiri sani. — Loekoe De Wachttoren foe 15 augustus 1990, bladzijde 30, 31.
17. San wi sabi foe a meki di a Njoen Jerusalem o kaba meki?
17 Wi sabi taki a Njoen Jerusalem o kon klari heri esi (Mateus 24:3, 7-14; Openbaring 12:12). Heri tra fasi leki a foto Jerusalem na grontapoe, a Njoen Jerusalem noiti no sa meki wan sma lasi-ati. Disi de so foe di ala den borgoe foe en na bakaman foe Jesus Krestes, di kisi salfoe nanga santa jeje. Den kisi tesi, èn den kon soifri èn krin. Foe di den e hori a getrowfasi foe den te na dede, meki ibriwan foe den sa gi a boeweisi taki den de loyaal foe têgo na a Universeel Soeverein, Jehovah Gado. A sani dati na wan prenspari sani gi a tra pisi foe a libisma famiri — gi den wan di de na libi èn gi den wan di dede kaba!
18. Foe san ede wi moesoe ’breiti pasa marki èn de nanga prisiri foe têgo’?
18 Prakseri san sa pasa te a Njoen Jerusalem e poti en prakseri tapoe libisma di e sori bribi na ini a srakti-ofrandi foe Jesus. „Loekoe!,” na apostel Johanes ben skrifi. „A tenti foe Gado de na libisma, èn en sa tan nanga den, èn den sa de en pipel. Èn Gado srefi sa de nanga den. Èn a sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba” (Openbaring 21:2-4). Moro fara, Gado sa gebroiki den sani disi di seti, di de leki seti foe wan foto, foe opo a libisma famiri kon tron volmaakti libisma (Openbaring 22:1, 2). Fa disi na troetroe sani di e meki wi ’breiti pasa marki èn de nanga prisiri foe têgo foe den sani di Gado e meki now’! — Jesaja 65:18.
19. San na a jeje paradijs pe kresten tjari kon makandra?
19 Ma libisma di abi berow, no abi foe wakti te leki a ten dati foe kisi jepi foe Gado. Na ini a jari 1919, Jehovah ben bigin tjari den lasti memre foe den 144.000 kon makandra na ini wan jeje paradijs, pe den froktoe foe a jeje foe Gado — soleki lobi, prisiri, nanga vrede — de pasa marki (Galasiasma 5:22, 23). Wan kefalek boen sani foe a jeje paradijs disi ben de a bribi foe den salfoewan foe en di e libi drape, èn di ben abi moi bakapisi na ini a preiki foe a boen njoensoe foe Gado Kownoekondre na heri grontapoe pe sma e libi (Mateus 21:43; 24:14). Leki wan bakapisi foe dati, so wan siksi miljoen „tra skapoe” di abi a howpoe foe libi na grontapoe, ben kisi na okasi toe foe go na ini a jeje paradijs èn foe njan boen foe wroko di abi boen bakapisi (John 10:16). Den feni den boen nofo gi disi, foe di den ben gi densrefi abra na Jehovah Gado na tapoe a gron foe a bribi di den abi na ini a loesoe-paiman foe Jesus Krestes, a Manpikin foe Jehovah. A wroko makandra foe den nanga den wan di o tron memre foe a Njoen Jerusalem, ben sori taki a de wan blesi troetroe. Foe dati ede, foe di Jehovah ben wroko nanga salfoe kresten, meki A ben poti wan steifi fondamenti gi „wan njoen grontapoe” — wan libimakandra foe libisma di e frede Gado èn di sa kisi a grontapoe kontren na ondro a hemel Kownoekondre. — Jesaja 65:17; 2 Petrus 3:13.
20. Fa a Njoen Jerusalem sa hori ensrefi na a nen foe en?
20 Den vrede situwâsi di Jehovah pipel e njan boen foe dati na ini a jeje paradijs foe den nownow, den sa ondrofeni heri esi na ini wan troetroe paradijs na grontapoe. Dati sa pasa te a Njoen Jerusalem e saka komoto na hemel foe blesi a libisma famiri. Na toe fasi, a pipel foe Gado sa njan boen foe vrede situwâsi soleki fa Gado ben pramisi dati na ini Jesaja 65:21-25. Leki Jehovah en anbegiman di de na ini wánfasi na ini a jeje paradijs, den salfoewan di moesoe teki a presi foe den ete na ini a Njoen Jerusalem na hemel èn den „tra skapoe”, e feni vrede foe Gado nownow. Èn a sortoe vrede disi sa kon moro foeroe na ini a troetroe paradijs, te ’Gado wani sa pasa na heri grontapoe, soleki fa a e pasa na ini hemel’ (Mateus 6:10). Ija, Gado en moi hemel foto sa hori ensrefi na a nen foe Jerusalem leki a steifi ’Fondamenti foe toe fasi foe vrede’. Foe têgo, a sa tanapoe leki wan sani di e prèise a Gran Kriaman, Jehovah Gado, èn a Trowmasra Kownoe foe a foto, Jesus Krestes.
Joe e memre disi ete?
◻ San ben doe kon di Nehemia ben tjari a pipel kon makandra na Jerusalem?
◻ San den djoe foe owroeten ben moesoe doe foe no libi na oso foe Gado sondro foe sorgoe na oso, èn sortoe kari wi e kisi?
◻ Fa „Jerusalem” abi foe doe nanga a tjari di a sa tjari prisiri nanga vrede kon foe têgo?
[Karta na tapoe bladzijde 23]
(Efoe joe wani si pe den sani disi skrifi, loekoe a tijdschrift)
PORTOE FOE JERUSALEM
Den nomroe e sori omeni meter den presi hei na ini a ten disi
FISIPORTOE
PORTOE FOE NA OWROE FOTO
PORTOE FOE EFRA-IM
OEKOEPORTOE
Bradi Skotoe
Poebliki Pren
LAGIPRESI PORTOE
A DI FOE TOE PISI FOE A FOTO
Fosi Skotoe na noordsei
FOTO FOE DAVID
PORTOE FOE NA ASISI-IPI
Lagipresi foe Hinom
Paleisi
SKAPOEPORTOE
PORTOE FOE WAKTIMAN
Tempel kontren
PORTOE FOE ONDROSOEKOE SANI
ASIPORTOE
OFEL
Poebliki Pren
WATRAPORTOE
Watrafonten foe Gihon
FONTEN PORTOE
Kownoe djari
En-rogel
Tyropoeon (Mindrisei) Lagipresi
Bigi watra Lagipresi foe Kidron
740
730
730
750
770
770
750
730
710
690
670
620
640
660
680
700
720
740
730
710
690
670
A skotoe foe Jerusalem soleki fa a ben de kande na a ten di a foto ben kisi pori, èn di Nehemia ben teki fesi foe meki a skotoe baka