Yehovah e gi wi „furu prisiri”

1-2. (a) Fa furu sma na ini a ten disi e firi? (b) Fu san wi o taki na ini na artikel disi?

FURU sma na ini a ten disi e du ala san den man fu de koloku. Ma aladi den e du so furu muiti, tòg den no de koloku fu di den e firi leki sani noiti o waka bun gi den. Son anbegiman fu Yehovah e firi so tu. Fu di wi e libi na ini „den lasti dei”, meki wi kan ferwakti taki wi o kisi fu du nanga muilek problema di kan gi wi broko-ede noso di kan meki wi firi sari.​—2 Tim. 3:1.

² Na ini na artikel disi wi o taki fu sani di kan meki wi lasi wi prisiri én wi o luku tu san wi kan du fu de nanga prisiri baka. Ma wi o luku fosi suma na a Sma di kan yepi wi fu de koloku trutru.

A SMA DI KAN YEPI WI FU DE KOLOKU TRUTRU

3. San den sani di Yehovah meki e leri wi fu en? (Luku den prenki)

³ Yehovah na wan koloku Gado èn a wani taki wi de koloku tu. Fu dati ede a meki so furu sani di e gi wi prisiri. Fu eksempre, wi e prisiri fu si den moi bromki di lai nanga kloru, wi lobi luku fa den meti e prei, èn wi lobi nyan den someni switi n’nyan di de. Den sani disi e sori taki Gado lobi wi trutru èn taki a wani taki wi de koloku.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Fu san ede Yehovah e tan a koloku Gado aladi a e si fa libisma e pina? (b) Sortu kado Yehovah gi wi? (Psalm 16:11)

⁴ Aladi Yehovah na „a koloku Gado”, tòg a sabi fa den sma na grontapu e pina (1 Tim. 1:11). Ma a sani disi no e meki taki a e lasi prisiri. A sabi taki a pina di sma e pina, na gi wan syatu pisi ten nomo. A poti wan dei kba te a o tyari wan kba kon na pina fu ala ten. Èn Yehovah e wakti nanga pasensi teleki a dei dati doro. Na a srefi ten, a e broko en ede trutru nanga a fasi fa wi e firi. Te wi e pina, dan Yehovah e sorgu gi wi èn a e yepi wi. Ma fa a e du dati? Wan sani na taki a e yepi wi fu kon leri sabi en, èn dati e gi wi prisiri. (Leisi Psalm 16:11). Kow go luku fa a sabi di Yesus ben sabi Yehovah ben e meki taki a de koloku.

5-6. Fu san ede Yesus de koloku?

⁵ Fu ala den sani di Yehovah meki, Yesus na a moro kolokuwan. Kow go luku tu reide fu san ede wi kan taki dati. (1) „A Manpikin abi den srefi fasi fu Gado di sma no man si”. A de neleki en P’pa èn dati meki a de so koloku (Kol. 1:15). (2) Yesus ben de wan heri pisi ten makandra nanga en P’pa, moro langa leki iniwan tra sma.

⁶ Yesus ben de nanga prisiri ala ten fu di ala ten a e du a wani fu en P’pa (Odo 8:30, 31; Yoh. 8:29). Dati meki Yehovah breiti nanga en.​—Mat. 3:17.

7. Fa wi kan de koloku trutru?

⁷ Wi srefi kan de koloku trutru te wi e tan du muiti fu leri sabi Yehovah moro bun. O moro wi e leri fu Yehovah èn e teki na eksempre fu en, o moro wi o de koloku. Wi o prisiri tu te wi e du a wani fu Gado èn te wi sabi taki a breiti nanga wia (Ps. 33:12). Ma fa a de te wi e sari son leisi, kande wan tu dei noso kande wan moro langa pisi ten? Efu yu e firi so, dan yu kan de seiker taki disi no wani taki dati Yehovah no breiti nanga yu. Wi alamala abi swakifasi èn ten na ten wi e sari, noso wi e firi brokosaka. Yehovah e ferstan fa wi e firi (Ps. 103:14). Meki wi go luku sortu sani kan meki wi lasi prisiri èn san wi kan du fu de nanga prisiri baka.

LUKU BUN NANGA SANI DI KAN MEKI YU LASI PRISIRI

8. San kan psa nanga wi te wi abi problema?

⁸ Te wi abi problema. Kande sma no e libi bun nanga yu fu di yu na wan futuboi fu Yehovah. Kande yu abi problema fu di wan rampu ben psa, noso fu di yu siki, fu di yu owru, noso fu di yu pôti. Wi kan lasi prisiri esi-esi te wi abi den sortu problema disi, spesrutu te wi no man du noti fu kenki a situwâsi fu wi. Dati meki Bijbel abi leti te a e taki dati „wan ati di e sari e meki wan sma firi brokosaka” (Odo 15:13). Babis, wan owruman, lasi en brada nanga en p’pa nanga m’ma na ini wan pisi ten fu fo yari. A e taki: „Mi ben e firi leki mi ben de mi w’wan èn taki nowan sma ben o man yepi mi. Son leisi mi ben e broko mi ede trutru fu di mi ben winsi taki mi ben meki moro ten gi mi brada èn gi mi p’pa nanga m’ma fosi den dede.” A tru taki den problema fu a libi kan weri wi skin èn den kan meki wi lasi prisiri.

9. San kan yepi wi fu de nanga prisiri baka? (Yeremia 29:4-7, 10)

⁹ San kan yepi wi fu de nanga prisiri baka? Wi o de moro koloku te wi no e broko wi ede nanga sani di wi no man kenki èn te wi de nanga tangi gi den sani di wi abi. Bijbel e leri wi taki wi kan de koloku awinsi a situwâsi fu wi a no san wi ben wani. Fu eksempre, Yehovah ben taigi den Dyu di ben de na ini katibo na Babilon fu meki muiti fu fiti densrefi na a libi drape. (Leisi Yeremia 29:4-7, 10.) San disi e leri wi? Pruberi fu fiti yusrefi na a situwâsi fu yu èn de nanga tangi gi den bun sani di yu abi. Hori na prakseri taki Yehovah no o libi yu w’wan. A o yepi yu (Ps. 63:7; 146:5). Effie, di no man waka moro fu di a ben kisi hebi mankeri, de nanga tangi gi a fasi fa Yehovah yepi en. A e taki: „Yehovah, mi famiri, nanga mi brada nanga sisa na ini a gemeente yepi mi èn den gi mi dek’ati. Mi wani sori den taki mi de nanga tangi gi san den e du gi mi èn gi san den du kba. Dati meki mi e du ala san mi man fu tan de nanga prisiri.”

10. Fu san ede wi kan de nanga prisiri awinsi wi abi problema?

¹⁰ Awinsi wi ben o wani taki a situwâsi fu wi ben de tra fasi, tòg wi kan de nanga prisirib (Ps. 126:5). Fu san ede? Fu di a no a situwâsi fu wi e meki taki wi de koloku trutru. Maria di e pionier, e taki: „Te problema e miti wi, dan wi e tan de nanga prisiri fu di wi e hori na prakseri san Yehovah pramisi wi. Disi no wani taki dati wi no e krei noiti noso taki wi e taki fa wi e firi. Ma wi P’pa kan yepi wi fu tan de nanga prisiri, awinsi sortu problema e miti wi.” Hori na prakseri taki awinsi fa a situwâsi fu yu muilek now, a no o tan so fu ala ten. Heri esi Yehovah o tyari wan kba kon na iniwan sani di e meki wi pina èn di e meki wi sari.

11. Fa na eksempre fu na apostel Paulus e gi yu dek’ati?

¹¹ Son leisi wi ben kan denki taki den problema di wi abi e kon fu di Yehovah no breiti nanga wi. Efu na so wi e firi, dan wi ben kan prakseri tra getrow futuboi fu Yehovah di ben de na ini situwâsi di ben muilek srefsrefi. Luku na eksempre fu na apostel Paulus. Yesus ben gi a man disi a wroko fu go preiki a bun nyunsu gi „den trakondre sma, den kownu nanga den Israelsma” (Tori 9:15). Dati ben de wan bigi grani. Ma tòg furu problema miti Paulus (2 Kor. 11:23-27). A de so taki den problema di ben e tan miti Paulus ben e sori taki Yehovah no ben feni en bun? Kwetkweti! Fu taki en leti, a wan-enkri fasi fa Paulus ben kan hordoro, na fu di Yehovah ben e yepi en (Rom. 5:3-5). Prakseri a situwâsi fu yu. Aladi problema e miti yu, tòg yu e tan dini Yehovah getrow. Sobun, yu kan de seiker tu taki Yehovah e horbaka gi yu èn taki a breiti nanga yu.

12. San kan psa efu wi no man du den sani di wi ben o wani du gi Yehovah?

¹² Te wi no man du san wi ben o wani du gi Yehovah (Odo 13:12). Wi lobi Yehovah èn wi de nanga tangi gi ala san a e du gi wi. Dati meki wi wani du ala san wi man gi en. Ma efu a situwâsi fu wi no e gi pasi taki wi du son sani gi Yehovah, dan wi kan las’ati (Odo 17:22). Wan pionier di nen Holly e taki: „Mi ben wani go na a Skoro gi Kownukondre preikiman fu man dini na ini wan tra kondre, noso fu go yepi nanga a bow-wroko na Ramapo. Ma a situwâsi fu mi kenki, èn mi no ben man doro den marki dati moro. Mi ben e sari srefsrefi.” Na so furu futuboi fu Yehovah e firi.

13. Efu a situwâsi fu yu e tapu yu fu du san yu ben o wani du, dan san yu kan pruberi fu du?

¹³ San kan yepi wi fu de nanga prisiri baka? Hori na prakseri taki Yehovah no e dwengi wi fu du sani gi en. A no e ferwakti tumsi furu fu wi, èn a no den sani di wi e du gi en e bepaal efu wi warti gi en. Yehovah wani taki wi musu sabi san wi man èn san wi no man èn wi musu tan getrow na en (Mika 6:8; 1 Kor. 4:2). San moro prenspari gi Yehovah, na a fasi fa wi e denki, a fasi fa wi e firi, èn den fasi di wi abi. Sobun, wi no musu ferwakti moro fu wisrefi leki san Yehovah e ferwakti fu wi.c Awinsi yu no man du san yu ben o wani du gi Yehovah, prakseri san yu man du gi en. Fu eksempre, yu kan yepi train wan yongu sma noso yu kan de wan dek’ati gi den owru brada nanga sisa. Kande yu kan go luku wan sma fu gi en dek’ati, kande yu kan bel en, noso kande yu kan seni wan app gi en. Yehovah breiti te yu e du den sani di yu man du èn a o yepi yu fu de nanga prisiri. Èn hori na prakseri taki na ini a nyun grontapu wi o man dini Yehovah na fasi fa wi noiti no ben denki. Na a sani disi gi Holly dek’ati. A e taki: „Te mi e firi taki mi e bigin las’ati, dan mi e memre misrefi taki mi o libi fu têgo. Èn na ini a nyun grontapu, Yehovah o yepi mi fu du wan tu fu den sani di mi wani du gi en.”

14. Sortu tra sani kan meki wi lasi prisiri?

¹⁴ Te wi e suku nomo fu plisi wisrefi. Tapu Internet wi e si sma di doronomo e libi wan switi libi èn den e du neleki den de koloku. Kande wi e bigin bribi taki efu wi e du den sani di wi lobi, efu wi e bai den sani di wi wani, èn efu wi man go na difrenti presi, dan wi o de koloku trutru. A no fowtu fu du den sani di wi lobi. Yehovah wani taki wi e nyan bun fu den moi sani di a meki gi wi. Ma furu sma di ben e feti nomo fu plisi densrefi, kon si taki den no de koloku, ma na presi fu dati, den lasi prisiri. Eva, wan pionier, e taki: „Te yu e suku nomo fu plisi yusrefi, dan ala ten yu o wani moro.” Efu ala ten wi e suku fu plisi wisrefi, dan wi o sari èn wi o las’ati.

15. San wi kan leri fu Kownu Salomo?

¹⁵ Kownu Salomo ben sabi sortu sari sani kan miti wan sma te a e suku nomo fu plisi ensrefi. Wi kan leri wan sani fu en. Kownu Salomo ben du furu difrenti sani fu luku efu a ben o firi koloku. Fu eksempre, a nyan ala sortu bun nyan, a arki moi poku, èn a bai furu diri sani. Ma tòg a no ben de koloku. A ben taki: „San ai e si, no e sari en èn san yesi e yere, no e sari en tu” (Preik. 1:8; 2:1-11). Son sma e denki taki te den abi moni èn te den man du san den wani, dan den o de koloku. Ma dati na wan lei. Noiti den sani disi kan meki wi de koloku trutru.

16. Fu san ede wi o de koloku te wi e du sani gi trawan? (Luku den prenki.)

¹⁶ San kan yepi wi fu de nanga prisiri baka? Yesus ben leri wi taki „wan sma o de moro koloku te a e gi sani, leki te a e kisi sani” (Tori 20:35). Wan owruman di nen Alekos, e taki: „Mi e pruberi fu du pkinpkin sani fu yepi trawan. Te mi e yepi trawan, dan mi no e prakseri san mi wani. Disi e yepi mi fu de nanga prisiri”. San yu kan du gi trawan? Efu yu e si taki wan sma e firi sari, dan yu kan gi en dek’ati. Kande a o firi moro bun te yu e teki yu ten fu arki en èn te yu e pruberi fu ferstan fa a e firi. Yu kan gi en dek’ati fu trowe en hebi tapu Yehovah (Ps. 55:22; 68:19). Yu kan yepi en tu fu hori na prakseri taki Yehovah no gwe libi en (Ps. 37:28; Yes. 59:1). Kande yu kan du wan bun sani gi en. Fu eksempre, kande yu kan bori gi en, noso kande yu kan go koiri nanga en. Kande yu kan go preiki nanga en. Te wi e preiki a bun nyunsu gi trawan, dan dati e yepi wi fu firi moro bun. Meki Yehovah gebroiki yu fu gi trawan dek’ati. Te wi e gebroiki wi ten fu yepi trawan, dan wi o de koloku trutru.​—Odo 11:25

17. Efu wi wani de koloku trutru, dan san wi musu du? (Psalm 43:4)

¹⁷ Wi kan de koloku trutru te wi e tan du muiti fu kon moro krosbei na wi P’pa na hemel. Bijbel e pramisi taki Yehovah e gi wi „furu prisiri”. (Leisi Psalm 43:4.) Sobun, awinsi san e miti wi na ini a libi, wi no abi fu frede. Efu Yehovah na wi beste mati, dan a kan yepi wi fu de koloku fu têgo.​—Ps. 144:15.