A lobi fu Gado de fu têgo

1-2. Te tesi e miti wi leki Kresten, dan fa wi ben kan firi?

PRAKSERI wan boto di de na se aladi wan bigi winti e wai. Hebi skwala e naki a boto go-kon. Na pe den skwala e tyari a boto, na drape a o go efu wan sma no e lusu na ankra. Na ankra o sorgu taki a boto no drifi gwe.

² Te wan muilek problema e miti yu, dan yu kan agersi yusrefi nanga a boto dati. Den firi fu wi kan kenki wantronso. Wan dei yu de seiker taki Yehovah lobi yu èn taki a e horbaka gi yu, ma wan tra dei yu e tweifri srefi efu Yehovah e broko en ede nanga yu (Ps. 10:1; 13:1). A kan taki wan mati e taigi yu wan sani di e gi yu dek’ati èn kande yu e firi bun wan pisi ten (Odo 17:17; 25:11). Ma dan yu e bigin tweifri baka efu Yehovah e horbaka gi yu. Kande yu e bigin denki srefi taki Yehovah e si yu leki wan sma di no warti noti. Fa yu kan de leki na ankra ini na agersitori te muilek situwâsi e miti yu? Noso fa yu kan de seiker taki Yehovah lobi yu en taki a e horbaka gi yu èn fa yu kan sorgu taki yu e tan bribi dati?

3. San Psalm 31:7 nanga 136:1 e leri wi fu a lobi fu Yehovah èn fu a bun-ati fu en, èn fu san ede wi kan taki dati nowan sma man sori den fasi disi leki fa Yehovah e du dati?(Luku a prenki.)

³ Wan fasi fa wi kan hordoro te problema e miti wi, na te wi e prakseri a bun-ati fu Yehovah. (Leisi Psalm 31:7; 136:1). A wortu „bun-ati” abi fu du nanga a tranga lobi di wan sma abi gi wan trawan èn a lobi dati e tan fu ala ten. Nowan sma man sori a lobi disi leki fa Yehovah e du dati. Fu taki en leti, Bijbel e sori taki Yehovah abi bun-ati „pasa marki” (Eks. 34:6, 7). Bijbel e taki disi tu fu Yehovah: „Yu abi bigi lobi gi ala den sma di e bari kari yu” (Ps. 86:5). Prakseri san den Bijbeltekst disi wani taki: Noiti Yehovah e gwe libi den getrow futuboi fu en. Te yu e hori na prakseri taki Yehovah abi bun-ati, dan dati kan yepi yu fu no bruya te tesi e miti yu.​—Ps. 23:4.

HORI NA PRAKSERI TAKI BIJBEL E LERI TAKI YEHOVAH LOBI WI

4. Gi wan tu eksempre fu prenspari leri na ini Bijbel, èn ferklari fu san ede wi e bribi den nanga wi heri ati.

⁴ Te wi abi problema, dan wan tra sani di kan yepi wi fu tan bribi taki Yehovah lobi wi, na te wi e hori na prakseri taki Bijbel e leri taki Yehovah lobi wi. Prakseri di yu bigin studeri Bijbel. Yu leri taki Gado nen na Yehovah, taki Yesus na Gado en wan-enkri lobi Manpkin, taki den dedewan no sabi notnoti, èn taki a grontapu disi o tron wan paradijs pe libisma o man libi fu têgo (Ps. 83:18; Preik. 9:5; Yoh. 3:16; Openb. 21:3, 4). Wan sma ben o man overtoigi yu taki den sani disi no tru? Nôno, fu di yu sabi taki ala den sani di yu leri e kmoto fu Bijbel. Dus, yu kan bribi taki Yehovah lobi yu èn taki a e si san e miti yu, fu di dati na wan fu den fosi sani di yu leri fu Bijbel. Meki wi go luku a tori disi moro fini.

5. Ferklari san kan yepi wan sma fu no bribi falsi leri.

⁵ Di yu bigin studeri Bijbel, dan san yepi yu fu no bribi falsi leri? Kande a sani di yepi yu, na di yu agersi den sani di yu ben leri nanga den sani di Bijbel e leri. Luku na eksempre disi: Kow taki dati yu ben e bribi fosi taki Yesus na a Almakti Gado. Ma di yu bigin studeri Bijbel yu aksi yusrefi efu a leri dati tru. Baka di yu ondrosuku san Bijbel e taki fu a tori disi, dan yu bigin bribi taki san Bijbel e leri tru. A sani disi meki taki yu no bribi a falsi leri moro, ma na presi fu dati yu bigin bribi a tru leri disi: Yesus na „a fosiwan fu ala sani di Gado meki” èn „a wan-enkri Manpikin di Gado srefi meki” (Kol. 1:15; Yoh. 3:18). A no de fu taki dati falsi leri kan „tranga so te” èn den muilek fu rutu puru na ini wi ati (2 Kor. 10:4, 5). Ma di yu leri san tru, dan yu no bigin bribi den falsi leri dati baka.​—Fil. 3:13.

6. Fu san ede Psalm 136 e taki someni leisi taki Yehovah „en bun-ati de fu têgo”?

⁶ Yu kan du wan srefi sortu sani te a abi fu du nanga a bun-ati noso a lobi fu Yehovah. Te wan tesi e miti yu èn yu e si taki yu e bigin tweifri efu Yehovah lobi yu, dan aksi yusrefi: ’Mi e denki krin?’ Te yu e tweifri, dan prakseri den wortu fu Psalm 136:1, a thema tekst fu na artikel disi. Dan aksi yusrefi: Fu san ede Yehovah e taki dati a bun-ati noso a lobi fu en de fu têgo? Fu san ede a psalm dati e taki 26 leisi taki „en bun-ati de fu têgo”? Disi e leri wi taki neleki fa wi no ben e tweifri fu bribi tra prenspari leri na ini Bijbel, na so wi no abi fu tweifri tu te Bijbel e taki dati Yehovah lobi wi. A no tru kwetkweti taki yu no warti gi Yehovah noso taki a no lobi yu. Neleki fa yu ben o weigri fu bribi ibri tra falsi leri, na so yu musu weigri fu bribi a sani dati.

7. Gi wan tu eksempre fu Bijbeltekst di e gi wi a dyaranti taki Yehovah lobi wi.

⁷ Bijbel abi moro bewijs taki Yehovah lobi wi. Fu eksempre, Yesus ben taigi den bakaman fu en: „Unu warti moro leki wan heri ipi pikin fowru” (Mat. 10:31). Yehovah srefi ben taigi a pipel fu en: „Mi o meki yu kon tranga èn mi o yepi yu trutru. Iya, mi o hori yu steifi nanga mi ret’anu fu retidu” (Yes. 41:10). Luku fa den wortu dati de krin fu ferstan. Yesus no e taki ’Kande yu warti moro den pikin fowru’, en Yehovah no e taki ’Kande mi o yepi yu’. Na presi fu dati, den e taki: „Unu warti moro den sani dati” èn „Mi o yepi yu trutru”. Efu wan tesi e miti yu èn yu e bigin tweifri efu Yehovah lobi yu, dan den Bijbeltekst disi no o meki yu denki nomo taki a lobi yu, ma den kan yepi yu fu de seiker taki a lobi yu. Den Bijbeltekst disi e taki san tru. Te yu e begi Yehovah fu yepi yu fu no tweifri moro èn te yu e denki dipi fu den Bijbeltekst disi, dan yu o man taki den wortu disi di skrifi na 1 Yohanes 4:16: „Wisrefi kon sabi taki Gado lobi wi èn wi kon bribi dati tu.”a

8. San yu kan du efu yu e tweifri son leisi efu Yehovah lobi yu?

⁸ Ma san yu kan du efu yu e tweifri ete efu Yehovah lobi yu? Luku fa den firi fu yu e kruderi nanga san yu sabi fu Yehovah. Den firi fu wi kan kenki, ma Bijbel e leri wi taki Yehovah lobi wi èn dati na wan tru tori di no e kenki noiti. Efu wi e bribi tra fasi, dan fu taki en leti wi no e poti prakseri na a tumsi prenspari fasi fu en, èn dati na lobi.​—1 Yoh. 4:8.

DENKI BUN FU A LOBI DI YEHOVAH ABI GI YU

9-10. San Yesus ben wani taki nanga den wortu: „A Tata srefi lobi unu”, soleki fa a skrifi na Yohanes 16:26, 27? (Luku a prenki.)

⁹ Wi kan leri moro fu a lobi fu Yehovah te wi e poti prakseri na a sani disi di Yesus ben taigi den bakaman fu en: „A Tata srefi lobi unu.” (Leisi Yohanes 16:26, 27.) Yesus no ben taki den wortu disi soso fu meki den disipel firi moro bun. Te wi e leisi den vers fosi den wan disi, dan wi e si taki Yesus no ben e taki fu den firi fu den disipel. Na presi fu dati, a ben e taki fu wan tra tori, èn dati na begi.

¹⁰ A no langa na fesi, Yesus ben taigi den disipel fu en taki den ben musu begi na ini a nen fu en. Sobun, a no en den ben musu begi (Yoh. 16:23, 24). A ben prenspari taki den sabi disi. Baka di Yesus kisi wan opobaka, dan a kan taki den disipel ben e prakseri fu begi en. Te yu luku bun, dan Yesus ben de wan mati fu den. Den ben kan denki taki a lobi di a ben abi gi den ben o meki taki a ben o wani arki den begi fu den èn taki a ben o aksi en P’pa fu yepi den. Ma Yesus taki dati den no ben musu denki so. Fu san ede? Fu di a ben taigi den: „A Tata srefi lobi unu.” Iya, Yehovah lobi wi so te taki en srefi e arki den begi fu wi. Na dati Bijbel e leri wi. Prakseri san dati wani taki gi yu: Fu di yu e studeri Bijbel, meki yu kon sabi Yesus èn yu kon lobi en (Yoh. 14:21). Ma neleki den disipel fu a fosi yarihondro, yu kan begi Yehovah nanga a fertrow taki ’en srefi lobi yu’. Yu e sori taki yu e bribi den wortu disi ibri leisi te yu e begi Yehovah.​—1 Yoh. 5:14.

FERSTAN SAN E MEKI YU TWEIFRI

11. Fu san ede Satan ben o breiti efu wi ben o tweifri efu Yehovah lobi wi?

¹¹ San e meki wi tweifri efu Yehovah lobi wi? Kande yu e piki taki na Satan e meki wi denki so, èn na a wan sei dati tru. Didibri e „suku fu swari” wi, èn a ben o breiti efu wi ben o tweifri efu Yehovah lobi wi (1 Petr. 5:8). Te yu luku en bun, dan na fu di Yehovah lobi wi, meki a sorgu gi wan lusu-paiman, èn Satan wani meki wi denki taki wi no warti fu kisi wini fu a lusu-paiman disi (Hebr. 2:9). Ma suma ben o breiti efu wi e tweifri efu Yehovah lobi wi? Na Satan. Èn suma ben o wani taki wi e las’ati so te taki wi e tapu fu dini Yehovah? Na Satan. Satan wani meki wi denki taki Yehovah no lobi wi. Ma dati no tru. Fu taki en leti, Yehovah no lobi Satan. Wan fu den „triki” fu en, na taki a wani pruberi fu meki wi denki taki Yehovah no lobi wi èn taki a no feni wi bun (Ef. 6:11). Te wi e ferstan san a feanti fu wi e pruberi fu du, dan dati kan gi wi moro dek’ati fu „kakafutu gi Didibri”.​—Yak. 4:7.

12-13. Fa a sondu di de na ini wi kan meki taki wi e bigin tweifri efu Yehovah lobi wi?

¹² Wan tra sani de di kan meki taki wi e bigin tweifri efu Yehovah lobi wi. San na dati? Dati na a sondu di de na ini wi (Ps. 51:5; Rom. 5:12). Sondu pori a matifasi di libisma ben abi nanga a Mekiman. A pori sosrefi a ferstan, na ati, nanga a skin fu libisma.

¹³ Sondu abi krakti tapu den firi fu wi. A e meki taki wi e kisi konsensi fonfon, taki wi e broko wi ede tumsi, taki wi no de seiker fa sani o waka nanga wi na ini a ten di e kon, èn a e meki tu taki wi e syen. Wi kan kisi den firi disi te wi du wan sondu. Ma den kan opo kon tu fu di wi alamala gebore leki sondu sma, èn fu taki en leti, a no so Gado ben meki wi (Rom. 8:20, 21). Neleki fa wan oto no man rèi bun te a abi wan plata banti, na so a sondu di de na ini wi e meki taki wi no man du ala sani bun soleki fa Gado ben wani di a meki libisma. Dati meki a no e ferwondru wi taki wi e tweifri son leisi efu Yehovah lobi wi trutru. Te dati e psa, dan wi musu hori na prakseri taki Yehovah na ’wan Gado di bigi srefsrefi èn sma abi bigi lespeki gi en [di] . . . e sori bun-ati gi den sma di lobi en èn di e hori densrefi na den wet fu en’.​—Neh. 1:5.

14. Te wi e prakseri a lusu-paiman, dan fa dati kan yepi wi fu no tweifri moro efu Yehovah lobi wi? (Romesma 5:8) (Luku sosrefi a faki „Luku bun taki ’sondu no bedrigi unu.’”)

¹⁴ Son leisi, wi ben kan firi leki wi no warti fu Yehovah lobi wi. Ma na fu di wi no warti fu kisi a lobi fu Yehovah, meki a lobi disi prenspari so. Nowan sani de di wi kan du fu ferdini a lobi fu Yehovah. Ma fu di Yehovah lobi wi, meki a sorgu gi a lusu-paiman so taki a kan gi wi pardon fu den sondu fu wi (1 Yoh. 4:10). Hori na prakseri tu taki Yesus kon fu ferlusu sondu sma, a no kon fu ferlusu sma di no abi sondu. (Leisi Romesma 5:8.) Nowan fu wi man du ala sani sondro fowtu, èn Yehovah no e ferwakti dati tu fu wi. Te wi e ferstan taki a sondu di de na ini wi kan meki taki wi e bigin tweifri efu Yehovah lobi wi, dan wi musu du ala sani wi man fu no meki dati psa.​—Rom. 7:24, 25.

TEKI A BESROITI FU TAN GI YESI NA YEHOVAH

15-16. Fu san wi kan de seiker efu wi e tai hori na Yehovah èn fu san ede? (2 Samuel 22:26)

¹⁵ Yehovah wani taki wi teki a yoisti besroiti. A wani taki wi e „tai hori na en” (Deut. 30:19, 20). Te wi e du dati, dan wi kan de seiker taki a o tan horbaka gi wi. (Leisi 2 Samuel 22:26.) Solanga wi e tai hori na Yehovah, wi kan abi a fertrow taki a o yepi wi fu psa iniwan situwâsi di e opo kon na ini wi libi.

¹⁶ Soleki fa wi si, dan wi abi ibri reide fu tnapu kánkan te wi e kisi fu du nanga muilek situwâsi. Wi sabi taki Yehovah lobi wi èn taki a o yepi wi. Na dati Bijbel e leri. Efu oiti wi e tweifri efu Yehovah lobi wi, dan wi kan poti prakseri na san wi sabi fu en, na presi fu poti prakseri na fa wi e firi na a momenti dati. Noiti wi wani tweifri taki a lobi fu Yehovah de fu têgo, neleki fa Bijbel e taki.