„Tan abi a wánfasi di unu kisi nanga yepi fu a santa yeye”
NA APOSTEL Paulus ben gi den Kresten na ini Efeise a rai disi: „Un musu abi lobi, so taki un man frudrage makandra. Un musu libi bun nanga makandra èn un musu du ala muiti fu tan abi a wánfasi di unu kisi nanga yepi fu a santa yeye.”—Ef. 4:2, 3.
„A wánfasi” di de na wi mindri e kon „fu a santa yeye”. Disi wani taki dati wi abi a wánfasi disi fu di a yeye fu Gado e sorgu gi dati. Ma soleki fa Paulus ben taki, wi musu du tranga muiti fu sorgu taki wi e tan na ini wánfasi. Suma musu du dati? Fu taki en leti, ibri Kresten musu du san de fanowdu fu sorgu taki den ’tan abi a wánfasi di den kisi nanga yepi fu a santa yeye’.
Kow taki dati wan sma gi yu wan nyun wagi. Suma musu sorgu taki a wagi e tan bun? A de krin suma musu du dati. Efu a wagi e broko fu di yu no e sorgu bun gi en, dan yu no kan gi a sma di gi yu a wagi a fowtu fu dati.
Na so a de tu taki aladi a wánfasi fu wi na wan kado di wi kisi fu Gado, tòg ibriwan fu wi abi a frantwortu fu sorgu taki a wánfasi disi e tan. Efu wi no man feni en nanga wan brada noso nanga wan sisa, dan wi musu aksi wisrefi: ’Mi e du san mi musu du fu sorgu taki wánfasi e tan na ini a gemeente?’
„DU ALA MUITI FU TAN ABI A WÁNFASI DI UNU KISI NANGA YEPI FU A SANTA YEYE”
A sani di Paulus skrifi e sori taki a no makelek ala ten fu tan na ini freide nanga wi brada nanga sisa, spesrutu te wan fu den du wan hati sani nanga wi. A de so ala ten taki wi musu go taki nanga a sma fu taigi en fa wi e firi? Nôno. Aksi yusrefi: ’Efu mi e du dati, dan a situwâsi no o kon moro ogri?’ Son leisi a moro koni sani fu du, na fu gi a sma pardon noso fu libi a tori.—Odo 19:11; Mark. 11:25.
Aksi yusrefi: ’Efu ala ten mi wani go taigi sma fa mi e firi te den du wan hati sani nanga mi, dan a situwâsi no o kon moro ogri?’
Neleki fa na apostel Paulus ben skrifi, a prenspari taki wi ’abi lobi èn taki wi e frudrage makandra’ (Ef. 4:2). Wan buku e taki dati den wortu disi wan taki sosrefi „teki sma soleki fa den de”. Disi wani taki dati wi Kresten brada nanga sisa e meki fowtu neleki fa wi e du dati. A no de fu taki dati wi e pruberi fu „kisi nyun fasi” (Ef. 4:23, 24). Ma nowan fu wi kan du dati sondro taki wi e meki fowtu (Rom. 3:23). Efu wi e hori a sani dati na prakseri, dan a o moro makelek gi wi fu ferdrage makandra èn fu gi makandra pardon, so taki wi kan ’tan abi a wánfasi di wi kisi nanga yepi fu a santa yeye’.
Wi o man „libi bun nanga makandra” èn wi o man de na ini „wánfasi” na ini a gemeente te wi e gi makandra pardon èn te wi de klarklari fu libi a tori te trawan du hati sani nanga wi. A Griki wortu di vertaal nanga „wánfasi” na Efeisesma 4:3, vertaal nanga „den titei fu a skin” na Kolosesma 2:19. Den titei fu a skin na tranga banti na ini a skin di e hori den bonyo fu wi skin na wán. Na so a de tu taki te wi e libi na ini freide nanga wi brada nanga sisa èn te wi lobi den, dan dati e yepi wi fu tan mati fu den, awinsi wi no lobi san den e du son leisi.
Sobun, te wan brada noso wan sisa e du wan hati sani nanga wi, kande wi e mandi nanga en, noso kande a e ferferi wi, dan pruberi fu ferstan a sma, na presi fu krutu en (Kol. 3:12). Fu di ala libisma e meki fowtu, meki a musu fu de so tu taki yu du wan hati sani tu nanga wan sma wan leisi. Te yu e hori dati na prakseri, dan dati o yepi yu fu du san yu man fu „tan abi a wánfasi di unu kisi nanga yepi fu a santa yeye”.