„Gado lobi yu srefsrefi”

1-2. San kan yepi wi fu kon ferstan taki Yehovah lobi wi trutru?

YEHOVAH lobi den futuboi fu en trutru. Ma sonwan fu den no e bribi a sani dati. Kande na fu di sma no libi bun nanga den kwetkweti. Fa a de nanga yu? Oiti yu ben e firi leki yu no warti noti? Efu dati de so, dan san kan yepi yu fu de seiker taki Yehovah lobi yu trutru?

² Wan sani di yu kan du, na fu poti prakseri na Bijbel tori di e sori fa Yehovah wani taki sma musu si den futuboi fu en. En Manpkin Yesus ben e lespeki sma èn a ben e sori switifasi gi den. Na so a sori taki en nanga en P’pa trutru lobi den wan di e firi leki den no bun nofo (Yoh. 5:19; Hebr. 1:3). Na ini na artikel disi wi o luku: (1) fa Yesus yepi sma fu kon ferstan taki Gado lobi den trutru èn (2) fa wi kan overtoigi wisrefi taki Gado lobi wi trutru.​—Hag. 2:7.

FA YESUS YEPI SMA FU KON FERSTAN TAKI DEN BUN NOFO

3. Fa Yesus ben e libi nanga den Galileasma di go suku yepi na en?

³ Di Yesus ben e preiki na ini Galilea, dan furu sma kon na en. Den ben wani yere a boskopu fu en èn den ben wani taki a dresi den siki fu den. Yesus si taki den sma disi ’ben e pina èn taki den ben e waka bruyabruya leki skapu di no abi skapuman’ (Mat. 9:36). Den kerki fesiman fu den ben e wiswasi den èn den ben e kari den „frufruktu sma” (Yoh. 7:47-49). Ma Yesus sori lespeki nanga switifasi gi den sma disi. A teki en ten fu gi den leri èn fu dresi den siki fu den (Mat. 9:35) Èn fu di a ben wani yepi moro sma, meki a sori den apostel fu en fa fu du a preikiwroko èn a taigi den fu meki sikisma kon betre baka.​—Mat. 10:5-8.

4. San wi e leri fu a fasi fa Yesus ben libi nanga den sma di trawan ben e wiswasi?

⁴ Fu di Yesus ben e sori switifasi nanga lespeki gi den sma di ben e arki a boskopu fu en, meki a sori taki en nanga en P’pa lobi den wan di trawan e wiswasi. Efu yu e dini Yehovah, ma yu e tweifri efu Gado feni yu bun, dan prakseri fa Yesus ben e libi nanga sakafasi sma di ben wani kisi leri fu en. Disi o yepi yu fu kon si taki Yehovah lobi yu trutru.

5. San ben de a situwâsi fu wan uma di Yesus ben miti na ini Galilea?

⁵ A tru taki Yesus ben gi grupu sma leri, ma son leisi a ben e meki ten fu yepi spesrutu sma. Fu eksempre, di a ben e preiki na ini Galilea, dan a miti wan uma di ben e lasi brudu twarfu yari kba (Mark. 5:25). Soleki fa a Wet ben e sori, dan na uma disi no ben krin, èn iniwan sma di ben e fasi en, no ben o krin tu. Sobun, na uma disi no ben man moksi nanga trawan èn a kan taki nofo tron a ben de en w’wan. Boiti dati, a no ben man anbegi Yehovah makandra nanga trawan na a snoga noso na den prenspari fesa (Lef. 15:19, 25). A no de fu taki dati na uma disi pina hebi èn a ben musu fu firi leki a no warti noti.​—Mark. 5:26.

6. San na uma du fu sorgu taki a kon betre baka?

⁶ Na uma disi ben e pina so te taki a ben wani taki Yesus dresi en. Ma a no waka go langalanga na Yesus. Fu san ede? Kande a ben e syen. Noso kande a ben e frede taki Yesus ben o bari en taki a no ben mag de na mindri den sma fu di a no ben krin. Dati meki a fasi a dyakti fu Yesus eife nomo, fu di a ben de seiker taki dati ben o dresi en kba (Mark. 5:27, 28). Èn a ben abi leti fu bribi dati fu di a kon betre baka. Baka dati, Yesus aksi suma ben fasi en èn na uma taigi en taki na en. San Yesus du?

7. San Yesus du nanga na uma di ben e pina hebi? (Markus 5:34)

⁷ Yesus ben si taki na uma ’ben e frede èn taki a ben e beifi’ (Mark. 5:33). Dati meki a sori switifasi nanga lespeki gi en. Fu di a ben e hori na prakseri fa na uma ben e firi, meki a gi en dek’ati. A kari en „mi umapkin” srefi. Disi ben e sori taki a ben e lespeki na uma èn taki a ben lobi en. (Leisi Markus 5:34.) A kan taki a ben kari na uma so fu di a ben si taki a ben e frede srefsrefi. Fa yu denki taki na uma ben e firi di Yesus taki so nanga en? A ben musu fu breiti taki Yesus sori switifasi nanga lobi gi en. Den sani di Yesus ben taigi na uma ben trowstu en so te taki a no ben e frede moro taki Yesus ben o mandi taki a ben fasi en dyakti èn taki a ben de na mindri ala den sma drape. Na presi fu dati, Yesus yepi en fu ferstan taki en P’pa na hemel lobi en trutru.

8. Sortu problema wan sisa na ini Brasyonkondre abi?

⁸ Na ini a ten disi, sonwan fu den futuboi fu Gado e siki tu èn kande den e firi brokosaka, noso kande den e firi leki den no warti noti. Maria,a na wan gewoon pionier na ini Brasyonkondre. A gebore sondro futu èn sondro en kruktusei-anu. A e taki: „Den pkin na skoro ben gwenti dreigi mi fu di mi gebore so. Den ben e kari mi ala sortu nen. Èn son leisi mi eigi famiri srefi ben e meki mi firi leki mi no bun nofo.”

9. San yepi Maria fu kon ferstan taki Yehovah ben lobi en trutru?

⁹ San yepi Maria? Di a tron wan Yehovah Kotoigi, dan den Kresten brada nanga sisa fu en trowstu en èn den yepi en fu si ensrefi leki fa Yehovah e si en. A e taki: „Mi no man taigi yu srefi omeni brada nanga sisa yepi mi. Mi e taigi Yehovah tangi nanga mi heri ati taki a gi mi so wan lobi famiri na ini a gemeente.” Den Kresten brada nanga sisa fu Maria yepi en fu kon ferstan taki Gado ben lobi en trutru.

10. Sortu problema Maria Makdalena ben abi? (Luku den prenki.)

¹⁰ Luku fa Yesus yepi Maria Makdalena. Seibi ogri yeye ben de na tapu na uma disi (Luk. 8:2). A kan taki den ogri yeye ben e meki a du ala sortu law sani èn dati meki sma ben e wai pasi gi en. Na uma disi ben e pina hebi èn a ben musu fu de so taki a ben e frede. Kande a ben e denki tu taki nowan sma ben lobi en èn taki nowan sma ben man yepi en. A musu fu de so taki Yesus puru den ogri yeye na en tapu, èn na so na uma disi tron wan fayafaya bakaman fu en. Na sortu tra fasi Yesus yepi Maria Makdalena fu ferstan taki Gado lobi en trutru?

11. Fa Yesus sori Maria Makdalena taki Gado lobi en trutru? (Luku den prenki.)

¹¹ Yesus gi Maria Makdalena a grani fu go preiki na den difrenti dorpu makandra nanga en nanga den tra disipel.b Na so a ben man arki te Yesus ben e gi sma leri. Yesus sori ensrefi tu na a uma disi a dei di a kisi wan opobaka. A ben de wan fu den fosi disipel nanga suma Yesus taki a dei dati. Yesus taigi en srefi fu go ferteri den tra apostel fu en taki a ben kisi wan opobaka. Na ala den fasi disi, Yesus yepi Maria Makdalena fu kon ferstan taki Yehovah lobi en trutru.​—Yoh. 20:11-18.

12. Fu san ede Lidia ben e denki taki a no ben warti fu sma lobi en?

¹² A kan taki neleki Maria Makdalena, furu sma na ini a ten disi e denki taki den no warti fu sma lobi den. Lidia, wan sisa na ini Spanyorokondre, e taki dati di en m’ma ben de nanga bere fu en, dan a ben prakseri fu puru a bere. Lidia sabi ete taki srefi di a ben de wan pkin meisje, en m’ma no ben e poti prakseri na en èn a ben gwenti taigi en hati sani. Lidia e taki: „Fu di mi m’ma no ben lobi mi, meki mi ben e howpu taki tra sma ben o lobi mi èn taki den ben o wani tron mi mati.”

13. San yepi Lidia fu kon si taki Yehovah lobi en trutru?

¹³ Di Lidia bigin studeri Bijbel, dan sani kon kenki. Fu di a ben e begi Yehovah, fu di a ben e leisi Bijbel, èn fu di den Kresten brada nanga sisa ben e sori switifasi gi en, meki a kon ferstan taki Yehovah lobi en trutru. A e taki: „Mi masra lobi taigi mi fa a lobi mi. Ibri leisi baka a e memre mi taki mi na wan bun sma. Tra bun mati fu mi du dati tu.” Yu sabi wan sma di yu kan yepi fu kon ferstan taki Yehovah lobi en trutru?

SAN KAN YEPI WI FU SI WISREFI LEKI FA YEHOVAH E SI WI?

14. Fa 1 Samuel 16:7 e yepi wi fu si wisrefi leki fa Yehovah e si wi? (Luku a faki „Fu san ede Yehovah lobi a pipel fu en?”)

¹⁴ Hori na prakseri taki Yehovah no e si yu leki fa tra sma e si yu. (Leisi 1 Samuel 16:7.) A no a moi fu wi, a moni di wi abi, noso a skoroleri di wi teki e bepaal efu Yehovah feni wi bun (Yes. 55:8, 9). Sobun, na presi taki wi e si wisrefi leki fa grontapu sma e si trawan, a moro bun fu si wisrefi leki fa Yehovah e si sma. Bijbel e taki fu sma di son leisi ben e firi leki den no warti noti. Wan tu fu den sma dati na Elia, Naomi, nanga Hana. Te yu e leisi den tori fu den sma disi, dan poti prakseri na a fasi fa Yehovah sori den taki a lobi den trutru. Kande yu kan skrifi wan tu sani di miti yu pe yu si taki Yehovah lobi yu trutru èn taki yu bun nofo gi en. Yu kan leisi artikel tu na ini den buku fu wi di o yepi yu fu kon si taki yu bun nofo gi Gado.c

15. Fu san ede Yehovah ben lobi Danièl srefsrefi? (Danièl 9:23)

¹⁵ Sabi taki Yehovah lobi yu fu di yu e tan getrow na en. Di a profeiti Danièl ben doro bijna 100 yari, dan a „ben weri srefisrefi” èn a ben las’ati (Dan. 9:20, 21). Fa Yehovah gi en dek’ati? Gado seni na engel Gabrièl fu memre Danièl taki a ben ’lobi en srefisefi’ èn taki a ben yere den begi fu en. (Leisi Danièl 9:23.) Fu san ede Gado ben lobi Danièl so? Fu di Danièl ben de wan ret’ati man èn a ben e anbegi Yehovah getrow (Esek. 14:14). Yehovah poti a tori fu a man disi na ini Bijbel fu trowstu wi (Rom. 15:4). Yehovah e arki den begi fu yu tu èn a lobi yu fu di yu e tan du san reti èn fu di yu e dini en getrow.​—Mika 6:8, ftw.; Hebr. 6:10.

16. San kan yepi yu fu si Yehovah leki wan P’pa di lobi yu?

¹⁶ Si Yehovah leki wan P’pa di lobi yu. Yehovah wani yepi yu, a no wani suku fowtu na yu (Ps. 130:3; Mat. 7:11; Luk. 12:6, 7). Furu sma di ben e firi leki den no warti noti, no abi a firi dati moro fu di den go denki dipi fu a lobi di Yehovah abi gi den. Fu eksempre, Eliana, wan sisa na ini Spanyorokondre, en masra ben gwenti taigi en hati sani omeni yari langa. A sani disi meki taki a sisa disi ben e firi leki a no warti noti èn taki nowan sma ben lobi en. A e taki: „Te mi e firi leki mi no warti noti, dan mi e pruberi fu prakseri fa mi de leki wan pkin meisje di Yehovah e opo tyari na ini anu fu di a lobi mi èn fu di a no wani taki ogri miti mi” (Ps. 28:9). Lauren, wan sisa fu Zuid-Afrika e memre ensrefi a sani disi: „Fu di Yehovah hari mi kon krosbei na en, meki mi ben man tan krosbei na en ala den yari disi. A gebroiki mi srefi fu gi trawan leri. Disi e sori krin taki a feni mi bun èn taki a lobi mi trutru.”​—Hos. 11:4.

17. San kan yepi yu fu de seiker taki Yehovah feni yu bun? (Psalm 5:12) (Luku a prenki.)

¹⁷ Yu kan de seiker taki Yehovah feni yu bun. (Leisi Psalm 5:12.) David ben taki dati Yehovah feni ret’ati sma bun èn taki a e kibri den neleki fa wan „bigi schild” e kibri sma. Fu di yu sabi taki Yehovah feni yu bun èn taki a e horbaka gi yu, dan dati kan kibri yu leki wan schild te yu e bigin denki takru fu yusrefi. Fa yu kan sabi taki Yehovah feni yu bun? Soleki fa wi si, dan Yehovah e gi yu a dyaranti dati nanga yepi fu a Wortu fu en. Boiti dati, a e gebroiki owruman, bun mati, nanga tra sma fu memre yu taki a lobi yu trutru. San yu musu du te trawan e taigi yu taki yu bun nofo gi Yehovah?

18. Fu san ede a bun fu bribi den sani di trawan e taki te den e prèise wi?

¹⁸ Te sma di sabi yu èn di lobi yu e taigi yu bun sani fu yusrefi, dan yu no musu denki taki den e lei. Hori na prakseri taki Yehovah kan gebroiki den sma disi fu yepi yu fu kon ferstan taki a feni yu bun. Eliana, di wi ben kari kba, e taki: „Safsafri mi e leri fu bribi den bun sani di sma e taigi mi fu misrefi. A no makelek, ma mi sabi taki na dati Yehovah wani taki mi du.” Eliana kisi wini fu a muiti di den owruman du. Now a e dini leki pionier èn wan tu dei na ini a wiki a e yepi nanga a wroko na Betel kmoto fu oso.

19. Fu san ede yu kan de seiker taki Gado lobi yu trutru?

¹⁹ Na wan switi fasi Yesus e memre wi taki wi warti trutru gi wi P’pa na hemel (Luk. 12:24). Dati meki wi kan abi a fertrow taki Yehovah lobi wi trutru. Noiti wi musu fergiti a sani disi! Èn meki wi du ala san wi man fu yepi trawan fu kon si fa Gado lobi den tu.