Incwadzi Yesibili YaSamuweli
23 Lawa ngemavi ekugcina aDavide:+
“Livi laDavide indvodzana yaJese,+
Nelivi lendvodza leyaphakanyiselwa esikhundleni lesisetulu,+
Logcotjiwe+ waNkulunkulu waJakobe,
Umhlabeleli wetingoma+ ka-Israyeli.
3 Nkulunkulu wema-Israyeli wakhuluma;
Lidvwala laka-Israyeli+ lakhuluma nami latsi:
‘Nangabe lolungile+ abusa bantfu,
Abusa ngekwesaba Nkulunkulu,+
4 Kuba njengekukhanya kwasekuseni nakuvela lilanga,+
Ekuseni nakungenamafu.
Kufana nekukhanya ngemuva kwemvula,
Lokwenta tjani buhlume emhlabeni.’+
5 Indlu yami ayifani yini naleyo lesembikwaNkulunkulu?
Ngobe wente sivumelwane saphakadze nami,+
Wahlela yonkhe imininingwane yaso futsi wasivikela.
Ngobe sisho kusindziswa kwami ngalokuphelele kanye nenjabulo yami,
Akusiko yini loko lokwenta asiphumelelise?+
6 Kodvwa onkhe emadvodza langenangcondvo ayalahlwa+ njengemanyeva,
Ngoba wona akatsatseki ngesandla.
7 Nakwenteka umuntfu awatsintsa,
Kufanele awahlomele ngensimbi nangesibambo sesikhali,
Futsi kufanele acotfulwe ngemlilo endzaweni yawo.”
8 Lawa ngemagama emasotja aDavide langemachawe:+ Joshebi-bashebethi umHakhamoni, umphatsi wemachawe lamatsatfu.+ Ngalesinye sikhatsi wake wabulala bantfu labangu-800 ngesikhali sakhe. 9 Lelandzela yena ngu-Eliyezeri+ indvodzana yaDodo,+ loyindvodzana ya-Ahoha, lobekasekhatsi kwemachawe aDavide lamatsatfu ngesikhatsi bachukuluta emaFilisti. Bahlangana lapho kuze balwe futsi ngesikhatsi ema-Israyeli abaleka, 10 yena akabalekanga kodvwa wachubeka abulala emaFilisti kwaze kwadzinwa umkhono wakhe futsi sandla sakhe somelela enkembeni sangaseluleki.+ Ngako Jehova wenta kutsi kube nekuncoba lokukhulu ngalelolanga+ futsi bantfu beta ngemuva kwakhe kuze batsatse tikhali taletidvumbu.
11 Lolandzela yena bekunguShama indvodzana ya-Age umHarari. EmaFilisti ahlangana ndzawonye eLehi, lapho bekunendzawo yemalentili khona; futsi bantfu babaleka ngenca yemaFilisti. 12 Kodvwa yena wema emkhatsini walensimu futsi wayivikela waphindze wachubeka nekubulala emaFilisti. Ngaleyo ndlela Jehova wenta kutsi kube nekuncoba lokukhulu.*+
13 Emadvodza lamatsatfu kulawo langu-30 lebekaphetse, ehlela kuDavide emhumeni wase-Adulamu+ ngesikhatsi sekuvuna futsi sicumbi* semaFilisti besimise emathende eSihosheni* semaRefa.+ 14 Ngaleso sikhatsi Davide abesendzaweni yekubhaca,+ futsi emasotja emaFilisti bekamise emathende eBhetlehema. 15 Davide wabese uveta sifiso lebekanaso, watsi: “Ngifisa shengatsi nginganatsa emanti emtfombo longasegedeni laseBhetlehema!” 16 Nakeva loko, emasotja lamatsatfu langemachawe abhidla emasotja emaFilisti ngenkhani aphumela ngale afike akha emanti emtfonjeni longasegedeni laseBhetlehema abuya nawo awanika Davide; kodvwa yena akavumanga kuwanatsa, wawacitsa embikwaJehova.+ 17 Davide watsi: “Awu Jehova, lena yintfo lengingacabangi kuyenta! Kufanele yini nginatse ingati+ yalamadvodza labeke kuphila* kwawo engotini?” Ngako wala kuwanatsa. Nguleti tintfo letentiwa ngulamasotja akhe lamatsatfu langemachawe.
18 Abishayi+ umnakaboJowabe indvodzana yaSeruya,+ bekaphetse lamanye emasotja lamatsatfu langemachawe; ngesikhali sakhe wabulala bantfu labangetulu kwa-300 futsi bekadvume njengalamasotja lamatsatfu langemachawe.+ 19 Ngisho nobe bekadvume kakhulu kwendlula lalamanye lamatsatfu futsi ayindvuna yawo, akazange aniketwe sigaba lesifana nesalawa ekucala lamatsatfu.
20 Bhenaya+ indvodzana yaJehoyada bekayindvodza lenesibindzi* leyenta tintfo letinyenti letimangalisako eKhabsiyeli.+ Wabulala emadvodzana lamabili a-Ariyeli wakaMowabi futsi wangena emgodzini lonemanti ngelilanga lebelinesitfwatfwa, wabulala libhubesi.+ 21 Waphindze wabulala indvodza lengumGibhithe lebeyisidlakela. Ngisho nome lendvodza lengumGibhithe beyinesikhali, waya kuyo aphetse indvuku wafike wayemuka lesikhali sayo wase uyibulala ngaso. 22 Letintfo leti tentiwa nguBhenaya indvodzana yaJehoyada, futsi bekadvume njengalamasotja lamatsatfu langemachawe. 23 Ngisho nobe bekasesikhundleni lesisetulu kwendlula emasotja langu-30, akazange aniketwe sigaba lesifana nesalawa lamatsatfu. Nobe kunjalo, Davide wambeka kutsi aphatse bogadzi bakhe.
24 Asaheli+ umnakaboJowabe abesekhatsi kulaba labangu-30: Eli-hanani indvodzana yaDodo, waseBhetlehema,+ 25 Shama umHarodi, Elika umHarodi, 26 Helesi+ umPheleti, Ira+ indvodzana ya-Ikheshi umThekhowa, 27 Abiyezeri+ um-Anathothi,+ Mebunayi umHusha, 28 Salmoni um-Ahoha, Maharayi+ umNethofa, 29 Heledi indvodzana yaBhana umNethofa, Ithayi indvodzana yaRibayi waseGibeya wesive sakaBhenjamini, 30 Bhenaya+ umPhirathoni, Hidayi wasetihosheni* taseGashi,+ 31 Abiyalboni um-Abha, Azmavethi waseBhahurimu, 32 Eliyaba umShalbimu, emadvodzana aJasheni, Jonathani, 33 Shama umHarari, Ahiyamu indvodzana yaSharari umHarari, 34 Elifeleti indvodzana ya-Ahasbayi loyindvodzana yemMakhathi, Eliyamu indvodzana ya-Ahithofeli+ umGilo, 35 Hesro umKhameli, Pharayi um-Arabiya, 36 Igali indvodzana yaNathani waseSobha, Bani umGadi, 37 Seleki um-Amoni, Naharayi umBherothi, inceku lebeyiphatsela Jowabe indvodzana yaSeruya tikhali, 38 Ira wase-Ithire, Garebi um-Ithire+ 39 na-Uriya+ umHethi. Bebangu-37 sebabonkhe.