Tihlabelelo

Ingoma yaDavide, imayelana nalesikhatsi asehlane lakaJuda.+

63 Awu Nkulunkulu, wena unguNkulunkulu wami, futsi ngihlale ngikufuna.+

Ngiyakulangatelela.+

Sengikulangatelele kangangekutsi sengize ngibutsakatsaka

Eveni lelome kheshe, lelite ngisho nemanti.+

2 Ngikubonile endzaweni yakho lengcwele;

Ngawabona emandla akho nenkhatimulo yakho.+

3 Ngenca yekutsi lutsandvo lwakho lolucotfo luncono kunekuphila,+

Ngitakukhatimulisa ngemlomo wami.+

4 Kungako ngitakudvumisa nangisaphila;

Ngitawuthantaza ngibite libito lakho.

5 Ngitawesutsa njengemuntfu lowesutsiswa kudla lokunonile,

Kungako ngitawuhlabela ngetindzebe tami, ngikudvumise ngemlomo wami.+

6 Ngiyakukhumbula nangilele embhedzeni wami;

Ngicabangisise ngawe ekhatsi nebusuku.+

7 Ngobe wena ungumsiti wami,+

Futsi ngimemeta ngijabulile ngephansi kwemaphiko akho.+

8 Ngihlale ngisedvute nawe;

Sandla sakho sangesekudla sihlale singibambile.+

9 Kodvwa labo labafuna kungibulala

Batawehlela ethuneni.

10 Batawubulawa ngenkemba,

Bese baba kudla kwabojakalazi.*

11 Kodvwa inkhosi itakujabulela loko Nkulunkulu latayentela kona.

Bonkhe bantfu labafunga yena batamdvumisa,

Ngobe labo labakhuluma emanga batawuthuliswa.