Isaya
28 Maye kulomchele* wekubukisa* wetidzakwa taka-Efrayimu+
Nembali lebunako yebuhle bakhona lobukhatitelako,
Lokusesicongweni seligcuma lelisesihosheni lesivundzile sebantfu labadzakwe liwayini!
2 Jehova unalotsite locinile futsi lonemandla.
Lonjengesangcotfo lesinemsindvo lomkhulu, nesiphepho lesibhubhisako,
Lonjengemvula lenkhulu lenekudvuma nembane, lokuhambisana netikhukhula,
Utakusacata phansi emhlabeni.
4 Lembali lebunako yebuhle bakhona lobukhatitelako,
Lesesicongweni sesihosha lesivundzile,
Itawuba njengelikhiwa lekucala lelivutfwe lisengakangeni lihlobo.
Lokutsi umuntfu nakalibona, alimite ngekushesha nje nasekalikhile.
5 Ngalelolanga, Jehova wemabutfo utawuba ngumchele lokhatitelako nemchele lomuhle lowakhiwe ngetimbali, kubantfu bakhe labasele.+ 6 Utawenta kutsi behluleli behlulele ngekulunga, aphindze abe ngumtfombo wemandla kulabo labacosha titsa letihlasela egedeni.+
7 Laba bayaduka ngenca yeliwayini;
Tinatfo tabo letidzakanako tiyabayendzisa.
Baphristi nebaphrofethi bayaduka ngenca yetjwala;
Liwayini libenta badideke,
Futsi bayendziswa tjwala babo;
Indlela lababona ngayo ibabangela kutsi baduke,
Futsi abehluleli ngendlela lefanele.+
8 Ematafula abo agcwele emahlanta lenyanyekako
Agcwele yonkhe indzawo.
9 Umuntfu utalwendlulisela kubani lwati,
Ngubani umuntfu latamchazela lomlayeto?
Ngulabo labasandza kulunyulwa yini,
Ngulabo labasandza kuyekeliswa libele yini?
10 Ngobe batsi: “Ngumyalo emuva kwemyalo, ngumyalo emuva kwemyalo,
Yintsambo yekukala etikwentsambo yekukala, yintsambo yekukala etikwentsambo yekukala,+
Kancane lana, kancane lena.”
11 Ngako utawukhuluma nebantfu bakhe asebentisa bantfu labangingitako kanye nelulwimi lwalesinye sive.+ 12 Wake watsi kubo: “Lena yindzawo yekuphumula. Lodziniwe akaphumule; lena yindzawo yekucabuleka,” kodvwa abazange balalele.+ 13 Ngako livi laJehova litawutsi kubo:
“Ngumyalo emuva kwemyalo, ngumyalo emuva kwemyalo,
Yintsambo yekukala etikwentsambo yekukala, yintsambo yekukala etikwentsambo yekukala,+
Kancane lana, kancane lena,”
Kuze kutsi nabahamba,
Bagileke futsi bawe ngesiphundvu
Bephuke, bangene elugibeni bese bayabanjwa.+
14 Ngako lalelani livi laJehova nine lenitikhukhumetako,
Nine babusi balabantfu labaseJerusalema,
15 Ngobe nine bantfu nitsi:
Nakwendlula sikhukhula lesinemandla,
Angeke sifike kitsi,
Ngobe sente emanga aba siphephelo setfu
Futsi sitifihle emangeni.”+
16 Ngako-ke, naku lokushiwo yiNkhosi Lephakeme Jehova:
“Ngibeka litje lelivivinyiwe kutsi libe sisekelo eSiyoni,+
Litje leliligugu lekusimisa+ indlu, lelisisekelo lesetsembekile.+
Kute lonekukholwa lotakwesaba.+
17 Ngitakwenta kwehlulela kahle kube yintsambo yekukala+
Ngente kulunga kube yintsambo yekucondzisa.+
Sangcotfo sitawushanyela lesiphephelo semanga,
Emanti atawukhukhula lendzawo yekubhaca.
18 Sivumelwane lenisente neKufa sitawucedvwa,
Nesivumelwane lenisente neliThuna,* angeke sichubeke sikhona.+
Ngesikhatsi sikhukhula lesinemandla sendlula,
Sitanifihlita.
19 Nome nini nasendlula,
Sitanikhukhula;+
Ngobe sitakwendlula njalo ekuseni,
Sendlule emini nasebusuku.
Kwesaba kakhulu kuphela lokutabenta bakucondze loko lokuvakele.”*
20 Ngobe lombhedze mfisha kakhulu, awukhoni kutelula kuwo,
Indvwangu leyelukiwe yincane kakhulu kutsi ungatigoca ngayo.
21 Ngobe Jehova utawusukuma njengaseNtsabeni iPherasimu;
Utawusukuma njengasesihosheni* lesiseceleni kweGibeyoni,+
Kuze ente umsebenti wakhe, lokungumsebenti wakhe longaketayeleki,
Kuze afeze umsebenti wakhe, lokungumsebenti wakhe longakavami.+
22 Nyalo-ke yekelani lokuphukuta,+
Kuze tinketane leniboshwe ngato tingaciniswa kakhulu kunakucala,
Ngobe ngivile eNkhosini Lephakeme Jehova wemabutfo,
Kutsi sekukhishwe sincumo sekutsi lonkhe lelive* litawubhujiswa.+
23 Bekani indlebe, nilalele livi lami;
Nakani futsi nilalele loko lengikushoko.
24 Umlimi uchubeka alima lilanga lonkhe yini ngaphambi kwekutsi ahlanyele?
Uyachubeka yini agucula, futsi abulale emagadze ensimini yakhe?+
25 Nasekayilungise kahle,
Akasakati yini ikhumini lemnyama, ahlanyele ikhumini,
Akahlanyeli yini kolo, emabele kanye nebhali etindzaweni tako
27 Ngobe ikhumini lemnyama ayibhulwa ngesihliphi,+
Lisondvo lenkalishi alihanjiswa etikwekhumini.
Kunaloko, ikhumini lemnyama ibhulwa ngendvuku,
Futsi ikhumini ibhulwa ngemzaca.
28 Umuntfu nakabhula uyakusila yini lokutinhlavu kuze ente sinkhwa?