Yekucala KubaseKhorinte

4 Bantfu kufanele basitsatse njengetinceku* taKhristu, nalabaphatsiswe timfihlo letingcwele taNkulunkulu.+ 2 Ngetulu kwaloko, labo labaphatsiswe lokutsite kulindzeleke kutsi betsembeke. 3 Kimi akukabaluleki kangako kutsi ngiphenywe ngini nobe ngiphenywe yinkantolo yebantfu. Ecinisweni nami ngekwami angitiphenyi, 4 ngobe nembeza wami umsulwa. Kodvwa loku akungenti ngibe ngulolungile, ngobe nguJehova* longiphenyako.+ 5 Ngako ningehluleli+ lutfo singakefiki sikhatsi lesifanele, kuze kube ngulapho kufika iNkhosi. Itawutibeka ekukhanyeni tintfo letifihleke ebumnyameni futsi itawembula tinhloso tetinhlitiyo, bese umuntfu ngamunye udvunyiswa nguNkulunkulu.+

6 Bazalwane, letintfo ngitisho ngikhuluma ngami nanga-Apholosi+ kuze kusitakale nine, khona nitowufundza kitsi lomtsetfo lotsi: “Ningeceli ngale kwetintfo letibhaliwe,” kuze ningagcwali umgcabho,+ futsi ningatsatsi lomunye njengaloncono kunalomunye. 7 Ngubani lokwenta wehluke kulomunye? Ecinisweni yini lonayo longazange uphiwe yona?+ Nangabe wayiphiwa, utigabatiselani shengatsi awuzange uyiphiwe?

8 Senivele nikutfolile yini lokwenele? Senivele ninjingile yini? Senivele nicalile yini kuba ngemakhosi+ ngaphandle kwetfu? Ngifisa shengatsi ngabe senivele ningemakhosi, kuze natsi sitobusa nani sibe ngemakhosi.+ 9 Ngobe ngibona shengatsi Nkulunkulu ubeke tsine baphostoli kutsi sibe sekugcineni enkhundleni njengebantfu labafanelwe kufa,+ ngobe sesibe ngumbukiso kulelive,+ etingilosini nakubantfu. 10 Tsine sitilima+ ngenca yaKhristu, kodvwa nine nihlakaniphile kuKhristu; sibutsakatsaka, kodvwa nine ninemandla; nikhulunyelwa kahle, kodvwa tsine sibukelwa phansi. 11 Kuze kube ngunyalo solo siyalamba,+ siyoma,+ site kwekugcoka,* siyashaywa,*+ site emakhaya, 12 siyakhandleka, futsi sisebenta ngetandla tetfu.+ Nasetfukwa, siyabusisa;+ nasiphatfwa kabi, siyabeketela;+ 13 nasihlanjalatwa, siphendvula ngemoya lophansi;*+ kuze kube ngunyalo sesifana netibi* kulelive, kungcola kwato tonkhe tintfo.

14 Letintfo angikatibhali ngenjongo yekunibangela emahloni, kodvwa ngitibhale kuze nginiyale njengebantfwana bami labatsandzekako. 15 Ngobe ngisho nobe kuKhristu ningaba nebanakekeli* labangu-10 000, nite bobabe labanyenti; ngobe mine sengibe ngubabe wenu kuKhristu Jesu ngekunifundzisa tindzaba letimnandzi.+ 16 Ngako-ke ngiyanincenga kutsi nilingise mine.+ 17 Kungaleso sizatfu ngitfuma Thimothi kini, ngobe ungumntfwana wami lotsandzekako nalowetsembekile eNkhosini. Utanikhumbuta indlela lengenta ngayo tintfo emsebentini waKhristu Jesu,+ njengobe nje ngifundzisa kuwo onkhe emabandla lakuto tonkhe tindzawo.

18 Labanye bagcwele umgcabho, benta shengatsi ngeke ngite kini. 19 Kodvwa nangabe Jehova* atsandza, ngitawukuta masinyane kini, futsi ngeke ngibe nendzaba nekwati tintfo letishiwo ngulabo labagcwele umgcabho, kepha ngifuna kwati emandla abo. 20 Ngobe uMbuso waNkulunkulu awubonakali ngalokukhulunywako, kodvwa ubonakala ngemandla. 21 Ngukuphi lokuncono kini, kutsi ngite nendvuku+ yini, nobe ngite nginelutsandvo nemoya lophansi?