Joshuwa
8 Ngemuva kwaloko Jehova watsi kuJoshuwa: “Ungesabi nobe wetfuke.+ Tsatsa onkhe emadvodza emphi, ukhuphuke nawo niyokulwa ne-Ayi. Nginikele kuwe inkhosi yase-Ayi, bantfu bayo, lidolobha layo kanye nelive layo.+ 2 Loko lowakwenta eJerikho nasenkhosini yayo ubokwenta e-Ayi nasenkhosini yayo,+ kodvwa tintfo tabo nemfuyo yabo ningatitsatsela tona. Ubobeka lamanye emadvodza kutsi abhace ngemuva kwelidolobha.”
3 Ngako Joshuwa nawo onkhe emadvodza emphi bakhuphuka bayokulwa ne-Ayi. Joshuwa wakhetsa emachawe lanemandla langu-30 000 futsi wawakhipha ebusuku. 4 Wawayala watsi: “Nibobhaca ngemuva kwalelidolobha. Ningabi khashane kakhulu nalo, futsi nonkhe kufanele nihlale nilungele. 5 Mine nabo bonkhe labantfu labakanye nami sitakuya kulelidolobha, futsi nabaphuma batekulwa natsi njengobe benta ekucaleni,+ sitawubese siyababalekela. 6 Nabeta kutewusihlasela, sitawubenta baphume kulelidolobha ngobe batakutsi: ‘Bayasibalekela njengakucala.’+ Ngaleso sikhatsi, sitawubese siyababalekela. 7 Ngemuva kwaloko nibobese niyasuka lanibhace khona futsi nihlasele lelidolobha. Jehova Nkulunkulu wenu utalinikela kini. 8 Ngekushesha nje nasenilitsetse lelidolobha, nibolokhela ngemlilo.+ Nibokwenta njengobe nje Jehova ashito. Nguleto-ke tintfo lokufanele nitente.”
9 Ngemuva kwaloko Joshuwa wawakhipha lamadvodza emphi futsi aya lapho abetawubhaca khona, afike ahlala emkhatsini weBetheli ne-Ayi, ngasenshonalanga ye-Ayi. Joshuwa yena wacitsa busuku nalalamanye emadvodza.
10 Joshuwa wavuka ekuseni kakhulu futsi wahlanganisa* lamasotja, ngemuva kwaloko yena nemadvodza lamadzala aka-Israyeli bawahola baya e-Ayi. 11 Onkhe emadvodza emphi+ labenaJoshuwa akhuphuka futsi aya ngembili kwalelidolobha. Afike amisa emathende enyakatfo ye-Ayi. Bekunesihosha emkhatsini we-Ayi nalapho bekamise khona emathende. 12 Joshuwa abetsetse emadvodza langaba ngu-5 000 wawabhacisa+ emkhatsini weBetheli+ ne-Ayi, ngasenshonalanga yalelidolobha. 13 Ngako lamasotja amisa emathende enyakatfo yalelidolobha+ kantsi emasotja lavikele libutfo ngemuva aba senshonalanga yalelidolobha.+ Ngalobo busuku, Joshuwa waya emkhatsini walesihosha.
14 Ngekushesha nje inkhosi yase-Ayi nayibona loku, yona nemadvodza alelidolobha baphutfuma ekuseni kakhulu baphuma bayokulwa nema-Israyeli endzaweni lebeyingenhla kwelugwadvule. Kodvwa lenkhosi beyingati kutsi kunemadvodza labekabhace ngemuva kwalelidolobha. 15 Ngesikhatsi emadvodza ase-Ayi ahlasela, Joshuwa nawo onkhe emadvodza aka-Israyeli babaleka ngemgwaco loya ehlane.+ 16 Bonkhe bantfu lebebakulelidolobha babese batjelwa kutsi ababagijimise, futsi njengobe bebacosha Joshuwa, baphuma kulelidolobha. 17 Kute ngisho nayinye indvodza leyasala e-Ayi naseBetheli, onkhe aphuma acosha ema-Israyeli. Ashiya lelidolobha livuliwe futsi agijimisa ema-Israyeli.
18 Jehova wase utsi kuJoshuwa: “Phakamisa lesikhali lesisesandleni sakho usibhekise e-Ayi+ ngobe ngitayinikela esandleni sakho.”+ Ngako Joshuwa waphakamisa lesikhali lebesisesandleni sakhe wasibhekisa kulelidolobha. 19 Ngesikhatsi nje elula sandla sakhe, lamadvodza labekabhacile aphuma masinyane lapho bekabhace khona futsi agijima angena kulelidolobha, alitsatsa. Ngekushesha nje alokhela ngemlilo.+
20 Emadvodza ase-Ayi atsi nakabuka emuva, abona intfutfu lesuka kulelidolobha yenyukela esibhakabhakeni futsi akazange abe nemandla ekubalekela nome ngukuphi. Lamasotja labebalekele ehlane abese ayajika agijimisa laba base-Ayi. 21 Ngesikhatsi Joshuwa nawo onkhe emasotja babona kutsi lamadvodza labekabhacile asalitsetse lelidolobha futsi babona nentfutfu lesuka kulo iphakama, bajika base bahlasela laba base-Ayi. 22 Lamadvodza labeshise lelidolobha abese ayaphuma kulo ayohlasela laba base-Ayi, ngako emadvodza ase-Ayi avaleleka emkhatsini, lamanye ema-Israyeli aba ngala kantsi lamanye aba ngale kwawo. Ababulala bonkhe base-Ayi, kangangekutsi kute lowasindza nobe lowakhona kubaleka.+ 23 Kodvwa inkhosi yase-Ayi+ ayibamba iphila futsi ayiletsa kuJoshuwa.
24 Ngemuva kwekutsi ema-Israyeli asacedze kubulala onkhe emadvodza ase-Ayi kulelihlane lapho bebawagijimisa khona, futsi newekugcina kuwo sekabulewe ngenkemba, onkhe ema-Israyeli abuyela e-Ayi ayobabulala ngenkemba bonkhe lebebasele. 25 Bonkhe bantfu base-Ayi, lokungulabadvuna nalabasikati, bafa ngalelolanga. Sebabonkhe baba ngu-12 000. 26 Joshuwa akazange ehlise sandla sakhe labephakamise ngaso lesikhali+ kwaze kwaba ngulapho sekababhubhise bonkhe bantfu base-Ayi.+ 27 Ngemuva kwaloko, ema-Israyeli atitsatsela imfuyo netintfo lebetikulelidolobha, njengobe nje Jehova abetjele Joshuwa.+
28 Ngemuva kwaloko Joshuwa wayishisa i-Ayi futsi yachubeka itindzala,+ njengobe isenjalo nalamuhla. 29 Walengisa inkhosi yase-Ayi elugodvweni* kwaze kwaba nguntsambama, futsi latsi naselitawushona, Joshuwa watsi sidvumbu sayo asisuswe kulolugodvo.+ Base basijika ekungeneni kweligede lalelidolobha, babeka indvundvuma lenkhulu yematje etikwaso, futsi isekhona nalamuhla.
30 Kungaleso sikhatsi lapho Joshuwa akhela khona Jehova Nkulunkulu wema-Israyeli li-al’thare eNtsabeni i-Ebali,+ 31 njengobe nje Mosi inceku yaJehova abetjele ema-Israyeli, futsi kubhaliwe encwadzini yeMtsetfo+ waMosi kwatsiwa: “Yakha li-al’thare ngematje langakacetulwa, lokungakase kusetjentiswe lithulusi lensimbi kuwo.”+ Kuleli-al’thare banikela kuJehova iminikelo yekushiswa kanye nemihlatjelo yekuthula.+
32 Kuleyo ndzawo Joshuwa wabese ubhala kulamatje loMtsetfo+ Mosi labewubhalele ema-Israyeli ekucaleni.+ 33 Onkhe ema-Israyeli, emadvodza lamadzala, tindvuna, nebehluleli bema ngala nangale kweLibhokisi, embikwebaphristi labangemaLevi lebebaphetse libhokisi lesivumelwane saJehova. Bebakhona nebantfu bekuhamba kanye nebantfu labangema-Israyeli ngekutalwa.+ Incenye yabo yema embikweNtsaba iGerizimu, lenye incenye yabo yema embikweNtsaba i-Ebali+ (njengobe nje Mosi inceku yaJehova abeshito ekucaleni),+ kuze kubusiswe bantfu baka-Israyeli. 34 Ngemuva kwaloko wawafundza ngelivi lelivakalako onkhe emavi aloMtsetfo,+ tibusiso+ neticalekiso,+ macondzana nako konkhe lobekubhalwe kulencwadzi yeMtsetfo. 35 Kute ngisho nalinye livi kuwo onkhe emavi Mosi lebekawashito, Joshuwa langazange alifundze ngelivi lelivakalako embikwaso sonkhe sive saka-Israyeli,+ lokufaka ekhatsi bafati nebantfwana, kanye nebantfu bekuhamba+ lebebahlala* emkhatsini waso.+