Kulandzisa KwaMatewu
24 Ngesikhatsi Jesu ahamba esuka ethempelini, bafundzi bakhe beta kuye bamkhombisa takhiwo telithempeli. 2 Watsi kubo: “Niyakubona yini konkhe loku? Ngicinisile ngitsi kini: Kute litje lelitawushiywa etikwalelinye lingakadzilitelwa phansi.”+
3 Watsi asehleti eNtsabeni Yemincumo, bafundzi bakhe beta kuye babodvwa batsi: “Sitjele, titawenteka nini letintfo, futsi sitawubona ngani kutsi sesikhatsi sekuba khona kwakho*+ nesekuphela kwalelive?”*+
4 Jesu wabaphendvula watsi: “Caphelani kutsi kube bete lonidukisako,+ 5 ngobe bantfu labanyenti batawukuta basebentisa libito lami batsi: ‘NginguKhristu,’ futsi batawudukisa incumbi yebantfu.+ 6 Nitawuva ngetimphi etindzaweni letehlukahlukene, kepha akukafaneli nesabe. Ngobe letintfo kufanele tenteke, kodvwa kuphela kutawube kusengakefiki.+
7 “Ngobe sive sitawuvukela lesinye sive, nembuso uvukele lomunye umbuso,+ futsi kutawuba khona indlala+ nekutamatama kwemhlaba etindzaweni letehlukahlukene.+ 8 Tonkhe letintfo titawube tikucala kwemihelo.
9 “Bantfu batonihlupha,+ banibulale,+ futsi nitawutondvwa tive tonkhe ngenca yelibito lami.+ 10 Labanyenti batawukuwa ekukholweni, batsengisane bodvwa futsi batondzane. 11 Kutawuvela baphrofethi bemanga labanyenti badukise incumbi yebantfu,+ 12 futsi ngenca yekwandza kwebubi, bantfu labanyenti batawuphelelwa lutsandvo. 13 Kodvwa loyo lotawucinisela* kuze kube sekugcineni utawusindziswa.+ 14 Letindzaba letimnandzi teMbuso titawushunyayelwa emhlabeni wonkhe, kuze tiviwe* ngito tonkhe tive,+ bese-ke kuphela kuyefika.
15 “Ngako nanibona intfo leyenyanyekako, futsi lebangela imbhubhiso ime endzaweni lengcwele,+ njengobe kwasho umphrofethi Danyela (lofundzako akasebentise kucondza), 16 labo labaseJudiya babobalekela etintsabeni.+ 17 Umuntfu losetikwendlu akangehli ayokhipha tintfo endlini, 18 naloyo losemasimini akangabuyeli endlini kuyotsatsa ingubo yakhe yangetulu. 19 Maye kulabo labatawube batetfwele nakulabo labatawube bamunyisa ngaleso sikhatsi! 20 Thantazelani kutsi lesikhatsi lenitawubaleka ngaso singabi sebusika nobe ngeliSabatha, 21 ngobe kutawuba nekuhlupheka lokukhulu+ lokungazange sekube khona kusukela kwaba khona umhlaba, nalokungeke kuphindze kube khona.+ 22 Ngako-ke, ngaphandle kwekutsi lawo malanga afinyetwe, kute umuntfu lobekangasindza, kodvwa ngenca yalabo labakhetsiwe, lawo malanga atawufinyetwa.+
23 “Nangabe umuntfu atsi kini: ‘Bukani, nangu Khristu,’+ nobe atsi: ‘Nanguya lapha!’ ningamkholwa loyo muntfu.+ 24 Kutawuvela boKhristu mbumbulu nebaphrofethi bemanga,+ bente tibonakaliso netimangaliso letinyenti kute badukise+ labakhetsiwe nakungenteka. 25 Kodvwa nine senginecwayisile. 26 Ngako-ke, nangabe bantfu batsi kini: ‘Usehlane,’ ningayi lapho; nobe nangabe batsi: ‘Usekhatsi endlini,’ ningabakholwa.+ 27 Ngobe kuba khona* kweNdvodzana yemuntfu kutawuba njengalapho umbane umanyata esibhakabhakeni usuka emphumalanga uze uyofika enshonalanga.+ 28 Nobe ngukuphi lapho kunesidvumbu khona, kulapho nemangce atawubutsana khona.+
29 “Ngekushesha nasetendlulile leto tinhlupheko, lilanga litawuba mnyama,+ inyeti ngeke ikhanyise, tinkhanyeti titakuwa esibhakabhakeni, netintfo letinemandla tasemazulwini titawunyakatiswa.+ 30 Lapho-ke kutawubonakala sibonakaliso seNdvodzana yemuntfu ezulwini, futsi tonkhe tive temhlaba titawukhala tilile+ natibona iNdvodzana yemuntfu+ ita isemafini inemandla nenkhatimulo lenkhulu.+ 31 Itawutfumela tingilosi tayo, tiphume nakushaywa emacilongo tiye emagumbini lamane emhlaba,* futsi tigcogcele ndzawonye labakhetsiwe labakuwo wonkhe umhlaba.+
32 “Fundzani sifundvo esihlahleni semkhiwa: Ngekushesha nasesihluma emagala lamasha futsi siveta emacembe, nivele nati kutsi lihlobo selifikile.+ 33 Ngalokufanako, nanibona tonkhe letintfo nibowati kutsi iNdvodzana yemuntfu seyisemnyango.+ 34 Ngicinisile ngitsi kini: Lesitukulwane ngeke siphele tingakenteki tonkhe letintfo. 35 Lizulu nemhlaba kutawendlula, kodvwa emavi ami ngeke aze endlule.+
36 “Macondzana nalelolanga neli-awa, kute lowatiko,+ tingilosi emazulwini atati ngisho neNdvodzana ayati, kodvwa nguBabe kuphela lowatiko.+ 37 Njengobe kwakunjalo ngesikhatsi saNowa,+ kutawuba njalo nekuba khona* kweNdvodzana yemuntfu.+ 38 Ngobe ngesikhatsi usengakefiki Zamcolo, bantfu bebadla, banatsa, labadvuna batsatsa bafati, labasikati bendza, kwaze kwaba lilanga Nowa langena ngalo emkhunjini,+ 39 futsi abazange banake kwaze kwefika Zamcolo wabakhukhula bonkhe,+ kutawuba njalo-ke nekuba khona kweNdvodzana yemuntfu. 40 Emadvodza lamabili atawube asensimini; yinye itawutsatfwa, kodvwa lenye ishiywe. 41 Nebafati lababili batawube basila etjeni; munye utawutsatfwa, kodvwa lomunye ashiywe.+ 42 Ngako-ke hlalani nilindzile ngobe anilati lilanga iNkhosi yenu letawufika ngalo.+
43 “Kodvwa yatini loku: Kube umnikati wendlu bekati kutsi lisela litawufika ngasiphi sikhatsi,*+ bekangahlala agadzile kute indlu yakhe ingagcekezwa.+ 44 Ngako-ke nani hlalani nilungele,+ ngobe iNdvodzana yemuntfu itawufika ngeli-awa leningalicabangi.
45 “Ngubani vele losisebenti lesetsembekile nalesihlakaniphile, loyo inkhosi yakhe lembeke ngetulu kwaletinye tisebenti tayo, kute atinike kudla ngesikhatsi lesifanele?+ 46 Siyajabula lesisebenti lokutawutsi inkhosi yaso nayifika isitfole senta njalo!+ 47 Ngicinisile ngitsi kini: Lenkhosi itasibeka ngetulu kwako konkhe lokukwayo.
48 “Kodvwa nangabe lesisebenti sisibi futsi sitsi enhlitiyweni yaso: ‘Inkhosi yami itawephuta,’+ 49 bese sicala kushaya leletinye tisebenti, sidle netidzakwa futsi sinatse nato, 50 inkhosi yaso itawufika ngelilanga lesingakayilindzeli ngalo nangesikhatsi lesingasati,+ 51 futsi itasijezisa kabuhlungu, isibeke endzaweni yinye nebatentisi. Kulapho sitawufikelwa khona kukhala nekugedletela kwematinyo.+