Hezekeli
34 Livi laJehova laphindze lefika kimi latsi: 2 “Ndvodzana yemuntfu, phrofetha ngalokumelene nebelusi baka-Israyeli. Phrofetha utsi kulabelusi: ‘INkhosi Lephakeme Jehova itsi: “Maye kubelusi baka-Israyeli,+ lebebasolo batondla bona! Akusiwo yini umhlambi lobekufanele ngabe bayawondla?+ 3 Nidla emanoni, nembatsa timphahla letakhiwe ngaloboya baletimvu, futsi nihlaba silwane lesikhuluphele,+ kodvwa aniwondli lomhlambi.+ 4 Anikaticinisi letibutsakatsaka, anikatelaphi letigulako, futsi anikatibhandishi letilimele, anikatibuyisi letidukile futsi anikatifuni letilahlekile;+ kunaloko, nitibuse ngelunya natiphatsa kabi kakhulu.+ 5 Ngako tasakateka ngobe betite umelusi;+ njengobe betisakatekile, taba kudla kwato tonkhe tilwane tesiganga. 6 Timvu tami betizulazula etintsabeni nasemagcumeni laphakeme; timvu tami betisakatekele kuwo wonkhe umhlaba, futsi bekute umuntfu lotifunako nobe lotimisele kutitfola.
7 “‘“Ngako-ke, nine belusi, lalelani nali livi laJehova: 8 ‘INkhosi Lephakeme Jehova itsi: “Ngitifunga mine, ngesizatfu sekutsi timvu tami setibe tinyamatane, tadliwa ngito tonkhe tilwane tesiganga, ngobe betingenamelusi futsi belusi bami abazange batifune timvu tami; kunaloko bachubeka batondla bona, bangatondli timvu tami,”’ 9 ngako-ke, lalelani livi laJehova nine belusi. 10 INkhosi Lephakeme Jehova itsi: ‘Ngimelene nalabelusi, ngitawufuna kutsi balandzise ngendlela labaphetse ngayo timvu tami,* futsi ngitawubayekelisa kondla* timvu tami,+ letimvu angeke tisaba kudla kwabo. Ngitawusindzisa timvu tami emilonyeni yabo, futsi angeke basatidla.’”
11 “‘Ngobe naku lokushiwo yiNkhosi Lephakeme Jehova: “Mine lucobo lwami ngitatifuna letimvu tami, futsi ngitatinakekela.+ 12 Ngitawunakekela timvu tami njengemelusi lotfole timvu takhe lebetihlakatekile, wase uyatondla.+ Ngitawutisindzisa etindzaweni letinyenti lebetisakatekele kuto ngelilanga lemafu nebumnyama lobukhulu.+ 13 Timvu tami ngitatibuyisa etiveni, ngitibutsise ndzawonye tibuye emaveni lebetikuwo, futsi ngitiletse eveni lato, bese ngiyatondla etintsabeni taka-Israyeli,+ eceleni kwemifudlana naseceleni kwato tonkhe tindzawo lokuhlalwa kuto kulelive. 14 Ngitatondlela emadlelweni lamahle, futsi titawudla etintsabeni letiphakeme taka-Israyeli.+ Titawulala khona lapho edlelweni lelihle.+ Titawudla emadlelweni lamahle kakhulu etintsabeni taka-Israyeli.”
15 “‘INkhosi Lephakeme Jehova itsi: “Mine lucobo lwami ngitatondla timvu tami,+ futsi mine ngitatilalisa phansi.+ 16 Imvu lelahlekile ngitayifuna,+ naledukile ngitayibuyisa, nalelimele ngitayibhandisha, futsi lebutsakatsaka ngitayinika emandla; kodvwa lekhuluphele nalenemandla ngitayicotfula. Leyo ngitayondla ngesehlulelo.”
17 “‘Wena mhlambi wami, iNkhosi Lephakeme Jehova itsi kuwe: “Sengitawehlulela timvu tami, ngehlulele timvu letindvuna netimbuti letindvuna.+ 18 Anikeneli yini ngekudla emadlelweni lancono kakhulu? Kufanele yini nigcobagcobe nalamanye emadlelo ngemasondvo enu? Kukahle yini kutsi nidvunge emanti leniwatfole ahlobile nasenicedze kunatsa? 19 Kufanele yini kutsi nyalo lomhlambi wami udle emadlelweni lagcotjwagcotjwe ngemasondvo enu futsi unatse emanti leniwadvunge ngemasondvo enu?”
20 “‘Ngako-ke, iNkhosi Lephakeme Jehova itsi kulabelusi: “Mine lucobo lwami ngilapha, futsi ngitawuba ngumehluleli emkhatsini wemvu lekhuluphele naleyondzile, 21 ngobe ngemhlubulo wenu nangemahlombe enu benichubeka nifuca tonkhe letigulako, futsi benichubeka nitikhweshisa ngetimphondvo tenu naze natilahlela khashane. 22 Mine ngitawusindzisa umhlambi wami, futsi angeke uphindze utingelwe;+ ngitawehlulela emkhatsini waleyo naleyomvu. 23 Ngitawuvusa umelusi munye abe setikwato,+ lokuyinceku yami Davide,+ futsi utatondla. Yena lucobo lwakhe utatondla aphindze abe ngumelusi wato.+ 24 Mine Jehova ngitawuba nguNkulunkulu wato,+ futsi inceku yami Davide itawuba ngumholi wato.+ Mine Jehova lucobo lwami sengikhulumile.
25 “‘“Ngitawenta sivumelwane sekuthula nato,+ futsi ngitawususa tilwane tesiganga letiyingoti kulelive+ kuze timvu tami tihlale ngekuphepha ehlane futsi tilale emahlatsini.+ 26 Ngitawenta kutsi tona kanye nendzawo letungelete ligcuma lami kube sibusiso,+ futsi ngitawunisa imvula ngesikhatsi lesifanele. Tibusiso titawehlela phansi njengemvula.+ 27 Tihlahla tesiganga titawutsela titselo tato, nemhlabatsi utawukhicita umkhicito wawo,+ futsi bantfu bami batawuhlala ngekuphepha kulelive. Bayawukwati kutsi mine nginguJehova nangephula lijoka lababoshwe ngalo,+ futsi ngibasindzisa kulabo lebebabagcilata. 28 Angeke baphindze babe yintfo yekutingelwa tive, tilwane tesiganga ngeke tibashwabadzele, futsi batawuhlala ngekuphepha, kube bete nalokubesabisako.+
29 “‘“Ngitabentela insimu yeludvumo,* angeke baphindze babulawe yindlala kulelive+ futsi angeke bahlaziswe nguletinye tive.+ 30 ‘Batawukwati kutsi mine, Jehova Nkulunkulu wabo nginabo nekutsi bona, lokubantfu baka-Israyeli, babantfu bami,’+ kusho iNkhosi Lephakeme Jehova.”’
31 “INkhosi Lephakeme Jehova itsi: ‘Nine timvu+ tami, lenitimvu lengitinakekelako, nimane nibantfu nje, futsi mine nginguNkulunkulu wenu.’”