Kulandzisa KwaMakho
4 Jesu waphindze washumayela eceleni kwelwandle futsi sicumbi lesikhulu sebantfu seta kuye. Ngako wagibela esikebheni wase uhlala kuso, wasikhweshisa kancane elugwini, futsi bonkhe labantfu bebeme elugwini.+ 2 Wabafundzisa tintfo letinyenti asebentisa imifanekiso.+ Njengobe bekabafundzisa, watsi kubo:+ 3 “Lalelani. Umuntfu lotsite waphuma wayohlanyela.+ 4 Njengobe ahlanyela, lenye inhlanyelo yawela eceleni kwendlela, tinyoni teta tayidla. 5 Lenye yawela emadvwaleni lapho bekute khona umhlabatsi lowenele, ngako yasheshe yamila.+ 6 Kodvwa kwatsi nakuphuma lilanga yasha, futsi yabuna ngobe timphandze tayo betingakajuli. 7 Lenye inhlanyelo yawela emanyeveni, lamanyeva akhula ase ayayiminyetela, yangasatseli.+ 8 Kodvwa lenye yawela emhlabatsini lomuhle, yamila futsi yakhula yase icala kutsela titselo, lenye ngalokuphindvwe tikhatsi letingu-30, lenye tikhatsi letingu-60 kantsi lenye tikhatsi letingu-100.”+ 9 Jesu wase utsi: “Lonendlebe levako akeve.”+
10 Kwatsi nasesihambile lesicumbi, labo lebebasele naye nalabaphostoli bakhe labangu-12 bacala kumbuta ngalemifanekiso.+ 11 Watsi kubo: “Nkulunkulu unisitile kutsi nine nicondze timfihlo letingcwele+ teMbuso wakhe, kodvwa laba labanye bacondza ngemifanekiso,+ 12 futsi bayabuka kodvwa ababoni, bayeva kodvwa abacondzi; ngeke baze bagucuke futsi ngeke batsetselelwe.”+ 13 Waphindze watsi kubo: “Njengobe ningawucondzi lomfanekiso, nitayicondza njani-ke leleminye?
14 “Umhlanyeli wahlanyela livi.+ 15 Ngako labo labayinhlanyelo leyawela eceleni kwendlela, ngulabo lokutsi nabeva livi, Sathane afike+ alihlwitse kubo.+ 16 Labo labayinhlanyelo leyawela emadvwaleni ngulabo labatsi ngekushesha nabeva livi balemukele ngenjabulo.+ 17 Kodvwa lisuke lingakatitsintsi tinhlitiyo tabo, nanobe kunjalo bayachubeka sikhashana, bese kutsi ngekushesha nakufika tinhlupheko nobe kuphatfwa kabi ngenca yelivi, bawe ekukholweni. 18 Kukhona nalabo labayinhlanyelo leyawela emanyeveni. Laba ngulabo labalivako livi,+ 19 kodvwa tinkinga talelive,*+ kuyenga kwemcebo+ kanye nekufisa+ tonkhe letinye tintfo kuyefika kuliminyetele, bese alisatseli. 20 Labo-ke labahlanyelwe emhlabatsini lomuhle ngulabo labalilalelako livi futsi balemukele, bese batsela titselo ngalokuphindvwe tikhatsi letingu-30, tikhatsi letingu-60 naletingu-100.”+
21 Wase utsi kubo: “Kuke kwenteke yini kutsi sibane sikhanyiswe bese sibekwa ngephansi kwabhasikidi* nobe ngephansi kwembhedze? Asibekwa yini elutsini lwesibane?+ 22 Kute lokufihliwe lokungeke kwembulwe; futsi kute lokutfukuswe ngekucophelela lokungeke kuphumele ebaleni.+ 23 Nobe ngubani lonendlebe levako akeve.”+
24 Waphindze watsi kubo: “Kunakisiseni loko lenikuvako.+ Ngobe lizinga leninaka ngalo kutawuba ngilo lenitawucondza ngalo, futsi nitawunikwa kucondza lokukhulu. 25 Ngobe loyo locondzako utawentiwa acondze kakhulu,+ kodvwa loyo longacondzi, ngisho naloko lokuncane lakucondzako kutawutsatfwa kuye.”+
26 Wachubeka watsi: “UMbuso waNkulunkulu unjengalapho umuntfu asakata inhlanyelo emhlabatsini. 27 Uyalala ebusuku aphindze avuke ekuseni, lenhlanyelo iyamila futsi ikhule, kodvwa usuke angati kutsi kwenteka njani loko. 28 Umhlabatsi utivetela wona titselo, kucale kube likhaba, bese kuyashakata, ekugcineni kube ngematimba. 29 Nasekuvutsiwe, lomuntfu utsatsa lisikela ayovuna, ngobe sikhatsi sekuvuna sisuke sesifikile.”
30 Jesu wase utsi: “Singawufanisa nani uMbuso waNkulunkulu, futsi ngumuphi umfanekiso lesingawusebentisa kuze siwuchaze? 31 Ufana nenhlanyelo yesinaphi, lehlanyelwa iyincane kunato tonkhe.+ 32 Kodvwa itsi ingamila, iba sihlahla lesikhulu kunato tonkhe futsi ivete emagala lamakhulu, bese tinyoni tiyeta tihlale kuwo.”
33 Ngako bekashumayela kubo asebentisa imifanekiso+ leminyenti lenjengalena, kuye ngaloko lebebangakucondza. 34 Ecinisweni bekangakhulumi nabo ngaphandle kwemifanekiso, kodvwa bekatsi nasekasele nebafundzi bakhe abachazele konkhe babodvwa.+
35 Kwatsi nasekuhwalele watsi kubo: “Asiweleleni ngale ngesheya.”+ 36 Ngako batsi nasebabakhululile labantfu, bagibela sikebhe bahamba, futsi kwakunaletinye tikebhe lapho.+ 37 Kwaba nemoya lomkhulu elwandle, nemagagasi bekamakhulu kangangekutsi sikebhe sacishe sacwila.+ 38 Kodvwa Jesu abengemuva alele emcamelweni. Ngako bamvusa batsi kuye: “Mfundzisi, awuboni yini kutsi siyafa?” 39 Ngako wavuka wawekhuta lomoya, wase utsi kulolwandle: “Thula utsi dvu!”+ Lomoya wabindza, kwase kuba nekuthula lokukhulu. 40 Ngako watsi kubo: “Kungani nesaba? Nisengakakholwa nanyalo?” 41 Kodvwa bona besaba kakhulu, futsi babutana batsi: “Kantsi ngubani lona? Ngobe ngisho nemoya nelwandle kuyamlalela!”+