Khristu Ungemandla ANkulunkulu

 1. Kungani Pawula atsi ‘Khristu ungemandla . . . aNkulunkulu’?

JEHOVA wasebentisa Jesu Khristu kute akhombise emandla akhe ngetindlela letimangalisako. Ngesikhatsi Jesu asemhlabeni, wenta timangaliso. Singafundza ngaletinye tato eBhayibhelini, futsi tingacinisa kukholwa kwetfu. (Matewu 9:35; Lukha 9:11) Jehova waniketa Jesu emandla lamakhulu, kungako umphostoli Pawula atsi: ‘Khristu ungemandla . . . aNkulunkulu.’ (1 Khorinte 1:24) Kodvwa timangaliso taJesu tisitsintsa njani?

 2. Yini lesingayifundza etimangalisweni taJesu?

² Umphostoli Phetro watsi Jesu wenta ‘timangaliso.’ (Imisebenti 2:22) Letimangaliso tisifundzisani? Tisifundzisa ngaloko Jesu latakwenta ngesikhatsi seKubusa kwakhe Kweminyaka Leyinkhulungwane. Ngaleso sikhatsi, utawenta timangaliso letinkhulu kakhulu letitawuzuzisa bonkhe bantfu emhlabeni. Timangaliso takhe tiphindze tisisite kutsi sibucondze kabanti bunguye bakhe kanye nebeYise. Kulesihloko, sitawucoca ngetimangaliso taJesu letintsatfu futsi sifundze kutsi tingasitsintsa njani lamuhla nasesikhatsini lesitako.

 3. (a) Kungani Jesu enta simangaliso sakhe sekucala? (b) Ngesikhatsi aseKhana, Jesu wakhombisa njani kutsi uyephana?

³ Jesu wenta simangaliso sakhe sekucala emshadweni lobewusedolobheni laseKhana. Nanobe singati kutsi kwakwentekeni, kodvwa liwayini belingasateneli timenywa lebetikhona. Loku bekungabadlisa emahloni bomakoti nemkhwenyane ngobe bekungumtfwalo wabo kwemukela letivakashi. Mariya unina waJesu abengulesinye saletimenywa. Ngesikhatsi acela lusito kuJesu, abekholwa yini kutsi unemandla ekubasita? Kungenteka kutsi Mariya wazindla ngato tonkhe tiphrofetho lebetimayelana nendvodzana yakhe, futsi bekati kutsi beyitawubitwa ngekutsi “yiNdvodzana yaLosetikwako Konkhe.” (Lukha 1:30-32; 2:52) Kuyacaca kutsi boMariya naJesu bebanesifiso sekusita laba labashadako. Ngako Jesu wenta simangaliso, wagucula emanti langaba ngemalitha langu-380 aba “liwayini lelimnandzi.” (Fundza Johane 2:3, 6-11.) Jesu bekabophekile yini kutsi ente lesimangaliso? Cha. Wasenta ngobe abebakhatsalela bantfu futsi abelingisa uYise lowephanako.

4, 5. (a) Simangaliso saJesu sekucala sisifundzisani? (b) Simangaliso lesenteka eKhana sisifundzisani mayelana nelikusasa?

⁴ Ngalokusimangaliso, Jesu wenta liwayini lelinyenti lelimnandzi, lebelingenela bantfu labanyenti. Uyabona yini kutsi lesimangaliso sisifundzisani? Sisifundzisa kutsi boJehova naJesu bephana kakhulu. Lesimangaliso sisenta siciniseke kutsi bayikhatsalela kakhulu indlela bantfu labativa ngayo. Siphindze sivete nekutsi Jehova utawusebentisa emandla akhe kute kube nenala yekudla emhlabeni lomusha, ngisho nobe sikuphi nendzawo.​—Fundza Isaya 25:6.

⁵ Ase ucabange nje ngaloku! Ngekushesha Jehova utasinika konkhe lesikudzingako mbamba. Umuntfu ngamunye utawuba nelikhaya lelihle nekudla lokumnandzi. Sijabula kakhulu nasicabanga ngato tonkhe tintfo letinhle Jehova latasipha tona emhlabeni loliPharadisi.

 6. Jesu abewasebentisa njani emandla akhe, futsi singamlingisa njani?

⁶ Jesu akazange asebentise emandla akhe ngebugovu. Cabanga ngaloko lokwenteka ngesikhatsi Develi alinga Jesu kutsi ashintje ematje abe tinkhwa. Jesu akazange avume kusebentisa emandla akhe kuze kusitakale yena. (Matewu 4:2-4) Kodvwa abetimisele kusebentisa emandla akhe kute asite labanye. Endzabeni yekubabete bugovu, singamlingisa njani Jesu? Jesu watsi kufanele ‘siphe labanye.’ (Lukha 6:38) Loku singakwenta ngekumema labanye emakhaya etfu kutsi badle natsi. Singaphindze sitinike sikhatsi ngemuva kwemihlangano kute sisite lotsite, njengekutsi silalele umzalwane nakaphrakthiza inkhulumo yakhe. Singasita labanye emsebentini wekushumayela futsi sibaceceshe. Nangabe sihlale sitimisele kusita labanye, sisuke silingisa kwephana kwaJesu.

 7. Nguyiphi inkinga letawuhlale ikhona kulelive laSathane?

⁷ Buphuya buyinkinga lesolo ikhona emhlabeni. Jehova watjela ema-Israyeli kutsi “bantfu labamphofu bayawuhlala bakhona njalo nje eveni.” (Dutheronomi 15:11) Emakhulwini eminyaka ngemuva kwaloko, Jesu watsi: “Bantfu labeswele nihlale ninabo.” (Matewu 26:11) Jesu bekasho kutsi bantfu labeswele batawuhlala bakhona yini emhlabeni? Cha, bekasho kutsi buphuya butawuhlale bukhona yingci nje nasisaphila kulelive laSathane. Emhlabeni lomusha, simo sitawehluka kakhulu! Ngaleso sikhatsi, buphuya ngeke buphindze bube khona. Bonkhe bantfu batawuba nenala yekudla futsi benetiseke!

8, 9. (a) Kungani Jesu ondla tinkhulungwane tebantfu? (b) Utiva njani ngalesimangaliso?

⁸ Umhlabeli wakhuluma ngaJehova watsi: “Uvula sandla sakho, wesutsise tonkhe tifiso talokuphilako.” (Tihlabelelo 145:16) Ngesikhatsi Jesu asemhlabeni, wamlingisa ngalokuphelele uYise futsi abehlale atikhatsalela tidzingo talabanye. Loko akakwentanga ngobe afuna kukhombisa kutsi unemandla. Abebakhatsalela mbamba bantfu. Asesicoce ngaMatewu 14:14-21. (Fundza.) Sicumbi sebantfu besilandzele Jesu ngetinyawo sisuka kulamanye emadolobha. (Matewu 14:13) Naselishonile, bafundzi bebakhatsateke ngekutsi labantfu besebalambile futsi badziniwe. Ngako bacela Jesu kutsi abatjele bahambe bayewutitsengela kudla. Abetawenta njani Jesu?

⁹ Asebentisa tinkhwa letisihlanu netinhlanti letimbili, Jesu wondla emadvodza langaba ngu-5 000 kanye nebafati nebantfwana. Kungani Jesu enta lesimangaliso? Kungobe abebatsandza mbamba bantfu futsi abakhatsalela. Kubonakala shengatsi Jesu wenta kudla lokunyenti ngobe lesicumbi ‘sadla sesutsa.’ Lokudla bekutawubaniketa emandla lebebawadzinga kuze batsatse luhambo loludze lwekubuyela emakhaya. (Lukha 9:10-17) Ngemuva kwekutsi bonkhe sebadle besutsa, bafundzi babutsa kudla lobekusele, kwagcwala bobhasikidi labangu-12.

10. Yini letawenteka ngebuphuya esikhatsini lesitako?

¹⁰ Ngenca yekutsi babusi banebugovu futsi bakhohlakele, tigidzi tebantfu teswele. Ngisho nalabanye bazalwane betfu abakutfoli kudla lokwenele. Kodvwa masinyane, bantfu labalalela Jehova batawuphila emhlabeni lote kukhohlakala nobe buphuya. Jehova unguNkulunkulu longusomandla, futsi unemandla nesifiso sekwenetisa tidzingo tabo bonkhe bantfu. Wetsembisa kucedza kuhlupheka ngekushesha!​—Fundza Tihlabelelo 72:16.

11. Yini lekwenta uciniseke kutsi ngekushesha Khristu utawusebentisa emandla akhe emhlabeni wonkhe, futsi loko kukukhutsata kutsi wenteni?

¹¹ Ngesikhatsi Jesu asemhlabeni, wenta timangaliso endzaweni lencane iminyaka lemitsatfu nehhafu nje kuphela. (Matewu 15:24) Kodvwa njengobe ayiNkhosi, Jesu utawusita bonkhe bantfu ngesikhatsi seKubusa kwakhe Kweminyaka Leyinkhulungwane. (Tihlabelelo 72:8) Timangaliso taJesu tisenta siciniseke kutsi ufuna kusebentisa emandla akhe kute kuzuze tsine. Nanobe site emandla ekwenta timangaliso, yini lesingayenta? Singasebentisa sikhatsi setfu nemandla etfu kute sitjele labanye ngelikusasa lelihle leletsenjiswe eBhayibhelini. Ngulowo umsebenti lesinawo njengobe siBoFakazi BaJehova. (Roma 1:14, 15) Kuzindla ngaloko Khristu latakwenta ngekushesha, kutasenta sitimisele kutjela labanye ngako.​—Tihlabelelo 45:1; 49:3.

12. Yini lengasenta siciniseke kutsi Jesu uticondza kahle tintfo letisemhlabeni?

¹² Ngesikhatsi Nkulunkulu adala umhlaba nako konkhe lokukuwo, Jesu ‘abeseceleni kwakhe, njengengcweti yekwakha.’ (Taga 8:22, 30, 31; Kholose 1:15-17) Ngako Jesu uticondza kahle tintfo letisemhlabeni. Uyakwati kusebentisa emandla emvelo aphindze awalawule.

13, 14. Shano sibonelo sendlela Khristu langawalawula ngayo emandla emvelo.

¹³ Ngesikhatsi Jesu asemhlabeni, wakhombisa kutsi unemandla lavela kuNkulunkulu ngekutsi alawule emandla emvelo. Sibonelo saloku, yindlela lathulisa ngayo umoya lomkhulu. (Fundza Makho 4:37-39.) Lesinye sati seliBhayibheli sitsi ligama lesiGriki lelitsi ‘umoya lomkhulu’ lelisetjentiswe kuMakho lichaza sivunguvungu lesikhulu nobe siphepho. Lisho siphepho lesihambisana nemafu lamnyama tsu, umoya lomkhulu, imibane netikhukhula. Sitsi nasiphela kube konakele yonkhe intfo. Umphostoli Matewu wachaza lesiphepho ngekutsi “sivunguvungu lesikhulu.”​—Matewu 8:24.

¹⁴ Ase ucabange ngaloko lokwenteka: Emagagasi abeshaya sikebhe futsi emanti angena angenile kuso. Nanobe bekunemsindvo wesivunguvungu newesikebhe lesiya lena nalena, Jesu abelele ngobe abedziniwe. Kodvwa bafundzi besaba kakhulu, ngako bamvusa futsi batsi: “Siyafa!” (Matewu 8:25) Yini Jesu layenta? Wavuka futsi wekhuta umoya nelwandle watsi: “Thula utsi nya!” (Makho 4:39) Lesivunguvungu lesikhulu saphela futsi ‘kwaba nekuthula lokukhulu.’ Lesi sibonelo lesimangalisako semandla Jesu lanawo ekulawula emandla emvelo.

15. Jehova ukhombise njani kutsi uyakwati kulawula emandla emvelo?

¹⁵ Emandla Khristu lanawo avela kuJehova, ngako siyati kutsi Nkulunkulu longuSomandla angawalawula emandla emvelo. Sibonelo saloku kutsi ngaphambi kwaZamcolo, Jehova watsi: ‘Emvakwemalanga lasikhombisa kusukela lamuhla ngitawutfumela imvula emhlabeni, emalanga langu-40 nebusuku bawo.’ (Genesisi 7:4) Eksodusi 14:21 naye utsi: “[Jehova] wakhweshisa emanti elwandle ngemoya lonemandla wasemphumalanga.” Jona 1:4 utsi: “[Jehova] watfumela umoya lomkhulu elwandle, kwaba nesivunguvungu lesikhulu kangangekutsi umkhumbi wabasengotini yekwephuka.” Kusijabulisa kakhulu kwati kutsi emhlabeni lomusha Jehova utawuhlale awalawula emandla emvelo.

16. Kungani kusidvudvuta kwati kutsi Jehova naJesu bayakwati kulawula emandla emvelo?

¹⁶ Kuyasidvudvuta kwati kutsi Jehova naJesu bayakwati kulawula emandla emvelo. Ngesikhatsi seKubusa KwaKhristu Kweminyaka Leyinkhulungwane, bonkhe bantfu labahlala emhlabeni batawube baphephile. Kute umuntfu lotawulimala nobe abulawe tehlakalo temvelo letifaka ekhatsi tiphepho letinemandla, ema-tsunami, tintsabamlilo, nobe kutamatama kwemhlaba. Ngeke sisatesaba tehlakalo ngobe “lithende laNkulunkulu” litawube linebantfu. (Sembulo 21:3, 4) Singaciniseka kutsi Jehova utawenta Jesu kutsi alawule emandla emvelo ngesikhatsi seKubusa kwakhe Kweminyaka Leyinkhulungwane.

17. Nguyiphi lenye indlela lesingamlingisa ngayo Nkulunkulu naKhristu nyalo?

¹⁷ Kuliciniso kutsi ngeke sikhone kuvimba tehlakalo temvelo. NguJehova naJesu kuphela labangenta loko. Kodvwa natsi kukhona lesingakwenta. Singasebentisa loko lokushiwo Taga 3:27. (Fundza.) Nangabe bazalwane betfu bahluphekile, singabasita ngekunakekela tidzingo tabo tenyama netemivelo, futsi sibadvudvute. (Taga 17:17) Nasi sibonelo: Singabasita nangabe kube nesehlakalo semvelo. Lomunye umfelokati lowapheshukelwa likhaya lakhe ngemuva kwesiphepho watsi: “Ngijabula kakhulu ngekuba senhlanganweni yaJehova, hhayi ngobe nje ngisitwa ngetintfo tenyama kodvwa nangenca yekutsi ngisitwa ebuhlotjeni bami naNkulunkulu.” Lomunye dzadze longakashadi wativa aphelelwe litsemba ngesikhatsi sivunguvungu siphephule likhaya lakhe. Ngemuva kwekutsi bazalwane balivusetele, watsi: “Angikhoni nekuyichaza indlela lengitiva ngayo!” Wachubeka watsi: “Ngiyabonga Jehova!” Kuyasijabulisa kwati kutsi bazalwane nabodzadze wetfu batikhatsalela mbamba tidzingo talabanye. Ngetulu kwaloko, siyajabula ngekutsi Jehova naJesu Khristu basikhatsalela mbamba.

18. Yini lekujabulisako ngesizatfu sekutsi Jesu ente timangaliso?

¹⁸ Ngesikhatsi asemsebentini wakhe, Jesu wakhombisa kutsi ‘ungemandla . . . aNkulunkulu.’ Kodvwa emandla akhe akazange awasebentisele kujabulisa bantfu nobe kutizuzisa yena. Esikhundleni saloko, emandla akhe ekwenta timangaliso abewasebentisa ngobe abebatsandza mbamba bantfu. Sitawufundza kabanti ngaloku esihlokweni lesilandzelako.