Kulandzisa KwaMatewu
13 Ngalelolanga, Jesu waphuma endlini futsi wayohlala ngaselwandle. 2 Sicumbi lesikhulu sebantfu seta kuye, wase ugibela esikebheni wahlala phansi, futsi bonkhe labantfu bebeme esihlabatsini saselwandle.+ 3 Wasebentisa imifanekiso+ kute abafundzise tintfo letinyenti, watsi: “Umuntfu lotsite waphuma wayohlanyela.+ 4 Njengobe ahlanyela, lenye inhlanyelo yawela eceleni kwendlela, tinyoni tefika tayidla.+ 5 Lenye yawela emadvwaleni lapho bekute khona umhlabatsi lowenele, ngako yasheshe yamila.+ 6 Kodvwa kwatsi nakuphuma lilanga yasha, futsi yabuna ngobe timphandze tayo betingakajuli. 7 Lenye yawela emanyeveni, lamanyeva akhula ase ayayiminyetela.+ 8 Lenye yawela emhlabatsini lomuhle, yase icala kutsela titselo, lenye yatsela tikhatsi letiphindvwe kangu-100, lenye kangu-60 kantsi lenye kangu-30.+ 9 Lonendlebe akeve.”+
10 Bafundzi beta kuye bafike batsi: “Ukhulumelani nabo ngemifanekiso?”+ 11 Wabaphendvula watsi: “Nkulunkulu unisitile kutsi nicondze timfihlo letingcwele+ teMbuso wemazulu, kodvwa labantfu abakalutfoli lolusito. 12 Ngobe loyo lonekucondza utawunikwa kucondza lokukhulu, kantsi loyo lote kucondza, utakwemukwa ngisho naloko lasavele anako.+ 13 Kungako-ke ngikhuluma nabo ngemifanekiso ngobe bayabuka kodvwa ababoni, bayeva kodvwa abenti, futsi abacondzi.+ 14 Kubo kugcwaliseka siphrofetho sa-Isaya lesitsi: ‘Niyawukuva kodvwa ngeke nicondze, futsi niyawubuka kodvwa ngeke nibone.+ 15 Ngobe tinhlitiyo talabantfu setibe lukhuni, tindlebe tabo tiyeva kodvwa abenti, futsi bacimetile; ababoni ngemehlo abo, abeva ngetindlebe tabo, tinhlitiyo tabo aticondzi futsi abagucuki kuze mine ngibaphilise.’+
16 “Kodvwa-ke, nine niyajabula ngenca yekutsi emehlo enu ayabona, netindlebe tenu tiyeva.+ 17 Ngobe ngicinisile ngitsi kini: Baphrofethi labanyenti kanye nemadvodza lamanyenti lalungile bebafisa kutibona letintfo lenitibonako kodvwa abazange batibone,+ bebafisa nekutiva letintfo lenitivako kodvwa abazange bative.
18 “Naku lokushiwo ngumfanekiso wemuntfu lowahlanyela.+ 19 Nangabe umuntfu eva livi lelimayelana neMbuso kodvwa angalicondzi, lomubi+ uyefika alihlwitse enhlitiyweni yakhe; lena-ke ngulenhlanyelo leyawela eceleni kwendlela.+ 20 Inhlanyelo leyawela emadvwaleni, ngulabo labatsi bangeva livi balemukele ngenjabulo.+ 21 Kodvwa basuke bete timphandze letijulile etinhlitiyweni tabo, nanobe kunjalo bayachubeka sikhashana bese kutsi nakufika kuhlupheka nobe kuphatfwa kabi ngenca yekukholwa kwabo, bawe ekukholweni. 22 Lena leyawela emanyeveni, ngulabo labalivako livi kodvwa tinkinga talelive*+ kanye nekuyenga kwemcebo kuliminyetele bese alisatseli.+ 23 Kodvwa leyo leyawela emhlabatsini lomuhle, ngulabo labalivako livi balicondze, bese batsela titselo, lomunye atsele tikhatsi letiphindvwe kangu-100, lomunye kangu-60, kantsi lomunye kangu-30.”+
24 Wabatjela lomunye umfanekiso watsi: “UMbuso wemazulu unjengemuntfu lowahlanyela inhlanyelo lenhle ensimini yakhe. 25 Kwatsi bantfu baselele, sitsa sakhe sefika sahlanyela lukhula emkhatsini wakolo, sabese siyahamba. 26 Nalikhula likhaba futsi selitsela, nelukhula lwase luyabonakala. 27 Ngako tisebenti talomuntfu teta kuye tafike tatsi: ‘Mnumzane, bewungakahlanyeli yini inhlanyelo lenhle ensimini yakho? Kwentiwa yini-ke kutsi kube nelukhula?’ 28 Watsi kuto: ‘Loku kwentiwe sitsa.’+ Tona tatsi kuye: ‘Uyafuna yini sihambe siyewuliziphuna?’ 29 Watiphendvula watsi: ‘Cha ningayi, kuze kungenteki kutsi naniziphuna lukhula bese niziphuna nakolo. 30 Kuyekeleni kukhule kanye kanye kute kufike sikhatsi sekuvuna, ngaleso sikhatsi ngitawutjela bavuni ngitsi: Calani nibutse lukhula nilubophe lube tinyandza bese niyalushisa; ngemuva kwaloko nibutse kolo niwufake enyangweni.’”+
31 Waphindze wabatjela lomunye umfanekiso watsi: “UMbuso wemazulu ufana nenhlanyelo yesinaphi, leyatsatfwa ngumuntfu wayihlanyela ensimini yakhe.+ 32 Lena yinhlanyelo lencane kunato tonkhe, kodvwa nayikhula yendlula konkhe lokuhlanyelwako futsi iba sihlahla, bese tinyoni tiyeta tihlale emagaleni aso.”
33 Wabese ubatjela nalomunye umfanekiso, watsi: “UMbuso wemazulu ufana nesibiliso umfati lasitsatsa wasihlanganisa nafulaha lomnyenti,* yaze yabila yonkhe inhlama.”+
34 Jesu wakhuluma tonkhe letintfo kulesicumbi asebentisa imifanekiso. Ecinisweni bekangakhulumi nabo ngaphandle kwemifanekiso,+ 35 kuze kugcwaliseke loko lokwakhulunywa ngumphrofethi, lowatsi: “Ngiyawuvula umlomo wami ngemifanekiso; ngiyawusho tintfo lebetifihlekile kusukela ekucaleni.”*+
36 Ngemuva kwekukhulula labantfu, wabuyela endlini. Bafundzi bakhe beta kuye batsi: “Sichazele umfanekiso welukhula lolusensimini.” 37 Watsi kubo: “Lomhlanyeli lowahlanyela inhlanyelo lenhle, yiNdvodzana yemuntfu; 38 insimu ngulomhlaba+ bese kutsi inhlanyelo lenhle, ngemadvodzana eMbuso. Lukhula ngemadvodzana alomubi,+ 39 sitsa lesaluhlanyela nguDeveli. Kuvuna kuphela kwalelive,* kantsi bavuni tingilosi. 40 Ngako njengobe lukhula lubutfwa bese lushiswa ngemlilo, kuyoba njalo nasekupheleni kwalelive.*+ 41 INdvodzana yemuntfu iyawutfumela tingilosi tayo, futsi tiyawukhipha eMbusweni wayo tonkhe tintfo letibangela bantfu kutsi bone, tikhiphe nalabo labenta lokubi, 42 bese tibajika emlilweni lowesabekako.+ Kulapho labayawufikelwa khona kukhala nekugedletela kwematinyo. 43 Ngaleso sikhatsi, labalungile bayawukhanya njengelilanga+ eMbusweni waBabe wabo. Lonendlebe akeve.
44 “UMbuso wemazulu ufana nemcebo lofihlwe ensimini, umuntfu lawutfola wase uyawufihla, futsi ngenca yekutsi abejabulile, wahamba watsengisa konkhe lanako wase utsenga leyo nsimu.+
45 “UMbuso wemazulu uphindze ufane nemtsengisi lohamba etindzaweni letehlukene afuna ematje laligugu. 46 Utsi ngekutfola litje linye lelidulile, ahambe futsi ngekushesha atsengise konkhe lanako bese uyalitsenga.+
47 “UMbuso wemazulu unjengelinethi lelijikwa elwandle kute libambe tonkhe tinhlobo tetinhlanti. 48 Naseligcwele, badwebi balidvonsela elugwini bese bahlala phansi kute bakhiphe tinhlanti letinhle+ batifake etitjeni, bese leto letimbi+ batilahle. 49 Kuyawuba njalo nasekupheleni kwalelive.* Tingilosi tiyawukwehlukanisa bantfu lababi kulabalungile, 50 bese kutsi lababi tibajike emlilweni lowesabekako. Kulapho labatawufikelwa khona kukhala nekugedletela kwematinyo.
51 “Niyakucondza yini konkhe loku?” Bamphendvula batsi: “Yebo siyakucondza.” 52 Ngako watsi kubo: “Nakunjalo-ke, wonkhe umfundzisi lofundziswa ngeMbuso wemazulu ufana nemnikati wemuti lokhipha tintfo letinsha naletindzala emcebweni wakhe.”
53 Nasekacedzile Jesu kusho yonkhe lemifanekiso, wesuka lapho. 54 Ngemuva kwekufika endzaweni yakubo,+ wafundzisa emasinagogeni futsi bantfu bamangala, batsi: “Lomuntfu ukutsetsephi lokuhlakanipha nalamandla ekwenta letimangaliso?+ 55 Akasiyo yini indvodzana yembati,+ namake wakhe akusuye yini Mariya? Bomnakabo akusibo yini boJakobe, Josefa, Simoni, naJudasi?+ 56 Bodzadzewabo abahlali yini natsi lana? Pho utitsatsaphi tonkhe letintfo?”+ 57 Ngako bamcansukela.+ Kodvwa Jesu watsi kubo: “Umphrofethi uyemukelwa kuto tonkhe tindzawo ngaphandle kwasendzaweni yakubo nasekhaya kubo.”+ 58 Ngako akazange ente timangaliso letinyenti lapho ngenca yekungakholwa kwabo.