‘Labalungile Bayawukhanya Njengelilanga’

“Lapho bantfu baNkulunkulu bayawukhanya njengelilanga embusweni weYise.”—MAT. 13:43.

 1. Jesu wasebentisa imifanekiso kute achaze tiphi tingoni letehlukahlukene teMbuso?

JESU KHRISTU wasebentisa imifanekiso leminyenti kute acacise tingoni letehlukahlukene teMbuso. ‘Wakhuluma eticukwini ngemifanekiso. Ngaphandle kwemifanekiso kute lakukhuluma kuto.’ (Mat. 13:34) Emfanekisweni wakhe lomayelana nekuhlanyela imbewu yeliciniso leMbuso, Jesu wagcizelela indzima yesimo senhlitiyo yemuntfu ekwemukeleni umlayeto wembuso, kanye nendzima yaJehova ekukhuleni kwaleyo nhlanyelo ngakamoya. (Mak. 4:3-9, 26-29) Jesu waphindze wafanekisa kwandza lokumangalisako kwebantfu labalalela umlayeto weMbuso ngisho nobe loko kwandza ekucaleni kungabonakali ngelizinga lelisetulu. (Mat. 13:31-33) Ngetulu kwaloko, waveta kutsi akusibo bonkhe labalalela lomyaleto weMbuso labakulungele kungena kuwo.—Mat. 13:47-50.a

 2. Emfanekisweni waJesu wemabele nelukhula, inhlanyelo lenhle ifanekiselani?

² Nobe kunjalo, lomunye umfanekiso waJesu ukhuluma ngekubutfwa kwalabo labayawubusa naye eMbusweni wakhe. Lomfanekiso uvamise kubitwa ngekutsi ngumfanekiso wemabele nelukhula, utfolakala encwadzini yaMatewu sehluko 13. Kulomunye umfanekiso, Jesu usitjela kutsi lenhlanyelo lehlanyelwako “livi lembuso,” kulomfanekiso, usitjela kutsi inhlanyelo lenhle imelela lokutsite lokwehlukile—“bantfwana bembuso.” (Mat. 13:19, 38) Laba ngibo lababusako, kutsiwa “bantfwana,” nobe tindlalifa teMbuso.—Rom. 8:14-17; fundza Galathiya 4:6, 7.

Umfanekiso Wemabele Nelukhula

 3. Asewuchaze inkinga indvodza lokukhulunywa ngayo kulomfanekiso leyabhekana nayo, nendlela leyayicatulula ngayo.

³ Lomfanekiso utsi: “Umbuso welizulu ufanana nendvodza leyahamba yayawuhlanyela inhlanyelo lenhle ensimini yayo. Kepha ebusuku, bantfu sebalele bonkhe, kwefika sitsa sayo sahlanyela lukhula emkhatsini walamabele, sesuka sahamba. Latsi kube likhule likhaba litsele titselo, kwase kubonakala lukhula. Tisebenti talendvodza teta kuyo tatsi: ‘Mnumzane, njengobe wawuhlanyele inhlanyelo lenhle ensimini yakho, pho, lolukhula luphumaphi?’ Lendvodza yaphendvula yatsi: ‘Loko kwentiwa sitsa.’ Tase tiyabuta titsi: ‘Uyafuna yini siyeluzuphuna lolukhula?’ Kodvwa yena watsi: ‘Cha, ngobe nitawutsi nizuphuna lukhula, kantsi senizuphuna nalamabele. Yekelani nje kukhule kokubili ndzawonye, kuze kube sikhatsi sekuvuna, kuvunwe; nasekuvunwa ngitawutjela labavunako kutsi babutse lukhula kucala, balubophe ticumbi, kuze lutewushiswa; bese-ke nibutsela emabele ndzawonye esiteni sami.’”—Mat. 13:24-30.

 4. (a) Ngubani lendvodza lokukhulunywa ngayo kulomfanekiso? (b) Jesu wacala nini futsi njani kuhlanyela lenhlanyelo?

⁴ Ngubani lendvodza leyahlanyela lenhlanyelo lenhle ensimini yayo? Imphendvulo siyitfola emavini Jesu lawasho kamuva nakacacisa lendzaba kubafundzi bakhe: “Lona lowahlanyela inhlanyelo lenhle yiNdvodzana yeMuntfu.” (Mat. 13:37) Ngalesikhatsi acitsa iminyaka lemitsatfu nencenye emsebentini wakhe wekushumayela lapha emhlabeni, Jesu, ‘iNdvodzana yeMuntfu’ abelungiselela lensimi kute ihlanyelwe. (Mat. 8:20; 25:31; 26:64) Kusukela ngeliPhentekhoste ngemnyaka wanga 33 C.E. kuchubeke, wacala kuhlanyela lenhlanyelo lenhle—“bantfwana bembuso.” Lokuhlanyela kwacala ngalesikhatsi Jesu, lincusa laJehova, acala kutfululela umoya longcwele kubafundzi, ngekwenta njalo abebagcoba njengemadvodzana aNkulunkulu.b (Imis. 2:33) Lenhlanyelo lenhle yakhula yate yaba ngemabele lavutsiwe. Ngako-ke, sizatfu lesibalulekile sekuhlanyela inhlanyelo lenhle, kutsi kubutfwe labo labayawuba tindlalifa kanye nebabusi naJesu eMbusweni wakhe bate bafinyelele enanini lelifanele.

 5. Simelela bani sitsa kulomfanekiso, futsi lukhula lufanekisela bobani?

⁵ Ngubani lesitsa, futsi lukhula lumelela bobani? Jesu usitjela kutsi lesitsa ‘nguLomubi [Develi].’ Lukhula luchazwa ngekutsi “bantfwana baLomubi.” (Mat. 13:25, 38, 39) Lolukhula abekhuluma ngalo Jesu lungushevu, lucishe lufanane nemabele nalusakhula lusengakavutfwa. Loku kufanana kahle nalabo labatenta shengatsi babantfwana beMbuso kodvwa babe bangatseli titselo letinhle. LamaKhristu mbumbulu latsi abalandzeli baKhristu, ecinisweni ayincenye ‘yenhlanyelo’ yaSathane Develi.—Gen. 3:15.

 6. Lacala nini kubonakala lukhula, futsi bantfu ‘bebalele’ ngamuphi umcondvo ngaleso sikhatsi?

⁶ LamaKhristu lafanana nelukhula acala nini kubonakala? Jesu utsi: “Bantfu sebalele bonkhe.” (Mat. 13:25) Bekungunini ngaleso sikhatsi? Imphendvulo siyitfola emavini emphostoli Pawula lawabhalela labadzala belibandla lase-Efesu: “Ngiyati kutsi emvakwekuhamba kwami timphisi letesabekako tiyawufika emkhatsini wenu tihlasele tilimate umhlambi wetimvu. Emkhatsini wenu kuyawuvela bantfu labayawufundzisa lokuphambene neliciniso badvonse emakholwa lamanyenti alandzele bona.” (Imis. 20:29, 30) Wachubeka ayala labazalwane labadzala kutsi bahlale baphapheme ngakamoya. Ngemuva kwekufa kwebaphostoli labebavimbela kuhlubuka, lamanyenti emaKhristu ehlisa emandla ekukhonteni Nkulunkulu. (Fundza 2 Thesalonika 2:3, 6-8.) Kuhlubuka lokukhulu kwacala ngaleso sikhatsi ebandleni lebuKhristu.

 7. Lamanye emabele agucuka aba lukhula yini? Chaza.

⁷ Jesu akashongo kutsi emabele atawuba lukhula, kodvwa watsi lukhula lwahlanyelwa emkhatsini wemabele. Ngako-ke, lomfanekiso awukhulumi ngemaKhristu lahlubuka ekukhonteni kweliciniso. Kunaloko, ukhuluma ngaloko lokwentiwa nguSathane lowadvunga libandla lebuKhristu futsi walibangela kutsi libe nebantfu lababi. Ngalesikhatsi umphostoli wekugcina Johane asakhulile, kwase kuvele kunalabanyenti bafundisi bemanga, bafundzisa timfundziso temanga letingasilo liciniso.—2 Phet. 2:1-3; 1 Joh. 2:18.

‘Kuyekeleni Kukhule Kokubili Ndzawonye Kuze Kube Sikhatsi Sekuvuna’

8, 9. (a) Kungani umyalo weNkhosi etisebentini tayo wevakala unengcondvo etilalelini taJesu? (b) Ekugcwalisekeni kwalomfanekiso, kwenteka njani kutsi lukhula lukhule ndzawonye nemabele?

⁸ Tisebenti teNkhosi tiyayitjela ngalenkinga futsi tiyayibuta: “Uyafuna yini siyeluzuphuna lolukhula?” (Mat. 13:27, 28) Imphendvulo yakhe ingevakala imangalisa. Utsi abayekele emabele kanye nelukhula kukhule ndzawonye kuze kube sikhatsi sekuvuna. Kubafundzi baJesu lomyalo wawuvakala unengcondvo. Bebacaphela kutsi kumatima kangakanani kwehlukanisa emkhatsini wemabele kanye nelukhula lolungushevu. Labo labanelwati ngetekulima bayati kutsi loluhlobo lwelukhula lunetimphandze letibambana kakhulu netimphandze temabele.c Kungaleso sizatfu iNkhosi ibayala kutsi balindze!

⁹ Ngendlela lefananako, kuwo onkhe emakhulu eminyaka, timfundziso letehlukahlukene tetinkholo teBukholwa tivete lukhula lolukhulu—kwekucala emasontfweni emaRoma Katolika newema-Orthodox, ngemuva kwesikhatsi kwase kuba semacenjini emaPhrotestani. Ngesikhatsi lesifananako, inhlanyelo yemabele yahlanyelwa emhlabeni wonkhe. Umnikati wemuti kulomfanekiso watinika sikhatsi sekulindza ekhatsi nalesikhatsi sekukhula kwenhlanyelo kwaze kwefika sikhatsi sekuvuna.

Sikhatsi Sekuvuna Lebesisolo Silindziwe

10, 11. (a) Sinini sikhatsi sekuvuna? (b) Emabele langumfanekiso aletfwa njani endlini yaJehova?

¹⁰ Jesu uyasitjela: “Kuvuna kusho siphetfo saletikhatsi, bavuni-ke tingilosi.” (Mat. 13:39) Kulamalanga ekugcina aletikhatsi letimbi, kwentiwa umsebenti wekwehlukanisa—kubutfwa bantfwana beMbuso behlukaniswe kunobe ngubaphi labafanana nelukhula. Mayelana naloku umphostoli Phetro uyasitjela: “Ngobe sesifikile sikhatsi sekwehlulela kutsi kucale kubendlu yaNkulunkulu; kepha nakucala kitsi, pho, siyawuba njani siphetfo salabo labangalaleli liVangeli laNkulunkulu?”—1 Phet. 4:17.

¹¹ Ngemuva nje kwekucala kwemalanga ekugcina, nobe “siphetfo saletikhatsi,” kwehlulela kwacala kulabo labatsi bangemaKhristu eliciniso—akunadzaba kutsi ‘bebabantfwana beMbuso’ yini vele nobe “bantfwana baLomubi.” “Kwacala” ngekutsi iBhabhulona leNkhulu iwe, ‘kwabese’ kubutfwa bantfwana beMbuso ekucaleni kwekuvuna. (Mat. 13:30) Kodvwa lamabele langumfanekiso aletfwa njani endlini yaJehova lamuhla? Labo labavuniwe baletfwa ebandleni lebuKhristu lelisungulwe kabusha lapho batfola khona umusa waNkulunkulu kanye nesivikelo sakhe, nobe batfole umvuzo wasezulwini.

12. Kuvuna kutsatsa sikhatsi lesidze kangakanani?

¹² Kwehlulela kutsatsa sikhatsi lesidze kangakanani? Jesu watsi kuvuna kusho ‘sikhatsi,’ lokusho kutsi kuchubeka sikhashana lesitsite. (Semb. 14:15, 16) Kwehlulelwa kwemalunga lagcotjiwe kuchubeka kudzimate kube tikhatsi tekuphela. Sitawuchubeka kuze kube sikhatsi lapho bonkhe sebabekwe luphawu.—Semb. 7:1-4.

13. Bantfu labanjengelukhula bakubangela njani kona, futsi bakwenta njani kungabi namtsetfo?

¹³ Bobani labatawukhishwa inyumbazane eMbusweni futsi bakubangela njani kona nekwephula umtsetfo? (Mat. 13:41) Imfundziso yetinkholo teBukholwa lefanana nelukhula, idukise bantfu labanyenti kulamakhulu eminyaka. Loko bakwente ngetimfundziso tabo letingamhloniphi Nkulunkulu, ‘tintfo letibangela bubi,’ letifaka ekhatsi imfundziso yesihogo kanye nemfundziso ledida bantfu yaMtsatfu amunye. Bafundisi labanyenti bawubekele sibonelo lesibi umhlambi ngekuphinga kwabo nelive kanye nangekutiphatsa lokubi. (Jak. 4:4) Ngetulu kwaloko, tinkholo teBukholwa tichubeka tibeketelela kutiphatsa lokubi kwemalunga ato. (Fundza Juda 4.) Ngisho nobe tenta njalo, tichubeka titiveta tibantfu labahle nalabatsandza Nkulunkulu. Ase ucabange kutsi bantfwana beMbuso bajabula kangakanani ngekwehlukaniswa nalabo labafanana nelukhula kanye nasetimfundzisweni tabo letingakalungi naletibangela bubi.

14. Bantfu labanjengelukhula bakhala futsi bawagedletelise njani ematinyo abo?

¹⁴ Bantfu labanjengelukhula bakhala futsi bawagedletelise njani ematinyo abo? (Mat. 13:42) “Bantfwana balomubi” beva buhlungu ngobe “bantfwana bembuso” bembule simo sabo sakamoya lesifanana nashevu. Bakhalela emalunga emasontfo abo langasafuni kubasekela futsi nabo abasakwati kuwalawula.—Fundza Isaya 65:13, 14.

15. Bantfu labafanana nelukhula bashiswa ngemlilo ngamuphi umcondvo?

¹⁵ Lukhula lubutfwa futsi lushiswe ngemlilo ngamuphi umcondvo? (Mat. 13:40) Lapha kukhulunywa ngaloko lokutawugcine kwenteke elukhuleni. Kujikijelwa kwalo emlilweni lowesabekako longumfanekiso kukhombisa kutsi lutawubhujiswa phakadze. (Semb. 20:14; 21:8) LamaKhristu lafanana nelukhula, batentisi, batawucotfulwa ngesikhatsi ‘sekuhlupheka lokukhulu.’—Mat. 24:21.

“Bayawukhanya Njengelilanga”

16, 17. Yini Malakhi layiphrofetha mayelana nelithempeli laNkulunkulu, futsi loku kwacala njani kugcwaliseka?

¹⁶ Ngusiphi sikhatsi labo labanjengemabele ‘labayawukhanya ngaso njengelilanga’? (Mat. 13:43) Mayelana nekuhlantwa kwelithempeli laNkulunkulu, Malakhi waphrofetha: “‘Masinyane loSimakadze [Jehova] lenimfunako uyakuta ethempelini lakhe. Yebo, sitfunywa sesivumelwane lenisifisako siyawufika,’ kusho Simakadze longuSomandla. Kodvwa ngubani nje longamelana nelilanga lekufika kwakhe? Ngubani longema ekubonakaleni kwakhe? Ngobe uyawufanana nemlilo wemcengi nobe nensipho yemgezi. Uyawuhlala njengemcengi nanjengemhlanti wesiliva; uyawuhlanta emaLevi awacenge njengegolide nesiliva. Simakadze uyawuba nemadvodza layawuletsa iminikelo ngekulunga.”—Mal. 3:1-3.

¹⁷ Etikhatsini talamuhla, lesiphrofetho sacala kugcwaliseka nga-1918, ngalesikhatsi Jehova kanye ‘nesitfunywa sesivumelwane,’ Jesu Khristu, ahlola lithempeli lakamoya. Malakhi uphindze asitjele ngaloko lokwenteka ngalesikhatsi sekuphelile kuhlantwa kwelithempeli: “Niyawuphindze niwubone kahle umehluko emkhatsini walabalungile nalabangakalungi, ngisho emkhatsini walabo labakhonta Nkulunkulu nalabo labangamkhonti.” (Mal. 3:18) Kwandza kwemsebenti wekukhutsata labo labebangemaKhristu eliciniso kusikhombisa sikhatsi lokwacala ngaso kuvuna.

18. Yini siphrofetho saDanyela lesatsi itakwenteka esikhatsini setfu?

¹⁸ Umphrofethi Danyela wakhuluma ngemalanga etfu nakabiketela atsi: “Labo labahlakaniphile bayawucwebetela njengekumanyatela kwemazulu nalobo labaholele labanye ekulungeni, bakhanye njengetikhanyeti kuze kube nguphakadze naphakadze.” (Dan. 12:3) Bobani labo labacwebetelako? Abekho labanye ngaphandle kwemaKhristu lagcotjiwe, lanjengemabele sibili Jesu lakhuluma ngawo emfanekisweni wakhe wemabele kanye nelukhula. ‘Kuzuphunwa’ kwalabo labanjengelukhula labatenta emaKhristu, kwabonakala ebaleni ngalesikhatsi sicumbi lesikhulu salabanjengetimvu sikhula. Kutihlanganisa kwaso nensali yema-Israyeli akamoya, kwenta lamalunga eMbuso achubeke akhanya kulelive lelise-shi ebumnyameni.—Zak. 8:23; Mat. 5:14-16; Fil. 2:15.

19, 20. Yini “bantfwana bembuso” labayibuke ngalabovu, futsi sitawucoca ngani esihlokweni lesilandzelako?

¹⁹ Lamuhla, “bantfwana bembuso” bawubuke ngalabovu umvuzo wabo wasezulwini. (Rom. 8:18, 19; 1 Khor. 15:53; Fil. 1:21-24) Njengobe singakefiki leso sikhatsi, kufanele bahlale betsembekile, bachubeke bakhanya futsi behlukile ‘kubantfwana balomubi.’ (Mat. 13:38; Semb. 2:10) Sonkhe siyajabula ngekuba nelilungelo lekubona umphumela walomfanekiso ‘wekuzuphunwa’ kwelukhula esikhatsini setfu!

²⁰ Kodvwa ngubuphi buhlobo lobusekhatsi kwebantfwana beMbuso kanye nesicumbi lesikhulu lesikhulako salabo labanelitsemba lekuphila phakadze emhlabeni njengalabo labatawubuswa nguloMbuso? Sihloko lesilandzelako sitawuphendvula lombuto.

[Imibhalo lengentasi]

Usakhumbula?

Emfanekisweni waJesu wemabele kanye nelukhula, letintfo letilandzelako timelelani?

• Inhlanyelo lenhle

• Indvodza leyahlanyela lehlanyelo

• Kuhlanyelwa kwenhlanyelo

• Sitsa

• Lukhula

• Sikhatsi sekuvuna

• Indlu yaJehova

• Kukhala kanye nekugedletela kwematinyo

• Umlilo lowesabekako

[Titfombe ekhasini 25]

LiPhentekhoste ngemnyaka wanga 33 C.E., lakhombisa kucala kwekuhlanyelwa kwenhlanyelo lenhle

[Sitfombe ekhasini 28]

Nyalo emabele langumfanekiso aletfwa endlini yaJehova

[Emavi laveta Umtfombo walentfo]

Pictorial Archive (Near Eastern History) Est.