Kulandzisa KwaMatewu

27 Kwatsi nasekusile, bonkhe baphristi labakhulu nemadvodza lamadzala bahlangana kuze bente lisu lekubulala Jesu.+ 2 Ngemuva kwekumbopha, bamchuba bamyisa kuPilatu umbusi.+

3 Ngako kutsite lapho Judasi lobekamtsengisile abona kutsi Jesu sewulahlwe ngelicala, watisola, wabuyisela letinhlavu telisiliva letingu-30 kubaphristi labakhulu nasemadvodzeni lamadzala.+ 4 Wafike watsi: “Ngonile ngekutsengisa umuntfu longenacala.”* Bona bamphendvula batsi: “Singenaphi tsine lapho? Tibonele kutsi wenta njani!”* 5 Ngako walahla letinhlavu telisiliva ethempelini, wahamba. Ngemuva kwaloko watikhunga.+ 6 Kodvwa baphristi labakhulu batsatsa letinhlavu telisiliva, batsi: “Akukho emtsetfweni kutsi tifakwe lakubekwa khona umcebo ethempelini ngobe betitekubhadalela kucitseka kwengati yemuntfu.” 7 Ngemuva kwekubonisana, batsatsa lemali batsenga ngayo insimu yembumbi kute bangcwabele kuyo tihambi. 8 Kungako leyo nsimu ibitwa ngekutsi yiNsimu yeNgati+ kuze kube ngulamuhla. 9 Kwagcwaliseka loko Nkulunkulu lakukhuluma asebentisa umphrofethi Jeremiya, nakatsi: “Batsatsa letinhlavu telisiliva letingu⁠-⁠30, lokuyimali emadvodzana aka-Israyeli lamtsengisa ngayo, 10 base batsenga ngato insimu yembumbi, kwavumelana naloko Jehova* langitjela kona.”+

11 Jesu wema embikwaPilatu umbusi, futsi Pilatu wambuta watsi: “UyiNkhosi yemaJuda yini?” Jesu wamphendvula watsi: “Sewuvele ushito.”+ 12 Kodvwa ngesikhatsi baphristi labakhulu nemadvodza lamadzala bambeka licala, akazange aphendvule.+ 13 Ngako Pilatu watsi kuye: “Uyaweva yini lamacala labakubeka wona?” 14 Nalapho akazange aphendvule, ngisho nangalinye nje, kangangekutsi Pilatu wamangala kakhulu.

15 Ngesikhatsi seMkhosi weliPhasika, bekungumkhuba waPilatu kutsi akhululele bantfu siboshwa lebebafuna sikhululwe.+ 16 Ngaleso sikhatsi, bekunesiboshwa lebekutsiwa nguBharaba lebesidvume ngekwenta lokubi. 17 Ngako ngesikhatsi sicumbi sebantfu sesibutsene, Pilatu watsi kuso: “Ngubani lenifuna nginikhululele yena, nguBharaba nobe nguloJesu lokutsiwa nguKhristu?” 18 Pilatu bekati kahle kamhlophe kutsi Jesu bamletse kuye ngenca yekutsi bebanemona. 19 Ngetulu kwaloko, ngesikhatsi sekahleti esihlalweni sekwehlulela, umkakhe watfumela umlayeto kuye watsi: “Ungayingeni indzaba yalomuntfu longenacala, ngobe lamuhla ngihlushwe liphupho ngenca yakhe.” 20 Baphristi labakhulu nemadvodza lamadzala bebakhutsata lesicumbi sebantfu kutsi sicele kukhululwe Bharaba+ bese kubulawa Jesu.+ 21 Ngako lombusi watsi: “Ngubani emkhatsini walaba lababili lenifuna nginikhululele yena?” Labantfu bamphendvula batsi: “NguBharaba.” 22 Pilatu wase utsi: “Ngenteni-ke ngaloJesu lokutsiwa nguKhristu?” Bonkhe bamphendvula batsi: “Akayiswe elugodvweni!”*+ 23 Pilatu watsi: “Leni? Yini lembi layentile?” Nanobe kunjalo bamemeta kakhulu batsi: “Akayiswe elugodvweni!”+

24 Nakabona kutsi sewehlulekile, nekutsi sekusuka siphitsiphitsi, Pilatu watsatsa emanti wageza tandla embikwebantfu, wase utsi: “Ngimsulwa engatini yalomuntfu. Tiboneleni nine kutsi nimenta njani.” 25 Labantfu baphendvula batsi: “Ingati yakhe ayibe setikwetfu nasetikwebantfwana betfu.”+ 26 Ngako wabakhululela Bharaba. Kodvwa watsi Jesu akashaywe,+ futsi wabanika yena kuze bambulalele elugodvweni.+

27 Ngemuva kwaloko emasotja aPilatu atsatsa Jesu amngenisa ekhaya laPilatu, ase abutsela lonkhe libutfo lemasotja kuye.+ 28 Amkhumula tingubo takhe, amgcokisa sembatfo lesibovu,+ 29 ngemuva kwaloko eluka umchele wemanyeva amfaka wona enhloko, futsi ambambisa umhlanga ngesandla sangesekudla. Aguca embikwakhe, ahlekisa ngaye atsi: “Sawubona, wena Nkhosi yemaJuda!” 30 Amkhafulela+ futsi atsatsa lomhlanga amshaya ngawo enhloko. 31 Ngako nasekacedzile kuhlekisa ngaye, amkhumula lesembatfo amgcokisa tingubo takhe tangetulu, ase ahamba naye kuze ayombetsela elugodvweni.+

32 Atsi lamasotja asesendleleni, ahlangana nendvodza yaseSirene lokutsiwa nguSimoni. Ayiphocelela kutsi yetfwale lugodvo* lebekutawubulawelwa Jesu kulo.+ 33 Nakefika endzaweni lokutsiwa yi-Golgotha, lokusho kutsi Indzawo Yesikobho,+ 34 anika Jesu liwayini lebelibhicwe nalokubabako,+ kodvwa ngemuva kwekuliva wala kulinatsa. 35 Nasekambetsele elugodvweni, lamasotja enta inkatho, abelana ngetingubo takhe tangetulu,+ 36 futsi ahlala lapho amgadza. 37 Abhala nemavi lebekamangalelwe ngawo, latsi: “Lona NguJesu, INkhosi YemaJuda,”+ futsi awafaka ngenhla kwenhloko yakhe.

38 Kunetigebengu letimbili lebetilengiswe naJesu etigodvweni, sinye silengiswe ngesekudla sakhe kantsi lesinye silengiswe ngesencele.+ 39 Bantfu lebebandlula lapho bebamedzelela,+ banikine tinhloko,+ 40 batsi: “Asewubuke! Wena watsi ungalibhidlita lithempeli futsi ulakhe ngemalanga lamatsatfu,+ tisindzise phela! Nangabe uyindvodzana yaNkulunkulu, yehla kulolugodvo!”*+ 41 Baphristi labakhulu, netati temtsetfo kanye nemadvodza lamadzala nabo bebahlekisa ngaye batsi:+ 42 “Bekabasindzisa labanye kodvwa yena uyehluleka kutisindzisa. Angitsi uyiNkhosi yaka-Israyeli,+ akehle-ke kulolugodvo,* tsine sitamkholwa. 43 Abetsembele kuNkulunkulu, akamsindzise-ke nangabe amemukela+ ngobe utsite: ‘Mine ngiyiNdvodzana yaNkulunkulu.’”+ 44 Letigebengu lebetilengiswe naye etigodvweni nato tacala kumhlambalata.+

45 Kwaba mnyama eveni lonkhe kusukela nasekusondzela insimbi yelishumi nakubili emini* kwaze kwaba kunasekusondzela insimbi yesitsatfu ntsambama.*+ 46 Kwatsi nasekuyinsimbi yesitsatfu ntsambama, Jesu wamemeta ngelivi lelikhulu watsi: “Eli, Eli, lama sabakthani?” lokusho kutsi: “Nkulunkulu wami, Nkulunkulu wami, ungishiyeleni?”+ 47 Nabeva loku, labanye lebebeme lapho batsi: “Lendvodza ibita Elija.”+ 48 Ngekushesha lomunye wabo wagijima watsatsa sipontji wasenya ewayinini lelimunyu, wasibophela emhlangeni, wase uyamnika kutsi anatse.+ 49 Kodvwa lalabanye batsi: “Asimyekeleni, sibone kutsi Elija utawufika yini atomsindzisa.” 50 Jesu waphindze wamemeta ngelivi lelikhulu, wase uyafa.*+

51 Indvwangu yasethempelini+ yadzabuka ekhatsi,+ kusuka etulu kuya phansi,+ umhlaba watamatama nemadvwala achekeka. 52 Emathuna avuleka, futsi tidvumbu talabangcwele lebebakuwo tajikijeleka ngephandle kwawo, 53 tase tibonwa bantfu labanyenti (bantfu labebasuka emathuneni ngemuva kwekuvuswa kwaJesu bahamba baya edolobheni lelingcwele kute bayobika ngalobekwentekile). 54 Ngesikhatsi indvuna yemasotja nebantfu lebebakanye nayo bagadze Jesu babona lokutamatama kwemhlaba naleti letinye tintfo lebetenteka, besaba kakhulu, base batsi: “Nembala lomuntfu abeyiNdvodzana yaNkulunkulu.”+

55 Bekunebafati labanyenti lebebasuke naJesu eGalile batomsita, futsi bebeme khashanyana babuka;+ 56 emkhatsini wabo kwakunaMariya waseMagdala, Mariya longumake waJakobe naJosese, kanye nemfati waZebedi.+

57 Ntsambama, kwefika indvodza lenjingile yase-Arimathiya, lokutsiwa nguJosefa, futsi beseyingumfundzi waJesu.+ 58 Josefa waya kuPilatu wayocela sidvumbu saJesu.+ Ngako Pilatu watsi akanikwe sona.+ 59 Josefa wasitsatsa lesidvumbu, wasigocotela ngendvwangu yelineni lehlobile futsi lecolisakele,+ 60 wasibeka ethuneni lelisha+ lebekaligubhe edvwaleni. Ngemuva kwekulivala ngelitje, wase uyahamba. 61 Kodvwa Mariya waseMagdala nalona lomunye Mariya bachubeka bahleti eceleni kwalelithuna.+

62 Loku kwenteka ngelilanga lekulungiselela liSabatha. Ngelilanga lelilandzelako,+ baphristi labakhulu nebaFarisi baya kuPilatu, 63 bafike batsi: “Mnumzane, sesikhumbula kutsi ngesikhatsi asaphila lomkhohlisi watsi: ‘Ngemuva kwemalanga lamatsatfu ngitawuvuswa.’+ 64 Ngako sicela ukhiphe umyalo wekutsi lithuna lakhe ligadvwe kuze kwendlule lilanga lesitsatfu, kuze bafundzi bakhe bangafiki bamebe+ bese batsi kubantfu: ‘Uvusiwe ekufeni!’ Ngobe lamanga atawuba makhulu kunalawa ekucala.” 65 Pilatu watsi kubo: “Tsatsani naba bogadzi kuze bayoligadza.” 66 Ngako bahamba bafike balivalisisa lelithuna futsi babeka bogadzi kuze baligadze.