Yekucala KubaseKhorinte

5 Kubikwe kutsi emkhatsini wenu kunebugwadla*+ lobungazange sebentiwe ngisho nabantfu betive, ngobe kutsiwa indvodza letsite ihlala nemfati wababe wayo.+ 2 Niyatigabatisa yini ngaloku? Bekungakafaneli yini nilile,+ kuze lomuntfu lowente loku asuswe emkhatsini wenu?+ 3 Nanobe ngingekho ngemtimba kodvwa nginani ngemoya, futsi sengivele ngimehlulele lomuntfu lowente loku, kwaba shengatsi benginani. 4 Nanihlangene ndzawonye ngelibito leNkhosi yetfu Jesu, nibowati kutsi nami nginani ngemoya nemandla eNkhosi yetfu Jesu, 5 futsi umuntfu lonjalo kufanele nimnikele kuSathane+ kuze kucedvwe* umkhuba wakhe lomubi lawuletse ebandleni, khona simo lesihle selibandla sitolondvolotwa ngelilanga leNkhosi.+

6 Kutigabatisa kwenu kubi. Anati yini kutsi imvubelo lencane iyibilisa yonkhe inhlama?+ 7 Susani imvubelo lendzala, kuze nibe yinhlama lensha njengobe nite imbiliso.* Ngobe ecinisweni Khristu loliwundlu leliPhasika+ letfu sewuvele unikelwe.+ 8 Ngako asiwugcineni lomkhosi,+ kepha hhayi ngemvubelo lendzala nobe ngemvubelo yebubi nekungcola, kodvwa asiwugcineni ngesinkhwa lesite imvubelo lesimelela bucotfo neliciniso.

9 Encwadzini lengayibhala ngatsi yekelani kutihlanganisa netingwadla,* 10 kodvwa bengingasho kutehlukanisa ngalokuphelele nalabagwadlako* kulelive,+ lababukhali, tigebengu, nobe labakhonta tithico. Kube bekunjalo bekutawudzingeka nisuke kulelive.+ 11 Kepha nyalo ngiyanibhalela kutsi niyekele kutihlanganisa+ nanobe ngubani lobitwa ngekutsi ngumzalwane kodvwa abe ayingwadla,* abukhali,+ akhonta tithico, etfuka,* asidzakwa,+ nobe asigebengu,+ futsi ningadli ngisho nekudla nemuntfu lonjalo. 12 Ngobe ngihlangene ngani nekwehlulela labo labangephandle? Nine anehluleli yini labo labangekhatsi, 13 Nkulunkulu abe ehlulela labo labangephandle?+ “Msuseni umuntfu lomubi emkhatsini wenu.”+