Lokushoko Kuyacondzakala Kulabanye

NAWUKHULUMA, ungagcini nje ngekundlulisela kwatiswa. Yetama kwenta loko lokushoko kucondzakale kulabo labakulalele. Loku kungasita kutsi lokushoko kube nemiphumela lemihle, ngisho nobe ukhuluma nelibandla nobe nebantfu labangasibo BoFakazi.

Tinyenti tintfo letingenta loko lokushoko kucondzakale. Letinye tato kukhulunywa ngato eSifundvweni 26, lesitsi “Kuhlela Indzaba Ngendlela Lenengcondvo.” Letinye kukhulunywa ngato eSifundvweni 30, lesitsi “Khombisa Kutsi Uyamnaka Loyo Lokhuluma Naye.” Kulesifundvo, sitawucoca nangalamanye emaphuzu.

Sebentisa Emagama Lamelula, Futsi Ukhulume Ngendlela Lemelula. Emagama lamelula kanye nemisho lemifishane anemandla ekukhulumeni. Inshumayelo yaJesu yasentsabeni isibonelo lesihle senkhulumo lengacondvwa ngunobe ngubaphi bantfu, bakunobe nguyiphi indzawo. Kungenteka bayacala kukuva loko lekhuluma ngako. Kodvwa bangakucondza loko Jesu lakusho ngobe abekhuluma ngetintfo letisitsintsako sonkhe, letifaka ekhatsi indlela yekutfola injabulo, indlela yekutfutfukisa buhlobo betfu nalabanye bantfu, indlela yekubhekana nekukhatsateka kanye nendlela yekutfola injongo ekuphileni. Jesu wasebentisa lulwimi lolumelula kuze avete loko labekucabanga. (Mat., tehl. 5-7) Kuliciniso kutsi liBhayibheli linetibonelo letinyenti tebudze nekwakheka kwemisho. Umgomo wakho kufanele kube kukhuluma ngendlela lecacile nalecondzakalako.

Ngisho nobe ucoca ngendzaba lelukhuni, kukhuluma ngendlela lemelula kungakusita kutsi uyente icondzakale. Yini longayenta kuze ukhulume ngendlela lemelula? Ungafaki imininingwane lengadzingeki letawenta labo labakulalele badideke. Hlela indzaba yakho kuze isekele emaphuzu layinhloko. Yikhetse kahle imibhalo leyinhloko. Kunekutsi usuke kulomunye umbhalo uye kulomunye ngekushesha, wufundze futsi uwuchaze. Ungakhulumi emagama lamanyenti latawenta kutsi ungasabonakali umcondvo lobalulekile.

Nawuchuba sifundvo seliBhayibheli sasekhaya, ungasebentisa emaphuzu lafanako. Ungetami kuchaza yonkhe imininingwane. Sita umfundzi kutsi awacondze kahle emaphuzu layinhloko. Ngekuhamba kwesikhatsi, angafundza kabanti ngalawo maphuzu esifundvweni latichubela sona kanye nasemihlanganweni yelibandla.

Kuze ukhone kwetfula indzaba ngendlela lemelula, kudzingeka ulungiselele kahle. Kufanele ucale uyicondze kahle leyo ndzaba kuze ukhone kwenta nalabanye bayicondze. Nangabe uyicondza kahle intfo letsite, uyakhona kuniketa tizatfu tekutsi kungani injalo. Uyakhona nekuyisho ngemavi akho.

Chaza Emagama Langaketayeleki. Ngaletinye tikhatsi, kuze wente tintfo letitsite ticondzakale kudzingeka kutsi uwachaze emagama langaketayeleki kulabo lokhuluma nabo. Ungacabangi kutsi labo labakulalele bayakwati loko lokhuluma ngako, kodvwa ungabatsatsi njengebantfu labangati lutfo. Ngenca yekutsi ufundza liBhayibheli, kungenteka usebentise lamanye emagama langaketayeleki kulabanye bantfu. Nangabe ungakachazi, labanye bantfu labangaketayelani naBoFakazi BaJehova ngeke bacondze kutsi emagama lanjengalatsi “labasele,” ‘sisebenti lesetsembekile nalesihlakaniphile,’ ‘letinye timvu,’ kanye ‘nesicumbi lesikhulu’ asho emacembu latsite ebantfu. (Rom. 11:5; Mat. 24:45; Joh. 10:16; Semb. 7:9) Ngalokufanako, nangabe umuntfu angaketayelani nenhlangano yaBoFakazi BaJehova kungenteka angacondzi kutsi asho kutsini emagama lanjengalatsi “ummemeteli,” “lihlahlandlela,” “umbonisi wesigodzi,” kanye “neSikhumbuto.”

Lamanye emagama laseBhayibhelini lasetjentiswa nabantfu labangasibo BoFakazi angase adzinge kuchazwa. Kubantfu labanyenti, ligama lelitsi “Amagedoni” lisho imbubhiso lengukhukhulela ngoco wenyukliya. Bangase batsi “uMbuso waNkulunkulu” usimo lesitsite lesingekhatsi kumuntfu, nobe bawuhlobanise nelizulu hhayi nahulumende. Kukhuluma “ngemphefumulo” kungase kubente bacabange ngencenye letsite yemuntfu lengabonakali, lesindzako nakufa umtimba. Tigidzi tebantfu tifundziswe kutsi “umoya longcwele” ungumuntfu, uyincenye yaMtsatfu Amunye. Ngenca yekutsi bantfu labanyenti abasatisebentisi timiso teliBhayibheli tekutiphatsa, kungase kudzingeke kutsi ubasite bacondze kutsi liBhayibheli lisho kutsini nalitsi: “Bubalekeleni budlundlulu.”—1 Khor. 6:18.

Nangabe bantfu bangaketayeli kufundza liBhayibheli, bangase bangalitfoli liphuzu nawutsi: “Pawula wabhala . . . ” nobe nawutsi: “Lukha watsi . . . ” Kungenteka banebangani nobe bomakhelwane labanalawo magama. Kungase kudzingeke kutsi usho lokunye lokutawuchaza kutsi lomuntfu ungumphostoli longumKhristu nobe ungulomunye walababhala liBhayibheli.

Bantfu balamuhla badzinga kusitwa kuze bacondze imibhalo lekhuluma ngekukalwa kwetintfo nobe ngemasiko asendvulo. Nasi sibonelo: Emavi latsi umkhumbi waNowa wawutinyatselo letingu-300 budze, tinyatselo letingu-50 bubanti, kanye netinyatselo letingu-30 kuphakama, angase angasho lutfo kubo. (Gen. 6:15) Kodvwa nangabe leto tintfo utichaza ngendlela lesetjentiswa kuleyo ndzawo, labo labakulalele batawusheshe babone kutsi lomkhumbi wawungakanani.

Niketa Inchazelo Ledzingekako. Kuze wente indzaba icace kulabo lokhuluma nabo, kudzingeka lokungetulu kwekumane nje uchaze ligama lelitsite. EJerusalema, emalangeni a-Ezra, kufundvwa kweMtsetfo bekuhambisana nekuwuchaza. Kuze asite bantfu bacondze kutsi usho kutsini, emaLevi abewuchaza uMtsetfo futsi akhombise nendlela lowawungasetjentiswa ngayo etimeni bantfu lebebakuto ngaleso sikhatsi. (Neh. 8:8, 12) Ngalokufanako, tinike sikhatsi sekuchaza imibhalo loyifundzako futsi uvete kutsi ingasetjentiswa njani.

Ngemuva kwekufa nekuvuswa kwakhe, Jesu wachazela bafundzi bakhe kutsi loko lokwakusandza kwenteka bekukugcwaliseka kwemiBhalo. Waphindze wagcizelela umtfwalo lebebanawo njengobe bebabofakazi baleto tintfo. (Luk. 24:44-48) Nangabe usita bantfu babone kutsi loko labakufundzile kufanele kukutsintse njani kuphila kwabo, kutawuba melula kucondza kutsi kusho kutsini.

Indlela Inhlitiyo Letsintseka Ngayo. Ngisho nobe inchazelo yakho icacile, kunaletinye tintfo letingancuma kutsi umuntfu utakucondza yini loko lokushoko nobe cha. Nangabe inhlitiyo yaloyo muntfu ilukhuni, loko kungambangela kutsi angawutfoli umcondvo waloko lokukhulunywa ngako. (Mat. 13:13-15) Kubantfu lababona tintfo ngemcondvo wenyama, tintfo letihlobene naNkulunkulu tiba bulima kubo. (1 Khor. 2:14) Nangabe umuntfu akhombisa umoya lonjalo, kungaba kuhle kutsi uyephetse indzaba yakho, lokungenani kwangaleso sikhatsi.

Kodvwa kuletinye timo, inhlitiyo ingaba lukhuni ngenca yetimo letimatima ekuphileni. Inhlitiyo yaloyo muntfu ingase itsambe nakanganiketwa lelinye litfuba lekuva emaciniso eliBhayibheli. Ngesikhatsi Jesu atjela baphostoli bakhe kutsi abetawubhambabulwa futsi abulawe, abazange bakucondze loko. Kungani? Kungobe bebangakakulindzeli futsi bebangafuni kutsi kwenteke. (Luk. 18:31-34) Nobe kunjalo, ngekuhamba kwesikhatsi baphostoli labangu-11 bakucondza, futsi bakukhombisa loko ngekwenta ngekuvumelana naloko Jesu labebafundzise kona.

Umphumela Wesibonelo Lesihle. Kuze bantfu bacondze, abasitwa nje nguloko lesikushoko kuphela, kodvwa basitwa nanguloko lesikwentako. Mayelana nekuya kwabo eHholweni LeMbuso, bantfu labanyenti batsi bakhumbula lutsandvo labalubona, hhayi loko lokwashiwo. Ngalokufanako, injabulo lesiyikhombisako isite bantfu labanyenti kutsi bemukele emaciniso eliBhayibheli. Nababona lutsandvo loluvetwa bantfu baJehova kulomunye nalomunye kanye nekubacabangela ngemusa labanye nabasetimeni letimatima, labanye baphetse ngekutsi BoFakazi basenkholweni yeliciniso. Ngako-ke, njengobe wetama kusita bantfu kutsi bacondze emaciniso eliBhayibheli, cabangisisa ngendlela lowachaza ngayo kanye nangesibonelo sakho.