Loko Lokushoko Kuyabafundzisa Labanye

KUZE loko lokushoko kufundzise, kufanele wente lokungetulu kwekumane ukhulume ngentfo lebalulekile. Tibute nayi imibuto: ‘Kungani labo lengitawube ngikhuluma nabo kufanele beve ngalendzaba? Yini lengitawuyisho kuze labo lengitawube ngikhuluma nabo beve kutsi bazuzile?’

Nangabe wabelwe kutsi ukhombise indlela yekufakaza kumuntfu, loyo lowabelwe naye kutawube kunguye lokhuluma naye. Kuletinye timo, kungenteka ukhulume nalo lonkhe libandla.

Loko Labakwatiko Labo Lokhuluma Nabo. Tibute nangu umbuto: ‘Yini labayatiko ngalendzaba labo lengitawube ngikhuluma nabo?’ Loko kutakukhombisa kutsi kufanele ucale kuphi. Nangabe ukhuluma nelibandla lelinemaKhristu lamanyenti lavutsiwe, ungaphindzaphindzi timfundziso letisisekelo labanyenti babo labatatiko. Lokushoko kusekele kuleto tintfo lesebavele batati. Nangabe kunalabanyenti labasacala kufundza liciniso, kufanele uwacabangele omabili lamacembu.

Litubane lolisebentisako nawukhuluma alihambisane naloko labakwatiko labo lokhuluma nabo. Nangabe kunetintfo labanyenti babo labatatiko, ungasheshisa nawukhuluma ngato. Kodvwa yehlisa litubane nangabe usho tintfo labanyenti balabo lokhuluma nabo labangatati kuze batewuticondza kahle.

Emaphuzu Latawufundzisa. Akusho kutsi ngaso sonkhe sikhatsi kufanele usho tintfo letinsha kuze loko lokushoko kufundzise. Letinye tikhulumi tinendlela yekusho tintfo letetayelekile ngendlela lemelula leyenta bantfu labanyenti labalalele baticondzisise kwekucala leto tintfo.

Nasisemsebentini wekushumayela, akukeneli kutsi sisho indzaba letsite leyentekile kuze sichaze kutsi siphila emalangeni ekugcina. Sebentisa liBhayibheli kuze uvete loko lokushiwo nguleyo ndzaba. Loku kutamzuzisa kakhulu umnikati welikhaya. Ngendlela lefanako, nawusho lokutsite ngemitsetfo lelawula imvelo nobe ngetihlahla nobe tilwane, umgomo wakho akukafaneli kube kusho imininingwane yesayensi lemangalisako umnikati welikhaya langazange asayive. Kunaloko, umgomo wakho kufanele ube kuhlanganisa bufakazi lobubonakala endalweni kanye naloko lokushiwo liBhayibheli kuze uvete kutsi ukhona uMdali lositsandzako. Loku kutawusita umnikati welikhaya kutsi abe nalomunye umbono ngaleyondzaba.

Kukhuluma ngendzaba bantfu lesebayive tikhatsi letinyenti akusimelula. Kuze ube ngumfundzisi lophumelelako, kufanele ufundze indlela yekukwenta ngemphumelelo loku. Kanjani?

Kucwaninga kutakusita. Kunekutsi enkhulumeni yakho umane ufake tintfo lotikhumbulako, sebentisa emathuluzi ekucwaninga lachazwe emakhasini 33 kuya ku-38. Khumbula loko lokukhulunywe ngako kulawo makhasi mayelana nemigomo lofuna kuyifinyelela. Nawusenta lucwaningo, ungase utfole kutsi indzaba letsite leyenteka futsi lengatiwa kakhulu iyahambisana nesihloko sakho. Ungaphindze utfole lokutsite lokusandza kuphuma etindzabeni lokutalichaza kahle liphuzu lofuna kukhuluma ngalo.

Njengobe uhlola indzaba yakho, yenta ingcondvo yakho nayo icabange ngekutsi utibute imibuto lenjengaletsi, ini? kungani? nini? kuphi? ngubani? kanye nalotsi kanjani? Nasi sibonelo: Kungani loku kuliciniso? Ngingakufakazela kanjani? Nguyiphi inkholelo levamile leyenta kube matima ngalabanye bantfu kutsi bacondze leliciniso leliBhayibheli? Kungani loku kubalulekile? Loku kufanele kukutsintse kanjani kuphila kwemuntfu? Ngusiphi sibonelo lesiveta tinzuzo tekukusebentisa? Leliciniso leliBhayibheli lembulani ngebunjalo baJehova? Kuye ngaloko lokhuluma ngako, ungase ubute nangu umbuto: Kwenteke nini loku? Singakusebentisa njani lokwatiswa lamuhla? Nenkhulumo yakho ungayenta iphile ngekutsi ubute futsi uphendvule imibuto lenjalo nawuyetfula.

Inkhulumo yakho ingase idzinge kutsi usebentise imibhalo labayetayele labo lokhuluma nabo. Yini longayenta kuze leyo mibhalo ifundzise? Ungamane nje uyifundze, kodvwa yichaze.

Umbhalo lowetayelekile ungafundzisa nangabe uwehlukanisa ngetincenye, uvete tincenye letihlobene nesihloko senkhulumo yakho bese uyatichaza. Asewunake loko longakwenta ngembhalo lofana naMikha 6:8 e-Humushweni Lemhlaba Lomusha. Kuyini “kulunga”? Kwabani lokulunga lokukhulunywa ngako? Ungakuchaza njani loko lokushiwo ‘kwenta kulunga’ nobe ‘kuphatsana ngemusa’? Kusho kutsini kutfobeka? Lombhalo ungawuchaza njani kumuntfu losakhulile ngeminyaka? Nawukhetsa kwatiswa lotakusebentisa, kufanele unake sihloko senkhulumo yakho, umgomo wakho, bantfu lotawube ukhuluma nabo, kanye nesikhatsi lotawube unaso.

Kuyasita kuchaza kutsi emagama latsite asho kutsini. Labanye bantfu bayamangala nabatfola kutsi uyini “uMbuso” lokukhulunywa ngawo kuMatewu 6:10. Ngisho nemuntfu losekusikhatsi lesidze angumKhristu kungamsita kakhulu kukhunjutwa inchazelo yeligama lelitsite kuze akucondzisise kahle loko lokushiwo ngumbhalo. Loku kuyabonakala nawufundza 2 Phetro 1:5-8 futsi uchaza letintfo lokukhulunywa ngato kulawo mavesi: kukholwa, buhle, lwati, kutibamba, kucinisela, kutinikela kuNkulunkulu, kutsandza bazalwane, kanye nelutsandvo ngalabanye bantfu. Nangabe emagama lamabili lanenchazelo lecishe ifane asetjentiswe ndzawonye, kuwachaza kutawusita kutsi kubonakale indlela lehluke ngayo. Loku kuyasebenta emagameni lafana nalelitsi kuhlakanipha, lwati, kanye nekucondza, lasetjentiswe kuTaga 2:1-6.

Labo labakulalele batawuzuza nangabe uwuchaza umbhalo. Bantfu labanyenti bayamangala nababona kwekucala kutsi live lelitawukwendlula lokukhulunywa ngalo ku-1 Johane 2:17 lisho bantfu labangamlaleli Nkulunkulu, ngobe lomhlaba lesihlala kuwo wona ute tifiso. Bayamangala nalapho bafundza Tihlabelelo 104:5, letitsi ‘umhlaba ngeke utanyatanyiswe phakadze naphakadze.’ Ngalelinye lilanga, baSadusi bamangala ngesikhatsi Jesu acaphuna Eksodusi 3:6, lebebatsi bayawukholelwa, futsi awusebentisa ekuvusweni kwalabafile.​—Lukha 20:37, 38.

Ngaletinye tikhatsi kuyasita kuveta ingcikitsi yembhalo, timo lebetikhona nawubhalwa, kanye nekutsi ngubani lokhulumako nobe lokukhulunywa naye. BaFarisi bebatati kahle Tihlabelelo 110. Nobe kunjalo, Jesu wabakhombisa liphuzu lelibalulekile lelitfolakala evesini lekucala. Wababuta: “‘Nicabanga kutsi Khristu uyindvodzana yabani?’ Bona batsi: ‘Uyindvodzana yaDavide.’ Yena watsi kubo: ‘Kungani-ke ngesikhatsi Davide achutjwa ngumoya longcwele ambita ngekutsi “yiNkhosi,” nakatsi: “Jehova watsi eNkhosini yami: ‘Hlala ngesekudla sami ngidzimate ngibeke titsa takho ngephansi kwetinyawo takho’”? Nangabe Davide ambita ngekutsi yiNkhosi, kuya ngani-ke kutsi abe yindvodzana yakhe?’” (Mat. 22:41-45) Nangabe uchaza imibhalo njengobe kwenta Jesu, utawusita bantfu kutsi balifundze ngekucophelela liVi laNkulunkulu.

Nangabe sikhulumi sisho sikhatsi incwadzi letsite yeliBhayibheli leyabhalwa ngaso nobe sikhatsi lokwenteka ngaso intfo letsite, kufanele siphindze sichaze netimo lebetikhona ngaleso sikhatsi. Ngaleyo ndlela, labo labalalele batawucondzisisa kutsi kungani leyo ncwadzi nobe loko lokwenteka kubalulekile.

Kucatsanisa kungasita ekwenteni loko lokushoko kufundzise. Ungase ucatsanise umbono lovamile kubantfu kanye naloko liBhayibheli lelikushoko. Ungaphindze ucatsanise kulandzisa kweliBhayibheli lokubili lokufanako. Ukhona yini umehluko? Kungani kunjalo? Yini lesiyifundzako kuko? Nawenta njalo, labo labakulalele batawuba nembono lomusha ngalendzaba.

Nangabe wabelwe kutsi ukhulume ngencenye letsite yemsebenti webuKhristu, ungayenta inkhulumo yakho ifundzise ngekutsi ucale ngekubuketa. Coca ngekutsi yini lokufanele yentiwe, kungani loko kudzingeka, kanye nekutsi kuhlobana njani nemigomo yetfu njengobe siBoFakazi BaJehova. Chaza kutsi lomsebenti kufanele wentiwe kuphi, nini, nekutsi kufanele wentiwe njani.

Kutsiwani nangabe inkhulumo yakho idzinga kutsi ukhulume ngaletinye ‘tintfo letijulile taNkulunkulu’? (1 Khor. 2:10) Nangabe ucala ngekuveta kanye nekuchaza lokutsite lokubalulekile ngaleyo ndzaba lokhuluma ngayo, loko lotawukusho emvakwaloko kutawucondzakala melula. Nangabe ekugcineni uyibuketa kafishane indzaba yakho, labo labakulalele batawutivela kutsi bafundze lokutsite.

Seluleko Lesimayelana Nendlela Yekuphila YemaKhristu. Labo lokhuluma nabo batawuzuza kakhulu nangabe ubasita babone kutsi emaphuzu enkhulumo yakho asebenta njani ekuphileni kwabo. Njengobe uhlola imibhalo lesendzabeni lowabelwe yona, tibute: ‘Kungani lokwatiswa kwalondvolotwa emiBhalweni kwaze kwaba sesikhatsini setfu?’ (Rom. 15:4; 1 Khor. 10:11) Cabanga ngetimo labo lokhuluma nabo lababhekene nato. Njengobe ucabanga ngaleto timo, naka loko lokushiwo seluleko kanye netimiso temiBhalo ngato. Enkhulumeni yakho, chaza imiBhalo kuze uvete kutsi ingamsita njani umuntfu kuze ahlangabetane ngekuhlakanipha netimo letinjalo. Ungamane nje ukhe etulu. Khuluma ngalokucondzile ngetimo tengcondvo nangaloko lokudzingeka kwentiwe.

Ekucaleni, nawulungiselela inkhulumo, sebentisa kunye nobe kubili kwaloko lokukhulunywe ngako lapha. Njengobe utfutfuka, sebentisa lokunyentana kwako. Ngekuhamba kwesikhatsi labo lotawube ukhuluma nabo batawutilangatelela tinkhulumo takho, baciniseka ngekutsi batawuva tintfo letitawubazuzisa.