SIFUNDVO 37

Litsini LiBhayibheli Ngemsebenti Nangemali?

Printed Edition

Wake wativa yini ukhatsateke kakhulu ngemsebenti nobe ngemali? Kungaba matima kunakekela tidzingo tetfu futsi ngesikhatsi lesifanako sikhonte Jehova ngendlela lemfanele. LiBhayibheli lisiniketa teluleko letilusito lesingatisebentisa.

1. Litsini liBhayibheli ngemsebenti?

Nkulunkulu ufuna siwujabulele umsebenti wetfu. LiBhayibheli litsi, “kute lokuncono lokwendlula kutsi umuntfu . . . ajabule ngalakusebentele kamatima.” (Umshumayeli 2:24) Jehova usebenta kamatima. Nasimlingisa, sisebenta ngekutimisela, utawujabula futsi natsi sitawujabula.

Umsebenti ubalulekile. Nobe kunjalo, akukafaneli siwuvumele ubaluleke kakhulu kwendlula kukhonta Jehova. (Johane 6:27) Jehova wetsembisa kutsi nasibeka kukhonta yena kucala ekuphileni kwetfu, utasinakekela futsi asinikete loko lesikudzingako kuze siphile.

2. Kusho kutsini kuba nembono lokahle ngemali?

Ngisho nobe liBhayibheli livuma kutsi ‘imali isivikelo,’ liphindze lisecwayise ngekutsi imali iyodvwa ngeke isente sijabule. (Umshumayeli 7:12) Ngako, sikhutsatwa kutsi singayitsandzi imali kodvwa ‘senetiswe tintfo lesinato.’ (Fundza KumaHebheru 13:5.) Nasihlale senetiseka ngaloko lesinako, ngeke sikhatsateke ngenca yekutsi sihlale sifuna lokunyenti. Sitatigwema tikweleti letingenasidzingo. (Taga 22:7) Sitawuphindze sibalekele tingoti tekugembula kanye netingoti temabhizinisi lasetsembisa kutsi sitawunjinga ngekushesha singakasebenti kakhulu.

3. Singephana njani ngemali yetfu?

Jehova unguNkulunkulu lowephanako, ngako singamlingisa ngekutsi ‘sephane, futsi sikulungele nekwabelana.’ (1 KuThimothi 6:18) Singephana ngemali yetfu ngekusekela libandla nangekusita labeswele, ikakhulukati labo lesikholwa nabo. Jehova akanendzaba kangako ngekutsi kungakanani lesephana ngako, kodvwa unaka kakhulu tisusa tetfu. Nasephana ngalokusuka enhlitiyweni, sitawujabula futsi naJehova utawujabula.—Fundza Imisebenti 20:35.

CHUBEKA UFUNISISA

Tfola kutsi kusita ngani kuba nembono lokahle ngemsebenti nangekwenetiseka.

4. Dvumisa Jehova ngendlela losebenta ngayo

Buhlobo betfu naJehova bufanele buyitsintse indlela lesiwutsatsa ngayo umsebenti. Dlala le-VIDEO, bese nicoca ngalemibuto lelandzelako.

I-VIDEO: Wente Ngemphefumulo Wonkhe Umsebenti WaJehova (4:39)

Kule-video, yini lekujabulisile mayelana nendlela Jason lawutsatsa ngayo umsebenti, kanye nendlela latiphatsa ngayo emsebentini?
Yini layentile kuze abe nembono lokahle ngemsebenti?

Fundza KubaseKholose 3:23, 24, bese nicoca ngalombuto:

Ibaluleke ngani indlela lesiwutsatsa ngayo umsebenti?

Titfombe: Indvodza yenta umsebenti wekutiphilisa ute kucala ekuphileni kwayo. 1. Emini isebenta ehhovisi. 2. Ichubeka isebenta ngisho ebusuku. 3. Uchubeka asebenta ngisho nobe labanye sebashayisile. 4. Udla kudla kwantsambama ayendvwana.

Umsebenti ubalulekile, kodvwa akukafaneli siwente ubaluleke kakhulu kwendlula kukhonta Jehova

Titfombe: Lendvodza itinika sikhatsi sekwenta tintfo letibaluleke kakhulu. 1. Emini isebenta ehhovisi. 2. Iyashayisa ntsambama emsebentini. 3. Iphakamisa sandla emhlanganweni. 4. Idla kudla kwantsambama nekayo kanye nebantfwana babo lababili.

5. Kuyasisita kwenetiseka

Bantfu labanyenti betama kuba nemali lenyenti, kodvwa liBhayibheli lisinika seluleko lesehlukile. Fundza 1 KuThimothi 6:6-8, bese nicoca ngalombuto:

LiBhayibheli lisikhutsata kutsi senteni?

Ngisho nobe site imali lenyenti, singajabula. Dlala le-VIDEO, bese nicoca ngalombuto lolandzelako.

I-VIDEO: “Yenetiseka Ngetintfo Lonato” (3:20)

Yini leyenta lemindeni ijabule ngisho nobe inemali lencane?

Kutsiwani nangabe sinemali lenyenti kodvwa sisafuna lenyenti kakhulu? Jesu wakhuluma ngendzaba lebeyikhombisa kutsi kuyingoti ngani loku. Fundza Lukha 12:15-21, bese nicoca ngalombuto:

Yini loyifundzile kulendzaba yaJesu?—Buka vesi 15.

Fundza futsi ucatsanise Taga 10:22 na-1 KuThimothi 6:10, bese nicoca ngalemibuto:

Ucabanga kutsi yini lebaluleke kakhulu? Kuba ngumngani waJehova nobe kuba nemali lenyenti? Usho ngani?
Ngutiphi tinkinga letibakhona nawufuna imali lenyenti?

6. Jehova utatinakekela tidzingo tetfu

Nasinetinkinga temsebenti nobe nasite imali leyenele, loko kungasisita sibone kutsi siyametsemba yini Jehova. Dlala le-VIDEO kuze ubone kutsi yini lesingayenta nasinetinkinga letinjena, bese nicoca ngalemibuto lelandzelako.

I-VIDEO: Jehova Utasipha Loko Lesikudzingako (6:21)

Kule-video, ngutiphi tinkinga lomzalwane lebekanato?
Yini layenta kuze ancobe letinkinga?

Fundza Matewu 6:25-34, bese nicoca ngalombuto:

Yini Jehova letsembisa kuyentela labo labambeka kucala ekuphileni kwabo?

LABANYE BANTFU BATSI: “Kufanele ngisebente kamatima kuze nginakekele umndeni wami. Angeke ngikhone kuya njalo ngeliviki emihlanganweni yelibandla.”

Ngumuphi umbhalo lokucinisekisako kutsi kubeka kukhonta Jehova kucala ekuphileni kwakho kuhlala kusincumo lesihle?

LOKO LESICOCE NGAKO

Umsebenti wekutiphilisa nemali kubalulekile, kodvwa akukafaneli kusiphazamise endleleni lesikhonta ngayo Jehova.

Yini Loyifundzile?

Yini lengakusita ube nembono lokahle ngemsebenti?
Kukusita njani kwenetiseka?
Ungakhombisa njani kutsi uyasetsemba setsembiso saJehova sekunakekela bantfu bakhe?

Lilanga locedze ngalo lesifundvo:

Umgomo

Kuhlola kutsi umsebenti wakho ukwente wangakhoni yini kuya njalo emihlanganweni kuletinyanga letendlulile. Nangabe kunjalo, hlela kulungisa lesimo.

Leminye Imigomo Lotibekela Yona:

Your other goal

LOKUNYE LONGAKUHLOLA

Hlola kutsi liBhayibheli litsi kubi yini kuba nemali.

“Imali Iyimphandze Yesono Yini?” (Sihloko lesiku-internet)

Fundza kutsi ungayisebentisa njani imali kuze ujabulise Nkulunkulu.

“Litsini LiBhayibheli Ngekupha?” (Sihloko lesiku-internet)

Kugembula kute yini bungoti?

“Umbono WeBhayibheli—Ukugembula” (Phaphama!, yaMarch 2015, letfolakala ngesiZulu)

Fundza kutsi yini leyenta lenye indvodza yayekela kugembula nekweba.

“The Bible Changes Lives” (Sicongosekulindza, saNovember 1, 2011 lesitfolakala ngesiNgisi)