Chubekani Njengetakhamuti TeMbuso!

‘Chubekani njengetakhamuti.’—FIL. 1:27, umbhalo longentasi ku-New World Translation With References.

UNGAPHENDVULA NJANI?

Bobani labangaba takhamuti teMbuso?

Yini lokufanele siyente mayelana nelulwimi, umlandvo nemitsetfo yeMbuso?

Takhamuti teMbuso tikhombisa njani kutsi tiyatitsandza timiso taNkulunkulu?

1, 2. Yini leyenta seluleko saPawula lesiya ebandleni laseFiliphi sabaluleka kakhulu?

UMPHOSTOLI PAWULA wakhutsata libandla laseFiliphi kutsi ‘lihambe ngalokufanele liVangeli.’ (Fundza Filiphi 1:27.) Ligama lesiGriki lelasetjentiswa nguPawula kuleli lelitsi “hambani” lingaphindze lisho ‘kuchubeka nitakhamuti.’ Lowo musho wawubalulekile ebandleni laseFiliphi. Yini leyawenta wabaluleka? Kungobe kubonakala shengatsi iFiliphi yayingulelinye licembu lemadolobha lelalinebantfu labaniketwe buve bemaRoma. Takhamuti taseRoma letatiseFiliphi nakuwo wonkhe uMbuso waseRoma betibutsandza kakhulu buve bato futsi betikujabulela kuvikelwa ngumtsetfo wemaRoma.

² Emalunga elibandla laseFiliphi abenesizatfu lesincono kakhulu sekujabula. Pawula wawakhumbuta kutsi njengemaKhristu lagcotjiwe abetakhamuti ‘tasezulwini.’ (Fil. 3:20) Abetakhamuti teMbuso waNkulunkulu, hhayi takhamuti tembuso webantfu. Ngaleso sizatfu, abejabulela kuvikeleka netinzuzo letincono kakhulu.—Ef. 2:19-22.

 3. (a) Bobani labanelitfuba lekuba takhamuti teMbuso? (b) Yini lesitawucoca ngayo kulesihloko?

³ Seluleko saPawula ‘sekuchubeka nitakhamuti,’ sisebenta ngalokuyinhloko kulabo labatawubusa naKhristu ezulwini. (Fil. 3:20) Kodvwa ngemcondvo lowenabile, singasebenta nakulabo labatawuba tikhonti tasemhlabeni teMbuso waNkulunkulu. Kungani kunjalo? Kungobe onkhe emaKhristu latinikele, akhonta iNkhosi yinye lenguJehova, futsi kudzingeka aphile ngetimiso letifanako. (Ef. 4:4-6) Lamuhla bantfu benta lokusemandleni abo kute babe takhamuti temave latfutfukile. Kufanele sikhombise kubonga lokukhulu ngelitfuba lekuba takhamuti teMbuso. Kute sikhulise kubonga lesinako ngalelilungelo, ase sicabange ngekufana lokukhona emkhatsini waloko lokudzingekako kute ube sakhamuti sahulumende webantfu nekuba sakhamuti seMbuso waNkulunkulu. Sitawubese sihlola tintfo letintsatfu lokufanele sitente kute sihlale sinelilungelo lekuba takhamuti teMbuso.

LOKUDZINGEKAKO KUTE UBE SAKHAMUTI

 4. Luyini lulwimi loluhlambulukile, futsi “silukhuluma” njani?

⁴ Fundza lulwimi. Labanye bohulumende bafuna kutsi labo labacela buve bacale bafundze kukhuluma lulwimi lwakulelo live. Ngisho nobe sebanabo lobo buve, bantfu kubatsatsa iminyaka kulwati kahle lulwimi lolusha. Bangasheshe bayifundze imitsetfo yelulwimi kodvwa kutsatsa sikhatsi kutsi bafundze kuwasho kahle emagama. Ngendlela lefananako, uMbuso waNkulunkulu ufuna takhamuti tawo tifundze lulwimi ‘loluhlambulukile’ lokukhulunywa ngalo eBhayibhelini. (Fundza Zefaniya 3:9.) Nguluphi lololwimi? Liciniso ngaNkulunkulu netinjongo takhe njengobe titfolakala eBhayibhelini. “Sikhuluma” lolulwimi loluhlambulukile ngekutiphatsa ngendlela levumelana nemitsetfo netimiso taNkulunkulu. Takhamuti teMbuso waNkulunkulu tingatifundza masinyane timfundziso letisisekelo teliBhayibheli bese tiyabhajatiswa. Nobe kunjalo, ngisho setibhajatisiwe kudzingeka tichubeke tetama “kukhuluma” lolulwimi loluhlambulukile kancono. Ngayiphi indlela? Ngamunye wetfu kudzingeka ente tento takhe tihambisane netimiso teliBhayibheli latatiko.

 5. Yini leyenta kudzingeke sifundze konkhe lesingakufundza ngemlandvo wenhlangano yaJehova?

⁵ Fundza umlandvo. Umuntfu lofuna kuba sakhamuti sahulumende lotsite kungadzingeka kutsi afundze ngemlandvo walowo hulumende. Ngendlela lefananako, labo labafuna kuba takhamuti teMbuso benta kahle ngekufundza konkhe labangakufundza ngeMbuso waNkulunkulu. Cabanga ngesibonelo lesabekwa ngemadvodzana aKhora, labekhonta ka-Israyeli wasendvulo. Abelitsandza liJerusalema nendzawo yalo yekukhontela futsi akujabulela kucoca ngemlandvo walelo dolobha. Abengajatjuliswa ngematje neludzaka lokwakhiwa ngalo, kodvwa abejatjuliswa ngulokwakumelelwa ngulelidolobha nendzawo yalo yekukhontela. LiJerusalema ‘kwakulikhaya leNkhosi lenkhulu,’ lenguJehova ngobe beliyindzawo yekukhonta kweliciniso. UMtsetfo waJehova wawufundziselwa lapho. Jehova abekhombisa umusa wakhe kubantfu labebabuswa yiNkhosi yaseJerusalema. (Fundza Tihlabelelo 48:1, 2, 9, 12, 13.) Njengalabo bantfu, unaso yini sifiso sekufundza nekucoca ngemlandvo wencenye lesemhlabeni yenhlangano yaJehova? Njengobe uchubeka ufundza ngenhlangano yaNkulunkulu futsi ufundza ngendlela Jehova labasekela ngayo bantfu bakhe, utawati kahle neMbuso waNkulunkulu. Sifiso sakho sekushumayela tindzaba letimnandzi teMbuso waNkulunkulu sitawuvele sitikhulele.—Jer. 9:24; Luk. 4:43.

 6. Yini leyenta kube nengcondvo kutsi Jehova afune sifundze imitsetfo netimiso takhe siphindze sitigcine?

⁶ Yati imitsetfo. Bohulumende bafuna kutsi bantfu bafundze imitsetfo yalelo live futsi bayigcine. Kuyafaneleka-ke kutsi Jehova alindzele kutsi sifundze imitsetfo netimiso leticondzisa takhamuti teMbuso futsi siyigcine. (Isa. 2:3; Joh. 15:10; 1 Joh. 5:3) Imitsetfo yebantfu ivamise kuba netinkinga futsi ingalungi. Ngalokungafanani nayo, “imfundziso yaSimakadze iphelele.” (Hla. 19:7) Siyawujabulela yini umtsetfo waNkulunkulu siphindze sifundze liVi lakhe onkhe malanga? (Hla. 1:1, 2) Umtsetfo waNkulunkulu singawufundza kuphela ngekutsi sititadishele wona. Kute umuntfu longasentela loko.

TAKHAMUTI TEMBUSO TIYATITSANDZA TIMISO TANKULUNKULU

 7. Takhamuti teMbuso tiphila ngatiphi timiso?

⁷ Kute sihlale sitakhamuti teMbuso, asidzingi nje kwati timiso taNkulunkulu kodvwa kufanele sititsandze. Takhamuti letinyenti tabohulumende titsi tiyavumelana nemitsetfo netimiso telive letihlala kulo. Nobe kunjalo, natibona kutsi lowo mtsetfo awutilungeli futsi kube kute umuntfu lotibonako, tivele tiwephule. Esikhatsini lesinyenti bantfu labanjalo basuke ‘bajabulisa bantfu.’ (Khol. 3:22) Takhamuti teMbuso tiphila ngetimiso letisezingeni lelisetulu. Siyilalela ngekujabula imitsetfo yaNkulunkulu, ngisho nobe kute umuntfu losibonako. Sikwentelani loko? Kungobe siyamtsandza uMniki-mtsetfo.—Isa. 33:22; fundza Lukha 10:27.

8, 9. Ungati njani kutsi uyitsandza mbamba imitsetfo yaNkulunkulu?

⁸ Ungati njani kutsi uyitsandza mbamba imitsetfo yaNkulunkulu? Hlola indlela lowenta ngayo nawuniketwa seluleko endzabeni locabanga kutsi kufanele utikhetsele kuyo—sibonelo saloku singaba yindzaba yekugcoka nekutilungisa. Ngesikhatsi usengakabi sakhamuti seMbuso, kungenteka bowugcoka ngendlela yebudlabha nobe levusa inkhanuko. Njengobe lutsandvo lwakho ngaNkulunkulu lukhula, wafundza kugcoka ngendlela lemdvumisako. (1 Thim. 2:9, 10; 1 Phet. 3:3, 4) Kungenteka nyalo ucabanga kutsi ugcoka ngendlela lehloniphekile. Kodvwa ungatsini nangabe lomdzala welibandla angakutjela kutsi indlela logcoka ngayo iyabakhuba bamemeteli labanyenti ebandleni? Yini longayenta? Ungetama yini kutivikela, utfukutsele nobe ube nenkhani? Umtsetfo losisekelo weMbuso waNkulunkulu ukutsi tonkhe takhamuti tilingise Khristu. (1 Phet. 2:21) Mayelana nesibonelo saJesu, umphostoli Pawula wabhala: “Ngako-ke akube ngulowo ajabulise makhelwane wakhe, khona atekwakheka. Ngobe naKhristu akatijabulisanga yena.” (Rom. 15:2, 3) Kute alondvolote kuthula ebandleni, umKhristu lovutsiwe ukulungele kuyekela tintfo letitsite, akhombise kucabangela bonembeza balabanye.—Rom. 14:19-21.

⁹ Cabanga ngaletinye tintfo letimbili letibalulekile: umbono wetfu ngekuya ecasini nemshado. Labo labasengakabi takhamuti teMbuso waNkulunkulu bangabuvumela bunkonkoni, bacabange kutsi kubuka titfombe letikhombisa kungcola kumane kukutijabulisa nje futsi bacabange nekutsi kuphinga nedivosi tintfo umuntfu langatikhetsela tona. Takhamuti teMbuso setisilahlile leso simo sengcondvo lesingakacaci nesekuticabangela wena. Nanobe lamanyenti emaKhristu ake aphila imphilo yekungatiphatsi kahle, nyalo atsatsa kuya ecasini nemshado njengetipho letivela kuNkulunkulu. Ayatitsandza timiso taJehova letisezingeni lelisetulu futsi avuma ngenhlitiyo yawo yonkhe kutsi labo labachubeka nekutiphatsa lokubi akubafaneli kuba takhamuti teMbuso. (1 Khor. 6:9-11) Nobe kunjalo, ayati kutsi inhlitiyo iyayengana. (Jer. 17:9) Ngako-ke, ayakujabulela kutfola tecwayiso leticacile letiwasita kutsi agcine timiso letisezingeni lelisetulu tekutiphatsa.

TAKHAMUTI TEMBUSO TIYATIJABULELA TECWAYISO

10, 11. Ngutiphi tecwayiso letifike ngesikhatsi letikhishwa nguMbuso waNkulunkulu, futsi utiva njani ngato?

¹⁰ Bohulumende bangakhipha tecwayiso temphilo letimayelana nekudla nemitsi. Kuliciniso kutsi akusiko konkhe kudla nemitsi lokungaba yingoti. Kodvwa nangabe umkhicito lotsite ungaba yingoti, hulumende utawukhipha secwayiso lesifanele kute avikele takhamuti. Nangabe angasikhiphi lesecwayiso, lohulumende ungaba nelicala lekunganaki. Ngendlela lefananako, uMbuso waNkulunkulu ukhipha tecwayiso ngesikhatsi lesifanele letimayelana naloko lokuba yingoti ekutiphatseni nasebuhlotjeni betfu naJehova. Nasi sibonelo: I-Internet seyibe yindlela lencono yekuchumana, yekufundza kanye nekutijabulisa. Inhlangano yaNkulunkulu iyayisebentisa i-Internet futsi kunyenti lokuhle lekwentako ngayo. Nobe kunjalo, emakheli lamanyenti e-Internet angaba yingoti ekutiphatseni nasebuhlotjeni naNkulunkulu. Emakheli lanetitfombe letikhombisa kungcola angaba yingoti kakhulu ebuhlotjeni betakhamuti teMbuso naNkulunkulu. Sekungemakhulu eminyaka sisebenti lesetsembekile sisecwayisa ngemakheli lanjalo. Sibonga kakhulu ngaletecwayiso letimayelana nebuhlobo betfu naNkulunkulu.

¹¹ Kuleminyaka, sekube nalelinye likheli lelisetjentjiswa kakhulu—lingaba lusito lolukhulu nangabe lisetjentiswa ngekunaka. Nobe kunjalo, lamakheli latiwa ngekutsi tinhlelo tekuchumana letiku-Internet angaba yingoti lenkhulu. Angasenta kutsi sihlangane nebangani lababi. (1 Khor. 15:33) Akusimangalisi-ke kutsi inhlangano yaNkulunkulu ikhiphe tecwayiso letifanele mayelana nekusebentisa lawo makheli. Sewukufundzile yini konkhe kwatiswa lokushicilelwe lokuvela esisebentini lesetsembekile lokumayelana nekusebentisa tinhlelo tekuchumana letiku-Internet? Kukhombisa kungahlakaniphi kusebentisa letinhlelo ungakakufundzi lokwatiswa.a Loko bekungafanana nekunatsa umutsi lotsite ungakatifundzi tecwayiso letibhalwe kuwo.

12. Yini leyenta kube bulima kungatinaki tecwayiso?

¹² Labo labangatinaki tecwayiso letikhishwa sisebenti lesetsembekile, batilimata bona nalabo lababatsandzako. Labanye sebanemkhuba wekubuka titfombe letikhombisa kungcola nobe batiphatse kabi futsi batiyenge ngekucabanga kutsi Jehova akakuboni labakwentako. Kubulima kucabanga kutsi loko lesikwentako singakufihla kuJehova. (Taga 15:3; fundza Hebheru 4:13.) Nkulunkulu uyafuna kubasita bantfu labanjalo futsi usebentisa bameleli bakhe labasemhlabeni kute abasite. (Gal. 6:1) Nobe kunjalo, njengobe bohulumende bangamemuka buve umuntfu lowente lokutsite, naJehova uyabususa buve balabo labephula timiso takhe futsi bangaphendvuki.b (1 Khor. 5:11-13) Kodvwa-ke unemusa. Labo labaphendvukako futsi bashintje indlela yabo yekuphila bangaphindze bemukeleke kuJehova balondvolote kuba takhamuti teMbuso. (2 Khor. 2:5-8) Kulilungelo kukhonta iNkhosi lenelutsandvo lolunjalo.

TAKHAMUTI TEMBUSO TIYAKUTSANDZA KUFUNDZISWA

13. Takhamuti teMbuso tikhombisa njani kutsi tiyayijabulela imfundvo?

¹³ Bohulumende labanyenti benta lokusemandleni abo kute bafundzise takhamuti. Bahlela tikolwa letitfutfukisa kufundza nekubhala tiphindze tifundzise nemakhono emisebenti letsite. Takhamuti teMbuso tiyatijabulela letikolwa futsi tiyatimisela natifundza kufundza, kubhala nendlela yekutisekela ngetimali. Bayijabulela kakhulu imfundvo labayitfolako njengetakhamuti teMbuso waNkulunkulu. Jehova usebentisa libandla lebuKhristu kute atfutfukise kufundza nekubhala. Batali bakhutsatwa kutsi bafundzele bantfwana babo labancane. Inyanga nenyanga sisebenti lesetsembekile sishicilela emakhasi lamanyenti ekwatiswa lokusekelwe eBhayibhelini lokuku-Sicongosekulindza ne-“Phaphama!” Nangabe ufundza emakhasi lambalwa ngelilanga ngalinye enyangeni, utawukhona kuhambisana nalemfundvo yeMbuso.

14. (a) Ngukuphi kuceceshwa lesikutfolako? (b) Ngukuphi kusikisela kweKukhonta Kwemndeni kwakusihlwa lokujabulele kukusebentisa?

¹⁴ Liviki neliviki, takhamuti teMbuso titfola kuceceshwa emihlanganweni yelibandla. Sibonelo saloku Sikolwa Semsebenti WemaKhristu lesesisite bafundzi kuleminyaka lengu-60 leyendlulile kutsi babe bafundzisi labaphumelelako beliVi laNkulunkulu. Sewubhalisile yini kulesikolwa? Kuleminyaka leyendlulile sisebenti lesetsembekile besisolo sikhutsata Kukhonta Kwemndeni kwakusihlwa. Lelilungiselelo liyabucinisa bunye bemndeni. Uke wakhona yini kusebentisa lokunye kusikisela lokushicilelwe etincwadzini tetfu?c

15. Nguliphi lilungelo lelikhulu kakhulu lesinalo?

¹⁵ Takhamuti tabohulumende bebantfu tingakhombisa kusekela kwato licembu lelitsite letepolitiki ngekubamba imihlangano lemikhulu, ngisho nangekungena umuti nemuti. Takhamuti teMbuso tenta lokungetulu kwaloko ngekuwusekela ngemdlandla uMbuso waNkulunkulu etitaladini nasemtini nemuti. Ecinisweni, njengobe kushiwo esihlokweni lesendlulile, Sicongosekulindza, lesimemetela uMbuso waJehova, nyalo singumagazini losakatwa kubendlula bonkhe emhlabeni. Lilungelo lelikhulu kakhulu lesinalo kutjela bantfu ngeMbuso waNkulunkulu. Uwenta ngemdlandla yini umsebenti wekushumayela?—Mat. 28:19, 20.

16. Ungakhombisa njani kutsi usakhamuti lesikahle seMbuso waNkulunkulu?

¹⁶ Sekusedvutane kutsi uMbuso waNkulunkulu ube nguwo kuphela hulumende lobusa umhlaba. Utawucondzisa tonkhe tincenye tekuphila tamalanga onkhe, hhayi nje letimayelana nekukhonta Nkulunkulu kuphela kodvwa naletinye tintfo ekuphileni. Utawuba sakhamuti lesikahle yini seMbuso waNkulunkulu ngaleso sikhatsi? Nyalo sikhatsi sekukhombisa kutsi utawuba ngiso. Kuto tonkhe tincumo lotenta lilanga nelilanga, yenta tonkhe tintfo kute udvumise Jehova futsi ngaloko ukhombise kutsi uyachubeka usakhamuti lesikahle seMbuso waNkulunkulu.—1 Khor. 10:31.

[Imibhalo lengentansi]

[Emavi lacashuniwe lasekhasini 14]

Uyatilalela yini tecwayiso letisekelwe eBhayibhelini letimayelana ne-Internet?

[Sitfombe ekhasini 12]

Njengemadvodzana aKhora, uyakujabulela yini kukhonta kweliciniso nemlandvo wako?

[Sitfombe ekhasini 15]

Kukhonta Kwemndeni kwakusihlwa kungasita wena nalabo lobatsandzako kutsi nibe takhamuti teMbuso letikahle