Umusa Ubalulekile KuNkulunkulu

LIJAHA laseJapane latsintseka ngekuba nemusa kwalomunye mkhulu. Lomkhulu lositfunywa selivangeli lobekanesikhashana afikile kulelive lase-Asia bekangasati kahle siJapane. Nome kunjalo, liviki ngalinye bekavakashela lelijaha kuze acoce nalo ngeliBhayibheli. Ngemusa, ngekumamatseka nangenhlonipho, lomkhulu bekaphendvula imibuto leminyenti yalelijaha lebelinesifiso sekwati.

Umusa walesitfunywa selivangeli lesesikhulile walitsintsa lelijaha. Lelijaha latsi ‘nangabe liBhayibheli lenta umuntfu abe nemusa nelutsandvo, loko kusho nami kufanele ngilifundze.’ Loko kwalikhutsata kutsi lifundze liBhayibheli intfo lebelingakase licabange kuyenta. Kuliciniso kutsi umusa utsintsa inhlitiyo kwendlula emavi.

Usimilo SaNkulunkulu

Kuyatentakalela kutsi sibe nemusa kubantfu lesihlobene nabo ngobe umusa usho kuvana kwetihlobo.a Nanobe kunjalo, umusa uvela kuNkulunkulu. Jesu watsi Babe wakhe losezulwini unemusa hhayi kuphela kulabatsandza Nkulunkulu kodvwa ‘nakulabangabongi.’ Jesu wakhutsata balandzeli bakhe kutsi balingise Nkulunkulu nakatsi “banini ngulabaphelele njengobe neYihlo losezulwini aphelele.”—Lukha 6:35; Matewu 5:48; Eksodusi 34:6.

Bantfu badalwa ngemfanekiso waNkulunkulu futsi banelikhono lekukhombisa labanye umusa. (Genesisi 1:27) Kuliciniso kutsi singamlingisa Nkulunkulu futsi sibe nemusa ngisho nakubantfu lesingakahlobani nabo. LiBhayibheli lichaza umusa njengesitselo semoya longcwele waNkulunkulu. (Galathiya 5:22) Ngaleso sizatfu, umusa ungatfutfukiswa noma ukhule nasichubeka sifundza ngaNkulunkulu longuMdali futsi sisondzele kuye.

Njengobe umusa uyincenye yesimilo setfu uphindze utsandvwa nguNkulunkulu, kunengcondvo kusikhutsata kwaNkulunkulu kutsi ‘siphatsane ngebumnene.’ (Efesu 4:32) Siyakhunjutwa kutsi ‘singakhohlwa kungenisa tihambi’ nome “kuba nemusa kubafokati.”—Hebheru 13:2.

Kulelive lalamuhla lelite umusa futsi lelingabongi, kungenteka yini kutsi sibe nemusa kulabanye ngisho nakubafokati? Yini lengasisita kuze sibe nemusa? Kungani kufanele sibe nemusa?

Umusa Ubalulekile KuNkulunkulu

Ngemuva kwekutsi Umphostoli Pawula akhulume ngesidzingo sekuba nemusa kubafokati wachubeka watsi: “Labanye ngekwenta njalo bangenisa tingilosi bangaketeleli.” Awucabange kutsi ungativa njani nawunganiketwa litfuba lekwemukela tingilosi. Pawula wasebentisa ligama lelitsi “bangaketeleli.” Ngalamanye emagama, Pawula bekatsi nasinemkhuba wekuba nemusa kulabanye lokufaka ekhatsi bafokati singase sivuzwe singakalindzeli.

Emahumusho lamanyenti eliBhayibheli ahlobanisa emavi aPawula nekulandzisa lokumayelana na-Abrahama naLoti lokuku-Genesisi sehluko 18 na 19. Kuko kokubili lokulandzisa sifundza ngetingilosi letafika kubo njengebafokati tiphetse umlayeto lobalulekile. Endzabeni ya-Abrahama lomlayeto bewumayelana nekugcwaliseka kwesetsembiso saNkulunkulu ngendvodzana kantsi endzabeni yaLoti bewumayelana nekukhululwa ekubhujisweni lebekutawehlela emadolobha, iSodoma neGomora.—Genesisi 18:1-10; 19:1-3, 15-17.

Nawufundza lemibhalo lokusandza kukhulunywa ngayo utawubona kutsi Abrahama naLoti baba nemusa kubafokati. Kuliciniso kutsi ngetikhatsi teliBhayibheli kungenisa tihambi lokungaba bangani, tihlobo nobe bafokati bekungumkhuba nemhambo lovamile. Umtsetfo Nkulunkulu lawuniketa Mosi bewutsi ema-Israyeli akukafaneli angatinaki tidzingo tebafokati labaseveni lema-Israyeli. (Dutheronomi 10:17-19) Nanome kungenisa tihambi bekuvamile ngaleso sikhatsi, bo-Abrahama naLoti benta lokungetulu kwaloko lokwagcina sekungumtsetfo. Benta imetamo kuze babe nemusa kubafokati futsi babusiswa ngekungenisa kwabo tihambi.

Umusa wa-Abrahama awuletselanga yena kuphela tibusiso ngekutfola kwakhe indvodzana kodvwa waletsela natsi. Loko kwenteka ngayiphi indlela? Abrahama kanye nendvodzana yakhe Isaka baba nendzima lebalulekile ekugcwalisekeni kwenjongo yaNkulunkulu. Baba seluhlwini lwebantfu lokwavela ngabo Jesu longuMesiya. Imphilo yabo yekwetsembeka beyimelela indlela Nkulunkulu lebekatosindzisa ngayo bantfu ngenca yelutsandvo nemusa wakhe.—Genesisi 22:1-18; Matewu 1:1, 2; Johane 3:16.

Lokulandzisa kuveta loko Nkulunkulu lakulindzele kubantfu labatsandzako nendlela lakutsatsa njengalokubaluleke ngayo kuba nemusa. KuNkulunkulu kuba nemusa akuyi ngekutsi uyatsandza yini kuba nawo nome cha kodvwa kubalulekile.

Kuba Nemusa Kusisita Kutsi Simati Kahle Nkulunkulu

LiBhayibheli litsi kulesikhatsi lesiphila kuso bantfu labanyenti bayawuba ‘ngulabangabongi, babete bungcwele, babete lutsandvo.’ (2 Thimothi 3:1-3) Akungatjatwa kutsi uphila nebantfu labanjalo malanga onkhe. Nome kunjalo, asikho sizatfu sekutsi singabi nemusa kwasanhlobo kulabanye bantfu. Naku emaKhristu lakhunjutwa kona: “Ningabuyiseli kunobe ngubani lokubi ngalokubi, kodvwa yentani lokubonakala kukuhle emehlweni abo bonkhe bantfu.”—Roma 12:17.

Singenta konkhe lokusemandleni etfu kuze sikhombise labanye umusa ngekubapha. LiBhayibheli litsi: “Wonkhe umuntfu lonelutsandvo . . . uyamati Nkulunkulu.” Lenye indlela lesingakhombisa ngayo kutsi sinelutsandvo kuba nemusa kulabanye. (1 Johane 4:7; 1 Khorinte 13:4) Kuliciniso kutsi kuba nemusa kulabanye kusho kutsi siyamati Nkulunkulu futsi loko kusenta sijabule. Enshumayelweni yakhe yaseNtsabeni Jesu watsi: “Babusisiwe labanesihawu, ngobe bayawuhawukelwa. Babusisiwe labahlantekile enhlitiyweni, ngobe bayawumbona Nkulunkulu.”—Matewu 5:7, 8.

Ase ucabange nganasi sibonelo sa-Aki longumake losemusha waseJapane lonemadvodzana lamabili. Ngemuva kwekushonelwa ngunina ngekutumeka lokukhulu, wacindzeteleka kakhulu. Ngaletinye tikhatsi bekeva buhlungu kangangekutsi bekuze kudzingeke aye kudokotela. Kulawo malanga, kwefika lomunye umndeni wahlala eceleni kwakakhe. Lomndeni bewusandza kushonelwa ngubabe wakhona engotini futsi lomake bese kufanele akhulise bantfwana labasihlanu labasesebancane ayedvwa. Aki wabevela buhlungu kulelikhaya futsi wenta imetamo kuze akhe bungani nalomake nebantfwabakhe. Abenta konkhe langakwenta kuze abasite. Abebanika kudla, timphahla nalokunye, lokwamenta welulama ekucindzetelekeni kwakhe. Wakubona kuba liciniso kwemavi eliBhayibheli latsi: “Kubusisiwe kupha kunekwemukela.” (Imisebenti 20:35) Kuliciniso kutsi kuba nemusa kulabanye kungaba yintfo lenhle longatentela yona nawutiva unemoya lophansi.

“Uboleka Simakadze”

Akudzingeki kutsi ube nemali kuze ube nemusa kulabanye futsi akuyi ngemakhono nome tintfo lokwati kutenta. Kumomotseka, kusho emavi lamnandzi, kusita, sipho lesincane, nome kuvulela labanye kutsi bangene kucala elayinini kungasho lukhulu. Nangabe ungaciniseki ngalongakusho nobe longakwenta esimeni lesitsite, shano emavi nome ukhombise kuba nemusa. Lijaha lokukhulunywe ngalo ekucaleni kwalesihloko latsintfwa ngumusa walesitfunywa selivangeli lesesikhulile. Lowo musa washo lukhulu kwendlula emavi aso. Kungako Nkulunkulu atsi tikhonti takhe kufanele ‘tiphatsane ngemusa.’—Mikha 6:8.

Sisho saseJapane sitsi kukhuluma ngemusa kunemiphumela lemihle. Njengobe kuvetwe kahle kulesisho, umusa lomncane nje ungenta lukhulu. Nawuvetwe ngetinhloso letinhle futsi uhambisana nelutsandvo ngaNkulunkulu, ungajabulisa bonkhe labakhonjiswe wona. Ngisho nobe labanye bangakubongi ngemusa lonawo, loko akusho kutsi utsele emanti emhlane welidada. Umusa uligugu kuNkulunkulu. LiBhayibheli lisitjela kutsi nangabe sinemusa kulabanye sisuke ‘siboleka Simakadze.’ (Taga 19:17) Kungaba njani nawe utifunele ematfuba ekukhombisa umusa kubantfu lophila nabo?

[Umbhalo longentansi]

[Emavi lacashuniwe lasekhasini 20]

Nangabe ungaciniseki kutsi yini longayenta nobe uyisho, yenta sento semusa nobe usho emavi lanemusa

[Sitfombe ekhasini 19]

Abrahama wabusiswa ngekuba nemusa

[Sitfombe ekhasini 20]

Kuba nemusa kulabanye kufana ‘nekuboleka Simakadze’