Caphela Tifiso Tenhlitiyo

ImiBhalo iyasecwayisa: “Ngobe enhlitiyweni kuvela imicabango lemibi, nekubulala, nekuphinga, nebugwadla, nekuba, nekucalemanga, nekuhlambalata.” (Mat. 15:19) Inhlitiyo yetfu lengumfanekiso ingasidukisa futsi isente sititsetselele ngekwenta tintfo ngendlela lephambene nentsandvo yaNkulunkulu. Kungenteka nekutsi singanaki kutsi kwentekani kuze kube ngulapho sesente intfo lembi. Yini lengasisita kutsi sibone tifiso tenhlitiyo yetfu ngembikwekutsi sente tintfo letimbi?

Fundza liBhayibheli onkhe malanga futsi uzindle ngaloko lelikushoko.

Umphostoli Pawula wabhala watsi: “Livi laNkulunkulu liphilile, linemandla; likhalipha kwengca inkemba lesika ngetinhlangotsi totimbili. Lisika lidzimate lehlukanise umphefumulo nemoya.” Umlayeto waNkulunkulu lotfolakala eBhayibhelini uyakhona ‘kwehlulela imicabango netifiso tenhlitiyo.’ (Heb. 4:12) Kubuka loko lokushiwo ngimiBhalo ngatsi kungaba lusito ekuboneni tifiso tenhlitiyo. Kubaluleke kakhulu kutsi silifundze onkhe malanga liVi laNkulunkulu futsi sizindle ngaloko lelikushoko, kute sikhone kwati imicabango nemibono yaJehova.

Kwemukela ticondziso temiBhalo nekusebentisa timiso teliBhayibheli kungabatsintsa bonembeza betfu—umuntfu wangekhatsi ‘losifakazelako.’ (Rom. 9:1) Livi labonembeza betfu lingakhona kusivimbela singatitsetseleli nasente intfo lembi. Ngetulu kwaloko, liBhayibheli linetibonelo letingaba “njengesecwayiso kitsi.” (1 Khor. 10:11) Kufundza kuletibonelo kungasenta singatitsatsi tinyatselo tekwenta lokubi. Yini ngamunye wetfu lokufanele ayente?

Thantaza kuNkulunkulu kute akusite ubone tifiso tenhlitiyo yakho.

Jehova “uvivinya inhlitiyo.” (1 Khr. 29:17) Nkulunkulu ‘mkhulu kunenhlitiyo yetfu, futsi wati konkhe.’ (1 Joh. 3:20) Angeke size simyenge. Nangabe sithantaza simtjela ngetintfo letisikhatsatako, ngendlela lesitiva ngayo nangetifiso lesinato, Jehova angasisita sitati tifiso tenhlitiyo yetfu. Singaphindze simcele Nkulunkulu kutsi ‘adale inhlitiyo lehlantekile kitsi.’ (Hla. 51:10) Ngako-ke, kute sibone tintfo letitsandvwa yinhlitiyo yetfu, kubalulekile kuthantaza.

Lalelisisa emihlanganweni yebuKhristu.

Kukulalelisisa loko lokushiwo emihlanganweni yebuKhristu kungasisita kutsi sihlolisise umuntfu wangekhatsi—inhlitiyo yetfu. Ngisho nobe kungenteka kutsi asitfoli kwatiswa lokusha ngaso sonkhe sikhatsi emihlanganweni yetfu, nasiba khona sitfola kucondza lokwengetiwe kwetimiso teliBhayibheli kanye netikhumbuto letibalulekile letingasisita sihlole tifiso tenhlitiyo. Timphendvulo tebazalwane nabodzadze nato tibalulekile ekwenteni umuntfu wangekhatsi abe ncono. (Taga 27:17) Kungaba yingoti kutehlukanisa esikhundleni sekutsi sijabulele budlelwane lesibutfola emihlanganweni yebuKhristu. Kungasenta ‘sitatise tsine.’ (Taga 18:1) Ngako-ke, kukuhlakanipha kutibuta kutsi: ‘Ngikwetayele yini kuba khona kuyo yonkhe imihlangano nekuzuza kuyo?’—Heb. 10:24, 25.

Inhlitiyo yetfu lesiyengako ingasidukisa eticini letinyenti tekuphila. Ase sicoce ngaletine tato: kuphishanekela umcebo, kunatsa tjwala, bangani lesibakhetsako naloko lesikwentako kute sitijabulise.

Kuphishanekela umcebo.

Kuyimvelo kufisa kwenetisa tidzingo tetfu tekuphila. Nobe kunjalo, Jesu waniketa sibonelo lesisecwayiso mayelana nekukhatsateka kakhulu ngemcebo. Kulomunye umfanekiso wakhe, Jesu usimema kutsi sicabange ngendzaba yendvodza lebeyinjingile futsi tinyango tayo setigcwele. Ngaleso sizatfu, beseyite indzawo yekugcina lesinye sivuno sayo. Lendvodza beyifuna kubhidlita letinyango letindzala bese yakha letinye letinkhulu. Naku lebeyikucabanga: “Lapho ngitawugcina khona sonkhe sivuno netimphahla tami, bese ngikhuluma ngedvwana ngitsi: ‘Cha, senginetimphahla lengitibekele tona teminyaka leminyenti; angikhululeke, ngidle, nginatse, ngijabule!’” Nobe kunjalo, lendvodza lenjingile yehluleka kunaka leliciniso lelibalulekile: Kuphila kwayo bekungaphela ngabo lobo busuku.—Luk. 12:16-20.

Njengobe sikhula, kungenteka sikhatsateke kakhulu ngekwetama kutihlelela kulondzeka etindzabeni tetimali size sicale kutitsetselela nasisebenta sikhatsi lesengetiwe ngebusuku bemihlangano nobe nasicala kungayinaki imisebenti yetfu yebuKhristu. Akukafaneli yini sikucaphele kuba nesifiso lesinjalo? Nobe kungenteka kutsi sisesebasha ngeminyaka futsi siyabona kutsi umsebenti loncono kakhulu kushumayela sikhatsi sonkhe. Nobe kunjalo, siyakuhlehlisa yini kuba ngemahlahlandlela, sicabange kutsi kufanele sicale ngekuba nemali? Akukafaneli yini sente lokusemandleni etfu nyalo kute sicebe kuNkulunkulu? Ngubani lowatiko kutsi sitawube sisaphila yini kusasa?

Kunatsa tjwala.

Taga 23:20 titsi: “Ungabi ngumngani wetidzakwa.” Nangabe umuntfu anesifiso lesikhulu sekunatsa tjwala, angase atitsetselele ngekwetayela kubunatsa. Kungenteka atsi unatsa ngobe afuna kuphumula, hhayi kutsi ufuna kudzakwa. Nangabe sidzinga tjwala kute siphumule, kungenteka kutsi kufanele sitihlolisise ngekwetsembeka tifiso tenhlitiyo yetfu.

Bangani lesibakhetsako.

Kuliciniso kutsi esikolweni, emsebentini nanasishumayela, siyahlangana nebantfu labangakholwa. Nobe kunjalo, loko kwehlukile kunekucitsa sikhatsi nabo, uze wakhe nebungani lobusedvute nabo. Siyatitsetselela yini ngebungani lobunjalo ngekutsi sitsi banebuntfu lobuhle? LiBhayibheli liyasecwayisa: “Ningayengeki: Bangani lababi bonakalisa similo lesihle.” (1 Khor. 15:33) Njengobe butsi lobuncane bungawangcolisa emanti lahlobile, bungani nebantfu labete kutinikela kuNkulunkulu, bungabungcolisa buhlobo betfu naNkulunkulu futsi busente semukele imibono yelive ngekwembatsa, kukhuluma nekutiphatsa.

Loko lesitijabulisa ngako.

Bucwepheshe balamuhla benta kutsi sititfole kalula tinhlobo letehlukehlukene tekutijabulisa, letinyenti tato letingamfaneli umKhristu. Pawula wabhala watsi: ‘Kepha konkhe kungcola akungaphatfwa ngisho nangeligama emkhatsini wenu.’ (Ef. 5:3) Kutsiwani nangabe inhlitiyo yetfu ifisa kubukela nobe kulalela tintfo letingcolile? Kungenteka sitsi wonkhe umuntfu uyakudzinga kuphumula nekutijabulisa lokutsite, futsi angatikhetsela nobe yini. Kodvwa tsine asisebentise seluleko saPawula futsi singavumeli tintfo letingcolile tibonwe ngemehlo etfu.

Nangabe besilalela loko lokutsandvwa yinhlitiyo lesiyengako futsi sesetayele kutitsetselela nasente lokubi, sisengatenta tingucuko. (Ef. 4:22-24) Cabanga ngetibonelo letimbili talamuhla.

Miguela bekudzingeka alungise kucabanga kwakhe endzabeni yemcebo. Utsi: “Mine nemkami nendvodzana yetfu, sisuka eveni lelikutsatsa njengalokubalulekile kuba netintfo tesimanjemanje netebucwepheshe. Ngike ngatinikela ekutfoleni tonkhe tintfo letikhona emhlabeni, ngicabanga kutsi loko ngingakwenta ngaphandle kwekutsi ngize ngitsandze umcebo. Ngasheshe ngabona kutsi kuphishanekela umcebo akupheli. Ngathantaza kuJehova mayelana nembono wami netifiso tenhlitiyo yami. Ngamtjela kutsi mine nemndeni wami sifuna kumkhonta sikhatsi sonkhe. Sakhona kwenta sincumo sekwenta kuphila kwetfu kube melula futsi satfutsela endzaweni lenesidzingo lesikhulu sebamemeteli. Masinyane ngemuva kwaloko, sakhona kuba ngemahlahlandlela. Sesibonile kutsi asidzingi tintfo letinyenti kute sibe nekuphila lokwenetisako nalokujabulisako.”

Sibonelo saLee sikhombisa kutsi kutihlola ngebucotfo kwamsita wehlukana nebangani lababi. Lee utsi: “Umsebenti wami bowungenta ngitihlanganise njalo nebatsengisi bakulamanye emave. Bengati kutsi kuleyo mihlangano batawudzakwa, kodvwa bengikujabulela kuya kuyo. Etikhatsini letinyenti bengicishe ngidzakwe, kodvwa bengitisola ngemuva kwaloko. Bekudzingeka kutsi ngiyihlolisise ngebucotfo inhlitiyo yami. Seluleko seliVi laNkulunkulu nelusito lwalabadzala, kwangisita ngabona kutsi ecinisweni bengakha bungani nebantfu labangamtsandzi Jehova. Nyalo sengenta libhizinisi lami ngelucingo futsi angisahlangani kanyenti nalabo batsengisi.”

Kudzingeka sitihlole ngekwetsembeka futsi sitibone tifiso tenhlitiyo yetfu. Njengobe senta njalo, kufanele sicele lusito kuJehova ngemthantazo, sikhumbula kutsi “wati timfihlo tenhlitiyo.” (Hla. 44:21) Nkulunkulu uphindze asinike liVi lakhe, leliba sibuko kitsi. (Jak. 1:22-25) Tikhumbuto neteluleko lesititfola etincwadzini tebuKhristu nasemihlanganweni yetfu, nato tibalulekile. Njengobe sinalamalungiselelo, singakhona kuvikela inhlitiyo yetfu futsi sichubeke sihamba etindleleni tekulunga.